मत्ती 28
28
येशू मरके जिन्दा भओ
(मर्क. 16:1-16; लूक. 24:1-12; यूह. 20:1-18)
1पबित्र दिन पिच्छु, हप्ताको पहिलो दिन भुकभुको उजियारो होतए मरियम मग्दलिनी और दुसरी मरियम चिहानमे आइं। 2तओ बहुत भारी हालाचाला गओ। काहेकी परमप्रभुको एक स्वर्गदूत स्वर्गसे तरे उतरके, पत्थर हटाइ और बोके उपर बैठीगओ। 3बोको रुप बिजुली जैसो और कुर्ता बरफ जैसो सेतो रहए। 4बिनके डरके मारे बे सैनिक थरथर काँपीं, और अधमरा हुइगए।
5तओ स्वर्गदूत बे बैयरनसे कही, “तुम मत् डराओ, काहेकी मोके पता हए, तुम क्रूसमे टाँगाओगओ येशूके ढुणत हओ। 6येशू हियाँ नैयाँ, काहेकी बा अप्नो बचन अनुसार जिन्दा हुइके उठीगओ हए। आओ, जा ठाउँ देखओ जहाँ प्रभुके धरोगओ रहए। 7तओ जल्दी जाएके बाके चेलनके खबर देओ, कि बा मरके जिन्दा हुइके उठीगओ हए, और बा तुमसे अग्गु गालील परदेशमे जाए रहोहए। तुम बाके हुवाँ देखैगे। देखओ, मए तुमके बताएदओ हओं।”
8और बे डर और बहुत आनन्दसे तुरन्त चिहानसे निकरके गइं, और येशूके चेलनके खबर देनके दौरीं।
बैयर पहिले येशूके दर्शन करीं
9अचानक येशू बिनके भेँटके कही, “शान्ति!” बे ढिँगै आएके बाको पाउँ पकणके बाके आराधना करीं। 10तओ येशू बिनसे कही, “मतडरओ, मिर बिश्वासी ददाभइयनसे जाएके कहाओ, कि बे गालीलमे चलेजामएं हुवाँ मोके देखंगे।”
पहरेदारनको खबर
(मर्क. 16:14-18; लूक. 24:36-39; यूह. 20:19-23; प्रे. 1:6-8)
11जब बैयर चेलनके जा खबर बतानके ताहीं जातए रहएं, तओ सैनिक जो चिहानकी लख्बारी करत रहएं, बे मैसे कोइ सैनिक सहरमे आएके पुरा बात मुखिया यहूदी पुजारीके सुनाइ। 12मुखिया यहूदी पुजारी, यहूदी अगुवनको समुहसे मिले और अपनो योजना बनाइं। बे सैनिकनके घुसके रुपमे बहुत धन देनके फैसला करीं, जा बतानके ताहीं, कि चिहान खाली काहे रहए। 13बे सैनिकसे कहीं, “आदमीनसे जा कहियओ, कि ‘रातके जब हम सोइगए रहएं, तओ येशूके चेला आएके बाको लहास चुराएके लैगए।’ 14और अगर तुम लख्बारीके समयमे सोइगए रहओ, करके जा बात रोमको बडो हाकिमतक पुगजएहए कहेसे फिर हम बोके मनाए लेमंगे और तुमके कोइ बातकी चिन्ता करन कि जरुरत नाए हए।” 15तओ बे बो धन लइं, और मुखिया पुजारी सिखाए अनुसार कहीं, और यहूदी समुहसे आजके दिनतक जहे बात फैलिहए।
चेलनके अन्तिम सन्देश
16और बे एघारा जनै चेला गालीलको बो डँगामे गए, जहाँ येशू बिनके जानके हुकुम दइ रहए। 17और बे येशूके देखके आराधना करीं, पर कोइ-कोइ शंखा करीं। 18तओ येशू बिनके ठिन आएके कही, “स्वर्ग और पृथ्वीको सब अधिकार मोके दओगओ हए। 19जहेमारे तुम जाएके सब जाति-जातिके आदमीके चेला बनाओ; और बिनके पिता, पुत्र, और पबित्र आत्माके नाउँमे बप्तिस्मा देओ, 20और बिनके सब आज्ञा जो मए तुमके दओ हओं, माननके सिखाओ और देखओ, मए संसारको अन्त तक सब दिन तुमर सँगमे हओं।”
Currently Selected:
मत्ती 28: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
