लूका 5

येशूके बुलाएभए चेला

(मत्ती. 4:18-22; मर्क. 1:16-20)

1एक दिन जब आदमी परमेश्वरको बचन सुननके चारौ घेन ढकेलीढकेला करत रहएं, तओ येशू गालील समुन्दरके किनारेमे ठाणो रहए। 2येशू गालील समुन्दरके किनारेमे दुई नैयाँ देखी। पर मछरेहा, नैयाँसे उतरके अपन मछ्री मारन बारी जार धोत रहएं। 3बे दुई मैसे एक नैयाँ सिमोनको रहए। नैयाँमे चढके येशू नैयाँके किनारेसे थुरदुर लैजानके ताहीं कही, और येशू नैयाँमे बैठके भिडके शिक्षा देन लागो।

4जब येशू भिडके आदमीनसे मसकडारी, तओ बा सिमोनसे कही, “नैयाँ गहिरो घेन लैजाएके मछ्री पकणनके ताहीं अपन जार डार।” 5पर सिमोन येशूसे कही, “हे महान गुरु, हम सारी रात मेहेनत करके फिर कुछु नाए पकणपाए। तहुँफिर, तुम अइसे कहात हओ तओ मए जार डारंगो।”

6तओ जब पत्रुस और बोके सँगी जार डारीं, तओ बे बहुत मछ्री फसाइं। और उनकी जार फटन लागी। 7बे दुसरी नैयाँमे भए सँगीन्के बुलाएके, मदत करओ कहिके इशारा करीं, और बे आएके दुनौ नैयाँ मछ्रीसे भरलैं, हियाँतककी बिनको नैयाँ डुबनके अवस्थामे आएगइ रहए।

8तओ जा देखके येशूके पाउँ पणके सिमोन पत्रुस कही, “हे प्रभु, मिर ठिनसे चलेजाओ, काहेकी मए पापी आदमी हओं।” 9इत्नो जद्धा मछ्री मरके देखके, बो और बोकेसँग रहन बारे सब अचम्मो मानीं। 10और बिनके सँगी, याकूब और यूहन्ना जौन जब्दियाके लौंणा रहएं, बे फिर अचम्मो पणिगए। तओ येशू सिमोनसे कही, “मत डराए, अबसे तए मिर चेला बननके ताहीं आदमीनके इकट्ठा करैगो।” 11तओ बे अपन नैयाँ डीणोमे लाइं, और तुरन्त बे अपनो मछ्री मारन बारो काम छोडके येशूके चेला बननके ताहीं येशूके पिच्छु गए।

येशू कोढ रोग लागो भओके अच्छो करी

(मत्ती. 8:1-4; मर्क. 1:40-45)

12जब येशू कोइ एक सहरमे रहए, तओ एक कोढ रोग लागो भओ आदमी येशूके ठिन आएके घुँटो टेकके अइसे बिन्ती करी, “हे प्रभु, तुमर इच्छा हए, कहेसे मोके अच्छो करसकत हओ।”

13येशू अपन हात उठाएके, “मए इच्छा करत हओं, तए अच्छो हुइजा” कहिके बा छुइ, और तुरन्त बोको कोढ रोगसे बो अच्छो हुइगओ। 14येशू बोके चेतावनी दइ, “हियाँसे जा, और कोइसे मत् कहिए, कि मए तोके अच्छो करो। पर जाएके यहूदी पुजारी ठिन अपनएके दिखा। और जैसे अगमबक्ता मोशा आज्ञा दइहए, बहे अनुसार जानबरको बलिदान चढा, ताकी सबके पता चलए, कि तए अच्छो भओ हए।”

15पर येशूको चर्चा औ जद्धा फैलगओ, और बहुत भरी भिड येशूको बात सुननके ताहीं, और अपन-अपन बिमारसे अच्छो होनके इकट्ठा भए। 16पर येशू जंगली इलाकामे जाएके परमेश्वरसे प्राथना करत रहए।

लुलो मनै अच्छो भओ

(मत्ती. 9:1-8; मर्क. 2:1-12)

17और एक दिन अइसो भओ, कि येशू शिक्षा देत रहए, तओ फरिसीनको समुह और नियम कानुन सिखान बारे हुवाँ बैठे रहएं, जौन गालील परदेशके और यहूदिया परदेशके सब गाउँसे और यरूशलेम सहरसे आए रहएं। और बिमारीसे अच्छो करनके, प्रभुको महान शक्ति येशूके सँग रहए। 18आदमी एक लुलो मनैके खटियामे ल्याइं, और बे बोके भितर लान और येशूके अग्गु धरन उपाय ढुणत रहएं। 19पर भिडके मारे बोके भितर लैजान कोइ डगर नाए पाइं। तओ बे घरकी छानी उपर चढाएके, और बे छानी उतक्के बोके गुन्द्री समेत येशूके अग्गु धरीं।

20तओ येशू बे आदमीनको बिश्वास देखके कही, “ए लौंणा, तिर पाप क्षमा हुइगओ।” 21तओ मोशाको नियम कानुन सिखान बारे और फरिसीनको समुह पुछन लागे, “परमेश्वरको बदनाम करन बारो जा कौन हए? पाप त परमेश्वर इकल्लो क्षमा करत हए।” 22पर येशू बिनको मनकी बात पता पएके बिनके जबाफ दइके कही, “तुम अपन हृदयमे काहे अइसो सोँचत हओ? 23का कहान सजिलो हए, ‘तिर पाप क्षमा हुइगओ,’ कहान कि ‘उठ और नेँग’ कहान? 24और मए, आदमीको लौंणाके पृथ्वीमे पाप क्षमा करन अधिकार हए, कहिके तुम जानओ।” तओ येशू बो लुलो मनैसे कही, “मए तोसे कहात हओं, उठ और अपन गुन्द्री उठाएके घरे जा।” 25तओ बो तुरन्त मोशाको नियम कानुन सिखान बारे और फरिसीनको समुहके अग्गुसे उठो। और जौन गुन्द्रीमे बो लेटो रहए, बो गुन्द्री उठाएके परमेश्वरको महिमा करत, बो अपन घर घेन गओ। 26तओ सब जनै अचम्मो मानीं, और बे परमेश्वरको महिमा करीं, और डराएके अइसो कहीं, “आज हम अचम्मको काम देखे।”

लेबीको बुलावट

(मत्ती. 9:9-13; मर्क. 2:14-17)

27तओ जे काम करके येशू बाहिर गओ, और लेबी नाउँ भओ, एक आदमीके कर उठान बारो ठिहामे बैठो देखी, और येशू बोसे कही, “आ, और मिर चेला बननके ताहीं मिर पिच्छु लाग।” 28तओ बो सब चीज छोडके उठो और येशूको चेला बनिगओ।

येशू पापीनके सँग खाइ

29लेबी अपनो घरमे येशूके ताहीं बडो भोजको ब्यवस्था करी। हुवाँपर कर उठान बारे, और बडो संख्यामे येशूके सँग खानु खानके बैठे रहएं। 30फरिसीनको समुह और मोशाको नियम कानुन सिखान बारे आदमी येशूके, चेलनके बिरुद्धमे अइसो कहिके काहान लागे, “तुम कर उठान बारे और पापीनके सँग काहे खानपिन करत हओ?”

31पर येशू बिनसे कही, “स्वस्थ आदमीके बैदाको जरुरत नाए पणतहए, पर रोगीनके इकल्लो बैदाको जरुरत पणतहए। 32मए धर्मीनके ताहीं नाए पर पापीनके, पाप करन छोडके परमेश्वर घेन घुमानके ताहीं बुलान आओ हओं।”

उपवासके बारेमे प्रश्‍न

(मत्ती. 9:14-17; मर्क. 2:18-22)

33बे येशूसे कही, “बप्तिस्मा देन बारो यूहन्नाके चेला घरी-घरी उपवास बैठके परमेश्वरसे प्राथना करत हएं और फरिसीनको समुहके चेला फिर उइसी करत हएं, पर तुमर चेला खात हएं और पिइत हएं।”

34येशू बिनसे कही, “का दुलहा सँग होन बारे बरैतियाके उपवास बैठाए पाबैगे? 35पर अइसो दिन आबैगो, जब दुलहा बिनसे छुटजएहए। तओ बे उपवास बैठंगे।”

36येशू बिनसे एक कहानी फिरसे कही: “कोइ आदमी नयाँ कुर्तामैको थिगरा पुरानो कुर्तामे नाए थिगरत हएं, अगर बे अइसे करंगे कहेसे जब कुर्ता धोमंगे, तओ थिगरा फटके निकार जाबैगो और नयाँ थिगरा पुरानो लत्ताके और जद्धा फारदेहए। 37कोइ आदमी नयाँ अंगुरको रसा पुरानी खालकी थैलीमे नाए डारतहएं, नत नयाँ अंगुरको रसासे खालकी थैली फुट जएहए, और अंगुरको रसा खतम हुइजए हए, और खालकी थैली फिर खराब हुइजए हए। 38नयाँ अंगुरको रसा नयाँ खालको थैलीमे धरन पणतहए। 39कोइ आदमी पुरानो अंगुरको रसा पिइके नयाँको चहना नाए करैगो, काहेकी बो कहात हए, ‘पुरानो अच्छो हए।’”

Currently Selected:

लूका 5: THRNT

Highlight

Copy