Lukas 14
14
Yesus pomambuh ico beti dulun hotoro nyan ondo Sabat
14:1-6
1Nyan ico kotika ondo Sabat, Yesus kuman homboh pira-pira guru agama Yahudi hintang kawan pomimpin agama ingkan kolompok Parisi. Iroh kuman nyan lopo ico beti kopala kolompok Parisi taiyoh. Kokon dulun Parisi hintang guru co oko nyan intin nyoroli Yesus ma kotoliti, ika nganyap kosolaai-Eh. 2Songola dombut ico beti dulun co hotoro hia Yesus. Toroeh yoh nompi paai hintang silui karas lonting. 3Maka Yesus ngisok ma kawan guru agama Yahudi hintang kawan dulun Parisi taiyoh, “Monurut Hukum Mohotara co tonulih Musa, kuhan pai pomambuh dulun nyan ondo Sabat?” 4Ngoneh kisok Yesus yoh, kokon doh potontonih. Paluh Yesus nantot silun dulun co hotoro yoh pomambuh eh holuh nyuhu are buli.
5Paluh Yesus mantun ma iroh, “Amun, sompamaeh, anak me atawa sapi me tahak hia ponah luwang kotika ondo Sabat, mositi ikan paluh ngawat eh kotika ondo cioh, mikeh eh?”
6Iroh tenden tonih awi aroko sangup naleh-Eh.
Kawan dulun sobulih herak mihi hintang aroh cakah
14:7-14
7Yesus momporhati dulun co mili uot nyan ika co poko muka. Maka, Are ngorapot kesah cotuh ma iroh. 8Hie-Eh, “Amun dulun mongundang ikan hia pesta kawin, aroh mili uot nyan ika co poko muka. Aroh isanioh awi mungkin oko dulun co meleh penting hangki ikan co tomongundang ka. 9Amun dulun penting cioh dombut, dulun co mongundang ikan yoh angar nyawot ikan kisat ina dulun co penting cioh baraoi tuot nyan intin. Mohaan bat ikan awi topaksa tuot nyan ika co poko likut. 10Tapi amun dulun mongundang ikan hia pesta kawin, kojereeh ikan mili uot nyan ika co poko likut. Mungkin dulun co mongundang ikan angar nyawot ikan kisat, tuot hia ika co poko muka. Paluh, kawan tamu co bokon angar mohormat ikan. 11Nompieh bat isanioh, awi Mohotara angar porandah dulun co nyuwah posompan arop eh tohormat. Tapi, Mohotara angar ngatang dorajat kokon dulun co porandah arop eh”.
12Opah iyoh Yesus mantun ma dulun co tempun lopo, “Amun iko nguan pesta pakuman dulun maondo atawa mamalom, aroh baya mongundang kawan jolaham, kawan konduang kuhung, sotatum, atawa kawan totangga co tatou. Aroh hopompaluh mongundang iroh leh awi iroh boraoi mongundang iko hopuli. Iyoh leh angar jarin baleh co kohaba mu. 13-14Tapi, amun iko nompi pesta pokuman dulun, otoi mongundang kawan dulun co aroko lian maleh eh iyohonon dulun mala, dulun cacat, dulun lumpuh, dulun bobuto. Amun iko nompi isanioh, iko angar haba baleh co ocu meleh pio nyan kotika Mohotara nompi kawan dulun co tuhit ma Are hopuli bolum.”
Mohotara mongundang orong dulun ika jarin anggota koluarga Korojaan-Eh tapi oko kawan dulun co aroko kolu norima Are
14:15-24
(Mat. 22:1-10)
15Ngoneh antun Yesus yoh, ico beti tamu nyan lopo dulun Parisi mantun ma Are, “Arelu oko oni nyaman kopioi kawan dulun co angar kuman homboh Mohotara ponah Korojaan-Eh.”
16Tapi Yesus ngesah kesah cotuh ma are. Hie-Eh, “Oko dulun nyau nompi pesta bahai. Are nyodia kokon aranaang, paluh mongundang orong dulun. 17Hayak jonyo molai pesta, Are nyuhu polayan eh ika parapot tungon cotuh hia kawan dulun co tomongundang, ‘Haas boh, dombut bat. Kokoieh ocop tonyodia!’
18Tapi kokon doh aroko kolu dombut, orong macam alasan ika doh aroko dombut hia pesta cioh. Oko co mantun, ‘Maap. Akuh punan moli kabun co sobulih akuh tulak nyalan notoeh.’
19Oko co bokon mantun, ‘Maap. Akuh punan moli limo kopasang sapi co dahat kuh nyuwah kobangkah eh.’
20Oko kole co bokon mantun, ‘Akuh baa opah kawin, jadi akuh aroko boraoi hantin.’
21Opah iyoh, polayan cioh buli, mara kokon aang co koneh eh yoh ma tuan eh. Tuan eh sangit tului kokon dulun co tomara anta nompi orong macam alasan ika aroko boraoi dombut. Paluh, are nyuhu polayan eh ika jion tulak hia kawan calan hintang kawan tohun kota ika mara kuman kawan dulun mala, kawan dulun cacat, kawan dulun lumpuh hintang kawan dulun babuto. Maka, iroh uras dombut hia pesta cioh paluh kuman.
22Opah iyoh, polayan cioh mantun ma tuan eh, ‘Tuan, akuh ocop ngontumun porentah mu cioh nin, tapi incah oko co buhang lian ika orong tomuoi kole.’
23Maka, tuan cioh nyuhu polayan eh, ‘Tulak bat hia luar kota, hia kawan calan bahai hintang kawan calan kolik nyan uwoidi. Mara kawan dulun co oko nyan idi ika hia pesta kuman cotuh ka. Ngonok iroh ika dombut, ina lopo kuh ponu. 24Ngoneh eh bat: Aroko ico beti mahi ingkan kawan dulun co ocop tomongundang kuh nin angar nongkomo ome bewe aang co ocop tomatang kuh indan doh.’ ”#14:16-24 Ponah tindung cotuh dulun co mongundang iyohonon Mohotara, pesta iyohonon Korojaan Mohotara, kawan tomuoi co sulak eh (ayat 16-20) molambang kawan dulun Yahudi co kuloi hia undangan Mohotara, kawan tomuoi kolompok koduo (ayat 21) molambang kawan dulun Yahudi co tomangap dulun buangan tapi norima undangan Mohotara, hintang kawan tamuoi kolompok kotolueh (ayat 23) molambang kawan dulun bokon ma Yahudi ka mahi norima undangan Mohotara. Noto nyan Roma 11:11-25.
Dulun sobulih bosodia naat kokon aranaang amun jere jarin murid Yesus
14:25-33
25Kotika Yesus ngoholuh solanai-Eh hia kota Yerusalem, orong dulun ngonulu-Eh. Are maling arop-Eh paluh mantun ma iroh, 26“Sika dulun co jere umba Akuh aroko lian jarin murid-Kuh, amun are mongasihi dulun bokon meleh hangki ma Akuh, iyohonon mongasihi ma tinai, tamai, oruh, anak, konduang malah arop eh tarop 27Sika dulun co kolu umba Akuh sobulih siap nohimo kosoranta, oluco dapot matoi. Are samah ma dulun co angar tomohukum matoi, are sobulih nyanon sompolakieh tarop. Amun are aroko bosodia nohimo kosoranta, are aroko boraoi jarin murid-Kuh.”
28Maka, amun jere jarin murid-Kuh, mikir eh soun ome co sobulih tonaat. Samah ma dulun co jere mangun ico monara. Are sobulih monau mainboh duit eh cukup ika ngumbot monara cioh atawa aroh. Are mositi tuot socara toliti mohitung biayaeh houn. 29Amun aroh, dulun cioh angar molai nguan pondasieh, tapi aroko lian ngumbot eh tului duit eh topah. Paluh sika dulun co noto aang cioh angar ngontao are. 30Iroh angar mantun nain otuh, ‘Noto kuong dulun conon! Are molai mangun tapi aroko liai ngumbot eh.’
31“Hapo cuntu co bokon. Sompamaeh, ico beti laca co tempun sopuluh ribu tontara angar hokohojat ngolawan laca bokon co tempun duam pulu ribu tontara. Mositi co pokosulak eh laca cioh angar tuot mompotimbang eh ika are monau mainboh are cukup kuat ika ngolawan musuh eh yoh atawa aroh. 32Amun ingkan sulak eh koraoi soun bahawa are aroko lian ngolawan musuh eh yoh, are angar nyoruhan coruhan ika nyawot sopakat hokodamai. Laca nompi aang cioh sorinai tontara musuh eh korinah dokin. 33Isan iyoh ka ma dulun co jere jarin murid-Kuh. Are sobulih momikir houn pio-pio awi amun are jere jarin murid-Kuh, are sobulih naat kokon aang co are empui.”
Dulun co aroko boguna indan Mohotara samah ma kahing co aroko mohoit bat
14:34-35
34“Kahing mula boguna. Tapi amun kahing jarin boleh, aroko boraoi tongompian mohoit kole.
35Kahing cioh aroko boguna lau ika nompi umo subur. Aroko boguna ka ika nompi pupuk. Samah sindo aroko gunai. Maka, kahing cioh tomende leh. Amun oko tolinga, ngoneh bat antun-Kuh pio-pio.”
Currently Selected:
Lukas 14: TBSS
Highlight
Share
Copy
Want to have your highlights saved across all your devices? Sign up or sign in
