YouVersion Logo
Search Icon

युहन्‌ना 17

17
ईसु आपसा वाटे दुवा करे
1जी वात कयदीन ईसु सरग भीणी भाळीन कह्‌यु, “ए मारा भगवान बास! तारा पुर्‌यान मरनेन घड़ी आय गुयली छे। ने तारा पुर्‌यान सेक-सींगार उजेंतु कर तेरे सी तारु पुर्‌यु बी तारु सेक-सींगार उजेंतु कर देय। 2तु ते तारा पुर्‌या काजे आखा माणसे पर हक आपलु छे, की तीना हक सी चु आखा माणसेन ईचमां तारु सेक-सींगार उजेंतु करे ने तींद्‌रेम सी जत्‌यार बी माणसे तु तेरा हाते सुपलु छे, तीनु आखा काजे चु अमर जीवाय आप देय। 3एकुत छाचलु भगवान तुत छे, ने मे ईसु तारे सी मकेल्‌लु छुड़ावन्‌यु मसी छे, तुसेक ने मेसेक जाणीन मान्‌ने सीत माणसेक अमर जीवाय जड़से। 4ज काम तु मेसेक करने करीन आपलु हतलु, च काम करीन धरती पर तारो सेक-सींगार काजे उजेंतु करलु छे। 5ए भगवान! कळी नी घड़ाय ने पेहलुन, मे तारे पुठ्‌ये हतलु, ने मे नी तारेन तसु सेक-सींगार मां हतलु हय मेसेक तीना सेक-सींगार मां पछु भेसकी ले।”
ईसु आपसा चेला वाटे दुवा करे
6तीनु माणसे काजे तु ईनी कळीम सी नेवाड़ीन मेसेक सुपलु चे तींद्‌रे अगळ मे तारो नाव उजेंतु कर देदलु छे, छाचलीन चे माणसे तारात हतला, ने तु तीनु काजे मार हातेम सुप देदु, ने चे तारा बुल काजे मानीन पाळ र्‌या। 7हय चे जाण गुया की ज काय तु मेसेक देदलु छे, च आखो तारो छे। 8काहाकी ज बुले तु मेसेक देदलु, ने चे बुले तीनुक बी सामळाय देदु, ने चे मान लेदा ने छाची-छाची जाण लेदा की मे तारे सी आय र्‌यु ने भुरसु कर लेदा की तुत मेसे काजे मकल्‌यु।
9हींद्‌रे वाटे मे जी दुवा करो ची दुवा तु सामळी ले, मे कळीन माणसे वाटे दुवा नी करतु, बाकुन तींद्‌रे वाटे करो जीनुक तु मारे हातेम सुपलु छे काहाकी चे तारात छे। 10छाचलीन ज काय मारो छे च तारो छे, ने ज तारो छे च मारो छे। ने हींद्‌रे सी मारु सेक-सींगार उजेंतु हवलु छे। 11“मे ईनी कळीक छुड़ीन तारेन चां आवणे हींड रयु, बाकुन हय जे चेला कळीत मां रवसे।” ए चुखला भगवान बास! तु ज नाव मेसेक आपलु छे तीने नावे हींद्‌री राखवाळी करो, तेरेसी चे आपणेन तसा एक हय जाय। 12जत्‌यार लग मे हींद्‌रे साते हतलु, तत्‌यार लग तारा नाव सी हींद्‌री पुरी राखवाळी करतु रयु। तींद्‌रे मायन कुय बी ठायकुत नी सर्‌यु बाकुन एकुत जणु ठायकुत सर गुयु, जु सरने वाळु हतलु। खरला-सास्‌तुर मां लिखली वात पुरी हवणु चाहजे करीन असो हयो। 13हय मे तारेन चां आवणे हींडी र्‌यु ने मे जी दुवा ईनी कळीम रय्‌न करने बाजी र्‌यु, तेरसी जी खुसी मारेम छे, ची खुसी जे चेला पुरी की पुरी हात करे। 14मे तारी बुल हीनुक कय देदलु छे ने भगवानेन काम रुकण्‌या काजे ईनी कळीन माणसे हीनु काजे भुंडा कर्‌या काहाकी जसु मे ईनी कळीन माणसे साते संगात नी करो, तसात चे चेला बी ईनी कळीन माणसे साते सात संगात नी करे। 15मे जी दुवा नी करतु की तु हीनु काजे कळी मां सी ली जाती रहे, बाकुन ज कहो की हीनु काजे भुंडात कामे सी बचाड़ीन राख। 16जसु मे ईनी कळीन नी हय तसात चे बी ईनी कळीन नी हय। 17ए भगवान बास तारा बुल चुखला छे ईना छाचला बुल सी ईनुक तारी सेवा वाटे चुखा करीन तीयार कर। 18जसु तु मेसेक ईनी कळीन चाकरीन हक आपीन मकेल्‌लु छे, तसुत मे बी ईनुक ईनी कळीन चाकरीन हक आपीन मकेल्‌लु छे। 19ने हींद्‌रा फायदा वाटे मे मारु जीव आपीन आपसाक नेवाड़ीन चुखु करो, काहाकी चे बी तारा छाचला बुले सी तारी सेवा वाटे नेवाड़ीन चुखा हय्‌न तीयार हय जाय।
20“मे हींद्‌रे वाटे अतरुत दुवा नी करतु, बाकुन तींद्‌रे वाटे बी दुवा कर र्‌यु, जे आवणे वाळा दाहड़ाम हींद्‌री वात सामळीन मार पर भुरसु करसे। 21मे तींद्‌रे वाटे असी दुवा करो की चे आखा एक मन हय्‌न एक सारका हय जाय करीन। ए भगवान बास! जसु तु मारेम छे, ने मे तारेम छे, तसात चे बी आपणेम भेसकायन एक सारका हय जाय काहाकी ईनी कळीन माणसे तीनुक देखीन असु भुरसु कर लेय की ईसुत भगवानेन मकेलन्‌यु छुड़ावन्‌यु मसी छे। 22ने जु सेक-सींगार तु मेसेक आप्‌यु, चु सेक-सींगार मे तीनुक आप देदलु छे, काहाकी चे आखा एक मन हय्‌न एक सारका हय जाय जसा आपणु एक सारका छे। 23मे तींद्‌रेम रवु, ने तु मारेम रहे ने चे आखा ने आखा एक सारका हय जाय ने ईनी कळीन माणसे ज जाण लेय की ईसु भगवानेन मकेल्‌लु मसी छे, ने जसु तु मार सी परम कर्‌यु तसु तु बी तीनुक परम करे।”
24“ए भगवान बास! जी कळी नी घड़ाय ने पेहलुत मारे सी परम राखलु छे, ने सेक-सींगार आपलु छे। जे माणसे तु मेसेक आपलु छे, चे बी मे जां रहो चां रहणु चाहजे काहाकी चे बी मारु सेक-सींगार देखे। 25ए धरमी भगवान बास! ईनी कळीन माणसे तुसे नी जाणता बाकुन मे तुसेक जाणो ने मारा चेला जाण लेदला छे, ईसु भगवानेन मकेल्‌लु मसी छे। 26मे तारो नाव ईनुक बताड़ देदु ने बताड़तु रय्‌स, काहाकी जसु तु मेसेक मारे सी परम करलु, चु परम हींद्‌रेम रव ने मे हींद्‌रेम रहो।”

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to युहन्‌ना 17

YouVersion uses cookies to personalize your experience. By using our website, you accept our use of cookies as described in our Privacy Policy