यूहन्ना 11

लाजरसको मृत्यु

1बेथानिया गाउँमे लाजरस नाउँको एक बिमार आदमी रहए। बहे गाउँमे मरियम और बोकी दिदी मार्था रहात रहएं। 2जा बहे मरियम हए जौन पच्छु प्रभुके पाँवमे महिंगो जटामसीको तेल लगाएके अपन बारसे पोँछी रहए। जिन्हिन्को भइया लाजरस बिमार रहए। 3तओ मार्था और मरियम येशूके खबर पठाइं, “हे प्रभु, देखओ, जौनके तुम प्रेम करत हओ, बो बिमार हए।”

4जा खबर सुनके येशू कही, “लाजरस बिमार हए, पर अन्तमे बो नाए मरैगो। बो त परमेश्वरको महिमा करनके ताहीं बिमार भओ हए और जहे द्वारा आदमी परमेश्वरको लौंणाके फिर महिमा करंगे।” 5येशू मार्था, बोकी बहिनीया मरियमके और लाजरसके बहुत प्रेम करत रहए, 6पर जब येशू बिमार भओ खबर पाएके बा अपना भओ ठिहामे औ दुई दिन बैठो। 7दुई दिन पिच्छु येशू चेलनसे कही, “अब हम फिर यहूदिया परदेशको बेथानिया गाउँमे जामएं।” 8चेला बासे कहीं, “हे महान गुरु, कुछ दिन अग्गु त हुवाँ यहूदी समुहके अगुवा तुमके पत्थर फेकके मारन चाँहत रहएं, और का तहुँफिर तुम बहे ठाउँमे जानके चाँहत हओ?”

9येशू चेलनके जबाफ दइके कही, “का दिनमे बाहृ घण्टा नाए होत हएं? दुपहारके नेँगन बारो आदमीके ठेस नाए लागत हए, काहेकी बो जा संसारको उजियारोके देखत हए। 10पर रातके नेँगन बारो आदमीके ठेस लागत हए, काहेकी बोके सँग कोइ उजियारो नाए होत हए।”

11तओ पिच्छु येशू बिनसे कही, “हमर सँगी लाजरस निँधमे पणो हए, और मए बोके निँधसे जगानके जएहओं।” 12चेला बासे कहीं, “प्रभु, अगर बो निँधानो हए कहेसे बो अच्छो हुइजएहए।” 13येशूको कहाइको अर्थ जा रहए, कि लाजरस मरीगओ हए। पर चेला सोचीं, कि बा स्वाभाविक निँधके बारेमे कहिरहो हए।

14बहेमारे येशू सुधे कहीदइ, “लाजरस मरिगओ हए। 15और मए खुसी हओं, कि मए हुवाँ नाए रहओं। पर मए तुमर ताहीं खुसी हओं कि तुम मोएमे बिश्वास करे। चलओ, अब हम बोके ठिन जामएं।”

16येशूके चेला मैसे दिदुमस कहान बारो थोमा अपन सँगी-चेलनसे कही, “चलओ, हम फिर जामएं और बाक सँग मरएं।”

दुई बहिनियनके येशू हौसला दइ

17जब येशू बेथानिया गाउँमे आएपुगो तओ कोइ आदमी बासे कही लाजरस मरीगओ हए और बक शरीरके चिहानमे धरे चार दिन हुइगओ हए। 18बेथानिया गाउँ यरूशलेम सहरसे लगभग तीन किलो मिटरके दुरीमे रहए। 19बहुतसे यहूदी आदमी मार्था और मरियमको भइया मरो दुखमे सान्त्वना देनके ताहीं आए रहएं। 20येशू आएरहो हए करके जा बात पता पाएके मार्था बाके डगरमे भेँटनके गइ, पर मरियम घरैमे बैठिरही।

21येशूके भेँटके मार्था कही, “हे प्रभु, तुमके हियाँ होन रहए, तओ मिर भइयाको मृत्यु नाए हुइतो। 22पर हबए फिर मए जानत हओं, तुम परमेश्वरसे जो माँगैगे, परमेश्वर तुमके देहए।” 23येशू मार्थासे कही, “तिर भइया फिरसे जिन्दा हुइजएहए।”

24मार्था बोसे कही, “मए जानत हओं, कि बा न्यायके दिनमे फिरसे जिन्दा हुइके उठजएहए।”

25येशू मार्थासे कही, “मए बा हओं, जो मरे भए आदमीनके जीबन लौटात हओं। जो कोइ मोएमे बिश्वास करत हए बो मरके फिरसे जिन्दा हुइ जाबैगे। 26और जो कोइ मोएमे जीइत हए और मोएमे बिश्वास करत हए बो कभीनाए मरैगो। का तए जा बातमे बिश्वास करत हए?”

27मार्था बासे कही, “हँ प्रभु, मए बिश्वास करत हओं, तुम जा संसारमे आन बारे परमेश्वरको लौंणा ख्रीष्ट हओ।”

लाजरसके जिन्दा करोगओ

28इतकए कहिके मार्था गइभइ, और अपनी बहिनीया मरियमके बुलाएके चुप्पएसे कही, “महान गुरु आइगओ हए, और तोके बुलाएरहो हए।” 29जा बात सुनके मरियम जलदिसे उठके बाके भेँटनके गइभइ। 30बो बेरा येशू अभौफिर गाउँसे बाहिर रहए, बल्कि येशू बहे ठिहामे रहए जहाँ मार्था बाके भेँटी रहए। 31तओ बे यहूदी जो मरियमके सँग घरमे रहएं, और जौन बोके सान्त्वना देत रहएं, बे मरियमके झट्टसे उठके बाहिर जात देखीं। जहेमारे यहूदी बोके पिच्छु-पिच्छु गए, जा सोँचके कि बो रोनके ताहीं चिहानमे जान डटी हए। 32जब मरियम येशू भओ ठाउँमे आइ और बाके देखी तओ बो बाको पाँवमे घुप्टा पणके कही, “हे प्रभु, अगर तए हियाँ हुइतो तओ मिर भइया नाए मरतो।” 33मरियम रोन डटी रहए और बोके सँग आए यहूदी फिर रोन डटे रहएं। जा देखके येशू दया और दुखसे भरिगओ। 34येशू बिनसे पुछी, “तुम लाजरसके कहाँ दफ्नाएके धरे हओ?”

35येशू रोइ। 36जहेमारे यहूदी जो मरियमके पिच्छु-पिच्छु आए रहएं बे एक-दुस्रेसे कहीं, “देखओ ता, येशू लाजरसके कित्नो प्रेम करत हए!” 37पर कोइ-कोइ यहूदी कहीं, “का अन्धराके चंगाइ करन बारो जहे नाए हए? का जा लाजरसके मरनसे नाए बचाए पाइ?” 38तओ येशू फिर बहुत दया और दुखी हुइके चिहान घेन गओ। बो चिहान एक गुफा रहए और बोको मोहोडा बडो पत्थरसे तुपोगओ रहए। 39येशू कही, “पत्थर हटाओ।” लाजरसकी दिदी मार्था कही, “हे प्रभु बोके चिहानमे धरो त आज मिलाएके चार दिन हुइगओ, आज तक त बो गिन्धान बारो हुइगओ हुइहए।” 40येशू मार्थासे कही, “का मए नाए कहो रहओं, कि अगर बिश्वास करैगो कहेसे तए परमेश्वरको महिमा देखैगो?” 41बे चिहानको मोहोडासे पत्थर हटाइं और येशू उपर देखके कही, “हे दौवा, मए तुमके धन्यबाद देत हओं, काहेकी तुम मिर प्राथना सुनलए हओ। 42मोके पता हए, कि तुम मिर प्राथना रोज सुन्त हओ। तुम मोके संसारमे पठाए हओ कहान बारी बात हियाँ भए आदमी बिश्वास करएं कहिके मए तुमके बडो अबाजसे प्राथना चढान डटो हओं।” 43इतका कहिके येशू बडो अबाजसे बुलाइ, “हे लाजरस, बाहेर निकरके आ!” 44बो मरो आदमी बोको हात-टाँग पट्टिसे बँधो और मुँहुँ लत्तासे बिटो बाहेर निकरके आइगओ। येशू बिनसे कही, “चिहान मैके लत्ता खोलदेओ और बोके जान देओ।”

येशूके मारनके षडयंत्र

(मत्ती. 26:1-5; मर्क. 14:1-2; लूक. 22:1-2)

45मरियमके ठिन आएभए बहुत यहूदी आदमी येशूक करोभओ काम देखके बाके उपर बिश्वास करीं। 46पर बिन मैसे कोइ आदमी फरिसीनको समुहके ठिन गए, और येशू जो काम करी रहए, सब बताए दइ। 47तओ मुखिया यहूदी पुजारी और फरिसीनको समुहके यहूदी सभाघरके सदस्यनके बुलाइ और उनसे कहीं, “अब हम का करएं? काहेकी जा आदमी बहुत शक्तिशाली चमत्कार कर रहोहए। 48जाके अइसियए छोड देहओ तओ सब जाके उपर बिश्वास करंगे और रोम सहरको आदमी आएके हमर पबित्रस्‍थान और हमर जातिनके दोनएके नष्ट करदेहएं।” 49पर बिन मैसे एक जनै, कैयाफा, बो समयमे प्रधान यहूदी पुजारी रहए, बो उनसे कही, “तुम कुछ नाए जानत हओ! 50हमर सब आदमी नाश होनसे बरु जनताके ताहीं एक आदमी मरनमे तुमर भलाइ हए कहिके तुम नाए जानत हओ।” 51जा बात बो अपने तरफसे नाए कही रहए, पर बो सालको प्रधान यहूदी पुजारीके रुपमे बो जा अगमबाणी बोली रहए, कि येशूके इस्राएल देशके आदमीनके ताहीं मरन पणैगो। 52पर उनके ताहीं इकल्लो नाए हुइके, बा परमेश्वरके सन्ताननके ताहीं फिर मरैगो, जौन जा संसारमे तितरबितर हएं, ताकी बिनके एक ठाउँमे जमा करो जाए सकए। 53जहेमारे बो दिनसे यहूदी बाके मारनके बिचार करन लागे।

54बहेमारे येशू बो दिनसे यहूदीनके बीचमे खुल्मखुल्ला नाए नेगन लागो। बा जंगली इलाकाके ढिँगै पणन बारो इफ्राइम सहरमे गओ और अपने चेलनके सँग हुवँए बैठो।

55यहूदीनको निस्तार तेवहार ढिँगै रहए, और गाउँ-गाउँसे बहुत जनै अपनएके शुद्ध करनके ताहीं यहूदीनको निस्तार तेवहारको सुरु होनेसे अग्गु यरूशलेम सहरमे गए। 56तओ बे येशूके ढुँणन लागे, और बे यरूशलेमको मन्दिरमे ठाणेके आपसमे कहान लागे, “तुमके कैसो लागत हए, का बा तेवहारमे अएहए?” 57मुखिया यहूदी पुजारी और फरिसीनको समुह येशूके पकणनके ताहीं “बा जहाँ फिर होबए खबर करीयओ” कहिके आज्ञा दइ रहएं।

Currently Selected:

यूहन्ना 11: THRNT

Highlight

Copy