مارقُس 8
8
لماسيح ءيشّوشا كّوژ ءيد‑والف
1يان‑واسّ غ‑ووسّان‑ان، لّيغ‑د‑مونّ‑داغ مدّن گّوتنين ءور‑دارسن‑يلّي ماد‑شتّان. ءيغر‑د ياسوع ءي‑يمحضارن‑نس س‑دارس ييني‑اسن: 2«ها‑مدّن‑اد قامان گيگي باهرا، اشكو كراض‑ووسّان ايد ديدي لّان، ءور‑دارسن ماد‑شتّان. 3ءيغ‑تن‑وزنغ س‑تگُمّا‑نسن، د‑نتني ءينغا‑تن لاژ، راد‑تغاشان غ‑وغاراس، اشكو كرا گيسن يوشكا‑د زغ‑توگّاگ.» 4ءينين‑اس ءيمحضارن‑نس: «مانيغ را‑ناف اغروم غ‑لخلا‑ياد ما‑س‑ا‑نشّباع كولّو مدّن‑اد؟» 5ءيسقسا‑تن ياسوع: «منّاوت‑تنگُال اد‑دارون؟» ءينين‑اس: «سّا.» 6يوصّا مدّن اد‑سكيوسن س‑واكال، ياسي سّا ن‑تنگُال‑لّي ءيشكر ربّي ءيبّي‑تنت، ءيفك ءي‑يمحضارن ا‑تنت‑اطّون. بضون‑تنت ف‑مدّن. 7ءيلينت دارسن كرا ن‑تسلمين دروسنين. ءيشكر ربّي ييني ءي‑يمحضارن ا‑تنت‑بضون ءولا نتنتي. 8شّن كولّو مدّن‑ان ايلّيغ شبعان. سّمونّ‑د توفّاژ لّي‑د‑قامانين، عمّرن سّا ن‑تريالين. 9غويلّي شّانين راد‑گن ما‑يتگّان كّوژ ءيد‑والف. غاكودان ءيمسافاض ديدسن ياسوع، 10ءيكشم س‑تاناوت نتّا د‑يمحضارن‑نس، سّودون غ‑ومدا س‑تسگيو ن‑دالمانوتا.
ءيفاريسين ضالبن يات‑تماتارت
11اشكين‑د ءيفاريسين س‑دار ياسوع، ءيرين اد‑ديدس‑تمجاحادن. ضالبن زغ‑گيس كرا لّمعجيزت اد‑اسن‑تگ تاماتارت ن‑يزد ربّي ا‑ت‑يد‑يوزنّ، ءيرين ا‑ت‑ارمن. 12ءيندر ياسوع غ‑رّوح‑نس ييني: «ماخ ايلّيغ ا‑تّضالاب تاسوت‑اد يات‑تماتارت؟ لحقّ ا‑راد‑اون‑ينيغ، ءور‑را‑تّياوفكا كرا ن‑تماتارت ءي‑تاسوت‑اد.» 13ءيفل‑تن ءيكشم‑داغ س‑تاناوت ءيسّودو س‑تسگا ياضني ن‑ومدا.
تاخميرت ن‑يفاريسين د‑تين هيرودوس
14تّون ءيمحضارن ءور‑د‑ديدسن‑يوين اغروم. ءور‑دارسن غير يات‑تنگولت غ‑تاناوت. 15ءيساول سرسن ياسوع ييني‑اسن: «ژرات، رارات لعاقل‑نّون زغ‑تخميرت ن‑يفاريسين ءولا تاخميرت ن‑هيرودوس.» 16بدون ار‑سّمقسان ءي‑نگراتسن ار‑تّينين: «ءور‑دارنّغ اغروم. مايان ا‑ف‑ينّا اوال‑اد.» 17ءيسّن ياسوع ماد‑سوانگمن، ييني‑اسن: «ماخ ايلّيغ ا‑تسّمقسام غمكاد ف‑وغروم ءور‑دارون‑يلّي؟ ءيس‑ور‑تا‑تسّينم ءولا تفهمّ؟ ءيس‑قّورن ءيخفاون‑نّون؟ 18ءيس‑دارون الّن ءور‑ا‑تّمنادم؟ ءيس‑دارون ءيمزگان ءور‑ا‑تسفليدم؟ ءيس‑ور‑ا‑تسوينگيمّ؟ 19ءينيات‑يّي، لّيغ بّيغ سمّوست‑تنگُال ءي‑سمّوس ءيد‑والف، منّاوت تيسلّا ا‑توسيم عمّرنت س‑توفّاژ؟» ءينين‑اس: «سنات د‑مراوت.» 20ييني‑اسن: «لّيغ بّيغ سّا ن‑تنگُال ءي‑كّوژ ءيد‑والف، منّاوت‑تريال ا‑توسيم عمّرنت س‑توفّاژ؟» ءينين‑اس: «سّا.» 21ييني‑اسن: «ءيس‑ور‑تا‑تفهيمّ؟»
لماسيح ءيجّوجّي ابوكاض
22لكمن بيتصايدا، اشكين‑د كرا ن‑مدّن اوين‑د يان‑وبوكاض ءي‑ياسوع، ضالبن‑ت باهرا اد‑اس‑يگّر. 23يامژ ياسوع ءي‑وبوكاض غ‑وفوس ياوي‑ت س‑برّا ن‑ودوّار، ءيسّوفس‑اس‑ن غ‑والّن‑نس ءيسرس فلّاس ءيفاسّن‑نس. ءيسقسا‑ت: «ءيس‑تژريت كرا؟» 24ابوكاض يولّ‑د الّن‑نس ييني‑اس: «ژريغ مدّن زوند ءيسغارن ار‑فتّون.» 25ءيسرس‑ن‑داغ ياسوع ءيفاسّن ف‑والّن‑نس. ءيسّماقّل‑د‑ورگاز غاكودان ييسفيو، ءيژر كرايگاتّ كرا ءيبايّن‑اس. 26يازن‑ت ياسوع ييني‑اس: «زري س‑تگمّي‑نّك. اد‑ور‑توورّيت س‑ودوّار.»
توگّا ن‑بطرُس ف‑لماسيح
27ءيزايد ياسوع ءيدّو نتّا د‑يمحضارن‑نس س‑يدوران غ‑تسگيو ن‑قايصريّا فيليبّي. ءيساول ديدسن غ‑وغاراس ءيسقسا‑تن: «ما‑فلّا‑تّينين مدّن، ماد‑گيغ نكّي؟» 28ساولن ءيمحضارن ءينين‑اس: «كرا ار‑يتّيني تگيت يوحانّا امسدّام، كرا ار‑يتّيني تگيت نّابي ءيليّا، كرا ار‑يتّيني تگيت كرا ن‑يان زغ‑لانبيا ن‑زمان.» 29ييني‑اسن ياسوع: «ءيمّا كونّي، ما‑فلّا‑تّينيم؟ ماد‑گيغ نكّي؟» ءيساول بطرُس ييني‑اس: «تگيت لماسيح ن‑ربّي.» 30يوصّا‑تن اد‑ور‑ينين ماياد ءي‑يان.
ءيساول لماسيح ف‑ورفوفن‑نس ءولا لموت
31ءيبدو ياسوع ار‑يمالا ءي‑يمحضارن‑نس ما‑راد‑اس‑يجرو ييني‑اسن: «ها‑نكّي لّي‑يگان يوس ن‑بنادم، ءيقّان‑يّي‑د اد‑باهرا‑رفوفنغ. را‑يّي‑ن‑لوحن ءيمغارن ن‑تمازيرت د‑ينمغورن ن‑تگمّي ن‑ربّي د‑يمسلمدن ن‑شّرع. را‑يّي‑نغن، والاينّي ويس كراض‑ووسّان را‑د‑نكرغ زغ‑لموت.» 32غمكاد ا‑س‑اسن‑ينّا، ءور‑فلّاسن‑يسّنتيل يات. ياوي‑ت ءيلمّا بطرُس ا‑ت‑يژي ف‑واوال‑اد. 33ءيگراول‑د ياسوع، ءيسّماقّل غ‑يمحضارن‑نس. ءيسّفسّا بطرُس ييني‑اس: «ءيتّي‑ن زغ‑گيگي ا‑شيطان، اشكو ءور‑ا‑تسكارت س‑ما‑يرا ربّي، والاينّي س‑ما‑يرا بنادم كا‑س‑ا‑تسكارت.»
34ءيغر‑د ياسوع ءي‑مدّن س‑دارس نتني د‑يمحضارن‑نس ييني‑اسن: «وانّا ءيران ا‑ديدي‑ييلي، ءيقّان‑ت‑يد ا‑يتّو ءيخف‑نس، ياسي اگّجدي‑نس، ءيمون ديدي. 35وانّا ءيران ا‑يجّنجم تودرت‑نس را‑ستّ‑يجلو. ءيمّا وانّا ءيجلان تودرت‑نس ف‑سّيبت‑ينو ءولا ف‑سّيبت لّخبار‑اد ءيفولكين، را‑ستّ‑يجّنجم. 36ما‑را‑ييلي ءي‑بنادم ءيغ‑يوورّي ءيطّاف دّونيت كولّوتّ ءيخسر ءيخف‑نس؟ 37ما‑را‑يفك بنادم باش ا‑يجّنجم ءيخف‑نس؟ 38وانّا ءينّان ءور‑يّي‑يسّين ءولا ءيسّن اوال‑ينو غ‑گر مدّن ن‑تاسوت‑اد ءيجلان يُخشنّ، راد‑ينيغ ءور‑ت‑سّينغ ءولا نكّي لّي‑يگان يوس ن‑بنادم غاكود لّيغ راد‑د‑اشكغ د‑لمالايكا ن‑يگنّا س‑لمجد ن‑ربّي بابا.»
Currently Selected:
مارقُس 8: SHINT10
Highlight
Share
Copy
Want to have your highlights saved across all your devices? Sign up or sign in
New Testament in Tashelhayt (Arabic script) © United Bible Societies, 1998, 2010.
