LUKA 11

1YI pakadiyi mu kulomba mu kinga kidi, pakalekyelayi, munga mweyi anci akamwambila ene, Fumu, utweyesi kulomba bea biakakweyesa Yoano kabidi beyi banci. 2Yi akabatôyela ene, Binwalomba, nutôyi ene, Tete, dina diebe diakali kincila. Bufumu bwebe bulwi. 3Utupi bidya biecu bia lwedi ku dituku ku dituku. 4Utulekyeli mabi ecu, bwalo butwalekyela kabidi muntu mwoso udi yinecu muna mbata. Yi kutufikixi munda mwa kielekyexelu.

5Yi akabatôyela ene, Muntu kai udi yinenu unakala yi kimbila, yi unaya kudiyi pakacikaci pa butuku yi unamutôyela ene, Kimbila, ungusombwesi mampa asatu. 6Bwalo bwamalwa kimbila kiamene kundi udi ku lwendo, yi kiena yi kintu kia kuteka ku mpala anci. 7Yi you a munda unapingasa ene, Kungunyingixi ; mbelo udi muncibika nkyekyu, yi bana bamene badi mu ntangi, yi meme kabidi ; kisolubukwa kubika ndo kukupa mampa. 8Nwatôyela ene, isanga kanabika ndo kumupa bwalo budiyi kimbila kienci, kaninga bwalo bwa kuxengula kwanci bunabikayi, yi unamupa mampa isanga lwedi lwoso Iwanangayi. 9Yi meme nwatôyela ene, Nulombi yi nunapebwa ; nupalali yi nunasokolola ; nukwakwali yi nunadipudibwa mbelo, 10Bwalo bwa muntu mwoso alomba unangata ; yi you apalala unasokolola ; yi kudi you akwakwala kunamudipudibwa. 11Muntu kai udi yinenu apwakala tete, aka mwananci unamulomba dimpa unamupa dibwe ? Sungu ndo yixi, yi ku mucwe ă yixi unamupa nyoka ? 12Sungu ndo unalomba dinyu unamupa kaminyi ? 13Mbwôso ndo nonu badi babi nubili kulonga bana benu malongi anengela, ki Tetenu utani mu diulu unadika kubalonga Mwoxixi a babala bamwalomba ?

14Yi akadi mu kupaula kidimu kibi kiakadi kimeme ; yi pakadi kidimu kiamapauka, muna kimeme akatôya ; yi bimbukuma bia bantu bakakama kama. 15Kaninga banga bakadi yinabo bakatôya ene, Kudi Belesebubu, fumu a bidimu bibi, ndo kwapaulayi bidimu bibi. 16Yi banga bakamwelekyesa yi bakapalala kilayixilu kia ku diulu. 17Mo yei akalubukwa nkanyi yabo yi akabatôyela ene, Bufumu bwoso ndo bwamadisambukila bulolwa Iwobuncu lutupu ; yi ncibo ndo atanda yi ncibo unapona. 18Yi ndo Satana kabidi amadisambukila, bufumu bwanci bunakwemana beci ? Bwalo bunwatôya ene, ngwapaula bidimu bibi kudi Belesebubu. 19Mo meme ndo ngwapaula bidimu bibi kudi Belesebubu, bana benu pako babiapaula kudi nani ? Ku bwalo bobu, bobo banakala basambodi benu. 20Mo ndo ngwapaula bidimu bibi ku lulembu lwa Ncembi, mbwôso bufumu bwa Ncembi bwamafika kunudi. 21Pakala muna ngulu amanama lumbu lwanci yi bipiko bienci bioso, bima bienci biapwakala polo ; 22mo palolwa munga muntu kudiyi amamudika ngulu yi umwapidila, yei unancula bipiko bienci bioso biakakwetabuxilayi, yi unakwabanya bima bienci bia lusancu. 23You utena yinami amatanda yinami ; yi you utasosangila yinami amacakanisa.

24Panakala kidimu kia mbindu kiamapauka munda mwa muntu, kiamakwenda mu bidi biomu, kidi mu kupalala kwomowa ; yi patasosañanakio kwomowa, kiamatôya ene, Nakupifiana mu ncibo amene munakapauka. 25Yi papulwakio, kimwasafiana mukomba yi mubongesa. 26Kunyuma kiyeya kuya diangacila bidimu binga sambwali biamamudika mikyenci bubi, yi biamabwela munda yi biamakala momu ; yi mwakadilu ă muntu you ă kunyuma ămadika mwakadilu ă buxi bubi.

27Yi pakatôyayi meyi aa, mwamukaxi akakwamena diyi dienci mu kimbukuma kia bantu, yi akamutôyela ene, Mulwangwasanibwi ndo muna difu diakakulela yi muna mabele akanwa Owe. 28Kaninga yei ene, Ya ; kaninga balwangwasanibwi ndo bobo bombombwa diyi dia Ncembi yi badianama nama.

29Mo pakafinafiana bimbukuma, akabanga kutôya ene, Mwociya ou udi mwociya mubi ; ămapalala kilayixilu, yi kilayixilu kakinaupebwa kitena kilayixilu kia Yona. 30Bea biakalwa Yona kilayixilu kudi bena Ninefe binakala Mwana a Muntu kabidi kudi mwociya ou. 31Fumu a babakaxi a ku Sudu unabika ku kimu yi bantu ba mwociya ou yi unababela ; bwalo bwakalwayi pôi ku sula kwa loboko ndo kwombwa bwinu bwa Solomono ; yi mona, muntu adika Solomono udi kunu. 32Bena Ninefe banakwemana ku kimu yi mwociya ou yi banaubela, bwalo bwakadibelabo ku kwambila kwa Yona ; yi mona, muntu adika Yona udi kunu.

33Kakuna muntu umoumwe amanamika mwinda unauteka ku busoko, ndo muxi mwa dikumbu, kate unauteka kulu kwa muci ă mwinda, bixemona bantu obo babwela momu. 34Mwinda ă mumbidi udi diso diebe ; pakala diso diebe didi loko mumbidi ě be muncimancima ăpwakala obo kabidi ; kaninga ndo didi dibi, mumbidi ěbe kabidi ăpwakala mwedima. 35Mbwôso dingila, ximbi obo udi munda mwebe uxeakala mwedima. 36Mbwôso ndo mumbidi ě be muncimancima ăpwakala obo, kutena kicini kioso kidi mwedima, unakwolubilañana yi obo dyendeli, bea luna mwinda ămakutekyela obo yi obo anci kaikai.

37Yi pakatôyayi, muFalixi akamuswala ku bidya bia lubangu ; yi akabwela yi akaxikama ku mesa. 38Mo pakamona muFalixi, akakama kama bwalo butakwowayi mai buxi bwa bidya. 39Mo Fumu akamutôyela ene, Nonu baFalixi nwakusula nkyekyu kunci kwa mpamba yi kwa dilonga ; mo munda mwenu mwamakwolubila yi lusancu yi bubi. 40Badibi, you akapanga kunci ki akapanga munda kabidi ? 41Kaninga nulongoli bintu malongi a bonkangi bidi yinenu, yi mona, bintu bioso bidi susu ku meso enu.

42Kate mpeya kunudi baFalixi, bwalo bunwalambula milambu ya minti yi lue yi kidibwa kioso, yi nwadikisa sambo asambola Ncembi yi nyinga yenci ; nuxekwenca malo aa, yi kanuxedikisa yia. 43Mpeya kunudi baFalixi, bwalo bunwananga bolelo bwa buxi mu bixingidilu, yi kubixibwa ku mabanca a bisalu. 44Mpeya kunudi, bwalo bunulexi yi luna nkita yitasomoneka, yi bantu bendenda kulu kwayo kabasolubukwa.

45Yi munga mweyexi a beyexi ba bwadi akamukulumuna ene, Mweyexi, pa kutôya noku wamatutangola coco kabidi. 46Yi akatôya ene, Mpeya kunudi kabidi, beyexi ba bwadi, bwalo bunwapeya maxitu kulu kwa bantu adi kukola kucwala, yi mikyenu kanusokwata maxitu isanga yi lulembu Iwenu lumolumwe. 47Mpeya kunudi, bwalo bunwabaka nkita ya badimuxi, mo batetenu bakabaxipa. 48Nako nwatôbôlela makisa a batetenu ntôbô, yi nwamakwetabusañana yinao ; bwalo bwakabaxipabo bobo, yi nonu nwabaka nkita yabo. 49Ku bwalo bobu kabidi kwamatôya bwinu bwa Ncembi ene, Nakubatumina badimuxi yi batumibwi, yi banaxipa banga yi banabakolomona ; 50bixedidibwa maxi a badimuxi boso kudi mwociya ou, amacakibwa pôi kibangolelu kia loboko ; 51pôi maxi a Ebele pôi maxi a Sakalia akafwa pakacikaci pa kilongolelu yi pa ncibo ; ya, nwatôyela ene, maxi aa anadidibwa kudi mwociya ou. 52Mpeya kunudi, beyexi ba bwadi, bwalo bunwamancula lufungula lwa bwinu ; nwakadi kanusobwela munda mikyenu, yi bobo bakadi mu kubwela, nwakabakanda.

53Yi pakadi amabatuka momu, bafundi ba mikanda yi baFalixi bakabanga kumusangila kungi kungi, yi kumutôyesa dia malo mangi ; 54badi mu kumupolamina bixemukwatabo ku kutôya kwa musuku ănci.

Currently Selected:

LUKA 11: Luna_NT

Highlight

Copy