1 पत्रुस 2
2
चुनो भओ पत्थर और बाके चुने भए आदमी
1जहेमारे सबए मेलको खराब ब्यबहार करन इन्कार करओ। औरेनके धोखा मतदेओ, कपटी मत् होओ। औरेनको ईर्ष्या मत् करओ। दुस्रे आदमीनको बिरुद्ध खराब बात मत् करओ। 2मए तुमके नयाँ जनम भए बाल्कन सँग तुलना करत हओं। नयाँ जन्मो भओ बालकाके मजबुत होतए बढनके ताहीं रोज अइयाकी दुध चाँहत हए। उइसीयए तुमके फिर परमेश्वरको बचन सुनन इच्छा करन पणत हए, ताकी तुमर परमेश्वर उपरको भरोसा बढतए जाबए और तुम बाचाए जाबओ। 3काहेकी जैसे पबित्र-शास्त्रमे लिखो हए, “तए अनुभव करो हए, कि प्रभु भलो हए।”
4-5प्रभु येशूके जिन्दा पत्थरसे तुलना करोगओ हए। बो पत्थर आदमीनके द्वारा फेंकोगओ रहए, काहेकी बे कहीं, कि जा बिना कामको हए। पर परमेश्वरको नजरमे बा एकदम अनमोल हए और परमेश्वर बाके जगको मूल पत्थर होनके चुनी। और तुम सँगी बिश्वासी फिर प्रभु येशू ठिन आओ, ताकी तुम फिर बाके द्वारा बनाए भए जिन्दा पत्थर जैसो बन पाबओ, जौन परमेश्वरके ताहीं आराधना करन बारो मन्दिर बनानके ताहीं प्रयोग करोजात हए। बा तुमके पबित्र पुजारी फिर बनाइ। जैसे पुजारी परमेश्वरके बलि चढात हएं, उइसीयए तुम फिर अपनो हृदयके बलिके रुपमे परमेश्वरके अर्पण करओ। और बो भेँटी परमेश्वरके खुसी बनाबैगो काहेकी तुम येशू ख्रीष्टके हओ।
6जा, पबित्र-शास्त्रमे परमेश्वरको कहो कता हए,
“देखओ! मए एक बहुत मुल्यवान पत्थर छानो हओं, जौन सियोन सहरमे घरके मजबुत बनान प्रयोग करोगओ।
जो फिर बामे भरोसा करैगो बो लज्जित नाए होबैगो।”
7तुम येशू ख्रीष्टमे बिश्वास करन बारेनके ताहीं जा पत्थर बहुत मुल्यवान हए, पर बामे बिश्वास नाए करन बारे आदमीनके बारेमे पबित्र-शास्त्र कहात हए कि,
“जौन पत्थरके घर निर्माण करन बारे प्रयोग करनके इन्कार करीं
बहे पत्थर घर बनात पेती बहुमुल्य पत्थर बनो हए।”
8और पबित्र-शास्त्रमे अइसेफिर लिखो हए,
“जा पत्थर आदमीनके भिमेमे गिराबैगो,
जा एक पत्थर हए, जौन बिनके गिराबैगो।”
बे अइसे गिरत हएं, काहेकी बे परमेश्वरको बचन पालन करनसे अस्वीकार करत हएं।
परमेश्वर बिनके ताहीं जहे योजना बनाइ हए।
9पर तुम उइसे नाए हओ, काहेकी तुम परमेश्वरके चुनेभए आदमी हओ, तुम परमेश्वरके पुजारी हओ, जो राजा हए। तुम परमेश्वरको सेवा करन समर्पित भए आदमी और परमेश्वरके निजी प्रजा हओ। बा तुमके अंधियारोसे अपनो अदभुत ज्योतिमे लाइ हए, ताकी तुम परमेश्वरके अचम्मे कामको घोषणा करपाबओ।
10एकदाओं तुम परमेश्वरके प्रजा नाए रहओ, पर अब तुम परमेश्वरके प्रजा भए हओ। एकदाओं तुम परमेश्वरको कृपा नाए पाए रहओ, पर अब तुम जाके जानत हओ, काहेकी बा पहिलीए तुमके अपनो कृपा दिखाइ हए। 11प्रिय हो, तुम जा संसारमे बिदेशी और प्रवासी कता बैठे हओ। मए तुमके बिन्ती करत हओं, कि बे सबए दुष्ट शारीरिक इच्छनसे अलग रहाओ, काहेकी अइसे चाहना आत्माके बिरोधमे रोज लडत हएं। 12कभीकभा उइसे आदमी होत हएं जौन परमेश्वरके नाए चिने होत हएं और तुमके तुमर काम अच्छो नाए हए कहिके झुटो आरोप लगान सिकत हएं। जहेमारे तुमके अपनो ब्यबहार प्रति साबधान होन पणैगो, ताकी बे तुमर अच्छो ब्यबहार देख पामएं। अन्तमे बे स्वीकार करंगे, कि तुमर ब्यबहार अच्छो हए और अन्तमे जब बा लौटके आबैगो तओ परमेश्वरको प्रसंसा करंगे।
सासक और मालिकनको अधीनता
13प्रभुके सम्मान देनके ताहीं तुम, जा संसारमे अधिकार भए सबको आज्ञापालन करन पणैगो; बो कहोक राजा हए। राजाको अधिनमे बैठओ, जौन सबके उपर शासन करत हए। 14और हाकिम, जो राजा द्वारा चुनेगए होत हएं। बे गलत काम करन बारेनके सजाय देनके और सही काम करन बारेनके सम्मान देनके चुनेगए होत हएं। 15काहेकी जा परमेश्वरको इच्छा हए, कि हमर अच्छो ब्यवहारसे परमेश्वरके नाए चिनेभए आदमी अब हमके झुटो आरोप लगान हिम्मत नाए करैगो। काहेकी जा स्पष्ट हए, कि बिनको झुटो आरोप सच्चो नाए हए। 16तुमके चाहो अनुसार काम करनसे तुमके रोकपान बारो कोइ नाए हए। काहेकी तुम हमर प्रभु येशू ख्रीष्टसे स्वतन्त्र करेगए हओ। पर जाके तुम खराब कामको बहाना मतबनाबओ। पर तुमके अपनो काममे जा दिखान पणैगो, कि तुम नेहात्तओ परमेश्वरके सेवक हओ। 17सब आदमीनके आदर करओ। बिश्वासी भइया बहिनियनके प्रेम करओ। परमेश्वरसे डराओ। राजाको आदर करओ।
18तुम कमैया, जो घरमे काम करेकर्त हओ और बिश्वासी हओ, तुमके अपनो मालिकको आज्ञापालन करन पणैगो और रोज उनको आदर करन पणैगो। अइसे तुम, बे सब मालिकनके आदर करओ, चहुँ दयालु होमएं और ब्यवहारिक होमएं चहुँ बुरे होमएं। 19काहेकी परमेश्वर हमसे खुसी होत हए, जब हम सहास करके बो दुखके सहात हएं जौन दुख हमके नाए मिलनके रहए। काहेकी हम परमेश्वरके बारेमे सोँचत हएं। 20पर अगर तुम गलत काम करके पिटाइ खात हओ कहेसे, तुमर सजायमे धैर्य होनको कोइ प्रसंसाको कारण नाए हए। पर अगर तुम अच्छो कामके ताहीं दुख भोगत हओ कहेसे, और तुम धैर्य हुइहओ कहेसे, तओ परमेश्वर खुसी होबैगो। 21परमेश्वर तुमके बुलानको एक कारण जा हए, कि तुम बाके ताहीं कष्ट उठाबओ। ख्रीष्ट, जौन तुमर ताहीं कष्ट उठाइ, बा तुमर उदाहरण हए। बहेमारे तुमके बाको दिखाओ भओ डगरमे नेँगन पणैगो।
22पबित्र-शास्त्रमे लिखो हए, “बा कभी फिर पाप नाए करी,
और बा कभी फिर कोइ झुट नाए मस्की।”
23जब आदमी येशूके अपमान करीं, तओ बा उनको अपमान नाए करी। जब आदमी बाके कष्ट दइं, बा बदलामे उनके चोट पुगानके कोसिस कभीनाए करी। बरु, बा मदतके ताहीं परमेश्वरमे भरोसा करी। बाके पता रहए, कि परमेश्वर हर बखत आदमीनको न्याय ठिक रितिसे करत हए। 24जब ख्रीष्ट मरो, बा क्रूसमे हमर पापके ताहीं अपनो शरीरमे दण्ड भोगी। बा अइसो करी, ताकी हम पाप करन छोडके धार्मि हुइके जीबन जीइन सुरु कर पामएं। और बाको सहीभइ चोट द्वारा हम अच्छे भए हएं। 25पहिले, तुम बराने भए भेंणा कता रहओ। पर अब तुम अपनो प्राणनको और मण्डलीके रेखदेख करन बारे अगुवा और ख्रीष्टके ठिन घुमके आए हओ।
Currently Selected:
1 पत्रुस 2: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.