LUKA 10
10
1YI kunyuma kwa bintu bebi, kwakalungika Fumu banga beyi kabidi masangi sambwali, yi akabatuma ku babidi ku babidi ku buxi bwa mpala anci kuya ku bula bwoso yi ku kidi kioso kuxelwayi mikyenci. 2Yi akabatôyela ene, Masangu amapya adi mangi, mo basadi badi babende ; mbwôso nulombeli Fumu a masangu atumi basadi ku masangu anci. 3Nuyi ; mona, meme nwatuma bea bana ba mikwakwa pakacikaci pa ngasama. 4Kanucwadi ndo nkonka a mpalata, ndo mwosokye, ndo makaka ; yi kanwedi muntu mwoso môyo ku ncila. 5Yi mu ncibo mwoso mununabwela, nutôyi buxi ene, Polo akali yi ncibo you. 6Yi ndo mwana a polo udi koku, polo enu unakala kulu kwanci ; kaninga ndo kienako, unapiñana kunudi kabidi. 7Yi nusali mu ncibo you, nudi mu kudya yi kunwa bintu binupapabo ; bwalo bwalelekyela musadi yi difuto dienci. Kanuncuki kuya ku ncibo ku ncibo. 8Yi mu bula bwoso munwabwela yi banwangata, nudi bintu biamatekyebwa ku mpala enu, 9yi nupandisi bena masama badi momu, yi nubatôyeli ene, Bufumu bwa Ncembi bwamakokyela pepe yinenu. 10Kaninga mu bula bwoso mununabweia yi kabasonwangata, nuyi mu mielongo yabo, yi nutôyi ene, 11Isanga yimbwi ya bula bwenu yamanamata ku makasa ecu, tuyakupulula ku bwalo bwenu ; kaninga nulubukwi noku ene, bufumu bwa Ncembi bwamakokyela pepe. 12Nwatôyela ene, lopelo lwa Sodomo lunakala lubende ku dituku yidia, mo lopelo lwa bula bobu lunakala lungi. 13Mpeya kudi, Kolasini ; mpeya kudi, Betesaida ; bwalo bwa makisa a ngulu amakwencebwa kwenu, ximbi akakwencebwa ku Tile yi ku Xidono, baxedibela kalikali, baxikamini mu makutu yi macu. 14Kaninga lopelo lwa Tile yi lwa Xidono lunakala lubende ku diba dia lopelo, yi lopelo lwenu lunakala lungi. 15Yi owe Kapenaumu, wamabandixibwa ku diulu, unapwexebwa isanga ku Adese. 16You unwombombwa nonu ungwombombwa meme, yi you unwanyañana nonu ungwanyañana meme, yi you ungwanyañana meme umwanyañana akangutuma.
17Yi beyi masangi sambwali bakapinana yi kiango ene, Fumu, isanga bidimu bibi biamatwedeya ku dina diebe. 18Yi akabatôyela ene, Nakamona Satana udi mu kupona ku diulu bea luna musadi ă kapenya. 19Mona, namanupa bumanya bwa kunyata nyoka yi tuminyi muxi, yi kulu kwa ngulu mioso ya mutandañani you ; yi kakuna kintu kinanutatisa pô. 20Kaninga kanuxekyeledi bwalo bobu ene, bidimu bibi biamanwedeya, mo nuxekyeleli bwalo bwamafundibwa mena enu mu diulu.
21Ku ola you kwakaxekyelelayi mu kidimu kienci ene, Nkwatumbisa Tete, Fumu a diulu yi a loboko, bwalo bwamasokoka bintu bebi kudi bena bwinu yi bena nkanyi, yi wamabiebesa kudi babaki ; E, Tete, bwalo bwapwakala bimpe ku meso ebe ndo kukisa nako. 22Bintu bioso biamangulongolebwa kudi Tetemi ; yi kakuna muntu ubili Mwana udiyi, utena Tete ; yi Tete udiyi, utena Mwana, yi muntu mwoso ananga Mwana kumwebesa. 23Yi akakulumuka kudi beyi banci yi akabambila ku busoko ene, Meso adi malwangwasana amona bintu binwamona nonu ; 24bwalo bunwatôyela ene, badimuxi bangi yi bafumu bangi bamakyeba kumona bintu binwamona, yi kababimonene ; yi bamakyeba kwombwa bintu binwombombwa nonu, yi kababiombwel.
25Yi mona, mweyexi a bwadi akakwemana yi akamwelekyesa ene, Mweyexi, nxekwenca kai ndo kukita môyo ă kô kô mwokito ? 26Yi akamwambila ene, Mu bwadi mwamafundibwa beci ? Wabala beci ? 27Yi akapingasa ene, Unananga Fumu Ncembi ebe ku mucima ě be muncimancima, yi kidimu kiebe kincimancima, yi ngulu yebe mincimancima, yi lukanyi lwebe luncimancima ; yi unananga muna kwebe bea mikyebe. 28Yi akamutôyela ene, Wamapingasa yi nkwami ; enca nako yi unakala yi môyo. 29Mo yei akakyeba kudisuwisa akatôyela Yisu ene, Mo ñani udi muna kwami ? 30Yi Yisu akapingasa ene, Muntu akapweka ku Yelusaleme kuya ku Yeliko ; yi akapona ku bianca bia befi, bakamupulula bilamba bienci, yi bakamukuma bintu, yi bakancuka bamamuxiya utanalanda kufwa. 31Yi bokanda bwakapweka pa ncila you kanana, yi pakamumonayi akadika ku munga mwanca. 32Yi mo nako kabidi muna Lebi akaiwa ku kidi, yi pakamumonayi akadika ku munga mwanca. 33Mo muna Samalia, biakakwendayi ku lwendo lwanci, akalwa kwakadiyi ; yi pakamumonayi akakwombwa mwengo, 34yi akalwa kudiyi, yi akasuka mbuta yenci bitambala pakadi amakwela manyi yi finyo ; yi akamwapeya kulu kwa nyama anci mikyenci, yi akamucwala ku ncibo a benyi, yi akamubungula. 35Mankyelo lolo akapaula mpalata ibidi, akayilongola kudi muna ncibo, yi akatôya ene, Umubunguli, yi minga mpalata mioso yinaleke owe, meme, bindolwa kabidi, nakukufuta. 36Owe wencenca beci ? Ñani a bantu baba basatu akadi muna kwanci a you akapona ku bianca bia befi ? 37Yi akatôya ene, You akamwombwela mwengo. Yi Yisu akamutôyela ene, Yaka ya kisi mo nako kabidi.
38Yi pakakwendabo ku lwendo, akabwela mu bula bunga ; yi mwamukaxi, dina dienci ene, Mata, akamwangata mu ncibo anci. 39Yei lolo akadi yi mwakunyenci dina dienci ene, Mali, akaxikama kabidi ku makasa a Fumu yi akakwombwa diyi dienci. 40Mo Mata akadixengaxenga bwalo bwa mudimo ă mesa mungi, yi akalwa kudiyi ene, Fumu, kusodinyingisa bwalo bwamanguxiya mwakunyami meme nkisi mudimo ă mesa mikyemi mutupu ? Mbwôso umutôyeli ene, angusadisi. 41Mo Yisu akapingasa yi akamutôyela ene, Mata, Mata, udi yi mutete yi wamanyingixibwa bwalo bwa bintu bingi ; 42mo kintu kimokimwe kidi bwalo, yi Mali amasungula dikapa didi kunengela, ditasomuncudibwa.
Currently Selected:
LUKA 10: Luna_NT
Highlight
Share
Copy
Want to have your highlights saved across all your devices? Sign up or sign in
© La Société biblique de Genève
