युहन्ना 11
11
लाजर मांदु हय्न मरे
1बेतन्या गांव मां तीन भाय बहणस्या रहतेला, लाजर ने तेरे दुय बहणीस मारथा ने मरीयम, एक दाहड़े हेरु भाय लाजर मांदु पड़ गुयु। 2जी चीत मरीयम हतली, ची मालीक ईसुन पाये पर ईत्तर रेचवीन आपसे कान्या सी तेरा पाये नुछली हेरुत भाय लाजर मांदलु हतलु। 3तेरेमां मरीयम ने मार्था लाजरेन बहणीस ईसु धड़े असी कय मकली की, “ए मालीक, देख, तीनाक तु वारु परम राखे चु मांदलु छे।”
4ईसु जी वात सामळीन कह्यु, “जी मांदवाड़ मर जाणु करीन नी आय, बाकुन भगवानेन बड़ाय हवणे करीन, ने ईनी मांदवाड़ेन साहरे भगवानेन पुर्यान बी बड़ाय हवे।”
5ईसु लाजर काजे, ने तेरी बहणीस मारथा ने मरीयम काजे परम करतेलु। 6तेबी जत्यार ईसु सामळ्यु, की लाजर मांदलु छे, ती जां लाजर रहतेलु चां जाणी बुजीन दुय दाहड़ा अळी रय गुयु। 7जी दुय दाहड़ा बीती गुया, ने पछेन ईसु चेला काजे कह्यु, “चालु आपणु अळी पछा यहुदी जीलाम जाजे।”
8बाकुन चेला ईसु काजे कह्या, “ए मास्तर! ईतराक दाहड़ा पेहलुस ते यहुदी डाहला नेता तुसेक दगड़ाटीन मारने हींडी रवला, ने तु पछु अळी चांहान जाणे हींडी र्यु?”
9ईसु जपाप आप्यु, “काय दाहड़ान बारे घंटा नी रवे? कदी काहनुक माणुस दीसु चाले ती झट नी लागे काहाकी तीनाक ईनी कळीन वीजाळो देखाये। 10बाकुन कदी काहनुक राते चाले ती झटवायसे, काहाकी चां वीजाळो नी रहे।” 11ईसु जी वात कह्यु, ने पछेन कहणे बाजी गुयु, “आपणु दुस्तीदार लाजर सुय गुयु, बाकुन मे हीनाक जागाड़ने जाम।”
12चेला कह्या, “ए मालीक। कदी चु सुय रयु हसे, ती वारु हय जासे।”
13ईसुन चेला ज्य समज्या की लाजर छाचलीन सुवणे बाजी रयु हसे, बाकुन ईसु ते दाखलान साहरे ईसारु करीन कहणे बाजी रवलु। 14तत्यार ईसु तीनुक सय-सय कय देदु, “की लाजर मर गुयु।” 15मे लाजरेन मरने टेमे चां नी हतलु, तेबी मे तुहुं छे करीन मे खुस छे, “काहाकी हय तुहुं मारे पर पाक्कु भुरसु करने मुखु जड़ जासे। ती चालु, आपणु लाजर धड़े जाजे।”
16तत्यार थोमु चु दीद्मुस बी कह्वाये, हेरे साते चेला सी कह्यु, “चालु, आपणु बी हेरे साते जाजे भले आपणुक बी हेरे पुठ्ये मरनु पड़े।”
बेतन्या गांव मां ईसु
17जत्यार ईसु बेतन्या गांव मां पुग्यु, ती चु सामळ्यु की लाजर काजे मसाण मां मेकला चार दाहड़ा हय गुया। 18बेतन्या गांव यरुसलेम सहर सी एक कुस लांबो हतलो। 19ने बेसका यहुदी माणसे बी लाजरेन मरनेन खबर सामळीन हेरी बहणीस मारथा ने मरीयम काजे हुगा राखणे, ने तुहुं काठु जीव राख्जु करीन हेरा भायसेन बारामां कहंणे चां आय रवला।
20जत्यार मारथा सामळी, की ईसु आवणे बाजी र्यु, तीनाक भेळी हवणे करीन अघीस गुय बाकुन मरीयम घरुत मां बस रय। 21ईसु धड़े पुगीन मारथा ईसु काजे कय, “ए मालीक! कदी तु जां रहतु ती मारु भाय नी मरतु। 22ने मेसेक मालम छे, की तु हय बी भगवान भीणी सी ज काय मांगीस, चोन भगवान तुसेक आपसे।”
23ईसु मारथा काजे कह्यु, “तारु भाय पछु जीवतु हय जासे।”
24ज सामळीन मारथा ईसु काजे कय, “मेसेक मालुम छे, की तीने दाहड़े आखा मरला माणसे मर्या-सर्याम सी पछा जीवता हय्न बठा हवसे, तीने दाहड़े मारु भाय बी तींद्रे भेलुत पछु जीवतु हय्न बठु हय जासे।”
25ईसु मारथा काजे कह्यु, “मर्या-सर्याम सी पछा जीवता करीन बठा करन्यु, ने तीनुक अमर जीवाय आपण्यु मेत छे, जु बी मार पर भुरसु करे, चु मर बी जासे तेबी जीवतेलु रवसे।” 26ने जु मार पर भुरसु करतु जाय्न जीवतेलु रवसे, तीनाक जलमकी मुतेन डंड नी जड़े तु ईनी वात पर भुरसु करे काय? 27ती मारथा कय, “हव, मालीक! पाक्कु भुरसु करो की ईनी कळी मां आवणे वाळु भगवानेन पुर्यु तीनाक मसी कहवे चु तुत छे।”
ईसु रड़्यु
28ची असी कयदीन जाती रय ने आपसी बहणीस मरीयम काजे बुलावीन कळ्येन तीनीक कय, “मास्तर आय रयु, चु तुसेक बुलावे।” 29ज सामळीन मरीयम छाटीत उठीन ईसु काजे भेळी हवणे चाल पड़ी। 30ईसु हाल लगुन तीना गांव मां नी आयु, हय बी चु तीना जागा पर हतलु जां मारथा ईसुक भेळी हवली। 31तत्यार ईतराक यहुदी माणसे हेरे साते घर मां हतला ने तीनाक हुगी रव ने काठु जीव राख, करीन कह्णे बाजी रवला, चे माणसे ज देख्या की ची उचकाणुन मरीयम उठीन खयड़े चाल पड़ी ती चे असा वीच्यार कर्या की जी मसाण पर रहणे जाणे बाजी रय, ने चे बी तेरे पछळ चाल पड़्या।
32जत्यार मरीयम ती जागे पुगी जां ईसु हतलु, ती तीनाक देखतात ची तेरा पायेम हीट पड़ी ने कय ए मालीक! “कदी तु जां रवतु ती मारु भायस नी मरतु।”
33ने ईसु मरीयम काजे ने तेरे पुठ्ये आवला यहुदी माणसेक रड़तेला देख्यु, ती ईसुन जीव भळ कर्यु, ने चु बेसकु दुखी हय गुई। 34ने चु कह्यु, “तीनाक काहना जागा पर मेकला छे?” चे ईसुक कह्या, ए मालीक!
चाल आवीन देख ले।
35ने ईसु तत्यार कलपी-कलपीन रड़ने बाजी गुयु। 36ईसु काजे रड़तेलु देखीन चां भेळा हवला माणसेम सी बेसका यहुदी माणसे कह्या, “देखु! जु ते लाजर काजे बेसकु परम करतेलु।”
37बाकुन थुड़ाक माणसे कह्या, “जु ते आंदळान डुळा उघाड़ीन तीनाक देखता कर्यु ती जु लाजर काजे काहानी बचाड़्यु?”
ईसु लाजर काजे पछु जीवतु करे
38ज सामळीन ईसुन जीव अळी भळ लेवायु, ने चु लाजरेन मसाण धड़े गुयु, ची मसाण बयड़ान खंगरा मां दर खुदीन बणावलो हतलो, ने तेरे पर एक चापरु दगड़ु मेल्लु हतलु। 39ईसु माणसेक कह्यु, “चापरु दगड़ु हेड़ देवु।” मरला लाजरेन बहणीस मारथा कही,
“बाकुन ए मालीक लाजर मरलु चार दाहड़ा हय गुया हय ते तेरो धड़ गंदायतो हसे।”
40ईसु मारथाक कह्यु, “कदी तु भुरसु करसी, ती भगवानेन सेक-सींगार देखसी, असु मे तुसेक हय पेहलुस कह्लु बी।” 41तत्यार चे माणसे चापरु दगड़ु हेड़ देदा ने ईसु सरग भीणी भाळीन कह्यु, ए भगवान बास! मे तुसेक बेसकु वारु कह्वो तु मारी दुवा सामळी लेदु। 42तु ते मारी दुवा सामळ्या करे जी वात मेसेक पाक्को मालुम छे बाकुन मे जी वात आड़े-धड़े उबा हय रवला माणसे वाटे कय र्यु, “काहाकी चे ज देखीन भुरसु करे ने असा जाणे की ईना ईसुक भगवानुत हक आपीन मकेल्लु छे।” 43असु कयदीन ईसु जुर सी आयड़ीन कह्यु, “लाजर! बाहर नीकळ। 44चु मरलु लाजर जीवतु हय्न बाहर नीकळी आयु, तेरे मुंहडे ने हाते पाये पुथल्यान पाटा बांदला हतला, ईसु माणसेक असु कह्यु, हेरा पाटा छुड़ीन हीनाक जाणी देवु।”
ईसु काजे मार नाखणेन जाळ सादी
(मत्ती 26:1-5; मरकुस 14:1,2; लुका 22:1,2)
45जे यहुदी माणसे, मरीयम काजे भेळा हवणे आवला हतला, चे ईसुन बेसका मटा काम देख्या, ने तीनु मायन बेसका माणसे ईसु पर भुरसु कर्या। 46बाकुन तीनु यहुदी माणसे मायन थुड़ाक जणा जाय्न फरीसी माणसे काजे ईसुन ईना मटला कामेन बारामां कय देदा। 47ने मंदीरेन डाहला पुजारा ने फरीसी माणसे पंचु बठ्या ने कह्या, “आपणु काय करजे? हयु माणुस ते मटा कामेन सहलाणी देखाड़ने बाजी र्यु। 48कदी आपणु हीनाक असुत करने देसुन ती हेरे पर आखा यहुदी माणसे भुरसु करने बाजी जासे, ने ईना काजे राजा बणाय देसे, तत्यार रोमी सीपायड़ा आवीन आपणु मंदीर ने आपणी आखी जाती काजे सार देसे।”
49तींद्रे मायन एक जणु तेरो नाव काइफा हतलो, ने चु तीने साल मंदीरेन डाहला पुजारान मुख्यु हतलु चु पंचुन वात सामळीन तीनु काजे कह्यु, “तुहुंक ईतरोक बी मालुम नी हय काय? 50जाराक वीच्यार ते करु आपणा माणसे वाटे एकुत माणुस मरसे ती आपणी आखी जाती बच जासे, आपणे वाटे च वारलु रवसे।” 51चु जी वात आपसुत नी कह्यु, बाकुन चु तीने साल मंदीरेन डाहला पुजारान मुखी हवणेन नाते पेहेल सी हवणे वाळी वात कह्यु की ईसु भगवान आखा माणसे वाटे मरसे। 52हेरो मतलब ज छे की ईसु यहुदी जाती वाटे अतरुत नी बाकुन, रावण्या-तीवण्या हवला भगवानेन आखा पुर्या-पारी तीनुक भेळा करने करीन मरसे।
53तीनेत दाहड़े सी यहुदी पंचु वाळा मुख्या ईसु काजे मारने करीन पाक्कु वीच्यार कर्या। 54ज जाणीन ईसु तीने दाहड़े सी यहुदीया जीलान माणसे मां उजेंतु नी हवणे चाहतेलु, बाकुन यहुदीया जीलान यरुसलेम सहर छुड़ीन उजाड़्या बयड़ा धड़े वाळा येफरेन नावेन सहरेम जाय्न चेला पुठ्ये रहणे बाजी गुयु।
55यहुदी जातीन फसह तीहवार धड़ेत आय रवलु, ने तीना तीहवारेन पेहलुत आपसा काजे चुखा करने करीन बेसका माणसे गांव खेड़ाम सी यरुसलेम सहर मां आय रवला। 56ने चे ईसु काजे हेरता-हेरता यरुसलेम मंदीरेन्चां उबा रय गुया, ने ईसु नी जड़्यु, ती चे एक दीसराक कहणे बाजी गुया, “तुंद्रु काय वीच्यार छे, चु तीहवार मां नी आवे काय?” 57मंदीरेन डाहला पुजारा ने फरीसी माणसे काजे पेहलुत हुकुम आपीन ज कह्या, की तुंद्रे मायन कुय बी ईसुन बारामां मालुम हवे, की ईसु जां छे, ती आवीन कय देजु ने हामु तीनाक धराय देसु।
Currently Selected:
युहन्ना 11: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
