प्रेरित 24
24
बडो हाकिम फेलिक्सके अग्गु पावल
1पाँच दिन पिच्छु प्रधान यहूदी पुजारी हननिया और कुछ यहूदी अगुवनको समुहनके, तर्तुल्लस नाउँको एक जनै वकिल सँग कैसरिया सहरमे आए, और बे पावलके बिरुद्धमे बडो हाकिमके अग्गु मुद्दा पेश करीं। 2जब पावलके राजा हेरोदको दरबारसे बडो-हाकिमके अग्गु लाओगओ तओ तर्तुल्लस बोके अइसे कहात दोष लागन लागो, “माननीय फेलिक्स, तुमसे हम बहुत शान्ति पाए हएं, और तुम जा जातिके ताहीं सुधार सुरु करेहओ।
3जा बातके हम हर प्रकारसे सब ठाउँमे धन्यबादसाथ स्वीकार करत हएं। 4पर हम चाँहत हएं, कि तुमर जद्धी समय नाए लैके हमर बिन्ती छुटकरीमे दया करके सुनदेबओ। 5काहेकी हम जा आदमीके इतएउतए दुख देत नेँगत, संसार भरके सारा यहूदीनके बीचमे हुलदङ्गा मचात और नासरत गाउँको धार्मिक सम्प्रदायको मुख्य अगुवाके रुपमे पाए हएं। 6जा मन्दिरके फिर अपबित्र करन कोसिस करि रहए, पर बो बेरा जाके हम पकणे। हमर मोशाको नियम कानुन अनुसार जाके दोष दिखानके बिचार करे रहएं। 7पर सेनापति लुसियस हमरे ठिन आएके जबरजत्ती करके पावलके हमर हातसे छिनाएके लैगओ। और जाके बिरोधमे दोष लगान बारेनके तुमर ठिन आनके आज्ञा करि रहए। 8अब तुम स्वयम जाको जाँच करैगे कहेसे, हम जाके लगाएभए दोषके जे सब सच्चाई बोसे पता पाएजाबैगे।” 9बे यहूदी समुह फिर, जा बात सब सच्चो हए कहिके समर्थन करीं।
फेलिक्सके अग्गु पावल अपनो बचाओके ताहीं बोली
10जब बडो हाकिम पावलके बोलनके ताहीं इशारा करी, तओ पावल जबाफ दइ, “बहुत बर्षसे तुम जा यहूदी जातिके आदमीनको बडो हाकिम और न्यायधीश होओ कहान बारी बात पता पाएके कारणसे, तुमर अग्गु मोके अपनो बयान देनके ताहीं उत्सहा बढो हए 11तुमके पता लागन सिकतहओ, कि मए यरूशलेम सहरको मन्दिरमे आराधना करनके ताहीं आए जम्मा बाह्र दिन इकल्लो भओ हए। 12मोके दोष लगान बारे आदमी नए त मोके कोइ आदमी सँग बहस करत पाइं, नए त मन्दिरमे, नए त यहूदी सभाघरमे, नए त सहरमे, नए त जनताके उसकात पाइं, 13नाए त जे मोके हबए दोष लगान बारी बातको प्रमाण दए पएहएं।
14पर जा मए तुमर अग्गु स्वीकार करत हओं, कि मए ख्रीष्टके डगरमे नेँगके मिर पुर्खाको परमेश्वरको आराधना करत हओं, जौनके यहूदी अगुवा झुठो कहातहएं। पर मए नियम कानुनमे भओ बात और अगमबक्तनको किताबमे लिखेभए सब बातमे बिश्वास करत हओं। 15मए परमेश्वरमे आसरा करत हओं, कि धर्मी और अधर्मी दुनौके, मरे भए मैसे परमेश्वर फिरसे जिइ उठात हए कहान बारी बात जे अपनए स्वीकार करत हएं। 16जहेमारे परमेश्वरमे और आदमीनमे मए सदादीन शुद्ध बिबेक धरन कोसिस करत हओं।
17बहुत बर्ष पिच्छु अपन गरीब आदमीनके ताहीं दान और परमेश्वरके ताहीं बलिदान चढानके यरूशलेम सहरमे आओ रहओं। 18बहे समय बे मन्दिरमे मोके शुद्ध होन बारो बिधि पुरा करत देखीं। हुवाँ कोइ भिड मिर पच्छु नाए लागी रहए, और हुलदङ्गा फिर नाए भओ रहए। पर हुवाँ एशिया परदेशके कोइ यहूदी आदमी रहएं, बे मोके देखी रहएं। 19अगर मए कुछ गलत करो हओं, तओ बे मिरमे आरोप लगानके ताहीं उनहीनके हियाँ तुमर अग्गु होनके रहए।
20अथवा जे आदमी अपनए हियाँ कहिते कि जब मए महासभाके अग्गु ठाणो रहओं तओ जे मोएमे का दोष पाइं? 21एकए इकल्लो दोष जो मेरे बिरुद्धमे लगाए सकत हएं, बो जा हए, कि जब मए आँगनमे ठाणके चिल्लातए कहो रहओं, ‘परमेश्वर मरे भए आदमीनके फिरसे जिन्दा करैगो कहान बारी बातमे मए बिश्वास करनके कारणसे आज तुमर अग्गु मिर मुद्दा चलरहो हए।’”
22जा ख्रीष्टको डगरके बारेमे बडो हाकिम फेलिक्सके ठिक-ठिक ज्ञान होनके कारणसे बो जा बात सुनके उन्हएं अइसे कहिके पठाए दइ, “सेनापति लुसियस हियाँ आबैगो तओ मए मुद्दाको फैसला करदेमंगो।” 23तओ बडो हाकिम पावलको अच्छेसे लख्बारी करीयओ, और थुर छुट दियओ, और बोको कोइ फिर सँगीके बोको सेवा करनके ताहीं रोक मत् लगैयओ कहिके कप्तानके आज्ञा दइ।
फेलिक्स और द्रुसिल्लाके अग्गु पावल
24कुछ दिन पिच्छु बडो हाकिम फेलिक्स, अपनी यहूदी बैयर द्रूसिल्लाके सँगमे लैके आओ। बो पावलके बुलाएके, ख्रीष्ट येशू उपरको बिश्वास करनके बारेमे पावलसे सुनी। 25पर पावल “परमेश्वरके अग्गु धार्मिक आज्ञा मानके काम करन पणत हए, अपनो इच्छा उपर नियन्त्रण करन पणत हए और परमेश्वरको न्याय करन बारो दिन आएरहो हए” कहान बारी बात सुनात पेती फेलिक्स घबणियातए अइसे कही, “हुइगओ, आजके ताहीं इतकए, अब तए जाए सकत हए। मौका मिलैगो तओ मए फिरसे तोके बुलामंगो।”
26बडो हाकिम फेलिक्स बो बातके बारेमे डराइगओ, जो पावल कही रहए। पर, पावलके जेल मैसे छुटामंगो तओ कुछु रुपैया मिलैगो कि, कहिके आसरा फिर करे रहए। तभीमारे बो घरी-घरी बुलाएके बातचित करत रहए। 27अइसीयए दुई बर्ष बितिगओ, तओपिच्छु फेलिक्सके ठाउँमे पर्किअस फेस्तस बडो हाकिम बनिगओ। फेलिक्स यहूदीनके खुसी करन ताहीं, पावलके जेलमे डारके गओ।
Currently Selected:
प्रेरित 24: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
