UBWANDILO 19

Ukupyutigwa kwa Sodomu na Gomora

1Popapo abandumi babili bala balinkwakufika nkaya ka Sodomu namayolo; Loti alitugele apa babunganaga pa kipata kya kaya ka Sodomu. Lelo bo ababwene alinkusumuka alinkwakubambilila, alinkubaponia nulugindiko, 2alinkubabula alinkuti, “Mwe Batwa, bangu nikubasuma ukuti mupaguke, mwise ku nyumba yangu ne mbombi gwinu ukuti ko mugone, kangi musugusule amisi mmalundi; po lelo mwise mutemelelege nulubunju fiyo ukubuka injila yinu.” Abene balinkuti, “Mma, tukugonaga itolo mumpulo.” 3Loli Loti alinkubumilisya fiyo; popapo balinkupaguka balinkwingila nnyumba yake; umwene alinkubatendekekesya ifyakulya, kangi nifisyesye ifisita nkese, balinkulya. 4Lelo bo bakali nukulambalala, popapo abandu ba nkaya kala ka Sodomu, abakeke na bakusi, na bandu bosa ukwakufika pa bapasi fiyo balinkwisa kuyisyungutila inyumba. 5#Balo 19.22-24Balinkunkolela Loti balinkuti, “Balikugu abandu aba bingilaga nnyumba ikilo iki? Ubasosye ukuti tubamanye.” 6Umwene Loti alinkusoka ukwakwaganila nabo, alinkwenda nukwigalako ku kifigo, 7alinkuti, “Mwe bamyitu, nikubasuma ukuti mungabombaga imbibi bo sisisi. 8Keta une ndi nabo abanangu abalindwana babili aba bakammanyamo nu nnyambala; bo mbatwalilege umwe, ukuti mubombege nabo syosa isi mwiganile; loli abandu aba bo mungababombelaga nasimo, namanga bingile nkitembe fyangu ukuti mo baponele.” 9Abene balinkuti, “Sokapo!” Kangi balinkuti, “Umundu uyu alisile nkupona itolo muno, yo kangi ikulonda ukuya gwakutulonga uswe! Lilino lelo po tukuya pakukubombela ugwe imbibi fiyo ukukindapo na bababa.” Abene balinkumumilisya fiyo, balinkusegelela mbupipi ukuti bonangege ulwigi. 10Popapo abandu bala balinkugolosya amaboko gabo balinkunkwabila Loti nnyumba mumo balimo, balinkwigalako ku kifigo. 11#2 Banyaf 6.18Balinkubapelela ingisi abandu bosa bala bali pakifigo fya nyumba, abanandi na bakulumba, popapo abene balinkusita nukufyaga ikifigo.

Loti ikwepukamo mu Sodomu

12Po lelo abahesya bala balinkundalusya Loti balinkuti, “Ngimba ulipo nagwe yumo uyungi mumo, abako bako, abanako abanyambala na bakikulu, pamo bamo aba uli nabo nkaya, ukabasosye; 13namanga tukuya pakukapyuta akaya aka, papo inguto iyi yiliko panongwa ya bandu ba nkaya aka, ngulumba fiyo nkyeni mu Ntwa, fyobene umwene atutumile uswe ukuti twise tukapyute akaya kakaka.” 14Popapo Loti alinkusoka, alinkwakuyoba na bako bake aba bayaga bakwegana na banake abalindwana, alinkuti, “Sumuka musokemo muno; namanga Untwa ikuya pakukapyuta akaya aka.” Loli silinkufwana sunga itolo kumyabo.

15Lelo bo kukuya pakukya, popapo abandumi bala balinkumumilisya Loti balinkuti, “Sumuka, umwegege unkasigo, na banako abalindwana bo babili aba balipo papapa, ukuti mungisakupyutiligwaga lumo nabandu ba nkaya aka ndufundo lwabo.” 16#2 Pet 2.7Umwene Loti alinkwilabasya-labasya; popapo abandu bala nkisa fya Ntwa balinkunkola pakiboko Loti nu nkasi kangi na banake abalindwana bo babili; balinkunsosya balinkwakumbika kunja kwa kaya kala. 17Lelo bo bansosisye balinkumbula balinkuti, “Bopaga mubuponesye ubumi bwinu, mungaketangako kunyuma, nalinga kokwima pabuyo bumo ubwa muntebela muno; mubopelege kufyamba ukuti mungisakupyutigwaga.” 18Umwene Loti alinkubasuma alinkuti, “Mwe batata, Keta ne mbombi gwinu ndyagile ilipyana nfyeni mmyinu, 19kangi munnangisye ikisa ikikulumba pakubupoka ubumi bwangu; loli ngabagila ukubopa ukuti ngafike kufyamba, pakumo ulupyuto lwisakunyagila mu njila po nende nukufwa. 20Amukete akaya kala kali pa bupipi ukuti mo ngaponele, kangi kanandi itolo, natigi mo mbonele mulamula.” 21Umwene ugwandumi gwa Ntwa alinkumwamula Loti alinkuti, “Syo nnunu itolo, ngwitikisye syosa isi usumile, ndikukapyutaga akaya aka uyobile. 22Endelelaga, ubopelege kuko; papo ngabagila ukubomba simo bo ukali nukufika.” Bunobuno akaya kala kalinkubilikiligwa ingamu ya Zoara.#19.22 Zoara: ko kuti akanandi. 23Ilisuba lyasokaga itolo apa Loti ingilaga nkaya ka Zoara.

Ukupyutigwa kwa Sodomu na Gomora

24 # Mat 10.15; 11.23-24; Luk 10.12; 17.29; 2 Pet 2.6; Yuda 7 Popapo Untwa alinkutuma ikibiliti numoto ukufuma kumwanya, filinkwisa nkaya ka Sodomu na Gomora, yilinkufwana fula yikutima; 25alinkutupyuta utwaya tula na gu ntebela gosa pamopene na babenekisu, na fyosa ifi fyamelile pakisu. 26#Luk 17.32Loli unkasi gwa Loti ali kunyuma ankongaga undume, yo alinkuti ngete kunyuma, popapo alinkwipela ukuya ibungila lya munyu. 27Lelo ilisiku lilalila Abrahamu alinkwakwima pabuyo bula alyimilepo bo alinkyeni mu Ntwa; 28alinkuketa ku kaya ka Sodomu na ka Gomora kangi na nkisu kyosa ikya ntebela, alinkulibona ilyosi bo likufyuka ukufuma pakisu, lilinkufwana bo li lyosi lya mung'anjo ya moto.

29Bo silinkuya bunobuno, apa Kyala atupyutaga utwaya tula twa muntebela, alinkunkumbuka Abrahamu, alinkunsosyamo Loti nkati ndupyuto bo ikutupalagania utwaya tula mumo Loti itugalaga.

Ikifumo kya banya Moabu na banya Amoni

30Umwene Loti papo atilaga ukuyenga nkaya ka Zoara, alinkufyuka nukwakuyenga mfyamba; alinkwakwitugala mu mbako pamopene na banake abalindwana bo babili bala. 31Popapo umwanake undindwana unkulumba alinkuyoba ku nnandi alinkuti, “Tata ikukangala, akayamo nayumo unnyambala nkisu kyosa uyu abagile ukutwega uswe ukufwana nulwiho lwa kisu. 32Oko, tunnwesye ubwalwa bwa mafilu ukuti ingile mmyitu, bunobuno twisakulwagilaga uluyungu lwitu mwa tata.” 33Popapo ikilo kikyo balinkunnwesya ugwisabo ubwalwa bwa mafilu; unkulumba alinkwingila alinkwakugona nu gwise; umwene ugwise yo alinkusita nukumanya nakamo papo umwanake isaga napa asumukilaga. 34Pisiku lya kilabo, unkulumba alinkuyoba ku nnandi alinkuti, “Mmayolo une nagonile na tata; oko, tunnwesye kangi ubwalwa bwa mafilu ikilo iki; po nanugwe gwise gwingilege ukwakugona nagwe, ko kuti tulwagilemo uluyungu mwa tata.” 35Kyope nikilo kilakila balinkunnwesya ugwisabo ubwalwa bwa mafilu popapo unnandi alinkusumuka alinkwakugona nagwe; umwene ugwise yo alinkusita nukumanya nakamo apa umwanake isilaga napa asumukilaga. 36Bunobuno bo babili abana ba Loti abalindwana balinkwambilila ififuba panongwa yakugona nu gwisabo. 37Unkulumba alinkupapa umwana undumyana, alinkumpa ingamu ya Moabi; yuyuyu yo gwisabo gwa banya Moabi, ukufika na ku lilino kuno. 38Yope unnandi alinkupapa umwana undumyana, alinkumpa ingamu ya Beni-ami; yo gwisabo gwa banya Amoni ukufika naku lilino kuno.

Currently Selected:

UBWANDILO 19: NNBII

Highlight

Copy