यूहन्ना 16

1“जे बात मए तुमसे जहेमारे कहो हओं, कि तुम कोइके द्वारा अपमानित नाए होबओ। 2बे तुमके यहूदी सभाघरसे निकार देहएं। पर अइसो समय फिर आबैगो, कि जो कोइ तुमके मार डारैगो बो जा सम्झैगो, कि मए परमेश्वरको सेवा करत हओं। 3और अइसे बे जाकेमारे करंगे, कि बे नए दौवाके जानी हएं नए मोके जानत हएं। 4पर जा बात मए जहेमारे तुमसे कहो हओं, कि जब परमेश्वरको पुरा होनको समय आबए तओ तुमके याद आयजाए, कि मए तुमसे पहिलीयए बताएदओ रहओं। जब तुम सुरुवातसे मेरे चेला बने तबसे लैके आजतक मए तुमसे जा बात जहेमारे नाए कहो काहेकी मए तुमर सँग रहओं।”

पबित्र आत्माको काम

5“अब मए मोके पठान बारेके ठिन जाएरहो हओं, और तुम मैसे कोइ मोसे नाए पुँछत हए, ‘तुम कहाँ जाएरहे हओ?’ 6मए जे सब बात बताओके कारणसे तुमर मन बहुत उदास हुइगओ हए। 7पर मए तुमसे सच्चो बात कहात हओं, मए हियाँसे जानो तुमर ताहीं फाइदा हुइहए काहेकी मए नाए गओ कहेसे मदत करन बारो सल्लाहकार तुमर ठिन नाए आबैगो। पर अगर मए तुमर ठिनसे गओ कहेसे बाके तुमर ठिन पठामंगो। 8और सल्लाहकार आएके संसारके आदमीनके गलत बात, धार्मिकता और परमेश्वरको न्यायके बारेमे, बे गल्ती करनडटे हएं कहिके दिखाबैगो। 9सल्लाहकार गलत बातके बारेमे याद दिलाबैगो जाकेमारे, कि बे मोएमे बिश्वास करनसे इन्कार करत हएं। 10और धार्मिकताके बारेमे जहेमारे, कि मए दौवाके ठिन जाएरहो हओं, और तुम मोके फिरसे नाए देखैगे। 11सल्लाहकार पापके बारेमे याद दिलाबैगो जाकेमारे, कि परमेश्वर पहिलीयएसे संसारको सासक शैतानकी शक्तिके दोषी ठहिराए डारी हए।”

12“मए तुमसे और फिर बहुत बात कहान चाँहत हओं, पर हबए तुम जा बातसे जद्धा नाए बुझ पएहओ। 13जब बा परमेश्वरके बारेमे सच्चाई प्रकट करन बारो आत्मा आबैगो। तओ आत्मा तुमके, परमेश्वरके बारेमे जो फिर सत्य हए कहिके जाननको कारण बनैगो, काहेकी सल्लाहकार अपनी अधिकारसे नाए मस्कत हए। बल्कि सल्लाहकार परमेश्वरके घेनको बात सुनैगो और बहे बताबैगो, और आन बारी बात तुमके बताबैगो। 14बा मिर महिमा करैगो, काहेकी बाके मिर घेनसे जो मिलो हए, बो तुमके बहे बताबैगो। 15परमेश्वर लौंणाके प्रेम करत हए और सब चीज जो दौवाके हएं बे सब मेरे हएं, जहेमारे मए कहो कि, सल्लाहकार मेरे बात सब तुमके बताबैगो।”

16“थोरी दिन पिच्छु तुम मोके नाए देखैगे, और थोरी दिन पिच्छु तुम मोके फिरसे देखैगे।”

चेलनको शोक और आनन्द

17तओ येशूके कोइ-कोइ चेला एक-दुस्रेसे कहान लागे, “बा हमके का कहान ढुँणरहो हए? कि ‘थोरी दिन पिच्छु तुम मोके नाए देखैगे, और थोरी दिन पिच्छु तुम मोके फिरसे देखैगे,’ और जा फिर कि ‘काहेकी मए दौवाके ठिन जात हओं।’” 18“जा थोरी दिन पिच्छुको मतलब का हए? बा काको बारेमे कहानडटो हए, हम त नाए बुझे,” कहिके बे अलमलमे पणिगए।

19चेला जा बातको अर्थ पुछनके चाँहत हएं, कहिके जानके येशू बिनसे कही, “मए कहो ‘मए हबए थोरी दिनतक तुमर सँग नाए रहाङगो पर थोरी दिन पिच्छु फिरसे तुम मोके देखैगे।’ का जहे बातमे तुम एक-दुस्रेसे पुँछत रहओ? 20नेहात्तओ, मए तुमसे कहात हओं, कि तुम मिर मौतके पच्छु रुइहओ और चिल्लाबैगे, पर संसारके आदमी आनन्द करंगे। तुम दुखित होबैगे, पर जब तुम मोके फिरसे देखैगे तओ तुमर दुख आनन्दमे बदलैगो। 21जब बैयरके बालका जन्मानको समय आत हए, तओ बो बहुत पिडामे होत हए। काहेकी बोकी दुखको बेरा आओ, पर जब बो बालकाके जनम दइडारत हए तओ जा आनन्दसे, कि संसारमे एक आदमीको जनम भओ हए, बो पिडाके बैयर फिर याद नाए करत हए। 22अइसियए, तुमके फिर त पिडा हए, पर मए तुमसे फिरसे मिलंगो और तुम आनन्दित होबैगे, और तुमर आनन्द कोइ तुमसे नाए छिनाए पएहए। 23जौन समय तुम मोके दुबारा देखैगे तओ तुम मोसे कुछ नाए पुँछैगे, नेहात्तओ मए तुमसे कहात हओं अगर दौवासे कुछ माँगैगे तओ बा मेरे नाउँमे तुमके देबैगो। 24हबएतक तुम मिर दौवासे कछु नाए मागे हओ। मागओ, तओ तुम पाबैगे। ताकी तुमरमे फिर बहे आनन्द पुरो होबए जो मोएमे हए।”

संसारमे बिजय

25“मए जे बात तुमसे सांकेतिक भाषामे तुमसे कहो हओं, पर बो समय अएहए, कि मए तुमसे सांकेतिक भाषामे और फिर दुस्राएके नाए कहामंगो, पर खुलके तुमर दौवाके बारेमे बतामंगो। 26बो समय तुम मेरे नाउँसे प्राथनामे जो कुछ फिर माँगैगे, और मोके अपन दौवासे कहानकी जरुरी नाए होबैगो, कि दौवा बहे करैगो, जो तुम मागत हओ। 27काहेकी दौवा परमेश्वर अपनए तुमके प्रेम करत हए, जहेमारे कि तुम मोसे प्रेम करत हओ और मए दौवा परमेश्वरसे आओ हओं कहिके बिश्वास करत हओ। 28मए दौवाके ठिनसे संसारमे आओ हओं, और अभए संसारके छोडके फिरसे दौवाके ठिन जानडटो हओं।”

29तओ येशूके चेला कहीं, “अभए इकल्लो त तुम कहानीमे नाए बताएके सांकेतिक भाषामे सुधे कहात हओ। 30अब हम बुझिगए, कि तुम सब कुछ जानत हओ, और तुमके कोइको जरुरी नाए हए कि कोइ तुमसे प्रश्न पुँछए। जहेसे हम बिश्वास करत हएं, कि तुम परमेश्वरके तरफसे आए हओ।” 31जा सुनके येशू बिनके जबाफ दइके कही, “का अन्तमे तुम बिश्वास करत हओ? 32देखओ, समय आए रहो हए और ढिँगै आइगओ हए, और तुम सब तितरबितर हुइके अपन घरमे जाबैगे और मोके अकेलो छोडदेबैगे, तहुँफिर मए अकेलो नाए हुइहओं काहेकी दौवा मोके अकेलो नाए छोडी हए और मए सब दिन बाके खुसी करन बारो काम करत हओं। 33मए जा बात तुमसे जहेमारे कहो, कि तुमके मेरे कारणसे शान्ति मिलए। संसारमे तुमके समस्या आबैगो, पर सहास करओ, काहेकी मए जा संसारके सासक या शैतानके जितो हओं।”

Currently Selected:

यूहन्ना 16: THRNT

Highlight

Copy