लूका 14
14
पबित्र दिनमे बिमारीसे अच्छो
1फिर येशू, पबित्र दिनमे फरिसीनको समुहके सासक मैसे कोइ एक घरमे खानु खान गओ, और बे येशूको चुहा लेत बैठे रहएं। 2हुवाँ एक आदमी रहए, जौनक हात-टाँग सुजे रहएं और बो आदमी येशूके अग्गु बैठो रहए। 3तओ येशू नियम कानुन सिखान बारे मुखिया पुजारी और फरिसीनको समुहसे पुछी, “पबित्र दिनमे बिमारीसे अच्छो करन ठिक हए कि नाए?” 4पर बे चुपचाप लागेरहे, तओ येशू अपन हात बो आदमीके उपर धरके अच्छो करी, और येशू बोके पठाए दइ।
5तओ येशू बिनसे कही, “अगर तुमर लौंणा या बर्धा पबित्र दिनमे कुँइँयाँमे गिरजए हएं और बो बोके तुरन्त बाहिर नाए निकर हएं?” 6तओ बे जा बातकी कोइ जबाफ नाए दइ पाइं।
पहुनको आदर
7तओ बेहामे आएभए पहुनाके, बिशेष आदमी बैठान बारो ठाउँके छानत देखके, येशू एक कहानी बिनसे कही, 8“जब कोइ तुमके बेहाके भोजमे निउतो देहए तओ मुख्य-मुख्य ठाउँमे जहाँ आदमी बैठत हएं, हुवाँ मत् बैठीयओ। कहुँ अइसो नाए हुइजाए, कि बो तुमसे फिर बडो आदमीके निउतो दइ होबए। 9और बो आदमी तुमके और बोके, दुनौके निउतो दइ हए, तओ आएके तुमसे कहाबए, ‘जाके अपना बैठो ठिहा देओ,’ और तओ तुमके सरममे पणके साधारण आदमीके बैठन बारो ठिहामे बैठन पणैगो। 10पर जब तुमके बुलाए जएहए, तओ साधारण आदमी बैठन बारो ठिहामे जाएके बैठओ। जब बो, जौन तुमके निउतो दइ हए, बो आबए और तुमसे कहाए ‘ए सँगी, मुख्य ठिहामे बैठ,’ तओ तुमर सँग बैठन बारेनके अग्गु तेरो इज्जत होबैगो। 11काहेकी जौन आदमी अपनएके बणे सम्झत हएं, बे आदमी छोटे बने जएहएं; और जौन कोइ अपनएके छोटो सम्झत हए, बे बणे बने जएहएं।”
प्रतिफल
12तओ येशू अपने निउतो देन बारे फरिसीनको समुहसे फिरसे कही, “जब तुम दिनको या रातको खानु खाबओ, तओ अपन सँगी या भइया या नातेदार या धनी परोसीनके मत् बुलैयओ, कहुँ अइसो नाए होए, कि बे फिर तुमके निउतो दइके तुमर गुन घुमाए देएं। 13पर जब तुम खानु खानके बुलाबओ, तओ गरीब, लुला, लंगणा, अन्धराके बुलाओ। 14तओ तुम धन्यके हुइहओ, काहेकी बे तुमर गुन घुमाए नाए पए हएं। जब धर्मीजान फिरसे मरके जिन्दा होबैगो तओ परमेश्वर तुमके इनाम देबैगो।”
बडो भोजको कहानी
(मत्ती. 22:1-14)
15येशूको बात सुनके बाके सँग खानु खान बैठन बारे मैसे एक जनै कही, “परमेश्वरको राज्यमे सहभागी हुइके खानु खान पान बारे धन्यके होमंगे!” 16पर येशू बोसे कही, “कोइ एक जनै आदमी संझाके एक बडो भोज तयार करी, और बेढमके निउतो दइ। 17बो अपन नोकरके, निउतो दएभएनके अइसे कहान पठाइ, ‘आबओ, सब चीज तयार हए।’
18पर बे सब जनै एकए हानी बहाना बनानलागे। पहिलो बोसे कही, मए एक खेत किनो हओं, मोके बो देखन जानपणैया हए, मए बिन्ती करत हओं, मोके माफ करओ। 19तओ दुस्रो कही, मए पाँच गोइ बर्धा किनो हओं, मए बिनके देखन जएहओं। मए बिन्ती करत हओं, मोके माफ करओ। 20दुस्रो कही, मए बेहा करो हओं। जहेमारे मए नाए आए पएहओं। 21तओ नोकर आएके अपन मालिकके जा बात कहीदइ। तओ घरको मालिक दिक्काएके अपन नोकरसे कही, सहरके डगरमे और घुल्लीमे जल्दी जा, और गरीब, लुला, अन्धरा, लंगणाके हियाँ भितर लिया। 22तओ नोकर कही, ‘तुम जैसी आज्ञा अढाए उइसी काम हुइगओ हए, पर अभए औ ठाउँ खाली हए।’ 23मालिक नोकरसे कही, ‘मेन डगर और घुल्लीसे हुइके जाएके आदमीके भितर आनके कर लगाओ, ताकी मिर घर आदमीसे भरजाए। 24काहेकी मए तुमसे कहात हओं, बे आदमी जौन पहिले निउतो दइके बुलाएगए रहएं, बे कोइ फिर मिर सँग खानुको स्वाद चाखनके नाए पामंगे।’”
चेलाके करन बारो त्याग
(मत्ती. 10:37-38)
25और जब बणी भिड येशूके सँग जात रहए, तओ येशू पिच्छु घुमके बिनसे कही। 26जौन आदमी मिर ठिन आत हएं बे तबतक मिर चेला नाए हुइ सकत हएं, जबतककी बे अपन अइयादौवासे, लौंणालौंणीया, ददाभइया, दिदी-बहिनीया और अपनेसे जद्धी मोसे प्रेम नाए करहएं। 27और जौन मिर अनुसरण नाए करैगो और मिर ताहीं अपनो क्रूस नाए उठाबैगो और मरनके ताहीं तयार नाए होबैगो; बो मिर चेला नाए हुइपए हए। 28अगर तुम मैसे कोइ एक धरहरा बनानके इच्छा करत हए, तओ बो बैठके सबसे पहिले जा बातको हिसाब करैगो, कि जाके बनानमे कित्नो खर्च आबैगो और देखैगो कि बोके ठिन जा धरहराके पुरा करनके ताहीं चाहन बारो रुपैया हए कि नाए। 29अगर बो धरहराको जग बनाएके पुरो नाए करी कहेसे आदमी बोको अइसे कहिके मजाक उणामंगे, 30“जा आदमी बनान त लागो पर पुरा नाए करपाइ।”
31फिर, अगर एक राजा दश हजार आदमीनके सँग दुस्रो राजाको बिरुद्धमे लडनके ताहीं निकरत हए और जौनके बीस हजार आदमी हएं कहेसे बो राजा सबसे पहिले बैठके जा बातको फैसला करैगो, कि बो दुस्रो राजाके सामना करपएहए कि नाए कर्पएहए। 32बो लड नाए पएहए कहेसे बो दुस्रो राजा, दुरए होत मेलमिलाप करनके ताहीं छलफल करन अपन राजदूतके पठाबैगो। 33जहेमारे तुम मैसे जो कोइ अपन सब कुछ नाए त्यागैगो कहेसे बो मिर चेला नाए हुइपए हए।
बिना स्वादको नुन
(मत्ती. 5:13; मर्क. 9:50)
34“नुन त अच्छो हए, पर अगर नुनको स्वाद बिगण जाए, तओ बो का चीजसे नुनाइन हुइहए? 35बो नए जमिनके ताहीं नए खादके ताहीं काम लगन बारो होतहए: बोके त आदमी बाहिर फेकन और आदमीके टाँगसे कुल्चन बाहेक कोइ काम नाए देतहए। जो तुम सुने हओ बोके बारेमे ध्यानसे सोँचओ।”
Currently Selected:
लूका 14: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
