UBWANDILO 30

Rakeli ikumbikila ubufi unkulu gwake Leya

1Umwene Rakeli bo agile ukuti akampapilamo nayumo umwana Yakobu, popapo alinkuya nubufi nu nkulu gwake, alinkumbula Yakobu, alinkuti, “Mbapo abana, linga utikumba po ngwigogaga.” 2Umwene Yakobu alinkunkalalila Rakeli alinkuti, “Ngimba ne Kyala une,” kangi alinkuti, “Kali youne ne ngukukanisya ukupapa abana?” 3Popapo Rakeli alinkuti, “Oko, umwegege Biliha umbombi gwangu undindwana uyu ali apa, yo ayege nkasigo; ambapilege abana mbagatege, ko kuti mbagilege abana mmyake.” 4Popapo Rakeli alinkumpa undume umbombi gwake Biliha ukuti ayege nkasi gwake, Yakobu alinkwegana nagwe. 5Biliha alinkwambilila ikifuba alinkumpapila Yakobu umwana undumyana. 6Rakeli alinkuti, “Kyala andongile inongwa yangu, apilike Ulwiputo lwangu, ambele umwana undumyana;” 7alinkumpa ingamu ya Dani.#30.7 Dani: ko kuti ambimile ukuya nganigwa. Untumwa gwa Rakeli yula alinkuya nikifuba kangi, po lelo alinkumpapila Yakobu umwana undumyana ugwa bubili. 8Rakeli alinkwinogona alinkuti, “Ndwile nu nkulu gwangu nendile nukuntola.” Popapo alinkumpa ingamu ya Nafutali.#30.8 Nafutali: ko kuti ukulwa. 9Yope na Leya bo agile ukuti alekile ukupapa, alinkumwega Zilipa umbombi gwake undindwana, alinkumpa undume gwake Yakobu ukuti ayege nkasi. 10Popapo Zilipa alinkumpapila Yakobu umwana undumyana. 11Leya alinkuti, “Ndi nulusako!” Alinkumpa ingamu iya Gadi.#30.11 Gadi: ko kuti gwalusako. 12Umbombi gwa Leya undindwana uyu ali yo Zilipa, alinkumpapila Yakobu umwana undumyana ugwa bubili. 13Leya alinkwinogona alinkuti, “Bo busangalufu buki une! Buno abakikulu abinangu bisakunjobaga une ubusangalufu,” popapo alinkumpa ingamu ya Asheri.#30.13 Asheri: ko kuti ubusangalufu.

14Mmasiku gakutondolela ingano, Rubeni alinkubuka mmigunda, alinkwenda nukwapako niseke simo sya mpiki gwa findongomilo, alinkuntwalila unna Leya. Popapo Rakeli alinkusuma kwa Leya alinkuti, “Natigi umbeko simo iseke sya mpiki gwa bukundwe isi umwanako atwele.” 15Loli Leya alinkumwamula alinkuti, “Ngimba ugwe kwinogona ukuti kandu kapepe itolo ukumboka undume gwangu? Ngimba kulonda nukupoka na si seke sya mpiki gwa findongomilo isi umwanangu atwele?” Umwene Rakeli alinkwamula alinkuti, “Po lelo umbeko iseke sya mpiki ugu isi atwele umwanako, ko kuti undume gwangu ise agone nnyumba yako ikilo iki.” 16Namayolo bo Yakobu ikugomoka ukufuma ku ngunda, Leya alinkusoka ukwakwaganila nagwe alinkumbula alinkuti, “Ubagile ukwakugona kumyangu, papo lilino ngulile ugwe niseke sya mpiki gwa findongomilo isi umwanangu utwele.” 17Popapo Yakobu alinkwakugona nnyumba ya Leya ikilo kilakila. Kyala alinkupilika ulwiputo lwa Leya, alinkuya nikifuba, alinkumpapila Yakobu umwana undumyana ugwa buhano. 18Umwene Leya alinkwinogona alinkuti, “Kyala ambele une ifihombigwa fyangu, namanga undume gwangu nalimpele umbombi gwangu unkikulu.” Bunobuno alinkumpa ingamu ya Isakara.#30.18 Isakara: ko kuti ifihombigwa 19Leya alinkuya nikifuba kangi, alinkumpapila Yakobu umwana undumyana ugwa buhano nayumo. 20Popapo Leya alinkuyoba alinkuti, “Kyala ambele une ikyabupe ikinunu; lilino po undume gwangu ikungindikaga; namanga mumpapile abana bahano nayumo.” Bunobuno alinkupa ingamu ya Zebuloni.#30.20 Zebuloni: ko kuti ambilila ikyabupe. 21Panyuma lelo po Leya alinkupapa umwana undindwana yo alinkumpa ingamu ya Daina. 22Po lelo Kyala alinkunkumbuka Rakeli, alinkupilika ulwiputo lwake, nukumwigula imbapo. 23Alinkuya nikifuba, alinkupapa umwana undumyana; Rakeli alinkuyoba alinkuti, “Kyala epwisye isoni syangu.” 24Alinkumpa ingamu ya Yosefu#30.24 Yosefu: ko kuti ukongelelako. alinkwiputa ukuti Untwa amongelele umwana uyungi undumyana.

Labani ikwitikana na Yakobu

25Bo Rakeli ampapile Yosefu, Yakobu alinkumbula Labani alinkuti, “Natigi unyitikisye ngomokege, mbukege kumyitu. 26Umbepo abakasi bangu aba nalyegile pakukubombela ugwe imbombo, kangi na ba banangu ukuti mbukege; papo nanugwe uyimenye itolo imbombo iyi mbombile.” 27Loli umwene Labani alinkumwamula alinkuti, “Nsimanyile mbulagusi ukuti, Untwa ambelile mmyako ulusayo ulu ndinalo. 28Umbulege lelo ifihombigwa ifi kufilonda ukuti ngupege.” 29Umwene Yakobu alinkwamula alinkuti, “Usimenye itolo nanugwe na mumo ngubombile ugwe, kangi na mumo imitimo gyako gyolokile bo ngutima. 30Namanga gwali nagyo minandi itolo bo ngali ukwisa, loli lilino gibele fiyo. Untwa akusayile ugwe posa apa nakubombelaga. Lelo lilino po ngwakubabombelaga ndili aba nnyumba yangu?” 31Labani alinkundalusya Yakobu alinkuti, “Ngimba gwalondaga ukuti ngupe fiki?” Umwene Yakobu alinkwamula, alinkuti, “Ndikuti umbepo kamo akandu mma. Loli une nikwitika ukutima imitimo gyako kangi, linga ugwe kwitika ukumbombela isi: 32oko, nendemo mmitimo gyako gyosa umusyugu, ukuti nepusyengemo utu ng'osi ututitu tosa nutupene tosa ututononde nutukekanie, tututu to tukuyaga go mfwalo gwangu. 33Bunobuno lelo po gwisakubwagaga ubwanaloli bwangu bo kubala, apa linga gwisile kutwagamo muntimo utung'osi utu tukaya tutitu ntupene utu tukaya tutononde, pamo tukekanie po gwise umanyege itolo ukuti nhiyile mu ntimo gwako.” 34Umwene Labani alinkwamula alinkuti, “Mma, nnunu itolo, oko lelo siyege bo mumo uyobile.” 35Lelo mwisiku ulilyo Labani alinkusosyamo mu ntimo gwa mbene, imbongo syosa isi syali ngololanie na isi syali ndononde, kangi nimbene syosa isi syali ngekanie pamo ndononde, alinkusisosyamo ni ng'osi syosa isi syali nditu. Alinkubapa abanake ukuti basitimege. 36Alinkwepukako kwa Yakobu nu ntimo gwake, ukufwana nu lwendo lwa masiku matatu. Umwene Yakobu yo alinkutima imitimo gya Labani iminine.

37Popapo Yakobu alinkwega utupiki utubisi, akapiki ka mutobo, aka alimondi, na kapiki ka Sindila. Alinkutukobola amapatu munyuma apa na apa, ukuti akapiki kosa kaye nubulabame. 38Utwene utupiki utu atukobwile to alinkutwimika mfipondo ifi imitimo gyanwelangamo amisi, nkyeni mmitimo gyake igi gisaga pakunwa amisi. Linga imitimo gila gipingwile popapo gilinkwesigwa palapala nkyeni ntupiki tula. 39Yo nongwa iyi mmitimo gyake gila mwafumangamo imbene isulula, ingekanie ni ndononde. 40Isyene ing'osi sya Yakobu syo Labani alinkusipagula, alinkusilabikisya amaso ku mitimo gya ng'osi sya Labani inyambala isi syali sulula, nisi syali ngekanie; bunobuno Yakobu alinkugubasya untimo gwake alinkusibika pasima isi sikafwene nisya mu ntimo gwa Labani. 41Kangi isya maka syosa mu ntimo gula apa linga sipingwile sikuya pakwesigwa, po Yakobu alinkubika utupiki tula nkipondo iki syanwelangamo amisi nkyeni mu ntimo, ukuti syesigwege nkyeni ntupiki tula. 42Loli isyene isi sikali na maka syo Yakobu alinkusita nukusibika nkyeni ntupiki tulatula, bunobuno isita maka silinkuya sya Labani, isya maka silinkuya sya Yakobu. 43Mo Muno kyabalile ikyuma kya Yakobu alinkuya nkabi fiyo: ali nimitimo gi mingi, na batumwa, ningamila kangi ni mbunda.

Currently Selected:

UBWANDILO 30: NNBII

Highlight

Copy