Lukas 10
10
Yesus nyoruhan pitum pulu murid-Eh
10:1-12
1Opah iyoh Tuhan Yesus mili pitum pulu murid-Eh co bokon ma duo balas murid-Eh yoh. Are nyoruhan iroh boduo-boduo ika nosoun Are hia kokon kota co angar tongohia-Eh. 2Sorinai iroh tulak, Are mantun, “Hasir co porulu tongumpur dalo kuhat eh, tapi co monggawieh baya isut. Jadi, nyawot eh ma Mohotara co tempun umo ika Are ngirim labih orong kole dulun co tukang bogawi ika ngumpur hasir imbun-Eh.
3Nah, tulak bat! Akuh nyoruhan ikan hia pulo dulun co ngolawan ikan, samah isan kawan domba hia pulo kawan srigala.
4Aroko usah mehen kambut, bohati, sandal. Nyan solanam me tuh, aroh moholu waktu me niho mohampa tului koponondo me hotontoke hintang hopander aang co aroko porulu.
5Sorinai ikan muntam lopo dulun, mantun aang co pio hinut ma dulun co oko nyan lopo cioh. Hiem me, ‘Mudahan Mohotara mihi kongolandah kongolami indan kokon dulun nyan ponah lopo cotuh.’ 6Amun dulun nyan lopo cioh kolu norima tontoke kongolandah me yoh, Mohotara tuu-tuu angar nompi dulun nyan lopo cioh ngolandah. Tapi, amun dulun nyan lopo cioh aroko kolu norimaeh, kongolandah cioh angar hopuli hia ikan.
7 Ome bewe co norima ikan ponah lopoeh, nukui leh nyan intin dapot ikan tulak naat kota cioh. Aroh pindah-pindah ingkan lopo cioh hia lopo co bokon. Somporengu dulun co bogawi patut norima tombah, ikan mahi oko hak me norima ongkun ponguman ingkan kawan dulun kotika ikan momborita tintun Korojaan Mohotara. Jadi kuman ngorih ome bewe co tonyurung doh indam me. 8Nyan kota comoh bewe iroh pio norima ikan, kuman eh leh ome bewe co tonyodia doh indam me. 9Pomambuh eh leh kawan dulun co hotoro nyan lowu cioh. Mantun eh ma iroh nyan intin, hiem me, ‘Korojaan Mohotara ocop dokin ma ikan.’#10:9 Maksut eh, korombut Yesus hia dunia tuh, maka dulun boraoi porocaya ma Are iyohonon Laca Co Tomonjanji Mohotara. Amun porocaya ma Yesus yoh, sobulih naat dosa, paluh ngonjorih Yesus, dulun boraoi jarin warga Korojaan Mohotara. 10Tapi amun ikan aroko tonorima nyan ico kota, tulak hia kawan calan nyan kota ika dulun boraoi ngoneh antun me. Hiem me, 11‘Kaih naat kota me tuh, kawan dabu tana co leket nyan paa, mahi tonontokoh kaih! Conon ika momporingat ikan, awi ikan angar tomohukum Mohotara tului ikan aroko norima kaih! Tapi aang cotuh sobulih tomonau me: Korojaan Mohotara ocop dokin.’ 12Sinan Mohotara ngolompuh kota Sodom hapo apui ingkan sorga.#10:12 Kesah kota Sodom hintang Gomora oko nyan Kojadian 19:1-23. Tapi, nyan ondo kiamat daai, hukuman indan kawan dulun nyan kota cioh angar meleh bahat.”
Yesus mancam dulun nyan kawan kota co aroko porocaya ma Are
10:13-16
(Mat. 11:20-24)
13Paluh Yesus mancam kawan kota nyan derah Galilea. Hie-Eh, “Mohotara angar mohukum ikan nyan kota Korasim hintang Betsaida. Akuh ocop pototo kuasang-Kuh ingkan Mohotara hapo orong aang co mosotahir nyan halo ikan, tapi ikan aroko porocaya ma-Akuh. Ikan aroko kolu naat dosam me hintang ngonulu kojere Mohotara. Amun Akuh nompi kawan aang co mosotahir taiyoh nyan kota Tirus hintang Sidon, mositi kawan dulun nyan intin ocop tahi naat kawan dosan doh. Hapo kain kuntah hintang umpi awu nyan pumpung kuhung doh. 14Nyan ondo kiamat daai, hukuman indam me nyan kota Korasim hintang Betsaida angar korinah kobahat eh hangki hukuman ma kawan dulun jahat nyan Tirus hintang Sidon yoh.
15Ikan mahi co nyan kota Kapernaum. Aroh borpikir ikan angar tomohormat. Aroh ka bopikir ikan angar muntam sorga! Ikan angar tomende hia noraka!”
16 Paluh Yesus mantun kole ma kawan murid-Eh co pitum pulu beti kuhat eh nin, “Dulun co ngoneh ikan, samah leh ma iroh ngoneh Akuh ka. Dulun co aroko norima ikan, samah ma iroh aroko norima Akuh ka. Dulun co aroko norima Akuh, samah leh ma aroko norima Mohotara co nyoruhan Akuh.”
Kobuli pitum pulu murid Yesus
10:17-20
17Pitum pulu murid Yesus yoh buli ma kojorih. Hien doh ma Yesus, “Tuhan kawan roh jahat mahi tunduk kotika kaih musir eh hapo kuasam-Mu.”
18Hien Yesus ma iroh, “Akuh ocop noto Lacan Setan tahak ingkan langit isan jilap.#10:18 Oko tolu komongkinan indan kalimat cotuh. 1) Cotuh samah ma tindung ma kojere kuasa Lacan Setan ocop mulai tongalah. 2) Kalimat cotuh nyata. Yesus noto aang cioh kotika kawan murid-Eh musir kawan roh jahat. Atawa 3) Kalimat cotuh nyata. Yesus noto Lacan Setan tomusir ingkan sorga sorinai Mohotara moncipta dunia. 19Ngoneh eh bat! Akuh ocop mihi kuasa indam me ina ngalah kuasa jahat, kuasan musuh to, tului iyoh arelu oko co boraoi moncolaka ikan. 20Tapi co meleh pio aroko usah jorih tului kawan roh jahat non tunduk ma ikan. Oko alasan co meleh porulu ika me jorih jerah, iyohonon tului aram me ocop tomoncatat nyan sorga.”
Yesus jorih jerah hintang bosukur ma Mohotara
10:21-24
(Mat. 11:25-27,13:16-17)
21Nyan kotika cioh ka, Roh Mohotara nompi Yesus jorih jerah. Hien Yesus, “Tamang-Kuh, Iko co monguasa langit hintang tana. Oko dulun co boakar pikir hintang todidik. Tapi Akuh bosukur tului Iko aroko poleha kokon kobujur cioh ma iroh. Iko baya poleha kokon aang cioh ma dulun co aroko todidik hintang boakar pikir. Yoh Tamang-Kuh, cara conon ngonjorih songam-Mu!”
22 Paluh Yesus mantun ma dulun orong, “Tamang-Kuh ocop mihi kokon aang indang-Kuh. Aroko ico beti mahi co tuu-tuu nyono Anak, bokon ma Tama. Arelu oko co bujur-bujur nyono Tama bokon ma Anak hintang kawan dulun co tomili Anak tului Anak posono Tama ma iroh.”
23Opah iyoh Yesus noto hia kawan murid-Eh. Hie-Eh husus ma iroh leh, “Ikan ihin Mohotara aang co pio hinut tului kojuan kito ome co kitam me makitu tuh. 24Mingkat otuh: Orong nabi hintang laca jaman sinan co jere noto kokon aang co kitam me makitu tuh. Iroh jere ngoneh kokon aang co koneh me makitu tuh. Tapi iroh aroko haba kosempatan cioh.”
Tindung tintun dulun Samaria co pio songai
10:25-37
25Opah iyoh ico beti guru agama Yahudi tonjok ika nyuwah Yesus. Are ngisok, “Guru, akuh sobulih nompi ome ika haba kobolum co sokotahi-tahieh nyan sorga?”
26Yesus museh, “Ome co tonulih ponah buku Hukum Mohotara co tonulih Musa? Ome aang co tomombaca mu nyan intin?”
27Dulun cioh museh, “ ‘Mongasihi bujur-bujur Tuhan, Mohotaram mu ma kotuun atoi mu, ma kotuun jiwamu, ma kotuun kangkahmu hintang ma kotuun pikiranmu,’#10:27 10:27 Ingkan Ulangan 6:5. hintang ‘Mongasihi sosamahmu samah ma iko mongasihi arop mu tarop.’ ”#10:27 10:27 Ingkan Imamat 19:18.
28“Useh mu non bujur lau,” hien Yesus. “Nompi eh bat samah ma co hiem non, maka iko angar haba kobolum co sokotahi-tahieh nyan sorga.”
29Tapi guru agama Yahudi cioh jere ika dulun bopikir are yoh dulun co pio hintang hopompaluh bujur. Jadi, are ngisok, hie “Ome co sosamah kolunon yoh boh?”
30Yesus museh hapo ico kesah co santuh nai, “Oko ico beti bakah nosuloh ingkan kota Yerusalem hia lowu Yeriko. Nyan benteng calan are tonyarang kawan porampuk, morampas kokon barang co ehe hintang kawan lembon eh mahi onun doh ka. Are tomolantu dapot jonyo matoi, dulun cioh dingan bohimat paluh kawan porampuk taiyoh otoi molenteng eh palek-palek nyan saran calan.
31Potohorong songola oko ico beti imam Yahudi nyalan ka nintai calan cioh. Kotika kitaieh dulun cioh, are paluh nyalan pohia topit saran calan, paluh ngoholuh solanai. 32Isan iyoh ka ico beti ingkan suku Lewi co nyalan nintai calan cioh; are mahi ngule pohoi calan, paluh ngoholuh solanai ka.
33Tapi opah iyoh ico beti dulun Samaria#10:33 Nyan jaman Yesus, bangsa Yahudi homusuh ma bangsa Samaria. co dahat ponah solanai, nyihin calan cioh. Hayak are kito dulun cioh, karas komasieh ma are. 34Maka tongohiaeh dulun cioh paluh are ngorasih kawan dingan eh hapo danum angur. Are nawah eh hapo minyak jaitun, opah iyoh milit dingan eh yoh hapo kain. Are paluh pocakat dulun cioh hia tungkui koledaieh, mehen eh hia ico ponginapan, nyorunuh eh nyan intin.
35Manyuap ondoeh are monu duo kodilat duit perak. Ihi indan dulun co tempun ponginapan cioh kawun mantun, ‘Nyorunuh dulun cotuh. Amun oko biayaeh co bokon, angar tonahur kuh ma iko amun akuh buli dai.’ ”
36 Opah iyoh Yesus ngumbot kesah-Eh paluh santuh nain kisok-Eh, “Monurut iko, ingkan iroh tolu cioh niin comoh co mongasihi ma samah arop eh, ma dulun co tomorampuk yoh?”
37Guru Hukum Yahudi cioh museh, “Dulun co ocop dohop dulun cioh.”
“Nah,” hien Yesus, “Tulakbat hintang umpi bat isanioh ka!”
Yesus nganda Maria doruo Marta
10:38-42
38Opah iyoh Yesus hintang kawan murid-Eh ngoholuh solanan doh hia kota Yerusalem. Iroh dapot nyan ico desa. Nyan intin oko ico bawe co araieh Marta. Are norima Yesus nyan lopoeh.
39Marta yoh oko konduang eh bawe co arai Maria. Maria hopompaluh tuot dokin Tuhan Yesus ngoneh ajaran-Eh. 40Tapi Marta hopompaluh sibuk tului molayani kawan tomuoi eh yoh. Maka, are ngorokin Yesus, ngolomumut, “Tuhan, konduang kuh tuh otoi moholu akuh bogawi tarop kuh molayan ikan. Isan deoi Iko aroko poduli. Suwah Iko nyuhu are dohop akuh!”
41Tapi Tuhan museh eh, “Marta, Marta, iko dalo giha, ngohojok arop mu ma aang co orong macam eh. 42Podahar baya ico leh co bujur-bujur porulu hintang konduang mu tuh ocop mili aang co pokopioeh, iyohonon ngoneh kawan aang co tomajar-Kuh. Aang conon aroko angar tomonu ingkan are.”
Currently Selected:
Lukas 10: TBSS
Highlight
Share
Copy
Want to have your highlights saved across all your devices? Sign up or sign in
