Matius 22
22
Yesus nyamah kawan pomimpin dulun Yahudi ma dulun co kuloi hia undangan pesta kawin
22:1-14
(Luk. 14:15-24)
1Paluh Yesus porapot tindung kole ma iroh. 2Hie-Eh, “Korojaan Sorga sompama kesah cotuh: Oko ico laca co umpi pesta kawin indan anak eh. 3Laca cioh nyuhu kawan polayan eh ina mara kawan dulun co ocop tomundang hia pesta cioh. Tapi, kawan dulun taiyoh aroko kolu dombut. 4Jadi, are nyuhu kawan polayan eh co bokon. Hieeh ma iroh, ‘Marabat ma kawan dulun co tomundang yoh bahawa kanon ocop siap. Kawan sapi hintang komolum kuh co monyak ocop tonyarak. Kokoieh ocop tonyodia. Haasboh dombut hia pesta kawin anakkuh tuh!’
5Tapi kawan dulun co tomundang yoh tenden aroko mohirau. Oko co tulak hia umoieh. Oko co tulak murus usahaeh. 6Molahan oko co bokon dapot nawan kawan polayan laca cioh. Iroh monyiksa hintang ngompatoi kawan polayan taiyoh. 7Korinah angit laca cioh. Are nyuhu tontaraeh ika ngompatoi kawan dulun co ngompatoi kawan polayan eh. Are mahi nyuhu tontaraeh ika nyaha kota doh.
8Opah iyoh, are mantun ma kawan polayan eh, ‘Pesta kawin ocop siap. Tapi kawan dulun co tomundang niin aroko layak. 9Jadi tulakbat hia kawan simpang calan. Mundangbat kokon dulun co ikan popak nyan intin ina iroh dombut hia pesta kawin cotuh.’ 10Kawan polayan taiyoh tulak hia kawan calan hintang mundang kokon dulun co tonyopopak doh, iyohonon kawan dulun jahat atawa kawan dulun pio. Maka, laoh ika pesta kawin cioh ponu ma kawan tamu.
11Opaiyoh, laca cioh muntam hia laoh cioh ika nyopopak kawan tamu taiyoh. Kotika iyoh, are kito oko ico dulun co aroko hapo lembon co pantas indan pesta. 12Jadi, laca mantun maeh, ‘Oo Konduang, iko aroko hapo lembon pesta kawin, kura iko boraoi muntam hia intoi?’ Dulun cioh tonih leh. 13Paluh, laca cioh mantun ma kawan polayan eh, ‘Mowot paan silun dulun cotuh. Nyakah are hia luar nyan ika co poko pindong. Kokon dulun nyan intin angar nangih hintang ngoritet kosing doh.’ ”
14 Paluh Yesus ngumbot tindung cioh ma antun, “Orong dulun co tonaah ika jarin warga Korojaan-Eh, tapi baya isut co tomili.”#22:14 Ponah tindung cotuh laca cioh molambang Mohotara, pesta molambang Korojaan Mohotara, kawan tamu co tomundang portama (ayat 3-7) molambang kawan dulun Yahudi co kuloi undangan Mohotara, kawan tamu co bokon molambang kawan dulun Yahudi atawa co bokon ma Yahudi co norima undangan Mohotara. Dulun co muntam hia ruang pesta kawin cioh molambang dulun co nyuwah muntam hia ponah Korojaan Mohotara ma cara bokon hangki porocaya Yesus.
Kawan pomimpin dulun Yahudi aroko haba monjebak Yesus
22:15-46
Kopongisok tintun nahur pajak hia pomorintah Romawi
22:15-22
(Mrk. 12:13-17; Luk. 20:20-26)
15Opaiyoh, kawan pomimpin agama Yahudi ingkan kolompok Parisi yoh tulakbat ingkan intin. Iroh umpi roncana ika monjebak Yesus ma kopongisok. 16Jadi, iroh nyuhu kawan murid doh hintang kawan dulun co mondukung Laca Herodes tulak hia Yesus. Kawan dulun taiyoh mantun ma Yesus, “Pa Guru, kaih monau Iko dulun jujur. Iko majar ma kojujur tintun cara bolum sosuai ma porentah Mohotara. Iko aroko momihak kawan dulun totentu. Awi iyoh, Iko aroko takut ma ome bewe. 17Monurut Iko, mainboh poraturan Mohotara co tonulih Musa ponah Hukum Torat kuhan ito nahur pajak ma Laca Roma atawa aroh?”
18Tapi Yesus monau maksut doh co jahat yoh.#22:18 Iroh hapo antun dolang co pura-pura pio. Tapi Yesus monau iroh nyau monjebak Are. Amun Are mantun bahawa nahur pajak iyohco aang co buah, maka orong dulun Yahudi angar sangit awi iroh aroko herak ma Pomorintahan Romawi. Amun Yesus mantun bahawa nahur pajak iyohco aang co sala, Are boraoi tomohukum pian Pomorintahan Romawi tului mohasut. Maka Are mantun, “Ikan pura-pura pio. Kura ikan nyau monjebak Akuh? 19Cuba pototoeh ma-Akuh ico kodilat duit perak co hapam me ika nahur pajak!” Jadi, iroh mihi ico kodilat duit perak hia-Eh.
20Yesus ngisok ma iroh, “Gamar hintang aran omeboh tocetak inyaieh?”
21Iroh museh, “Gamar hintang aran Laca Romawi co tonisi Kaisar.”
“Amun sanioh,” hien Yesus, “Mihi Kaisar bat co jarin indan tioh. Mihibat indan Mohotara co jarin tioh Mohotara!”
22Iroh hurong lau ngoneh useh Yesus yoh. Paluh, iroh tulak naat Yesus.
Kopongisok tintun bolum hopuli ingkan pompatoi
22:23-33
(Mrk. 12:18-27; Luk. 20:27-40)
23Hiah ondo cioh ka, pira-pira pomimpin agama Yahudi ingkan kolompok dulun Saduki dombut hia Yesus. Dulun Saduki aroko porocaya dulun angar bolum hopuli opah matoi. Jadi, iroh nyuwah monjebak Yesus ma kopongisok tintun iyoh. Hien doh, 24“Pa Guru, Musa majar poraturan indan to. Poraturan eh nain otuh: Amun ico bakah matoi, aroko empun anak, maka konduang eh sobulih kawin ma sindah eh yoh ina mihi koturunan indan konduang eh co ocop matoi yoh.#22:24 Noto Ulangan 25:5-6 hintang Kojadian 38. 25Nah, piji oko pitu dulun hokonduang nyan halo kaih. Konduang co pokongongko ngoruh ico bawe, tapi banai matoi sorinai oko anak. Jadi, are naat oruh eh yoh indan konduang eh. 26Konduang eh co koduo ngoruh balu cioh. Tapi, are mahi matoi sorinai oko anak. Sanioh ka tojadi ma konduang eh co kotolueh. Sanioh borait dapot konduang eh co kopitu. 27Kojekaieh, opah kokon konduang eh yoh matoi, bawe cioh matoi ka. 28Jadi, oko pitu dulun hokonduang kuhung co horuh ma bawe co samah. Amun bujur dulun lian bolum hopuli ingkan pompatoi, bawe cioh angar jarin oruh are comoh?”#22:28 Dulun Yahudi kuhan bakah empun oruh labih hangki ico (oluco iyoh aroh roncana Mohotara; Kojadian 2:24), tapi iroh aroko kuhan bawe labih hangki ico banai nyan waktu co samah. Dulun Saduki nyompan kesah doh lian mombukti arelu oko pomolum opah pompatoi, tului amun oko pomolum opah pompatoi, iroh nyompan bawe cioh angar empun pitu banai, co monurut iroh aroko kuhan Mohotara. Iroh mahi bopikir kesah doh angar umpi Yesus lehabat konguong nyan tohimo dulun orong.
29Useh Yesus ma iroh, “Ikan koliru lau awi ikan aroko paham Surat Borasih atawa kuasan Mohotara! 30Nyan waktu kawan dulun bolum hopuli, iroh aroko angar hanak horuh bat. Iroh angar bolum samah isan molekat nyan sorga. 31Aang tintun kawan dulun bolum hopuli ingkan pompatoi oko nyan ponah Surat Borasih. Tapi, mositi ikan arinai paham iyoh. Mohotara mantun, 32‘Akuhleh Mohotaran Abraham, Ishak, hintang Yakup.’#22:32 Ingkan buku Koluaran 3:6. Mohotara cioh bokon Mohotaran dulun matoi. Are Mohotaran dulun co bolum!”
33Kotika dulun orong ngoneh ponjelasan Yesus yoh, kagum lau iroh ma ajaran-Eh.
Kopongisok tintun porentah Mohotara co poko penting
22:34-40
(Mrk. 12:28-34; Luk. 10:25-28)
34Kawan dulun Parisi ngoneh bahawa Yesus umpi kawan dulun Saduki yoh aroko bokutik. Tului iyoh iroh hokumpur. 35Ico guru Hukum Torat ingkan kolompok doh nyuwah monjebak Yesus ma kopongisok bokon. Hieeh, 36“Pa Guru, ingkan kokon porentah Mohotara ponah Hukum Torat, co omoh co poko penting?”
37Hien Yesus maeh, “‘Mongasihileh tuu-tuu Tuhan Mohotarammu ma kokuan tuu atoimu, ma kokuan tuu jiwamu, hintang ma kokuan tuu pikiranmu.’#22:37 Ingkan buku Ulangan 6:5. 38Porentah ciohboh co poko utama hintang co poko penting. 39Samah isan porentah cioh, oko porentah bokon co korinah penting, iyohonon: ‘Mongasihileh sosamah kolunon isan iko mongasihi aropmu leh.’#22:39 Ingkan buku Imamat 19:18. 40Uras hukum agama co tomihi pian Musa hintang ajaran kawan nabi asar eh ingkan duo porentah cioh.”
Yesus, Laca Co Tomonjanji Mohotara, meleh bokuasa hangki budas koturunan Laca Daud bewe
22:41-46
(Mrk. 12:35-37; Luk. 20:41-44)
41Sopondehan kawan dulun Parisi taiyoh incah hokumpur nyan intin, Yesus ngisok ma iroh, 42“Mikirbat tintun Laca Co Tomonjanji Mohotara co tonisi ka ‘Kristus’. Koturunan omeboh Are?”
Useh doh, “Kristus iyohco koturunan ingkan Laca Daud.”
43“Amun sanioh,” hien Yesus, “kura Roh Mohotara umpi Daud naah ‘Kristus’ sobagai ‘Tuhan’? Otuhboh antun Daud:
44‘Tuhan mantun ma Tuhankuh:
Tuotbat nyan ika co tohormat nyan topit kontoung-Kuh,
dapot Akuh pokalah kawan musuh-Mu,
umpi iroh ibarat eh tohucak paam-Mu, umpi iroh tunduk ma kuasam-Mu.’#22:44 Ingkan buku Masmur 110:1.
45Jadi, Daud nisi ‘Kristus’ sobagai ‘Tuhan’. Poko tului iyoh, mositi Kristus meleh bokuasa hangki koturunan Daud co tonganak tongobua.”#22:45 Yesus, Laca Co Tomonjanji Mohotara, iyohco kolunon (koturunan Daud) tapi Mohotara ka (Tuhan Daud). Noto Roma 1:3-4.
46Arelu oko dulun co lian naleh Yesus. Ingkan ondo cioh, arelu oko co bohanyi nyuwah monjebak Are ma kopongisok kole.
Currently Selected:
Matius 22: TBSS
Highlight
Share
Copy
Want to have your highlights saved across all your devices? Sign up or sign in
