Yohanes 8
8
1Tapi Yesus tulak hia lungkuh Jaitun.
2Nyuap ondoeh, ngonyua-nyua lau, Are tulak kole hia Lopo Mohotara. Orong dulun dombut hia-Eh. Paluh, Yesus tuot hintang majar iroh. 3Hiah waktu cioh, dombutbat kawan guru agama Hukum Torat hintang kawan pomimpin agama Yahudi ingkan kolompok Parisi. Iroh mehen ico beti bawe co buah tangkap tului are umpi dosa hokoruh ma bakah co bokon banaieh. 4Holuh iroh mehen bawe cioh hia tohun dulun ngarun, hien doh ma Yesus, “Bapa Guru, bawe cotuh tongohaba kaih dahat umpi dosa hokoruh. 5Ponah Hukum Torat, Musa mihi porintah indan to bahawa kawan bawe co umpi dosa isan iyoh sobulih tomedak ma batu dapot matoi. Maindeon pondapat-Mu tintun aang cioh?” 6(Iroh ngisok sanioh ika monjebak Are ina doh haba nyala Are.)#8:6 Kawan pomimpin taiyoh bopikir amun Yesus mantun bawe cioh aroko boraoi tomohukum, maka iroh hegah nondah Are tului are naleh porintah Musa. Amun Yesus mantun bawe cioh sobulih tomohukum, maka Are sotuju ma iroh ATAWA iroh hegah nondah Are nyan tohimo pomorintah Romawi co bohak mohukum matoi ico dulun. Tapi Yesus hoop-hoop leh paluh nulih ma bua silui-Eh nyan tana.
7Tapi iroh horoholuh monggasak Are ika mihi useh. Holuh, Are tonjok holuh mantun, “Amun oko dulun nyan halo ikan co aroko piji bodosa, oluceh are co portama medak batu hia bawe conon.” 8Holuh, Are hoop-hoop kole, monulih nyan tana.
9Opah doh ngoneh antun Yesus yoh, iroh tulak boroico-ico, ingkan intin, molai ingkan co pokongongko. Kojekaieh, baya Yesus tarop bolenteng ma bawe cioh co incah tonjok nyan intin. 10Yesus tonjok paluh mantun ma bawe cioh, “Nyan omohbat iroh? Main arelu oko ico beti mahi co mohukum iko?”
11Useh eh, “Arelu oko, Tuan.”
Hien Yesus, “Akuh mahi aroko mohukum iko. Tulakbat hintang molai makitu aroh umpi dosa bat.”
Yesus isan kopandau co mihi kobolum
8:12-20
12Yesus hopander kole ma dulun ngarun. Hie-Eh, “Akuh iyohco kopandau dunia. Sika dulun co umba Akuh, are aroko angar nyalan ponah kopindong, tapi are angar empun kopandau co mihi kobolum.”
13Kawan pomimpin agama Yahudi ingkan kolompok Parisi yoh paluh mantun ma-Eh, “Baya Iko leh co bosaksi tintun arop-Mu tarop. Kosaksian-Mu non aroko bujur.”
14Yesus museh iroh. Hie-Eh, “Oluco Akuh bosaksi tintun arop-Kuh, kosaksian-Kuh bujur. Tului koraong Kuh ingkan omoh Akuh dombut hintang hia omoh Akuh tulak. Tapi ikan aroko monau ingkan omoh Akuh dombut hintang hia omoh Akuh tulak. 15Ikan mutus dulun sala atawa buah ma ukuran kolunon. Tapi Akuh aroko nyala atawa ngombujur ico beti mahi. 16Amun Akuh mutus dulun sala atawa buah, koputusan-Kuh yoh bujur. Awi, Akuh aroko momutus tarop. Mohotara Tama co nyoruhan-Akuh oko halo-Akuh. 17Nyan ponah Hukum Torat oko tonulih nain otuh: amun duo beti dulun mihi kosaksian co samah maka aang cioh mula bujur.#8:17 Ingkan buku Ulangan 17:6 dan 19:15. 18Oko duo co bosaksi tintun Akuh, iyohonon Akuh hintang Tama co nyoruhan Akuh.”
19Jadi, iroh mantun ma-Eh, “Nyan omohboh Tamam-Mu?”
Useh Yesus, “Ikan aroko nyono Akuh atawa Tamang-Kuh. Sompamaeh, ikan bujur-bujur nyono Akuh, mositi ikan nyono Tamang-Kuh ka.”
20Yesus mantun uras otuh hiah waktu Are majar nyan Lopo Mohotara dokin pati porsembahan. Tapi, arelu oko ico beti mahi co nawan Are awi waktueh co tonukas Mohotara indan iyoh arinai okot.
Yesus mara bahawa Are borasar ingkan sorga
8:21-30
21Yesus mantun kole ma iroh, “Akuh angar tulak. Ikan angar nganyap Akuh, tapi ikan angar matoi ponah dosam me. Ikan aroko lian dombut hia ika Kuh tulak.”
22Maka, kawan pomimpin agama Yahudi mantun, “Mainbat Are nyau ngompatoi arop? Mungkin onon tuluieh Are mantun, ‘Ikan aroko lian dombut hia ika Kuh tulak.’ ”
23Yesus mantun ma iroh, “ikan borasar ingkan pinda, tapi Akuh borasar ingkan hunyung. Ikan ingkan dunia tuh. Akuh bokon ingkan dunia tuh. 24Iyoh tuluieh Akuh mantun ma ikan bahawa ikan angar matoi ponah dosam me. Awi, amun ikan aroko porocaya bahawa Akuhboh Are Co Oko, maka ikan angar matoi ponah dosam me.”
25Hien doh ma-Eh, “Omeboh Iko?”
Useh Yesus, “Ingkan kosulak, Akuh ocop monjelas ma ikan tintun arop-Kuh! 26Incah oko orong aang tintun ikan co nyau Kuh mantun hintang Kuh mutus eh. Tapi, Akuh baya porapot eh ma ikan nyan dunia tuh, kawan aang co koneh Kuh ingkan Are co nyoruhan Akuh, Are co bujur.” 27(Iroh aroko paham bahawa Are mantun ma iroh tintun Mohotara Tama).
28Maka, Yesus mantun, “Hiah waktu ikan nongkacuk Anak Kolunon nyan sompolaki,#8:28 Maksut eh nyan intoi, hiah waktu iroh moningi Are nyan sompolaki ika mohukum matoi Are. Nyan waktu cioh, orong aang co mosotahir tojadi ika mombukti ome Are sobujur eh. (Matanondo jarin pindong, oko gempa bumi, horden nyan Lopo Mohotara botosah, dll. Noto buku Matius 27:45-54.) ikan angar monau bahawa Akuhboh Are Co Oko. Ikan mahi angar monau bahawa Akuh aroko umpi ome-ome ingkan arop-Kuh tarop. Akuh baya mantun ome co tomajar Tama ma-Akuh. 29Are co nyoruhan Akuh oko soming-Kuh. Are aroko naat Akuh tarop, awi Akuh horoholuh nguan kokon aang co ngonyorih atoi-Eh.”
30Opah Yesus mantun kokoieh yoh, orong dulun porocaya ma-Eh.
Yesus meleh penting hangki Abraham
8:31-59
Yesus polampas dulun ingkan kuasan dosa
8:31-38
31Paluh, Yesus mantun ma kawan dulun Yahudi co ocop porocaya ma-Eh. Hie-Eh, “Amun ikan tenden nontumun ajaran-Kuh, borati ikan bujur-bujur murid-Kuh. 32Ikan angar monau kobujur, hintang kobujur cioh aroh nompi ikan jarin cipon bat.”
33Useh doh, “Kaih iyohco koturunan Abraham. Kaih aroko piji jarin cipon ome bewe! Maindeoi Iko boraoi mantun: ‘Ikan aroh bat jarin cipon’?”
34Hien Yesus ma iroh, “Ngoneh ehboh! Tuu bujur antun-Kuh tuh: Kokon dulun co umpi dosa, iroh iyohco cipon dosa. 35Ico beti cipon bokon anggota koluarga co tatap, tapi ico beti anak iyohco anggota koluarga sokotahi-tahieh. 36Jadi, amun Anak molampas ikan, maka ikan bujur-bujur lampas. 37Mula, tomonau Kuh ikan iyohco koturunan Abraham. Tapi, ikan nyau ngompatoi Akuh awi ikan aroh norima ajaran-Kuh. 38Akuh mantun kawan aang co Tamang-Kuh porahan ma-Akuh. Tapi ikan nguan kawan aang co koneh me ingkan tamam me.”
Dulun co aroko porocaya ma Yesus, sobujur eh ngumba Lacan Setan
8:39-47
39Useh doh ma-Eh, “Taman kaih iyohco Abraham!”
Hien Yesus ma iroh, “Sompamaeh ikan bujur-bujur anak Abraham, mositi ikan angar umpi aang co pio isan Abraham. 40Akuh porapot ome co bujur ma ikan, kawan aang co tongoneh Kuh ingkan Mohotara. Tapi ikan nyau ngompatoi Akuh. Abraham aroko piji umpi aang isan iyoh! 41Ikan nguan ome co tonguan pian tamam me leh.”
Useh doh, “Kaih aroko kawan anak kalih. Kaih baya tempun ico Tama, iyohonon Mohotara!”
42Hien Yesus ma iroh, “Sompamaeh Mohotara bujur-bujur Tamam me, mositi ikan angar mongasihi Akuh. Awi, Akuh dombut ingkan Mohotara. Nohani, Akuh dombut aroh tului kojere-Kuh tarop, tapi awi kojere Are co nyoruhan Akuh. 43Kura ikan aroko paham antun-Kuh? Tuhboh tuluieh: Awi ikan nongkuloi ajaran-Kuh. 44Ikan iyohco kawan anak Lacan Setan! Are iyohco tamam me. Ikan nyau nontumun kojere tamam me yoh. Ingkan kosulak, sipat eh nyau ngompatoi dulun. Nyan are arelu oko aang co bujur awi arelu oko kobujur nyan ponah arop eh. Kotika are ngoncunih, iyoh tonai, awi sipat eh horoholuh ngoncunih. Are iyohco taman kokon unih. 45Tapi Akuh mantun ome co bujur ma ikan, hintang tului iyoh ikan aroh porocaya ome co tomantun-Kuh. 46Ome nyan halo ikan co mombukti bahawa Akuh umpi dosa? Amun Akuh mantun aang co bujur, kura ikan aroko porocaya antun-Kuh? 47Kawan anak Mohotara kolu ngoneh antun Mohotara. Tapi ikan aroh ingkan Mohotara, ononboh tuluieh ikan aroh kolu ngoneh antun-Kuh.”
Yesus ocop oko sorinai Abraham
8:48-59
48Kawan pomimpin agama Yahudi mantun ma Yesus, “Bujur mikeh eh antun kaih bahawa Iko iyohco dulun Samaria, hintang iko tonyarung setan?”
49Useh Yesus, “Akuh aroh tonyarung setan. Tapi Akuh mohormat Tamang-Kuh hintang ikan aroko mohormat Akuh. 50Tapi Akuh aroh nganyap ina dulun hormat ma Akuh. Oko ico co bousaha ika Akuh tomohormat, hintang Areboh co mutus sala atawa buah. 51Ngonehehboh! Kokon dulun co nontumun antun-Kuh, iroh aroh angar matoi sumong kotahi.”
52Kawan pomimpin agama Yahudi taiyoh mantun ma Yesus, “Makitu kaih monau bahawa Iko bujur-bujur tonyarung setan! Awi, Abraham ocop matoi, sanioh ka kawan nabi. Tapi Iko mantun: uras dulun co nontumun antun-Kuh, iroh aroh angar matoi sokotahi-tahieh. 53Mainboh Iko meleh penting hangki taman kaih Abraham co ocop matoi. Kokon nabi mahi ocop matoi! Omeboh Iko tuh?”
54Useh Yesus, “Sompamaeh Akuh nganyap hormat indan arop-Kuh leh, maka hurmat cioh arelu oko artieh. Co mihi hurmat indang-Kuh iyohco Tamang-Kuh, iyohonon Are co ikan nisi sobagai Mohotaram me. 55Podahar, ikan aroko nyono Are. Tapi Akuh nyono Are. Sompamaeh Akuh mantun: ‘Akuh aroh nyono Are’, maka iyoh borati Akuh ico dulun pongoncunih, samah isan ikan! Tapi, Akuh nyono Are, hintang Akuh nontumun Antun-Eh. 56Tamam me Abraham korinah jorih jerah bahawa ondo pongaan are angar noto ondo korombut-Kuh. Are ocop kitoeh, paluh are jorih!”
57Kawan pomimpin agama Yahudi taiyoh mantun ma Yesus, “Umur-Mu arinai dapot limam pulu toun. Mu bodai Iko ocop kito Abraham?”
58Antun Yesus ma iroh, “Ngonehehboh! Sorinai Abraham tonganak, Akuh ocop oko!”#8:58 Nyan buku Koluaran 3:14, Mohotara mara araieh ma Musa, iyohonon Akuh Oko. Ma hapo sotilah cioh, Yesus mantun bahawa Are iyohco Mohotara. Iyoh alasan dulun Yahudi nyau medak Are ma batu. 59Kotika iroh ngoneh Yesus mantun nain iyoh, iroh monu kawan batu ika medak Are dapot matoi. Tapi Yesus nyuhuk arop, paluh tulak naat Lopo Mohotara.
Currently Selected:
Yohanes 8: TBSS
Highlight
Share
Copy
Want to have your highlights saved across all your devices? Sign up or sign in
