مارقُس 1

1لخبار ءيفولكين ن‑ياسوع لماسيح يوس ن‑ربّي. 2ءيبدا غمكلّي ءيتياران غايد ءيزرين ف‑وفوس ن‑نّابي ءيشاعيا، ءينّا ربّي: «راد‑ازنغ ارقّاس‑ينو اد‑اك‑يزوور ءيجّوجاد‑اك اغاراس‑نّك. 3ها‑يان‑واوال ار‑يتبرّاح غ‑لخلا ار‑يتّيني ‹جّوجادات اغاراس ن‑سيديتنّغ، تسّنمّ تيغاراسين‑نس.› »

تابرّاحت ن‑يوحانّا

4غمكان ا‑س‑د‑يبان يوحانّا امسدّام غ‑لخلا ار‑يتبرّاح ار‑يتّيني: «فلات كولّو ما‑تسكارم يُخشن، تدّمّ غ‑وامان، باش اد‑اون‑يصامح ربّي ف‑دّنوب‑نّون.» 5فّوغن‑د س‑دارس مدّن گّوتنين زغ‑تمازيرت ن‑يودايا د‑يمزدغن ن‑تمدينت ن‑وروشاليم، ار‑تقرّان س‑دّنوب‑نسن، دّمن كولّوتن ف‑وفوس‑نس غ‑واسيف ن‑وردون. 6يوحانّا ار‑يلسّا تاضوت ن‑يرعامان ار‑ياگّس س‑وبكّاس ن‑يلم، ار‑يشتّا تامورغي د‑تامّنت لّخلا. 7ار‑يتبرّاح ار‑يتّيني: «را‑د‑ياشك تيگيرا‑نو يان يوگُر‑يّي. ءور‑ستهلّاغ اد‑كنوغ اد‑رژمغ ءيفالان ن‑تورژيّين‑نس. 8نكّي سّدّمغ‑كُن غ‑وامان، ءيمّا نتّا را‑كُن‑يسّدّم س‑رّوح لقودوس ن‑ربّي.»

ءودوم لّماسيح ف‑وفوس ن‑يوحانّا

9يان‑واسّ غ‑ووسّان‑ان ءيفّوغ ياسوع تامدينت ن‑ناصيرا لّي‑يلّان غ‑تمازيرت ن‑جاليل، ياشك‑يد ءيدّم غ‑واسيف ن‑وردون ف‑وفوس ن‑يوحانّا. 10غير ءينكر‑د زغ‑وامان س‑يژرا ءيگنوان رژمن، ءيگّوز‑د فلّاس رّوح لقودوس ن‑ربّي زوند يان‑وتبير، 11ءيساول‑د يان‑واوال زغ‑يگنوان ييني: «كيّي تگيت ءيوي ءيعزّان. فرحغ سرك باهرا.»

شيطان يورم لماسيح

12ءيدّو ياسوع ءيدحي‑ت رّوح لقودوس غاكودان س‑لخلا. 13ءيكّا‑ن غ‑دار لوحوش غ‑لخلا كّوژ ءيد‑مراو ن‑واسّ، ار‑ت‑يتارم شيطان، ار‑تي‑تعاوانّ لمالايكا.

ءيمحضارن ءيمزوورا

14لّيغ ءيتياماژ يوحانّا غ‑لحبس ياشك‑يد ياسوع س‑تمازيرت ن‑جاليل ار‑يتبرّاح س‑لخبار ءيفولكين ن‑ربّي 15ار‑يتّيني: «ءيكمّل زّمان، تاكمور‑د‑تگلديت ن‑ربّي. فلات كولّو ما‑تسكارم يُخشن، تغويم غ‑لخبار‑اد ءيفولكين.» 16ءيفتو غ‑تاما ن‑ومدا ن‑جاليل، ءيژر سيمعان نتّا د‑گماس اندراوس. ءينگُمارن ن‑يسلمان اد‑گان. گرن‑ين شّبكت غ‑ومدا. 17ءيساول ياسوع ييني‑اسن: «اشكاد‑د مونات ديدي، رارغ‑كُن ا‑تگم ءينگُمارن ن‑مدّن.» 18فلن شّبايك‑نسن غاكودان، مونّ ديدس. 19ءيزايد ءيفتو يان ءيميكّ س‑ن‑يژرا ياعقوب يوس ن‑زابدي نتّا د‑گماس يوحانّا. لّان غ‑تاناوت‑نسن ار‑تعدالن شّبايك. 20ءيغر‑اسن غاكودان، فلن‑ين باباتسن زابدي غ‑تاناوت نتّا د‑يخدّامن‑نس، مونّ د‑ياسوع.

لماسيح ءيسّوفغ لجنّ يُخشنّ

21روحن تامدينت ن‑كافرناحوم. غ‑واسّ ن‑وسونفو ءيكشم ياسوع س‑تگمّي ن‑تژالّيت ار‑يسّلماد مدّن. 22ار‑تعجّابن غ‑ولمّود‑نس اشكو ار‑سرسن‑يساوال غمكلّي دارس لحقّ اد‑اسن‑ييني ما‑تن‑د‑يقّانّ ا‑ت‑سكارن. ءور‑يگي نتّا زوند ءيمسلمدن ن‑شّرع. 23غ‑تاساعت‑ان ءيلّا غ‑تگمّي ن‑تژالّيت يان‑ورگاز لّي‑غ‑يلّا يا‑لّجنّ يُخشنّ باهرا. 24يوت س‑يات‑تغويّيت ييني: «وا‑ياسوع گو‑ناصيرا، ما‑يلّان غ‑گراتنّغ ديدك؟ ءيس‑دي‑توشكيت اد‑اغ‑تهلكت؟ سّنغ ما‑تگيت كيّي. امژلاي ن‑ربّي ا‑تگيت.» 25ءيساول ياسوع يامر لجنّ ييني‑اس: «فسّا، تفّوغت زغ‑گيس.» 26ءيسّمحاكّا‑ت لجنّ باهرا، يوت س‑يات‑تغويّيت ءيتجهّدن ءيفّوغ زغ‑گيس. 27ار‑تعجّابن مدّن كولّوتن ار‑سّمقسان ءي‑نگراتسن ار‑تّينين: «ما‑يگا ماياد؟ كرا ن‑ولمّود لّجديد اياد. هاتي دارس تاژضّارت ءيگّوتن ايلّيغ ا‑يتامر لجنون أُخشنّين، ار‑سكارن س‑واوال‑نس.» 28غاكودان ار‑باهرا‑ساوالن مدّن ف‑ياسوع، اوين لخبار‑نس س‑كرايگاتّ ماني غ‑تمازيرت ن‑جاليل كولّوتّ.

تاضگُّالت ن‑سيمعان

29لّيغ ءيفّوغ زغ‑تگمّي ن‑تژالّيت ياشك‑يد س‑تگمّي ن‑سيمعان د‑اندراوس. كشمن سرس نتني د‑ياعقوب د‑يوحانّا. 30افن‑ين تاضگُّالت ن‑سيمعان تگن توضن س‑تاولا، ءينين‑اس فلّاس. 31ياكمور س‑تاما‑نس يامژ‑اس غ‑وفوس ءيسّنكر‑تّ‑يد. تيتّي زگيس تاولا، تنكر ار‑فلّاسن‑تّسخّار.

لماسيح ءيجّوجّي ءيموضان گّوتنين

32غ‑تدگُّات ن‑غاسّان لّيغ‑ن‑تضر تافوكت اشكين‑د مدّن س‑دار ياسوع، اوين‑اس‑د ءيموضان كولّوتن ءولا غويلّي‑غ‑لّان لجنون. 33مونّ‑د كولّو ايت‑تمدينت غ‑يمي ن‑تگمّي. 34ءيجّوجّي ءيموضان گّوتنين زغ‑كولّو تيموضان لّي‑گيسن‑لّانين ءيسّوفغ كيگان د‑لجنون. ءور‑يودجي لجنون ا‑فلّاس‑ساوالن، اشكو سّنّ نتني ما‑يگا.

تابرّاحت لّماسيح غ‑جاليل

35ءينكر‑د ياسوع غ‑تيلّاس ن‑صّباح، ءيفّوغ ءيفتو س‑يان ماني غ‑ور‑يلّي يان، ار‑غين‑يتژالّا. 36ءيضفور‑ت سيمعان د‑ويلّي ديدس لّانين. 37لّيغ‑ت‑ين‑وفان ءينين‑اس: «ها‑مدّن كولّوتن ار‑سرك‑سيگّيلن.» 38ءيمّا ياسوع ءيرور‑اسن: «ا‑ندّو س‑يدوران‑ان ياضني ا‑ن‑تبرّاحغ غين‑داغ، اشكو ماياد ا‑ف‑د‑وشكيغ.» 39ءيزايد ار‑يتكّا كولّو تامازيرت ن‑جاليل ار‑يتبرّاح غ‑تگُمّا ن‑تژالّيت ار‑يسّوفوغ لجنون.

لماسيح ءيجّوجّي انجدام

40يان‑واسّ يوشكا‑د دارس يان‑ونجدام، ءيضر غ‑لگدّام‑نس ءيضالب‑ت باهرا ييني‑اس: «تژضارت ا‑يّي‑تسّغوست ءيغ‑تريت.» 41ءيحنّو گيس ياسوع باهرا، ءيگّر‑اس س‑وفوس‑نس، ييني‑اس: «ريغ نكّي. غوس.» 42غاكودان ييتّي زغ‑گيس لجدام ءيغوس. 43يازن‑ت ياسوع يوصّا‑ت س‑لمعقول 44ييني‑اس: «رار لعاقل اد‑ور‑تينيت يات ءي‑يان، والاينّي دّو تملت ءيخف‑نّك ءي‑ونمغور ن‑تگمّي ن‑ربّي تفكت ف‑وسغوس‑نّك تيغرسي لّي‑ف‑يوصّا موسا، ا‑تگ توگّا ءي‑مدّن.» 45ءيمّا نتّا ءيفّوغ غاكودان ار‑يساوال باهرا ف‑ياسوع، ار‑يتاوي لخبار ن‑ماد‑اس‑يجران ايلّيغ ءور‑سول‑يژضار ياسوع ا‑يكشم ءيبايّن س‑كرا ن‑ودوّار. ءيقاما غ‑لخلا ار‑ن‑دارس‑تّاشكين مدّن زغ‑كرايگاتّ تاسگا.

Currently Selected:

مارقُس 1: SHINT10

Highlight

Copy