Lukas 6
6
Ajaran Yesus tintun ondo Sabat
6:1-11
(Mat. 12:1-14; Mrk. 2:23–3:6)
1Nyan ico kotika ondo Sabat, Yesus hintang kawan murid-Eh nyalan buah tohun umo ika nukan gandum. Kawan murid-Eh mutoi tampung gandum cioh, ngolutit eh ma lukep doh ika monu luang eh, paluh kanon doh luang eh. 2Bopira beti dulun Parisi mantun, “Gawi conon sala! Kawan hukum agama to bosiit dulun bogawi nyan ondo Sabat.”
3Yesus museh iroh, “Mositi ikan piji mombaca Surat Borasih tintun kesah Laca Daud hintang kawan dulun co umba are. Kotika iroh dou, 4Daud muntam hia Lopo Mohotara, monu rute co ocop tomporsembah indan Mohotara. Monurut hukum agama to, baya kawan imam leh co boraoi kuman rute cioh. Tapi nyan kotika cioh, Daud kuman eh. Paluh tomihieh ka indan kawan dulun co umba are yoh ika kanon doh ka.”
5Yesus nukas eh, “Anak Kolunon iyohco Tuhan co bokuasa ma ondo Sabat.”
6Nyan ico kotika ondo Sabat co bokon kole, Yesus muntam hia lopo ika sombayang, ika majar. Nyan intin oko ico dulun co matoi silun kontouieh. 7Oko ka kawan guru agama Yahudi hintang kawan dulun Parisi. Iroh karas nyolidik Yesus nganyap kosolaai-Eh, ina boraoi nondah Are. Jadi iroh horoholuh nyoroli Are main boh Are angar ngompio dulun cioh nyan ondo sabat. Monurut hukum Mohotara, kolunon aroko boraoi bogawi nyan ondo Sabat.
8Tapi Yesus monau pikiran doh. Jadi, Yesus mantun ma dulun co matoi silan silui yoh, “Haas, hia muka tuh. Tonjok nyan intoi!” Dulun cioh tonjok, paluh maju hia muka.
9Hien Yesus ma iroh, “Akuh oko aang co tongisok Kuh ma ikan, santuh nai: Ome co boraoi tonompi to nyan ondo Sabat, nompi aang co pio atawa nompi aang co jahat; monyolamat dulun atawa moncolakaeh?”
10Kokon doh tonoto Yesus. Hie-Eh ma dulun co matoi silan silui yoh, “Nyoro silum mu!” Hayak dulun cioh nyoro siluieh, paluh kotika iyoh ka siluieh pio.
11Kawan guru hintang dulun Parisi yoh karas angit doh. Paluh molai hopakat maindeoi ngolawan Yesus.#6:11 Ingkan Injil Matius 12:14, ito monau kojere doh ika ngompatoi Yesus.
Yesus mili duo balas rasul-Eh#6:12-16 JudulAntun ‘Rasul’ ponah Bohasa Yunani ‘Apostolous’ co arti ‘dulun co tonyoruhan ika nompi tugas husus atawa ngorapot tungon husus’. Antun cotuh ika mombeda duo balas rasul Yesus ma kawan murid-Eh co bokon, tapi daai hapo ka ina Paulus hintang dulun Kristen co bokon ngorapot tarung tintun Yesus.
6:12-16
(Mat. 10:1-4; Mrk. 3:13-19)
12Nyan kotika cioh, Yesus tulak hia tungkui lungkuh ika bodoa. Ngomomi-momi Are bodoa hia Mohotara. 13Ngondaii icoeh, hayak ondo pandau, Are naah kawan murid-Eh. Paluh, mili duo balas ingkan iroh. Kawan dulun co tomili-Eh tuh tonisi-Eh ‘rasul’.
14-16Tuh iyoh daptar aran kawan rasul Tuhan Yesus: Simon (co pian Yesus arai Petrus), Andreas (konduang Simon yoh), Yokobus, Yohanes, Pilipus, Bartolomeus, Matius, Tomas, Yokobus (anak Alpeus), Simon (dulun Jelot),#6:14-16 Selot = Kolompok dulun Yahudi co bojuang merdeka ingkan pomorintahan Romawi. Yudas (anak Yokobus) hintang Yudas Iskariot (co nyarah Yesus hia kawan musuh-Eh).
Yesus majar hintang pomambuh orong dulun
6:17-19
(Mat. 4:23-25)
17Opah iyoh Yesus nosuloh ingkan pumpung lungkuh homboh ma kawan rasul taiyoh. Iroh tondo nyan ika co datah. Nyan intin ocop kumpur orong murid-Eh hintang kawan dulun co bokon ingkan ngolauh derah Yudea, tomasuk kota Yerusalem, hintang ingkan kota co saran laut iyohonon kota Tirus, hintang kota Sidon. 18Iroh dombut ika ngoneh ajaran-Eh, paluh ika topomambuh ingkan kawan toro doh. Are ka pomambuh dulun co tonyarung kawan roh jahat. 19Kokon dulun bousaha nantot Yesus, awi oko kuasa pusit ingkan Are co pomambuh kokon doh.
Yesus mantun aang co pio hinut hintang momporingat
6:20-26
(Mat. 1:1-12)
20Opah iyoh, Yesus noto kawan murid-Eh, paluh mantun, “Ihin aang co pio hinut ikan co mala, awi ikan yoh warga Korojaan Mohotara!.#6:20 Koluarga korajaan Mohotara iyohco dulun co porocaya bahawa Yesus iyohco Laca Co Tomonjanji Mohotara hintang bolum nyambo kuasai-Eh. 21Ihin aang co pio hinut co makitu ikan dou, awi ikan angar hopompaluh bosuh! Ihin aang co pio hinut bat ikan co makitu nangih, awi daai ikan angar kotao jorih! 22Ihin aang co pio hinut ikan co tongondolee, tonongkuloi, tomohina, tonondah jahat tului Anak Kolunon. 23Otoi jorih jerah leh ikan kotika me tongompian isan iyoh, nomarang nomposut ma kojorih, awi sobujur eh tombah me bahai nyan sorga! Awi isan iyoh ka tatu hiang doh sinan mompolaku kawan nabi.
24Tapi, Mohotara angar mohukum ikan co tatou, awi ikan ocop nongkomo kojorih kojerah. 25Mohotara angar mohukum ikan co bosuh makitu, awi daai ikan angar dou. Mohotara angar mohukum ikan co kotao makitu awi ikan angar nangih tului koporoh songam me daai. 26Mohotara angar mohukum ikan co tonara kokon dulun, awi ikan tonara samah ma kawan nabi palsu co tonara tatu hiang me.”#6:24-26 Ayat 24-26 borupa kiasan. Kojereeh, dulun co boharap ma ome bewe co bokon ma Yesus, aroko mungkin muntam hia sorga. Noto Markus 10:23-25; Lukas 12:16-21; Yesaya 30:10; Yeremia 5:30-31; 2Tim. 4:3.
Yesus majar tintun mongasihi musuh
6:27-36
(Mat. 5:38-48)
27Yesus ngompaluh kopomajar-Eh, “Ikan co ngoneh Akuh, Akuh mantun: Mongasihi bat kawan musuh me. Nompi aang co pio ma dulun co dolee ma ikan. 28Mantun aang co pio hinut ma dulun co hotulut ikan. Bodoa leh indan dulun co nompi aang co jahat ma ikan. 29Amun dulun ngapek sobiam mu co silai olueh ngapek sobiam mu co silaieh kole. Amun jubah mu tomorampas, mihieh ka barun lapis jubah mu yoh. 30Amun oko co nyawot ome bewe ma iko, mihieh! Amun barang mu tomorampas, aroh nyawot eh hopuli! 31Nompi aang co pio ma dulun bokon, samah rimai ma ikan jere dulun bokon nompi aang co pio ka ma ikan.
32Amun ikan baya mongasihi ma dulun co mongasihi ikan, ikan aroko patut moharap ome bewe aang co pio hinut ingkan Mohotara sobagai baleh eh. Awi dulun co bodosa mahi mongasihi dulun co mongasihi iroh. 33Amun ikan nompi aang co pio baya ma dulun co pio ma ikan, ikan aroko patut moharap ome bewe aang co pio hinut ingkan Mohotara sobagai baleh eh. Awi dulun co bodosa mahi nompi aang co isan iyoh ka. 34Amun ikan potindah duit baya ma dulun co lian nompulieh, ikan aroko patut moharap ome bewe aang co pio hinut ingkan Mohotara sobagai baleh eh. Awi dulun co bodosa mahi potindah duit ma dulun co bodosa paluh boharap duit eh tonompuli.
35Tapi ikan sobulih mongasihi musuh. Nompi aang co pio ma iroh. Potindah iroh aroh boharap lian tonompuli. Amun ikan nompi aang co isanioh, baleh eh angar bahai. Ikan angar jarin kawan anak Mohotara Co Poko Hunyung, amun ikan nompi aang co samah isan co tongompiai-Eh. Are pio ma kawan dulun co aroko monau maindeoi bosukur, isan iyoh ka tohimo kawan dulun co jahat. 36Ikan sobulih mongasihi, samah ma Mohotara Tamam mongasihi ikan.”
Yesus majar ika aroh otoi nisi dongam bujur atawa sala
6:37-42
(Mat. 7:1-5)
37“Aroh momutus dongam, maka ikan aroko angar tomohakim Mohotara. Aroh nyait nyala dulun, maka ikan aroko angar tonyala Mohotara. Sobulih mongampun dongam, maka Mohotara angar mongampun ikan. 38Mihi indan dongam, maka Mohotara angar mihi ikan aang co holowi-holea co ocop tonakan eh pisit-pisit indam me. Mingkat eh: Ukuran takan hapam me ika ukuran me ma dongam, Mohotara angar hapo takan co samah ma iyoh ka indam me.”
39Yesus mahi mara tindung cotuh ma iroh, ika iroh monyuntu aang co piai-Eh aroko aang co pian kawan pomimpin agama Yahudi. Hie-Eh, “Amun dulun bobuto nyuwah nuntun dulun bobuto co bokon, mositi iroh ruo angar torunjo hia ponah lebak. 40Ico beti murid aroko angar jarin meleh tingi hangki gurueh. Tapi amun kokon polajaran eh uras lulus, hanyar are boraoi samah ma gurueh.
41-42Aroh jarin dulun co pura-pura pio. Are hopompaluh nyoroli kosolaan dongai tapi aroko piji mompohati kosolaan tioh. Kawan dulun co nompi aang co isanioh samah ma dulun co noto juwuk nyan ponah matan konduang eh, tapi baluk co bahai nyan ponah matai aroko tomonaueh. Paluh are mantun, ‘Haas, Konduang, olu akuh dohop iko pokusit juwuk conon ingkan ponah matam mu.’ Tapi baluk co bahai nyan ponah matan tioh aroko tomonaueh. Haas kawan dulun co pura-pura pio songai, pokusit eh houn baluk co bahai non ingkan matam mu, opah iyoh iko boraoi tonta noto hintang pokusit juwuk cioh ingkan matan konduang mu.”
Alokuan dulun mopoleha aang co oko nyan ponah songaieh
6:43-45
(Mat. 12:33-35)
43“Kolunon tuh isan kaju. Kaju co pio mositi buaeh pio. Kaju co aroko pio mositi buaeh aroko pio. 44Kokon kaju tonyono ingkan buaeh. Aroko tonai hobua ara ingkan pulou humput duhi. Aroko tonai ka hobua angur ingkan pulou uru co boduhi. 45Isan iyoh ka dulun co pio pokusit aranaang co pio awi songaieh pio. Dulun co aroko pio pokusit aranaang co aroko pio awi atoieh jahat. Awi kawan antun dolang co pusit ingkan bauieh yoh, pusit ingkan ponah atoi ka.”
Kokon dulun sobulih ngontumun ajaran-Eh aroh otoi ngoneh eh bewe
6:46-49
(Mat. 7:24-27)
46“Ikan sala amun hopompaluh naah Akuh ‘Tuhan,’ tapi aroko jarin hamba co nontumun antun-Kuh. 47Makitu Akuh angar mihi tindung indam me tintun kawan dulun co dombut hia Akuh, ngoneh antun-Kuh, hintang paluh nompieh ka. 48Iroh samah ma kawan dulun co mangun lopo nyan tungkui pondasi co pio. Tongali doh jalom-jalom ika pondasi nyan tungkui batu. Kotika oko sompulak, danum sungoi nyurung paluh nampuh lopo cioh, tapi lopo cioh aroko hokuwut, tului tomangun dohon. 49Oko ka kawan dulun co ngoneh antun-Kuh tapi aroko nompieh. Iroh isan kawan dulun mangun lopo co aroko dohon pondasieh. Kotika oko sompurak, danum sungoi nyurung. Hayak danum nampuh eh, maka borohop bat lopo cioh. Paluh rusak lau.”
Currently Selected:
Lukas 6: TBSS
Highlight
Share
Copy
Want to have your highlights saved across all your devices? Sign up or sign in
