YOHANI 7

Yesu nabamyabo

1Panyuma pali sisisi, po Yesu alinkusyungutila nkisu kya Galilai; namanga akaliganile ukusyungutila mu Yudai, papo abaYuda balondaga ukungoga. 2#Levi 23.34; Kukumbu 16.13Lelo iKyaka kya baYuda ikya masasa kyasegelile. 3Popapo abanuguna bake balinkumbula Yesu balinkuti, “Sokapo apa ubukege nkisu kya Yudai, ukuti bope abafundigwa bako bakasibonege imbombo isi kubomba. 4Buno nayumo atikubombela fimo mbutitu, bo umwene ikulonda ukuti ayege pabwelu; linga syo kubomba sisisi, po gwinangisyege kukisu!” 5Namanga bope nabanuguna bake bakamwitikaga. 6Umwene Yesu alinkubabula alinkuti, “Akabalilo kangu kakali, loli umwe akabalilo kinu kalipo bwila. 7Umwe ikisu kikabagila ukubabenga, loli une kikumbenga papo nikukisisimikisya ukuti imbombo syake mbibi. 8Umwe loli fyukaga kuKyaka, une ndikufyukako kuKyaka kikiki papo akabalilo kangu kakali ukufikapo.” 9Bo ababulile sisisi, popapo alinkusyala mu mu Galilai.

10Lelo bo abanuguna bafyukile ukubuka kuKyaka, popapo yope alinkufyuka, alinkusita nukwenda pabwelu. Loli alinkwendela mbutitu. 11Abene abaYuda balinkundonda paKyaka, balinkuyoba balinkuti, “Ali kugu umwene?”

12Kulinkuyapo ukuhehanila ku kwingi, mfilundilo fya bandu bamo balinkuti, “Mundu nnunu,” abangi balinkuti, “Mma, buno ikubasofya abandu.” 13Loli akalipo yumo ugwa kunjoba pabwelu, papo babatilaga abaYuda.

14Lelo bo iKyaka kifikile pakati popapo Yesu alinkufyuka, alinkwakwingila Nnyumba ya Kyala alinkumanyisya. 15Popapo abaYuda balinkuswiganika, balinkulalusania balinkuti, “Umundu uyu agagile kugu amahala apa umwene akaya mmanyi?” 16Umwene Yesu alinkubamula alinkuti, “Ulumanyisyo ulu nikumanyisya lukaya lwangu, loli lwa yuyo andumile. 17Uyu linga ikulonda ukubomba isya bwigane bwa Kyala, yo isakulumanyaga ulumanyisyo linga lufumile kwa Kyala pamo lwangu nimwene. 18Uyu linga ikuyoba isyake mwene, yo ikwilondela ubukulumba bwake mwene; loli uyu ikubulonda ubukulumba bwa uyu antumile, yo gwa naloli, yo ubusyobi bukayamo mmyake. 19Ngimba Mose akabapele indagilo? Pope akayamo yumo mmyinu uyu ikukonga indagilo. Po fiki mukulonda ukungoga lelo?” 20Popapo ikilundilo kilinkumwamula kilinkuti, “Uli nimbepo inyali; ywani ikulonda ukukugoga?” 21Umwene Yesu alinkubamula alinkuti, “Nabombile akabombo kamo mwesa mulinkuswiga. 22#Bwa 17.10; Levi 12.3Umwene Mose abapele ulwiho ulwa bubutigwa (kukaya ko kuti lwafumile kwa Mose, loli lwafumile kwa batata), bunobuno umwe mukumbutako umundu pisiku fya Sabati. 23#Yoh 5.9Lelo linga umundu ikwambilila ububutigwa pisiku fya Sabata, ukuti ululagilo lwa Mose lungisakomoligwaga, po mwati mungalalilege une bo numbumbulwisye pisiku fya Sabati umundu ukuti aye nnunu itolo? 24Mungalongelaga inongwa mbundu bwa bandu, loli mulongelege mbugolofu.”

Yo yu Kristi

25Popapo abandu bamo aba mu Yerusalemu balinkuyoba balinkuti, “Kali akaya yo yuyo, uyu bikundonda ukuti bangoge? 26Keta lelo ikuyoba pabwelu itolo, loli abene batikuyoba nalimo! E, kingamo abakulumba bammenye naloli ukuti yo yu Kristi? 27Namanga umundu uyu tummenye kuno afumile, loli bo ikwisa Kristi, nayumo atisakumanyaga kuno afumile.” 28Lelo bo Yesu ikumanyisya Nnyumba ya Kyala alinkukolela alinkuti, “Mummenye une, kangi mumenye nakuno mfumile; ngisa nimwene une, loli uyu andumile yo gwa naloli, uyu umwe mukamanya. 29Une nummenye, papo ko kuno mfumile, kangi yo yuyo alindumile.” 30Popapo balinkulonda ukunkola, loli alinkusita nukuyapo yumo ugwa kumpalamasya, papo akabalilo kake kakali ukwisa. 31Abandu ba bingi nkilundilo balinkumwitika, balinkuyoba balinkuti, “Bo ikwisa Kristi, kali isakupelaga ifika ukukinda ifi ikupela uyu?” 32AbaFarisai balinkupilika isi bibubusyaga abandu panongwa yake, popapo abaputi abakulumba nabaFarisai balinkubatuma ababombi babo ukuti bakankole. 33Umwene Yesu alinkuyoba alinkuti, “Pasyele panandi apa nikuyaga nanumwe, lelo po nisakubukaga kuli yuyo alindumile. 34Mwisakundondaga, loli mutisakunyagaga; kangi kuno ndiko une, ko mukabagila ukwisako.” 35Popapo abaYuda balinkulalusania balinkuti, “Kali ikulonda ukubuka kugu yuyuyu, kuno tukabagila nukwakumwaga? Kali ikuti mbuke kuli aba babalamle mbaGriki kukubamanyisya abaGriki? 36Ikuyoba isyu iki lilili apa ikuti, ‘Mwisakundondaga, loli mutisakunyagaga, kangi kuno ndiko ko mukabagila ukwisako?’ ”

Amisi aga gikupa ubumi

37 # Levi 23.36 Pisiku ilikulumba ilya bumalikisyo bwa Kyaka, Yesu alinkwima, alinkukolela alinkuti, “Uyu linga umilwe, yo isege kumyangu anwege. 38#Eze 47.1; Zeka 14.8Uyu linga ikunyitika une, yo isoko sya misi aga gikupa ubumi sisakwigukaga mmyake, bo mumo amasimbo gikuyobela.” 39Lyo anjobaga yu Mbepo, uyu aba bamwitike bayaga pakumwambilila, namanga Mbepo akali, papo Yesu akali ukwingila mbukulumba.

40Lelo bamo aba nkilundilo bo bagapilike amasyu gagaga, balinkuti, “Uyu yo nsololi naloli.” 41Abangi balinkuti, “Yo yu Kristi;” loli abangi balinkuti, “Kali Kristi ikufuma nkisu kya Galilai? 42#2 Samu 7.12; Mika 5.2Ngimba amasimbo gatikuti, ‘Kristi ikufumaga nduyungu lwa Davidi, nukuti ikufumaga nkaya ka Betelehemu, akaya aka ayangamo Davidi?’ ” 43Popapo lulinkuyapo ulutapukano nkilundilo panongwa yake. 44Bamo balinkulonda ukunkola, loli alinkusita nukuyapo yumo ugwa kumpalamasya.

45Popapo ababombi bala balinkubuka kubaputi abakulumba na ku baFarisai; abene balinkubalalusya balinkuti, “Mukantwala fiki?” 46Abene ababombi balinkwamula balinkuti, “Nayumo umundu akayobamo bo mumo ikuyobela umundu yuyuyu!” 47Popapo abaFarisai balinkubamula balinkuti, “Kingamo nanumwe abasofifye itolo? 48Kali alipo yumo mbakulumba pamo mbaFarisai uyu amwitike? 49Mma, loli ki kilundilo iki ikya bandu aba bakasimanya indagilo — abandu aba bagunigwe.” 50#Yoh 3.1-2Yumo umwinabo, uyu ali yo Nikodemu, (uyu lumo abukile kwa Yesu) alinkubabula alinkuti, 51“Kali ululagilo lwitu lukundonga umundu kisitakumpilikisya tasi nukumanya isi ikubomba?” 52Abene balinkumwamula balinkuti, “E, kingamo nanugwe ufumile nkisu kya Galilai? Ulonde fiyo, kwisakwaga ukuti unsololi atikufumamo mu Galilai.”

Unkikulu uyu akoligwe mbulogwe

[53Popapo balinkubalanila ukubuka uyu kukaya kake, uyu kukaya kake,

Currently Selected:

YOHANI 7: NNBII

Highlight

Copy