Markus 15
15
Yesus nyan tohimo Gubernur Pilatus
15:1-15
(Mat. 27:1-2,11-26; Luk. 23:1-5,13-25; Yoh. 18:28–19:16)
1Ngonyua-nyua lau, kokon Mahkamah agama Yahudi hokumpur, tomasuk kawan imam kopala, kawan pomimpin bangsa Yahudi hintang kawan guru agama Yahudi. Iroh umpi koputusan ina Yesus tomohukum matoi. Jadi, iroh mowot silun Yesus hapo rantai paluh mehen-Eh hia gubernur Pilatus. Hiah waktu iroh nyarah Yesus ma Pilatus, 2Pilatus ngisok ma Yesus, “Mainboh Iko laca dulun Yahudi?”
Useh Yesus, “Sanioh hiemmu.”
3Kawan imam kopala mongaju orong tondah ngolawan Are. 4Pilatus ngisok kole ma-Eh, “Iko ngoneh orong tondah doh ma Iko. Kura Iko aroko museh ika ngilang arop-Mu?” 5Tapi, Are aroko museh samah sindo, sohinga Pilatus hurong.
6Hiah sika ondo raya Paskah, biasaeh gubernur Pilatus mombebas ico beti tohanan, sosuai ma sawot dulun orong. 7Hiah waktu cioh oko dulun nyan seper co araieh Barabas. (Barabas tomokuntam ponah seper hontong bopira dulun tului momboruntak ngolawan pomorintah Romawi. Iroh mahi ngompatoi dulun ponah pomboruntakan cioh.) 8Orong dulun hokumpur paluh nyawot hia Pilatus ina are mombebas ico beti tohanan isan co koliin eh. 9Pilatus ngisok ma iroh, “Mainboh ikan nyau akuh mombebas Laca dulun Yahudi non?” 10(Pilatus mantun sanioh awi are monau alasan kawan imam kopala nyarah Yesus hiaeh, iyohonon tului atoi doh bosingon ma Yesus.)
11Tapi kawan imam kopala mohasut dulun ngarun taiyoh ika nyawot ina Barabas co tomombebas indan doh. 12Maka, Pilatus mantun kole ma dulun ngarun yoh, “Amun sanioh, ome co ikan nyau akuh umpi tohimo dulun co tonisi me Laca dulun Yahudi non?”
13Iroh noriak, “Nyompolaki Are!”
14Hien Pilatus, “Tapi kojahatan ome co ocop tongompiai-Eh?”
Tapi iroh sasar muhat noriak, “Nyompolaki Are!”
15Awi Pilatus jere ngonjorih dulun ngarun yoh, maka are mombebas Barabas tului sawot doh. Tapi Yesus tomoncambuk. Paluh Pilatus nyarah Yesus hia kawan tontaraeh ika tonyompolaki.
Kawan tontara polea-lea Yesus
15:16-20
(Mat. 27:27-31; Yoh. 19:2-3)
16Opaiyoh kawan tontara Pilatus yoh mehen Yesus hia istana gubernur.#15:16 Ponah istana cioh, oko ruang ika nahan dulun co angar tomohukum. Iroh naah kokon pasukan ika hokumpur nyan intin. 17Paluh iroh molai polea-lea Are sobagai laca. Iroh pohapo jubah ungu ma-Eh. Iroh mahi nyalin somacam mahkota ingkan kawan pating hoduhi, holuh masang eh nyan tungkui kuhung-Eh. 18Iroh pura-pura mihi hormat ma-Eh. Hien doh, “Hormat kaih yoh Laca Dulun Yahudi!” 19Paluh, iroh ngiwoh-Eh hintang molantu kuhung-Eh hapo tuntu. Iroh mahi bolutut nyan toharep-Eh, pura-pura nyembah-Eh. 20Opah iroh polea-lea Are, iroh mukoi jubah cioh paluh pohapo hopuli lembon-Eh. Opaiyoh iroh mehen Are hia luar ika tonyompolaki.
Yesus tomaku nyan sompolaki
15:21-32
(Mat. 27:32-44; Luk. 23:26-43; Yoh. 19:17-27)
21Hiah waktu iroh nyalan hia luar kota, iroh sopopak ma dulun ingkan kota Kirene. Araieh Simon. (Are iyohco taman Aleksander doruo Rupus.) Simon punai dombut ingkan luar kota. Kawan tontara maksa are ika nyanon sompolaki Yesus. 22Iroh mehen Yesus hia ika co araieh Golgota, co artieh: ‘Ika Ongang’. 23Nyan intin, iroh mihi Yesus korih angur co bocampur ma mur.#15:23 Mur iyohco kita ingkan somacam puun kaju, rasaeh poit. Dulun co ngorih angur, are isan dulun co tombius, nyaman koporoh co tonongkomo eh angar bokurang. Tapi Are aroko kolu ngorih eh. 24Opaiyoh, iroh maku Are nyan sompolaki. Kawan tontara monu lembon Yesus paluh mundi ika hobagi-bagi lembon-Eh.#15:24 Poristiwa cotuh umpi antun ingkan Masmur 22:19 jarin nyata.
25Ondo kotika iroh nyompolaki Are jam suoi manyuap. 26Nyan topit hunyung sompolaki, iroh masang tulisan co monjelas alasan Are tomohukum. Santuh tulisan cioh, “Laca dulun Yahudi.”#15:26 Tulisan co tomasang nyan hunyung Yesus borupa kopolea ma Yesus (awi iroh aroko porocaya Are iyohco Laca) ATAWA kopolea ma dulun Yahudi (awi moremeh kuasan doh tombanding ma kuasan pomorintah Romawi). 27Homboh ma Yesus, iroh mahi nyompolaki duo beti ponjahat, co ico nyan topit kontoui-Eh hintang co icoeh kole nyan topit komuloi-Eh. [28Ma sanioh, antun cotuh ponah Surat Borasih jarin nyata: “Are tomangap ico ingkan kawan dulun co jahat.”]
29Kawan dulun co nyihin nyan idi mohina Are samir ngiling kuhung. Hien doh, “Hei Iko co nyau nohop Lopo Mohotara holuh mangun eh hopuli ponah tolu ondo! 30Toka bat ingkan sompolaki conon! Nyolamat bat arop-Mu!”
31Sanioh ka kawan imam kopala hintang kawan guru agama Yahudi. Iroh polea-lea Yesus. Hien doh ico ma co bokon, “Are ngawat dongai, tapi Are aroko hegah ngawat arop-Eh tarop! 32Amun Are bujur-bujur Laca Dulun Israel, Laca Co Tomonjanji Mohotara, olueh Are toka ingkan sompolaki non! Amun kaih lian noto Are sangup nguan iyoh, kaih angar porocaya ma-Eh.”
Duo beti ponjahat co tonyompolaki nyan hoponyila Yesus, iroh mahi mohina Are ka.
Yesus matoi
15:33-41
(Mat. 27:45-56; Luk. 23:44-49; Yoh. 19:28-30)
33Hiah jam duo balas maondo, ngolauh derah cioh jarin pindong lau dapot jam tolu macohit. 34Nyan jam tolu macohit, Yesus noriak ma suara muhat, “Eloi, Eloi, lama sabaktani?” Artieh, “Mohotarang-Kuh, Mohotarang-Kuh, kura Iko naat Akuh?”#15:34 Ingkan buku Masmur 22:2. 35Bopira dulun co ngoneh iyoh aroko paham. Hien doh, “Noto! Are naah nabi Elia.” 36Ico beti ingkan iroh jion tulak monu aranaang co lian nosop cairan. Are monculup eh nyan ponah angur mosom holuh molilit eh nyan pungko doroh kaju. Are nyoroeh hia baun Yesus ina tongorih-Eh. Dulun cioh mantun, “Pioleh! Haas ito nundui hintang noto amun Elia dombut ika potoka Are ingkan sompolaki.”
37Paluh Yesus noriak, hintang diuh. 38Hiah kotika iyoh ka, horden nyan ponah Lopo Mohotara tirat tosah duo, ingkan hunyung dapot pinda.#15:38 Ponah gedung Lopo Mohotara, oko laoh husus ika Mohotara oko. Oko horden co misah laoh cioh ma laoh co bokon. Sindo ponah ico toun baya Imam Kopala co poko bokuasa boraoi muntam laoh cioh. Jadi, kotika horden cioh tirat artieh arelu oko batasan bat. Ika Mohotara oko, aroko baya nyan laoh husus cioh. Lopo Mohotara aroko jarin pusat ika nyembah Are bat. Molalui Yesus, ito makitu boraoi nyembah Mohotara nyan omoh-omoh. Noto Ibrani 6:19-20; 9:1-15; 10:19-22 hintang Epesus 2:18; 3:12.
39Oko kopala pasukan co tonjok nyan muka sompolaki Yesus. Are noto kokon co tojadi hiah kotika Yesus diuh. Jadi, are mantun, “Tuu, Dulun cotuh bujur-bujur Anak Mohotara!”
40Nyan intin oko ka bopira bawe co noto ingkan ocu. Nyan halo iroh iyohco Salome, Maria Makdalena, hintang Maria (tinan Yokobus co daja doruo Yoses.) 41Iroh iyohco bawe co ngonulu Yesus hintang molayan Are hiah waktu Are nyan propinsi Galilea. Oko orong bawe co bokon ka co dombut hia Yerusalem homboh Yesus.
Yesus tongolowong ponah guha
15:42-47
(Mat. 27:57-61; Luk. 23:50-56; Yoh. 19:38-42)
42Ondo cioh iyohco ondo Jomahat, ondo dulun Yahudi mondakan posiapan sorinai ondo Sabat molai. Ondoeh ocop jonyo mamalom, nyau molai ondo Sabat. 43Jadi, oko dulun co araieh Yusup, tulak hia gubernur Pilatus ika nyawot ijin amun are boraoi ngolowong ontun Yesus. (Yusup tuh borasar ingkan kota Arimatea. Are anggota Mahkamah agama Yahudi hintang are tomohormat dulun. Are mahi iyohco dulun co nganto Korojaan Mohotara dombut.) Ma hanyi, are nohimo Pilatus. 44Pilatus hurong ngoneh bahawa Yesus ocop matoi. Jadi, are naah kopala pasukan hintang ngisok main bujur Yesus ocop matoi. 45Opah ngoneh laporan ingkan kopala pasukan cioh, maka Pilatus mihi ijin ma Yusup ika monu ontun Yesus.
46Yusup moli benang kaci hintang borasih paluh tulak potoka ontun Yesus ingkan sompolaki. Are mungkuh ontun Yesus hapo benang cioh paluh pokaling-Eh nyan ponah guha kolowong co tonguan nyan ponah lungkuh batu. Are ngolinang loong batu nyan muka guha ika kolowong cioh ina nutup eh. 47(Maria Makdalena hintang Maria tinan Yoses noto nyan omoh Yesus tomokaling).
Currently Selected:
Markus 15: TBSS
Highlight
Share
Copy
Want to have your highlights saved across all your devices? Sign up or sign in
