Лука 15
15
(Мт 18:12-14)
1Нэгэтэ Иисүүсэй һургаалыень шагнахаяа алба татаашад болон нүгэлтэн олоороо ерэбэ.
2– Иисүүс нүгэлтэнтэй нүхэрлэжэ, тэдэнээр хамта эдеэлжэ байна, – гэжэ фарисейнүүд болон Хуули заадаг багшанар шоо үзэбэд. 3Тиимэһээ Иисүүс тэдэндэ нэгэ иимэ һургаалта үгэ хөөрэжэ үгэбэ:
4– Зуун хонитой аад, нэгэнэйнь үгы болошоходо, таанадай хэнтнай ерэн юһэн хониёо хээрэ орхёод, үгы болоһон ганса хониёо бэдэржэ ошохогүйб? 5Тэрээнээ олоходоо, тон ехээр баярлажа, ара нюргандаа үргэлөөд, гэртээ асархат. 6Тиин хани нүхэдөө, хүршэнэрөө суглуулаад: «Намтай хамта баярлагты. Би үгы болоһон хониёо оложо асарбаб!» – гэжэ хэлэхэлта. 7Тэрээн шэнги нүгэл хээгүй ерэ юһэн сэхэ сэбэр ябадалтан тушаа бэшэ, харин нүгэл хэгшэ нэгэ хүнэй Бурханда хандан, эрид хубилхые харахадаа, тэнгэридэ баяр баясхалан болохол гэжэ таанарта үнэниие хэлэнэб.
Үгы болоһон мүнгэн
8Үгышье һаа, арбан сагаан мүнгэтэй нэгэ эхэнэр ганса сагаан мүнгэеэ үгы болгожорхёо һаа, дэнгээ носоожо, гэрээ хамажа, ехэл нарибшалан бэдэржэ олодог бэшэ аал? 9Мүнгэеэ олоһон эхэнэр хани басагадаа, хүршэ эхэнэрнүүдээ суглуулжа: «Намтай баярлалсагты, би үгы болоһон мүнгэеэ олооб», – гэжэ хэлэхэл. 10Эгээл энээн шэнги нэгэшье хүнэй Бурханда хандабал, Бурханай Эльгээмэлнүүд баярлаха юм.
Төөриһэн хүбүүн
11Иисүүс саашань хэлэбэ:
– Хоёр хүбүүтэй нэгэ хүн байгаа һэн ха. 12«Аба, минии хубита зөөри намда үгыт», – гэжэ бага хүбүүниинь эсэгэдээ хэлэбэ гэлэй. Эсэгэнь гэр буусаяа хүбүүдтээ хубааба. 13Нэгэ хэды хоноод, бага хүбүүниинь хубита зөөриеэ абаад, холын газарта ошожо, ехээр һэбхиржэ, зөөриеэ үрижэрхибэ. 14Зөөригүй болоод байхадань, тэрэ хари газартань ехэ үлэсхэлэн зуд боложо, үнөөхи хүбүүн ядарба. 15Тиигээд тэрэ ороной нэгэ хүнэйдэ ажалда ороходонь, гэрэй эзэн тэрэниие гахайгаа адуулуулхаар хээрэ тала руу эльгээгээ бэлэй. 16Гахайн эдеэ эдилсэжэ, гэдэһээ дүүргэхэ дуратай байхадань, тиимэшье эдеэ тэрээндэ хүн үгэдэггүй бэлэй. 17Хүбүүн ухаа орожо, досоогоо бодобо: «Түрэһэн эсэгымни хэды олон зарасанарай элбэг дэлбэг эдеэ хоолтой байхадань, би эндэ туража үхэхэеэ байнаб. 18Эсэгэдээ ошоод: „Абамни, би Бурханай, мүн танайнгаа урда нүгэл үргэлбэб. 19Танай хүбүүн гэжэ нэрлэгдэхээр бэшэ муу амитанби. Зарасаяа зараһандаал намайе зарагты“, – гээд хэлэхэб». 20Тиигээд тэрэ хүбүүн удангүй эсэгэдээ бусажа ерэбэ. Эсэгэнь хүбүүгээ холоһоо хараад хайрлажа, урдаһаань гүйжэ ошоод, тэбэрин таалаба. 21«Абамни, би Бурханай, мүн танайгаа урда нүгэл үргэлбэб. Хүбүүнтнай гэжэ тоологдохо эрхэгүйб», – гэжэ хүбүүниинь хэлэбэ. 22Эсэгэнь барлагуудтаа: «Түргэхэн эгээ һайн хубсаһа асараад, хүбүүндэм үмдэхүүлэгты, хургандань үнэтэ шулуутай бэһэлиг зүүлгэгты, хүлдэнь гутал үмдэхүүлэгты. 23Тиигээд шахамал буруу асаржа гаргагты, найрлаха хүхихэбди. 24Энэ хүбүүмни үхэшэһэн аад, амидыраа ха юм, үгы болошоһон аад, олдоо ха юм», – гэбэ. Тиигээд лэ хүбүүнэйнгээ бусажа ерэһые тэмдэглэн, хүхижэ сэнгэжэ эхилбэ. 25Тэрэ үедэ ехэ хүбүүниинь хээрэ ажал хэжэ байгаа. Гэртээ бусажа ерэхэдээ, хүгжэм хатарай хүнхинэжэ байхые дуулаба. 26Тиигээд нэгэ зарасаяа дуудажа: «Энэмнай юун боложо байнаб?» – гэжэ һураба. 27«Дүү хүбүүнтнай бусажа ерээ, тиимэһээ эсэгэтнай хүбүүнэйнгээ амиды мэндэ ерэһэндэ баярлан, шахамал буруугаа гаргаа», – гэжэ зарасань харюусаба. 28Ахань сухалаа хүрэжэ, гэртээ оробогүй. Эсэгэнь гаража, тэрэнээ аргадаба. 29Ехэ хүбүүниинь эсэгэдээ иигэбэ: «Би хэды олон жэл танда барлаг шэнги ажал хээ гээшэбиб, захяа заабариһаатнай нэгэтэш гаража үзөөгүйб. Та адагай захын эшэгэшье гаргажа, хани нүхэдөөрни найрлуулаагүйт. 30Харин энэ хүбүүнэйнгээ янхан һамгадаар орёолдожо, үгэһэн зөөрииетнай үреэд ерэхэдэнь, та шахамал буруугаа гаргажа угтаат».
31Тиихэдэнь эсэгэнь ехэ хүбүүндээ хэлэбэ: «Хүбүүмни, ши ходо намтаяа эндээ байна ха юмши, минии бүхы зөөри шинии ха юм. 32Харин дүү хүбүүншни үхэһэн аад, амидыржа, үгы болоһон аад, олдожо ерээ бшуу. Тиимэһээ бидэ баярлаха, сэнгэхэ ёһотойбди».
Currently Selected:
Лука 15: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
