यूहन्ना 18

येशूको गिरफ्तारी

(मत्ती. 26:47-56; मर्क. 14:43-50; लूक. 22:47-53)

1जब येशू प्राथना करन बन्द करी तओ अपन चेलनकेसँग किद्रोन नहारमे गओ। जब येशू और बाके चेला किद्रोन घाटके पार करीं। बहे ठिहामे एक बगिया रहए और बे बो भितर गए। 2येशूके पकणन बारो यहूदा इस्करियोत फिर बा ठाउँ चिने रहए, काहेकी येशू अपन चेला सँग बहुत जैसो हुवँए जमा होत रहए। 3तओ यहूदा इस्करियोत रोमी सिपाहीनको एक दल मुखिया यहूदी पुजारी और फरिसीनको समुहके द्वारा पठाओ गओ पहरेदारनके सँग हुवाँ आएपुगो। बे दिया, ऊँका और हथियार लैके हुवाँ आए रहएं।

4तओ येशू बगियासे, बे सब बात जानके निक्रो जो बाके सँग होन बारो रहए, और बहेमारे अग्गु जाएके येशू बे आदमीनसे पुछी, “तुम कौनके ढुणत हओ?” 5बे येशूके जबाफ दइके कहीं, “नासरत गाउँको येशूके।” येशू बिनसे कही, “मए बहे हओं।” और बाके पकणबान बारो यहूदा इस्करियोत फिर बिनके सँग ठाणो रहए। 6येशू जा कहातए कि, “मए बहे हओं” बे पिच्छु हटे और बाको शक्तिके कारण भुइँमे गिरपणे। 7तओ बा फिरसे बिनसे पुँछी, “तुम कौनके ढुणत हओ?” बे कहीं, “नासरत गाउँको येशूके।” 8येशू जबाफ दइके कही, “मए तुमसे अग्गुवए कहिडारो, कि मए बहे हओं। अगर मोके ढुणत हओ, तओ जे अन्य आदमीनके जान देओ।” 9अइसो जहेमारे भओ ताकी येशू जो पहिले कही रहए बो बात पुरा हुइजाए, जैसे बा कही रहए: “हे दौवा, तुम जौन आदमीनके मिर हातमे दए, बिन मैसे मए एकौके फिर नाए गुमाओ।” 10सिमोन पत्रुस अपन ठिन भओ तरबार निकारके प्रधान यहूदी पुजारीको कमैयाको दहिना कान चट्टए काटदइ। बो कमैयाको नाउँ माल्खस रहए। 11तओ येशू पत्रुससे कही, “अपनी तरबारके खोलमे धर। का दौवा मोके दओ भओ दुखको कटोरा मए नाए पिइमओं?”

येशूके हन्‍नासके ठिन लैजाओगओ

12तओ सिपाहीनको समुह, उनको कप्तान और यहूदीनके चौकीदारनके येशूके पकणके बाके बाँधलैं। 13तओ पिच्छु बे येशूके पहिले हन्नासके ठिन लैगए। हन्नास बो सालको प्रधान यहूदी पुजारी कैयाफाको ससुरो रहए। 14जा बहे कैयाफा रहए, जौन जनताके ताहीं एक आदमी मरनसे भलाइ हए करके यहूदीनके सल्लाह दइ रहए।

पत्रुस येशूके चिननसे इन्कार

(मत्ती. 26:69-70; मर्क. 14:66-68; लूक. 22:55-57)

15सिमोन पत्रुस और दुस्रो एक चेला येशूके पिच्छु-पिच्छु लागे। बो दुस्रो चेलाको, प्रधान यहूदी पुजारी सँग अच्छो चिनजान रहए। तभीमारे बो चेला येशूके सँग प्रधान यहूदी पुजारीके आँगनमे गओ। 16पर पत्रुस बाहिर फाटकमे ठाणो रहो। तओ बो दुस्रो चेला जो प्रधान यहूदी पुजारी सँग अच्छो चिनजान रहए, बो बाहिर निकरके द्वारपालकी दासी लौंणीयासे कहिके पत्रुसके भितर ल्याइ। 17बो दासी लौंणीया जो फाटकके द्वारपाली रहए, पत्रुससे कही, “का तए फिर जा आदमीको चेला मैसे हए?” पत्रुस जबाफ दइके कही, “मए नाए हओं।” 18तओ कमैया-चाकर और पहरेदार जाडोके मारे आगी तापत रहएं। तओ पत्रुस फिर बिनके सँग आगीको आहारा तापन लागो।

येशूसे प्रधान पुजारीको प्रश्‍न

(मत्ती. 26:59-66; मर्क. 14:55-64; लूक. 22:66-71)

19अब प्रधान यहूदी पुजारी येशूसे, बाके चेलनके बारेमे और बाके शिक्षाके बारेमे पुँछी। 20येशू बोके जबाफ दइके कही, “मए सबसे खुल्मखुल्ला रुपसे बात कहो हओं। मए यहूदी सभाघर और यरूशलेमको मन्दिरमे रोज शिक्षा दओ, जहाँ सब यहूदी समुह इकट्ठा होए करत हएं। और मए गुप्तमे कुछु शिक्षा नाए दओ हओं। 21तुम मोसे जा सवाल काहे पुँछत हओ? सुनन बारेनसे पुछओ, कि मए बिनके का-का सिखाओ? देखओ, बे जान्त हएं कि मए बिनके का-का शिक्षा दओ हओं।” 22जब येशू जा बात कही, तओ मन्दिरको पहेरेदार मैसे एक जो बाके ठिन ठाणो रहए, येशूके पहरेदार मैसे एक जनै अइसो कहात येशूके थप्पड मारके कही, “का तए प्रधान यहूदी पुजारीके अइसे जबाफ देतहए?” 23येशू मन्दिरके पहेरेदारनसे कही, “अगर मए ठिक नाए कहो हओं, तओ मोके जा बताको प्रमाण देओ, पर अगर मए ठिक कहो हओं कहेसे तुम मोके काहे मारत हओ?” 24येशू अभौफिर बँधो रहए और हन्नास येशूके प्रधान यहूदी पुजारी कैयाफाके ठिन पठाए दइ।

पत्रुसको दुस्रो और तिस्रो इन्कार

(मत्ती. 26:71-75; मर्क. 14:69-72; लूक. 22:58-62)

25सिमोन पत्रुस फिर कमैया-चाकर और पहरेदार सँग आगी तापन लागो। तओ बे पत्रुससे कहीं, “का येशूको चेला मैसे एक तहुँफिर हए?” पत्रुस इन्कार करके कही, “मए नाए हओं।” 26प्रधान यहूदी पुजारीको कमैया मैसे एक जनै, जौनके नातेदारको कान पत्रुस काटी रहए, बो पत्रुससे पुछीं, “का मए तोके येशूके सँग बगियामे नाएदेखो?” 27तओ फिरसे पत्रुस इन्कार करी। और तुरन्त मुर्गा बासदइ।

पिलातसके अग्गु येशू

(मत्ती. 27:1-2,11-14; मर्क. 15:1-5; लूक. 23:1-5)

28और बे येशूके, कैयाफाके ठिनसे पिलातसको महलको आँगनमे लैगए जो रोमको बडो हाकिम रहए। और सुबेरेको समय रहए, यहूदी समुहके अगुवा महलमे नाए कुचे। काहेकी यहूदीनको निस्तार तेवहारको भोज खानके ताहीं बे अपनएके शुद्ध करनके चाँहत रहएं। 29बहेमारे रोमको बडो हाकिम पिलातस बाके भेँटनके बाहिर निक्रो। पिलातस बिनसे पुछी, “तुम जा आदमीके काको दोष लगात हओ?”

30बे एकए अबाजमे बोके जबाफ दइं, “अगर जा आदमी दोषी नाए हुइतो त तुमर ठिन काहे लैते?” 31पिलातस बिनसे कही, “तुम जा आदमीके लैजाओ और तुम अपनो नियम कानुनके अनुसार जा आदमीके न्याय करओ।” यहूदी समुहके अगुवा पितालससे कहीं, “हमएं कोइके मारनके अधिकार नाए हए, केबल तुमके अनुमति हए।” 32जा जहेमारे भओ, कि येशूकी बो बात पुरा होबए जो बा जा संकेत दइके कही रहए, कि बाको मृत्यु कौन तरिकासे हुइहए।

33तओ पिलातस फिरसे महाल भितर घुसो, और येशूके महल भितर बुलाएके बासे पुँछी, “का तुम यहूदीके राजा हओ?”

34येशू जबाफ दइके कही, “का तुम जा अपनए पुँछे हओ, कि औ कोइ मेरे बारेमे तुमके बताइ हए?”

35पिलातस जबाफ दइके कही, “का तुम मोके यहूदी सम्झत हओ? तुमर जाति और मुखिया यहूदी पुजारी तुमके मेरे हातमे सौँपदइं हएं, तुम का अपराध करेहओ?”

36येशू जबाफ दइके कही, “मिर राज्य जा संसारको जैसो नाए हए, अगर मिर राज्य जा संसारको राज्य कता हुइतो तओ मोके पछ्यान बारे मोके यहूदी समुहके अगुवनसे बचानके ताहीं लणते। पर मिर राज्य उइसो नाए हए।”

37पिलातस येशूसे पुछीं, “का तुम राजा हओ?” येशू जबाफ दइके कही, “तुमही कहात हओ, कि मए राजा हओं। मए जनम लेन और संसारमे आनको कारण जा हए, कि मए सत्यके बारेमे सिखाए पामओं। सत्यके पालन करन बारे सब मेरी बात सुन्तहएं।” 38पिलातस येशूसे पुछीं, “सत्य का हए?” इतका कहिके बो फिरसे यहूदी समुहके अगुवनके ठिन बाहिर निकरके गओ, और बिनसे कही, “मए जामे कोइ दोष नाएपाओ। 39पर तुमरी जा चलन हए, कि यहूदीनको निस्तार तेवहारके उपलक्ष्यमे तुमर ताहीं एक आदमीके छोडदेओं। तओ तुम का चाँहत हओ? कि मए तुमर ताहीं यहूदीनको राजाके छोडदेओं?”

40तओ बे फिरसे चिल्लाएके अइसे करके कहीं, “जाके नाए, पर हमर ताहीं बारब्बाके छोड देओ।” बारब्बा एक डाँकु रहए।

Currently Selected:

यूहन्ना 18: THRNT

Highlight

Copy