IMBOMBO SYA BATUMIGWA 4

Peteri na Yohani nkyeni ndukomano

1Lelo bo Peteri na Yohani bakali bikuyoba nabandu, popapo balinkwisa kumyabo abaputi, nundindililaNyumba ya Kyala nabaSadukai. 2Bo bakalele papo abatumigwa bala bamanyisyaga abandu nkusifumukisya mungamu ya Yesu isya kusyuka mbafwe. 3Popapo balinkubakola, balinkubigalila nnyumba ya bannyololo ukufika nulubunju, namanga gali mayolo. 4Loli bingi muli aba bapifike ilisyu balinkwitika; abanyambala baliti bali baelifu bahano (5,000) ubwingi.

5Popapo nulubunju balinkubungana mu Yerusalemu abalongosi mbaYuda, abakulumba nabamanyandagilo, 6na Hanasi umputi unkulumba, na Kayafa na Yohani na Aliksandara, bosa nabakamu ba mputi unkulumba. 7Lelo bo bababikile abatumigwa pakati, popapo balinkubalalusya balinkuti, “Isi mukubomba, kali mukubombela mmaka maki, na mungamu ngi?”

8Popapo Peteri bo iswile Mbepo Mwikemo, alinkubabula alinkuti, “Mwe balongosi mbandu, na mwe bakulumba, 9linga tukulongigwa umusyugu panongwa ya mbombo inunu iyi tumbombile umundu undemale uyu, na muno abumbulukile, 10syo mumanyege mwesa nabandu bosa mbanyaIsraeli ukuti, mungamu ya Yesu Kristi ugwa nkaya ka Nazareti, uyu mwalinkomile pakipingika, uyu Kyala alinsyusisye mbafwe, muli yuyuyu, mo mumo umundu uyu imile nkyeni mmyinu unkafu itolo. 11#Salimo 118.22Yesu yuyuyu, ‘Yo ibwe ili lyasyokeligwe nanumwe mwe bayengi, lyo lipelile ukuya ibwe ikulumba lya panguto.’ 12Bukayamo ubupoki mmundu uyungi; namanga yikayako ingamu iyingi kusi kumpalanga, iyi bapegigwe abandu, muli iyi fikuti mo tubwagilege ubupoki.”

13Lelo bo babubwene ubukifu bwa Peteri na Yohani, kangi bo basyagenie ukuti bandu itolo aba bakaya nubumanyi nabumo, balinkuswiganika, balinkusyagania ukuti bo aba bali nagwe Yesu. 14Loli bo bambwene umundu uyu abumbulusigwe imile pamopene nabo, balinkusita nukuya nalyo limo ilya kwamula. 15Lelo bo bababulile ukuti basokemo ndukomano, balinkulalusania babo batupu, 16balinkuti, “Tubombe fiki nabo abandu aba? Buno sili pabwelu ku bandu bosa aba bali nkaya ka Yerusalemu isya kuti, abandu aba babombile ikika ikikulumba, kangi tukabagila nukukana. 17Loli ukuti sisisi singakindililaga ukubalanila mbandu, isaga tubogofye, ukuti bangandisyaga kangi ukuyoba numundu yumo mungamu yiyiyi.” 18Lelo bo bababilikile, balinkubakanisya fiyo ukufumusya nukumanyikisya mungamu ya Yesu. 19Loli Peteri na Yohani balinkubamula balinkuti, “Linga kununu nkyeni mwa Kyala ukubapilika umwe, ukukinda ukumpilika Kyala, syo mulongege yuyumwe; 20buno uswe tukabagila ukuleka ukusiyoba isi tusibwene nisi tusipilike.” 21Abene bo bongilepo ukubogofya, po balinkubabula, papo bakayagile injila ya kubafundilamo, panongwa ya bandu; namanga abandu bosa bamwimikaga Kyala pali isi syabonike. 22Namanga umundu uyu kyapeligwemo ikiswigu kikiki, ifyinja fyake fyakindile pamalongo mana (40).

Abitiki bikwiputa ukuti bayege nubukifu

23Lelo bo bababwile, popapo balinkubuka kubinabo, balinkubapangila syosa isi abaputi abakulumba, nabakulumba bababulile. 24#Kuso 20.11; Nehe 9.6; Salimo 146.6Abene bo bapilike, balinkwinula ilisyu lyabo pali kimokyene kwa Kyala balinkuti, “Gwe Ntwa gwe Mwenefyosa, gwe gwapelile ikya kumwanya nikya pasi, ninyanja na fyosa ifi filimo, 25#Salimo 2.1-2gwe gwayobile mwa Mbepo Mwikemo nkanwa mwa tata Davidi, umbombi gwako gwatile,

‘Abapanja baywegaga fiki,

nifikolo fya bandu finogonaga syaki isya itolo?

26Abanyafyale ba nkisu bitendekisye,

nabalagili bakomene pamopene,

bansambukile uNtwa na yu Mpakigwa gwake.’

27 # Mat 27.1-2; Mar 15.1; Luk 23.1,7-11; Yoh 18.28-29 Buno naloli Herodi na Ponti Pilati bakomene nkaya aka kangi nabapanja nabanyaIsraeli ukumbombela imbibi umbombi gwako umwikemo Yesu, uyu gwalimwimike, 28ukubomba isi ikiboko kyako nulutumulilo lwako fyalinogonile ngani ukuti sisege. 29Lilino lelo gwe Ntwa ukukete ukogofya kwabo, ubapege ababombi bako ukuliyoba ilisyu lyako nubukifu bosa, 30bo kugolosya ikiboko kyako nkubumbulusya, nukubomba ifika nifiswigu mungamu ya Yesu, umbombi gwako umwikemo.”

31Lelo bo biputile, popapo pabuyo apa babungene palinkusenyendeka; bosa balinkwisula Mbepo Mwikemo, balinkuliyoba ilisyu lya Kyala nubukifu. Abitiki bikulilanila ikyuma kyabo 32#Imbo 2.44-45Popapo ikilundilo kya aba balitike kilinkuya ndumbula yimoyene, kangi moyo gumogwene, akalipo yumo ugwa kuti in ali nafyo fyake mwene, loli balinkulilanila fyosa itolo. 33Popapo abatumigwa balinkusisimikisya namaka amakulumba isya kusyuka kwa Ntwa Yesu; lyope ilipyana li lingi itolo lilinkuya nabo bosa. 34Namanga akalipo yumo uyu agilwaga, papo bosa aba bali nifisu naba bali ninyumba balinkulisya, balinkutwala indalama sya ifi bulisyaga, 35balinkusibika mmaka ga batumigwa, balinkubayabila yumo yumo ukufwana nukwagilwa kwa mundu gwesa. 36Bunobuno Yosefu uyu abatumigwa balimpele iya Barnaba, (ko kuti “nnya lusubisyo”), ugwa kikolo kya Levi uyu afumile nkisu kya Saiprasi, 37yo alinkulisya ungunda gwake; bo ulisye, alinkutwala indalama, alinkusibika mmaka ga batumigwa.

Currently Selected:

IMBOMBO SYA BATUMIGWA 4: NNBII

Highlight

Copy