Markus 10
10
Ajaran Yesus tintun hanak horuh
10:1-12
(Mat. 19:1-9)
1Yesus naat ika cioh, paluh tulak hia derah Yudea hintang hia derah nyan pohoi sungoi Yordan. Orong dulun dombut kole. Iroh hokumpur nyan toliut Are, paluh isan koliin Are majar iroh kole. 2Oko pira-pira pomimpin agama Yahudi ingkan kolompok Parisi, iroh dombut hia Yesus ika nganyap alasan ika nyala Are. Iroh ngisok, “Monurut Hukum Torat, mainboh bakah boraoi misah oruh eh?”
3Tapi Are ngisok ma iroh, “Porentah ome co tomihi Musa ma ikan ponah Hukum Torat yoh?”
4Useh doh, “Musa kuhan dulun misah oruh eh, asar nulih surat pisah houn.”#10:4 Ingkan buku Ulangan 24:1-4.
5Hien Yesus ma iroh, “Musa mihi porentah cioh malah tului atoi me makeng. 6Podahar, ingkan kosulak, Mohotara nampa kolunon, iyohonon bakah hintang bawe.#10:6 Ingkan buku Kojadian 1:27; 5:2. 7Tului iyoh, Kawan bakah angar naat tinan tamaieh paluh hico ma oruh eh. 8Dapot dulun duo iyoh jarin ico.#10:8 Ingkan buku Kojadian 2:24. Jadi, iroh aroko bat duo beti, tapi iroh ico. 9Awi iroh ocop tongonyarin ico pian Mohotara, maka iroh aroko boraoi tomisah pian kolunon.”
10Opah iroh ocop muntam hia ponah lopo, kawan murid-Eh ngisok kole ma Yesus tintun iyoh. 11Hien Yesus ma iroh, “Amun oko bakah co misah oruh eh paluh kawin ma bawe bokon, bakah cioh hokoruh ma bawe co bokon ma oruh eh co portama yoh.#10:11 Noto ka Mat. 5:32; Luk. 16:18; 1 Kor. 7:10-11. 12Sanioh ka, amun oko bawe co misah banaieh paluh kawin kole ma bakah bokon, bawe cioh hokoruh ma bakah co bokon ma banaieh.”
Yesus mantun aang co pio hinut indan kawan daja
10:13-16
(Mat. 19:13-15; Luk. 18:15-17)
13Oko kawan dulun mehen kawan daja kolik dombut hia Yesus ina Are ngoncamak iroh. Tapi kawan murid-Eh nyangit kawan dulun co mehen kawan daja taiyoh. 14Yesus sangit noto kawan murid-Eh nguan iyoh. Hie-Eh ma iroh, “Oluboh kawan daja dombut hia-Akuh! Aroh ngosiit iroh. Awi, kawan dulun co isan kawan daja tatuh iyohco anggota koluarga Korojaan Mohotara.#10:14 Kawan daja bolum bosandar ma dulun ongkoeh. Samah ka, anggota koluarga Korojaan Mohotara sobulih bolum bosandar ma Mohotara Tama nyan sorga. 15Ngoneh ehyoh! Amun dulun aroko nyambut Korojaan Mohotara isan daja kolik, are aroko piji angar muntam Korojaan Mohotara.” 16Yesus ngohapon kawan daja taiyoh, mandak silui-Eh nyan tungkui iroh hintang mantun aang co pio hinut indan doh.
Dulun tatou moho ngohaba kobolum co sumong kotahi nyan sorga
10:17-31
(Mat. 19:16-30; Luk. 18:18-30)
17Hiah waktu Yesus ngoholuh kole solanai-Eh, oko dulun tongkoru-koru dombut hia-Eh. Dulun cioh bosujut nyan tohimo Yesus paluh ngisok, “Pak Guru co pio, ome co sobulih piang kuh ina lian haba kobolum co sumong kotahi nyan sorga?”
18Yesus ngisok maeh, “Kura iko mantun Akuh Pio? Arelu oko dulun co pio. Baya Mohotara co pio. 19Mositi iko ocop monau kokon porentah Mohotara cotuh: Aroh ngompatoi, aroh hokoruh ma co bokon hangki oruh atawa banammu, aroh nako, aroh bosaksi unih, aroh nipu dulun, mohormat tinam hintang tamammu.”
20Hien dulun cioh, “Pak Guru, akuh ocop nuhit kokon porentah cioh ingkan akuh incah daja.”
21Yesus nolangon dulun cioh hintang masieh. Hien Yesus maeh, “Baya oko ico oni co kurang co sobulih piammu. Bulibat, borakang kokon co iko empui. Paluh hobagi-bagi duit eh indan kawan dulun mala. Ma sanioh, iko angar ngohaba koponatou nyan sorga. Opah iko nguan kokoieh yoh, dombutboh kole hia intoi, paluh umba Akuh.” 22Ngoneh porentah Yesus yoh, are kocewa. Are naat ika cioh ma atoi co jorung lau, awi are korinah kotatoueh.
23Paluh Yesus noto kawan murid-Eh. Hie-Eh ma iroh, “Moho lau indan dulun tatou jarin anggota koluarga Korojaan Mohotara.”#10:23 Mungkin moho indan dulun tatou bosandar ma Mohotara awi boraoi derek bosandar ma koponatoueh.
24Kotika kawan murid-Eh ngoneh iyoh, korinah kohurong doh. Tapi Yesus mantun kole, “Kawan anak-Kuh, moho lau muntam koluarga Korojaan Mohotara. 25Meleh sutir unta muntam calan luwang doih hangki dulun tatou muntam Korojaan Mohotara.”
26Kawan murid-Eh sasar hurong. Hien doh ico ma co bokon, “Wah, amun sanioh, ome co lian tonyolamat?”#10:26 Dulun Yahudi bopikir kokon dulun tatou ihin aang co pio hinut ingkan Mohotara. Jadi, amun dulun tatou aroko tonyolamat, maka dulun bokon co aroko tatou mositi aroko boraoi tonyolamat ka.
27Yesus noto iroh hintang museh, “Indan kolunon mula aroko bodai, tapi aroko sanioh indan Mohotara, awi kokon aranaang bodai indan Mohotara.”
28Paluh Petrus mantun ma Yesus, “Kaih ocop naat kokon co tioh kaih ina jarin kawan murid-Mu. Jadi ome co angar tongohaba kaih?”
29Useh Yesus, “Ngoneh ehyoh! Oko kawan dulun co ocop naat lopoeh, kawan konduang eh, dulun ongkoeh, kawan anak eh, atawa umoieh tului iroh porocaya ma-Akuh hintang tului momborita Tarung Pio. 30Nyan jaman cotuh, kokon dulun taiyoh angar ngohaba hopuli solatuh kali lipet: lopo, konduang, tinai, anak, hintang umo. Iroh mahi angar tonyiksa. Tapi, nyan jaman co angar dombut, iroh angar ngohaba kobolum co sumong kotahi nyan sorga. 31Orong dulun co tomangap ‘kosulak’ makitu, tapi daai iroh angar jarin ‘tontiput’ hintang orong dulun co tomangap ‘tontiput’ makitu, tapi daai angar umpi iroh ‘kosulak’.”
Indan kohontolu, Yesus mara tintun pondoritaan co angar tonongkomo-Eh
10:32-34
(Mat. 20:17-19; Luk. 18:31-34)
32Yesus hintang kawan murid-Eh dahat ponah solanan hia kota Yerusalem. Yesus nyalan nyan muka. Kawan murid-Eh giha. Kawan dulun co ngonulu Yesus ingkan uwoilikut nongkomo takut ka. Nyan owang calan Yesus naah koduo balas murid-Eh ina hokumpur nyan ika hotontarop ma Are. Sindo oni, Are mara ma iroh tintun siksaan co angar tojadi ma-Eh daai. 33“Hie-Eh,” Makitu ito tulak hia Yerusalem. Nyan idi, Anak Kolunon angar tonyarah hia kawan imam kopala hintang kawan guru agama Yahudi. Iroh angar umpi koputusan bahawa Are sobulih tomohukum matoi. Paluh iroh angar nyarah Are hia kawan dulun bokon ma Yahudi. 34Kawan dulun taiyoh ka angar mohulut Are, ngiwoh-Eh, moncambuk-Eh hintang ngompatoi-Eh. Tapi nyan ondo kotolu Are angar bolum hopuli.
Kawan murid Yesus sobulih morandah arop
10:35-45
(Mat. 20:20-28)
35Opaiyoh, Yokobus doruo Yohanes, iyohonon kawan anak Sebedeus, ngoroni Yesus. Hien doh ma-Eh, “Pak Guru, kaih nyau nyawot aranaang ingkan Iko. Kaih nyawot Iko angar nguan iyoh.”
36Yesus ngisok iroh, “Ome co ikan nyau Akuh nguan eh indam me?”
37Hien doh, “Kaih nyau ina-Mu mihi kodudukan tingi indan kaih nyan waktu Iko hopuli porahan bahawa Iko terhormat. Ico ingkan karo tuot nyan topit kontoum-Mu, hintang ico kole nyan topit komuloi-Mu.”
38Tapi Yesus museh iroh. Hie-Eh, “Ikan aroko monau ome co tonyawot me. Sonyulu oni, Akuh angar mondorita. Mainboh ikan sangup mondorita samah isan Akuh?”
39Hien doh ma-Eh, “Iyoh, karo tuh sangup.”
Hien Yesus ma iroh, “Mula bujur. Ikan ruo angar mondorita samah isan Akuh. 40Tapi Akuh aroko bohak nantu omeboh co angar tuot nyan topit kontoung-Kuh atawa nyan topit komuloi-Kuh. Kodudukan tingi cioh tonyodia indan kawan dulun co ocop tonantu pian Tamang-Kuh.”
41Kotika sopuluh murid Yesus co bokon yoh ngoneh aang cioh, iroh sangit ma Yokobus doruo Yohanes. 42Tapi Yesus naah kokon doh. Hie-Eh, “Oko kawan pomimpin bangsa nyan dunia tuh co aroko nyono Mohotara. Koraom me bahawa iroh herak nindas rayat. Kawan dulun co bokuasa maksa rayat ina tunduk ma kuasan doh. 43Tapi, ikan aroko boraoi sanioh! Malah, dulun co jere jarin poko penting nyan halo ikan, are sobulih jarin polayan me. 44Dulun co jere jarin tohormat nyan halo ikan, are sobulih jarin isan hamba me co bokon. 45Ikan sobulih ngumba toladan Anak Kolunon co dombut hia dunia tuh aroh ika tomolayan pian dongai, tapi ika molayan dongai. Are angar nyarah arop dapot matoi ika nahur hukuman dosan orong dulun.”
Yesus pomambuh dulun co bobuto co araieh Bartimeus
10:46-52
(Mat. 20:29-34; Luk. 18:35-43)
46Paluh iroh dapot nyan kota Yeriko. Orong dulun ngonulu Yesus hintang kawan murid eh. Hiah waktu kokon doh pusit ingkan kota cioh, oko dulun bobuto nyan saran calan rahat tuot mongemis. Araieh Bartimeus, anak Timeus. 47Bartimeus ngoneh bahawa dulun co dahat nyihin iyohco Yesus, ingkan lowu Nasaret. Jadi, are noriak, “Yesus, koturunan Daud! Masi akuh!”
48Orong dulun nopoh are ina are tonih leh. Tapi are naah meleh muhat kole, “Laca ingkan koturunan Daud! Masi akuhboh!”
49Yesus tondo hintang mantun, “Naah are boh!”
Jadi, iroh naah dulun co bobuto cioh. Hien doh maeh, “Tenangboh! Tonjokbat, Yesus naah iko!”
50Dulun bobuto cioh jion tonjok, mukoi jubah eh, hintang tulak hia Yesus.
51Kisok Yesus maeh, “Ome co tonyau mu Akuh umpi indam mu?”
Are museh, “Pak Guru, akuh jere boraoi noto!”
52Yesus mantun, “Amun sanioh, tulak bat! Iko tongompio awi iko porocaya.”
Hanyih iyoh ka dulun co bobuto cioh boraoi noto, paluh lansung ngonulu Yesus ponah solanai-Eh.
Currently Selected:
Markus 10: TBSS
Highlight
Share
Copy
Want to have your highlights saved across all your devices? Sign up or sign in
