Лука 14
14
(Мт 23:37-39)
Иисүүс үбшэнтэниие эдэгээбэ
1Субботодо фарисейнүүдэй хүндэтэй нэгэ даргында хоол барихаяа Иисүүсэй ерэхэдэ, фарисейнүүд хойноһоонь ажаглан хаража һуубад. 2Нэгэ хабадашаһан хүл гартай хүн орожо, урдань зогсобо. 3Хуули заадаг багшанарта болон фарисейнүүдтэ Иисүүс хандажа:
– Манай Хуулиин ёһоор субботодо хүниие аргалжа болохо бэлэй гү, али үгы гү? – гэжэ асууба. 4Тэдэнэр абяа гарабагүй. Иисүүс үбшэнтэниие гараараа хүрөөд, эдэгээжэрхибэ.
5– Танай хэнтнай хүбүүнэйгээ гү, али сарайгаа худаг руу унашабалынь, субботошье һаань, тэрэ дороо татажа гаргахагүйб? – гэжэ Иисүүс тэдээндэ хэлэбэ. 6Тэдэнь тороод, юуншье гэжэ хэлэжэ шадабагүй.
Даруу номгон байха, айлшадые угтажа абаха тухай
7Уряалаар ерэһэн хүнүүдэй дээгүүр һуурида һуухыень хараад, Иисүүс иимэ һургаалта үгэ хөөрэбэ:
8– Шамайе хэн нэгэнэй түрэ найрта урихада, дан дээгүүр гаража бү һуу, юундэб гэхэдэ, уряалаар ерэһэн хүнүүдэй дунда шамһаа хүндэтэй хүн байжа болохо. 9Тиигээд шамайе болон тэрэ хүниие уриһан гэрэй эзэн ерээд: «Энэ һуурида тэрэниие һуулгыш даа», – гэхэдээ болохо. Тиихэдэнь ши аягүйрхэһөөр адагай захын һуурида ошожо һуухаш. 10Уряалаар ошоходоо, эгээн һүүлшын һуурида һуудаг байгаарай. Тиихэдэшни шамайе уриһан эзэн хараад: «Хани нүхэрни, дээшээ гаража һуу», – гэжэ урихадань, найрай зоной дунда ехэ хүндэтэй хүн гэжэ мэдэгдэхэш. 11Ушарынь юуб гэхэдэ, өөрыгөө дээгүүр абхуулһан хүн доошоо даруулагдаха, харин даруу доогуур хүн дээшээ үргэгдэхэ бшуу.
12Гэртээ уриһан фарисейдэ Иисүүс иигэжэ хэлэбэ:
– Үдын гү, али үдэшын хоол бэлдээд, хани нүхэдөө, аха дүүнэрээ, түрэл саданараа, баян хүршэнэрөө бү ури. Юуб гэхэдэ, тэдэшни хожомынь шамайгаа урижа, харюу үгэхэ болоно. 13Зүгөөр найрай шэрээ татахадаа, үгытэйшүүлые, үбшэн үлбэр, һохор дохолон хүнүүдые ури. 14Тэдэ ядуу зон ашыеш харюулжа шадахагүй. Гэбэшье Бурхан шамда буян хэшэгээ хайрлаха, тиигээд захяа заабарииень дүүргэжэ ябадаг хүнүүдээ амидыруулхадаа, шамайе шагналда хүртөөхэл.
Найрай шэрээ тухай һургаалта үгэ
15Сугтаа хоол барижа байһан нэгэ хүн Иисүүсэй хөөрэжэ байһые дуулаад:
– Бурханай хаан орондо хоол бариха хүнүүд аза жаргалтай! – гэжэ хэлэбэ. 16Иисүүс тэрээндэ хэлэбэ:
– Нэгэ хүн аргагүй томо найрай шэрээ заһаад, олон айлшадые уриба ха. 17Шэрээдэ һууха сагай ерэхэдэ, уриһан айлшадтаа барлагаа эльгээжэ, «Хоол бэлэн болоо, морилжо хайрлагты», – гэжэ захюулба гэхэ. 18Урилгатай хүнүүдынь булта хоорондоо хэлсэһэн юумэндэл, ерэхэ аргагүй байһандаа хүлисэл гуйжа: «Би газар худалдажа абаад, тэрэнээ ошожо хараагүйдэм аргагүй. Намайе хүлисэхыетнай гуйнаб», – гэжэ нэгэниинь захюулба. 19«Би табан паара сар худалдажа абаад, тэдэнээ ажаллуулжа туршахам, намайе хүлисэжэ хайрла», – гэжэ нүгөөдэхинь захюулба. 20«Би һаял һамга абабаб, тиимэһээ ошожо шадахагүй байнаб», – гэжэ гурбадахинь захюулба. 21Барлагынь ерэхэдээ, айлшадай ерэхэ аргагүй байһан тухай эзэндээ дуулгаба. Тиихэдэнь сухалаа хүрэһэн эзэн: «Түргэхэн хотын гудамжада гараад, үгытэйшүүлые, эрэмдэг үбшэнтэниие, һохор дохолон зониие дуудажа асара», – гэжэ барлагтаа хэлэбэ. 22«Эзэмни, хэлэһэн ёһоортнай хамаг юумэ хэбэб, теэд үшөөшье олон һуури сүлөө байна», – гэжэ барлагынь хэлэбэ. 23«Ши хотоһоо гараад, харгыгаар ябаһан, хото хорёондоо байһан хүнүүдые аргадажа, гэрэймни дүүрэтэр зониие абажа ерэ. 24Уряалтай байһан хүнүүдэй хэнииньшье манайда хоол барихагүй!» – гэжэ эзэниинь барлагтаа хэлэбэ.
Иисүүсэй шаби болохын үнэ сэн
25Иисүүстэй хамта олон хүн ябаа һэн. Иисүүс тэдэ зондо хандажа, иигэжэ хэлэбэ:
26– Намда ерэһэн хүнүүд эхэ эсэгэһээ, һамга үхибүүдһээ, аха дүүнэрһээ, ами наһанһаа үлүү ехээр лэ Намда дуратай һаа, шабинарни болохо аргатай. 27Хэрээһээ үргэлөөд#14:27 Зоболон туйлахадашье, үхэлэй саазада хүртэхэдэшье бэлэн байха гэһэн удхатай., Намтай ябалсаагүй хүн Минии шаби боложо шадахагүй. 28Жэшээнь, таанадай хэн нэгэн үндэр гэр бариха һанаатай байбал, түрүүн һуугаад, хэды шэнээн гаргаша гаргахаб гэжэ тооложо үзөөд, барилгаяа дүүргэжэ шадаха үгы байһанаа бодогты. 29Тиигээгүй һаа, һуурииень табяад, самхагаа саашань барижа дүүргэхэ шадалгүй байхыетнай зон хараад: 30«Шимнай барилга эхилээд, дүүргэжэ шадахагүй хүн байбалши», – гэжэ энеэдэ наадан болгохо бшуу. 31Үгышье һаа, нэгэ хаан нүгөөдэ хаанда дайгаар орохынгоо урда тээ арбан мянган сэрэгтэйгээ добтолоо һаа, хори мянган сэрэгтэй дайсаниие диилэхэ гүб гэжэ уридшалан һуужа һайн бодохо бэшэ гү? 32Хэрбээ диилэжэ шадахагүйгөө ойлгоо һаа, нүгөөдэдөө өөрынгөө элшэн һайдуудые эльгээжэ, эб найрамдал тухай гуйха болоно бшуу. 33Энэ мэтээр таанадай хэнтнайшье бии байһан хамаг юумэнһээ арсаагүй һаа, Минии шаби боложо шадахагүй.
Хэрэггүй дабһан
34Дабһан болбол һайн юумэн гээшэ, зүгөөр дабһанай амтаяа гээгээ һаань, яажа дахин гашуун болгохобта? 35Тиимэ дабһан хэндэшье хэрэггүйл, угайдхадаа тэрээгээр газараашье үтэгжүүлхэгүйлши. Тэрэниие миил хаяжархихал! Шэхэтэй юм һаа, анхаран шагныта!
Currently Selected:
Лука 14: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
