Matius 20
20
Tindung tintun kawan dulun co bogawi nyan kabun angur
20:1-16
1 Yesus ngoholuh pomander, “Korojaan Sorga samah isan kesah cotuh. Oko ico dulun co empun ico kabun angur. Ngonyua-nyua lau, are tulak nganyap pira-pira beti ika bogawi nyan kabun angur eh yoh. 2Opah are sopakat nahur iroh ico kodilat duit perak indan gawi ico ondo, isan tombah co biasa, paluh are nyuhu iroh tulak bogawi nyan kabun eh yoh. 3Sokitar jam suoi manyuap, are tulak kole hintang kitai nyan pasar oko kawan dulun bokon co dahat ngangur. 4Maka hieeh ma iroh, ‘Ikan mahi tulak bat bogawi nyan kabun angur kuh. Akuh angar nahur ikan ma tombah co pantas.’ Jadi, iroh mahi tulak bogawi nyan kabun eh. 5Sokitar jam duo balas maondo, tempun kabun cioh tulak kole ngohaba kawan dulun ika bogawi nyan kabun eh. Sokitar jam tolu macohit are umpi aang co samah. 6Sokitar jam limo macohit, are tulak kole, sopopak kawan dulun co incah ngangur. Hieeh ma iroh, ‘Kura ikan ngangur?’ 7Hien doh maeh, ‘Awi aroko dulun co nombah kaih.’ Hieeh ma iroh, ‘Ikan tulak bat bogawi nyan kabun angur kuh.’
8Kotika ondo ocop pindong, are mantun ma mandur eh. Hieeh, ‘Naahbat kokon dulun co bogawi indang kuh ngondai cotuh. Nahur tombah doh hopomasing, molai ingkan iroh co dombut pokongaan dapot ma iroh co dombut pokosulak eh’. 9Jadi, dombutbat iroh co punan molai bogawi sokitar jam limo macohit. Iroh norima tombah hopomasing ico kodilat duit perak. 10Opah iroh co portama dombut kito iyoh, iroh bopikir bahawa iroh angar norima tombah meleh orong awi iroh bogawi ingkan manyuap ondoeh. Tapi iroh mahi norima tombah hopomasing ico kodilat duit perak ka. 11Jadi, opah iroh norimaeh, iroh ngumer ma empun kabun cioh. 12Hien doh, ‘Iroh co dombut torahir tuh baya bogawi ico jam leh. Kaih ocop bogawi ngecat tungkas ngondai minda mai. Tapi iko nahur iroh ma tombah co samah ma kaih!’
13Tapi empun kabun cioh museh ico ingkan iroh yoh. Hieeh, ndoh ‘Konduang, akuh aroko umpi aang co kurang sucing ma iko! Indoi, maka kite ocop sopakat bahawa iko angar norima ico kodilat duit perak indan gawi ico ondo? 14Jadi, makitu bulibat mehen tombah mu non. Akuh nyau mihi tombah indan dulun co dombut torahir tatuh samah isan akuh mihi indammu. 15Mainboh akuh aroko boraoi bebas hapo kokon co akuh empui monurut kojere atoi kuh? Mainboh bosingon atoimu awi akuh mohian songa ma dulun bokon?’ ”
16Isanioh boh “Oko orong dulun co tomangap ‘tontiput’ makitu, tapi daai Mohotara angar umpi iroh ‘pokosulak’. Oko ka orong dulun co tomangap ‘pokosulak’ makitu, tapi daai Mohotara angar umpi iroh ‘tontiput.’ ”
Indan kohontolu kalieh, Yesus mara tintun pondoritaan co angar buah Are
20:17-19
(Mrk. 10:32-34; Luk. 18:31-34)
17Hiah waktu Yesus nuntuh kota Yerusalem, nyan oang calan Are naah duo balas murid-Eh ina hokumpur nyan ika co tontarop ma Are. Paluh Are mantun ma iroh, 18“Ito dahat nuntuh kota Yerusalem. Nyan idi, Anak Kolunon, angar tonyarah hia kawan imam kopala hintang kawan guru Hukum Torat. Iroh angar umpi koputusan bahawa Are sobulih tomohukum matoi. 19Paluh iroh angar nyarah Are hia kawan dulun co bokon ma Yahudi ina Are topolea-lea, tomoncambuk paluh tongompatoi nyan sompolaki. Tapi nyan ondo kotolu, Mohotara angar umpi Are bolum hopuli.”
Kawan murid Yesus sobulih morandah arop
20:20-28
(Mrk. 10:35-45)
20Opah iyoh, oruh Jebedeus homboh ma kawan anak eh Yokobus doruo Yohanes dombut hia Yesus. Nyan tohimo Yesus, are nukup bolutut ika nyawot aranaang. 21Hien Yesus, “Ome co tonyau mu ne?”
Tinan doruo museh, “Akuh nyau ina Iko mihi kodudukan tinggi indan duo anakkuh tuh ponah Korojaan-Mu, iyohonon ico tuot nyan topit kontoum-Mu, hintang ico kole nyan topit komuloi-Mu.”
22Tapi Yesus museh iroh. Hie-Eh, “Ikan aroko monau ome co tonyawot me. Mainboh ikan sangup mondorita samah isan Akuh?”
Hien doh ma-Eh, “Iyoh, karo sangup.”
23Hien Yesus ma iroh, “Mula bujur. Ikan ruo angar mondorita samah isan Akuh. Tapi Akuh aroh bohak nantu ome co angar tuot momorintah nyan topit kontoung-Kuh atawa nyan topit komuloi-Kuh. Kodudukan tinggi cioh tonyodia indan kawan dulun co ocop tonantu pian Tamang-Kuh.”
24Kosopuluh murid co bokon ngoneh sawot Yokobus doruo Yohanes yoh. Jadi, iroh jarin sangit ma konduang duo iyoh. 25Tapi Yesus naah kokon doh. Hie-Eh, “Oko kawan pomimpin bangsa co aroko nyono Mohotara nyan dunia tuh. Ikan monau bahawa iroh herak dangas ma rayat. Kawan dulun co bokuasa momaksa rayat ina tunduk ma kuasan doh. 26Tapi, ikan aroko boraoi isanioh! Malah, dulun co nyau jarin poko penting nyan halo ikan, are sobulih jarin polayan me. 27Dulun co nyau jarin pomimpin nyan halo ikan, are sobulih jarin jungus me. 28Samah isan Anak Kolunon cioh ka; Are dombut aroh ika tomolayani, tapi ika molayani, kawun nyarah arop-Eh dapot matoi ika polampas hintang nangung dosan kokon dulun.”
Yesus pomambuh duo dulun bobuto
20:29-34
(Mrk. 10:46-52; Luk. 18:35-43)
29Kotika iroh naat kota Yeriko, orong dulun ngonulu Yesus. 30Oko duo dulun bobuto co tuot nyan saran calan. Iroh ngoneh bahawa Yesus dahat nyihin. Jadi, iroh mantun muhat, “Tuhan, Laca ingkan koturunan Daud!#20:30 Laca ingkan koturunan Daud iyohco tisi bokon indan Kristus, iyohonon ‘Laca Co Tomonjanji Mohotara’. Dohop kaih!”
31Dulun orong taiyoh nopoh iroh ruo ina doh tonih. Tapi iroh noriak meleh muhat kole, “Tuhan, Laca ingkan koturunan Daud! Dohop kaih!”
32Yesus tondo paluh naah iroh. Hie-Eh, “Ome co tonyau me Akuh umpi indam me?”
33Useh doh, “Tuhan, kaih jere boraoi noto.”
34Yesus nongkomo masi ma iroh paluh ngoncamak matan doh. Hanyih iyoh ka iroh lian noto. Paluh iroh ngonulu Yesus.
Currently Selected:
Matius 20: TBSS
Highlight
Share
Copy
Want to have your highlights saved across all your devices? Sign up or sign in
