प्रेरित 17
17
थेसलोनिके सहरमे पावल और सिलास
1पावल और सिलास, अम्फिपोलिस गाउँ और स्पोल्लोनिया गाउँ हुइके थेसलोनिके सहरमे पुगे। हुवाँ यहूदीनको एक यहूदी सभाघर रहए। 2सदिमान कता, पावल बो यहूदी सभाघरमे फिर गओ। बो हुवाँ तीन हप्तातक पबित्र दिनतक पबित्र-शास्त्र मैसे बात लैके बिनसे बादबिबाद करतए रहो। 3पावल पबित्र-शास्त्रसे प्रमाण दइके बिनके अइसे सम्खाइ, “मुक्ति देन बारो राजा ख्रीष्ट दु:ख उठाएके मरनके रहए, और मरके जिन्दा होनके फिर रहए, और मए जौनके बारेमे तुमके सुनात हओं बहे येशू मुक्ति देन बारो ख्रीष्ट हए।” 4अइसियए उन मैसे कित्ने यहूदी प्रभुमे बिश्वास करीं और अइसियए परमेश्वरको डर मानन बारे ग्रीक देशके आदमी और नाउँ चले भए प्रमुख बैयर फिर प्रभुमे बिश्वास करके पावल और सिलासके सँग लग गइं।
5पर औरे यहूदी उनसे गुस्सा करीं और गल्लीके गुण्डन्के जम्मा करके अपने सँगमे लैं, और भिड लगाएके गाउँमे हुलदंगा मचान लागे, और बे यासोनको घरमे हमला करीं। और पावल और सिलासके, जनताके अग्गु लानके ढुणत रहएं। 6पर बे पावल और सिलासके हुवाँ नाएपाइं। तभीमारे बे यासोन और प्रभुमे बिश्वासी ददाभइयनके खिँचके ल्याइं। उनके सहरको हाकिमके ठिन पुगाएके चिल्लातए कहीं, “जा आदमी हरेक ठिहामे परेसानी फैलाएदइ हएं, बे आदमी अभए हमरे सहरमे फिर आइगए हएं। 7यासोन उनके अपनो घरमे रहानके अनुमति दइ हए, और बे सबके सब जा कहात हएं कि येशू राजा हए, और रोमको महाराजा कैसरको बिरोध करत हएं।” 8जा बात सुनके भिड और सहरके हाकिम घबणियइ गए। 9अन्तमे हाकिम, यासोन और बिनके सँग भए बाँकी आदमीनसे धरौटी लैके छोडदइं।
बेरिया गाउँमे पावल और सिलास
10रात पणतए खीना प्रभुमे बिश्वासी ददाभइया पावल और सिलासके मेशोदोनिया परदेशको बेरिया सहरमे पठाए दइं। और जब बे हुवाँ पुगे, तओ यहूदीनको यहूदी सभाघर भितर गए। 11हुवाँके यहूदी, थेसलोनिके सहरके आदमीनसे बहुत जद्धा असल रहएं। बे परचार एकदम अच्छो मानके सुनीं। पावलकी कही, बात मिल्त हए कि नाए मिल्त हए कहिके बे रोजए पबित्र-शास्त्र पढके जात रहएं। 12बहुत यहूदी प्रभुमे बिश्वास करीं। उइसीयए नाउँ चल भए बहुत उँचे घरानाके ग्रीक देशके बैयर और लोग सबए प्रभुमे बिश्वास करीं।
13थेसलोनिके सहरमे भए यहूदी मेशोदोनिया परदेशको बेरिया सहरमे फिरसे पावल परमेश्वरको बचन परचार कर रहोहए कहान बारी बात बे सुनीं। बे बेरिया गाउँमे आएके आदमीनके भणकातए और हलचल मचातए पावलको बिरोध करन आएपुगे। 14तओ जा देखतए खीना प्रभुमे बिश्वासी ददाभइया, पावलके तुरन्त समुन्दर किनारे पठाए दइं। पर सिलास और तिमोथी हुनै बेरिया गाउँमे बैठे। 15पावलके पुगान जान बारे ददाभइया बोके सँग एथेन्स सहर तक गए। हुवाँ पुगके पावल अपनएके पुगान बारे ददाभइयनके, सिलास और तिमोथी जल्दी आमएं कहिके खबर पठाइ।
16पावल, एथेन्स सहरमे सिलास और पावलके असियात पेती बो सहर मूर्तिपुजासे भरो देखके बोको मन बहुत दु:खी भओ। 17जहेमारे बो यहूदी सभाघरमे जाएके यहूदी और परमेश्वरको डर मानन बारे गैर-यहूदी आदमीनके सँग येशूके बारेमे बादबिबाद करत रहए। अइसियए दिनए-दिन सहरको मुख्य बजारमे आनजान बारे आदमीनके सँग फिर बो बहुत बादबिबाद करी।
18इपिक्युरी और स्तोइकी कहान बारे दर्शनके कुछ गुरु फिर पावल सँग बादबिबाद करन लागे। बिन मैसे कित्ने कहीं, “जा गबगबान बारो का कहात हए?” और कित्ने जनै कहीं, “जा त नयाँ देबतनको परचार करत हए!” पावल येशूके बारेमे और बा मरे मैसे जिन्दा भओ कहिके अच्छो समाचार परचार करेके कारणसे बे अइसे कहीं। 19तओ बे पावलके अरियोपागस नाउँको एक सभामे लैजाएके कहीं, “तुमर परचार करोभओ जा नयाँ शिक्षाके बारेमे हमके जानन्के इच्छा हए। तुमर दओ भओ जा नयाँ शिक्षा का हए? 20काहेकी तुम हमके अचम्मको बात सुनात हओ। तभीमारे जा बातको मतलब का हए कहिके हम जानन चाँहत हएं।” 21एथेन्स सहरमे बैठन बारे और हुवाँ बैठन बारे बिदेशी नयाँ-नयाँ बात इकल्लो करके दिन बितात रहएं। 22पावल अरियोपागस नाउँको एक सभाके अग्गु ठाणके कही: “ए एथेन्स सहरमे बैठन बारे, मए देखतहओं कि तुम हर बातमे देबतनके बडे मानन बारे हओ। 23जा सहरमे घुमत पेती मए तुमर आराधना करन बारो चीज फिर देखो। मए एक अइसो बेदी फिर देखो, जोमे अइसो लिखो हए, ‘नाए चिनो भओ ईश्वरके ताहीं।’ तभीमारे जोके तुम बिना जानके आराधना करत हओ, मए बोको अच्छो खबर सुनाए रहो हओं।”
24“संसार और जामे भए सब चीज सृष्टि करन बारो परमेश्वरए बादर और पृथ्वीको मालिक हए। बा आदमीको बनाओ भओ मन्दिरमे बास नाए करत हए। 25बाके आदमीनको मदतकी जरुरत नाए हए। बरु बा आदमीनके जीबन, प्राण और चाहन बारो सब चीज देतहए।
26संसार भर आदमी बैठएं कहिके परमेश्वर एकए आदमीसे सब जातिनके सृष्टि करी और बिनके संसार भर बैठन दइ। बिनको जीइन बारो समय और बैठन बारो ठाउँ बा अग्गुवएसे तोक दइ हए। 27परमेश्वर अइसे जहेमारे करी, ताकी आदमी बाके ढुँणन और छामछुम करके पाए सकएं कहिके आसरामे बा अइसे करी। तहुँफिर परमेश्वर हमसे दुर नाए हए।
28काहेकी बा हमर सँग हए जहेमारे हम जीइत हएं और चल्त फिरत हएं और हमर अस्तित्व हए। ठिक उइसीयए तुमर जनै कबि फिर कही हए, ‘नेहात्तओ हम बहेक सन्तान हएं।’ 29जहेमारे परमेश्वरको सन्तान हुइके हम परमेश्वरके, आदमीको बुद्धि और कलासे बनोगओ पत्थर, चाँदी और सोनोको मूर्ति कता नाए सम्झन पणत हए।
30जहेमारे अन्जानमे होत पेती नाए जानके करोभओ कामके परमेश्वर वास्ता नाए करी। पर अब परमेश्वर सबए आदमीनके ‘पाप करन छोडके परमेश्वर घेन घुमओ’ कहिके आज्ञा दइ हए। 31काहेकी संसारके सबए आदमीनको न्याय करन बारो दिन बा तोक दइ हए और बो दिन बा अपनए छानो भओ व्यक्ति द्वारा न्यायसाथ इन्साफ करैगो। आदमीको लौंणाके न्याय करनके अधिकार हए कहान बारो प्रमाण सबए आदमीनके देओ कहिके परमेश्वर येशूके मरो मैसे जिन्दा करी।”
32तओपिच्छु, मरे भए आदमी जिन्दा हुइजात हएं कहिके सुनके बहुत जनै पावलके उपर मजाक उणाइं। पर कोइ-कोइ कहीं, जाके बारेमे कल फिर हम सुनन चाँहत हएं। 33तओ पिच्छु पावल बिनके बीचसे चलो गओ। 34पर कुछ आदमी बोके सँग लागके परमेश्वरमे बिश्वास करीं। बिन मैसे अरियोपागस नाउँको एक सभाको डियनुसियस कहान बारो सदस्य और दामारिस नाउँ भइ एक बैयर रहए। जे बाहेक और कोइ आदमी फिर प्रभुमे बिश्वास नाए करीं।
Currently Selected:
प्रेरित 17: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
