मर्कूस 15
15
पिलातसको येशूसे प्रश्न
(मत्ती. 27:11-31; लूक. 23:2-3,18-25; यूह. 18:28-40; 19:1-16)
1सुबेरे बहुत जल्दी मुखिया यहूदी पुजारी, यहूदी अगुवनको समुह, मोशाको नियम कानुन सिखान बारे और जम्मए यहूदी सभाघरके सब सदस्य आपसमे सल्लाह करके येशूके साँकरसे बाँधके लैगए, बे बाके जाँचनके ताहीं रोमको बडो-हाकिम पिलातसके घरमे लैगए। 2रोमको बडो-हाकिम पिलातस बासे पुछीं, “का तए यहूदीको राजा हए?” बा बिनके जबाफ दइ, “जैसी तुम कहात हओ मए उइसीयए हओं।”
3मुखिया यहूदी पुजारी येशू उपर बहुत बातकी दोष लगाइं। 4रोमको बडो-हाकिम पिलातस येशूसे फिरके पुछी, “का तिर ठिन कुछ बात नाए हए? देख, तिर बिरुद्धमे बे कित्तो बातकी दोष लागए रहे हएं।” 5येशू फिर कुछु जबाफ नाए दइ, तभीमारे रोमको बडो-हाकिम पिलातस फिर अचम्मो मानीगओ।
येशूके मृत्युदण्डको आज्ञा
6हर साल निस्तार-तेवहारके समयमे, पिलातसको जा चलन रहए, कि कोइ फिर कैदी, जौनके मनै कहात रहएं, बोके बो छोडदेत रहए। 7और बो समय बारब्बा नाउँको एक आदमी रहए जो बिद्रोहीनको सँगमे जेलमे रहए, जौन रोमी सरकारके बिरुद्ध बिद्रोहमे कुछ आदमीके मारडारी रहए। 8और भिड रोमको बडो-हाकिम पिलातसके ठिन आइ और बोसे, बो करनके ताहीं बिन्ती करी, जो बो हर साल बिनके ताहीं करत रहए।
9रोमको बडो-हाकिम पिलातस अइसे करके उनसे प्रश्न करी, “का मए तुमर ताहीं यहूदीको राजाके छोडदेओं करके तुम चाँहत हओ?” 10काहेकी बा जानत रहए, कि मुखिया यहूदी पुजारी येशूके, दिक्कके मारे पकणीं रहएं। 11पर मुखिया यहूदी पुजारी भिडके उकसाइ, कि बाके ठाउँमे बारब्बाके छोडनके ताहीं रोमको बडो-हाकिम पिलातससे अनुरोध करएं। 12रोमको बडो-हाकिम पिलातस फिरसे उनसे पुँछी, “तओ जौनके तुम यहूदीके राजा कहात हओ, बाके मए का करओं?” 13भिड फिरसे चिल्लाइं, “बाके एक क्रूसमे टाँगदेओ।” 14रोमको बडो-हाकिम पिलातस उनसे कही, “काहे? जा का अपराध करीहए?” पर भिड औ जोडसे चिल्लाएके बोसे कहीं, “बाके एक क्रूसमे टाँगदेओ।”
15पर रोमको बडो-हाकिम पिलातस भिडके सन्तुष्ट करन इच्छासे बिनके ताहीं बारब्बाके छोड दइ, और येशूके पैना लागएके रोमी सिपाहीनके क्रूसमे टाँगन सौँपदइ।
16तओ सिपाही येशूके रोमको बडो-हाकिम पिलातसको महलको आँगनमे लैगए, जौनके प्रेटोरियन कहोजात रहए। और जम्मा पल्टनके इकट्ठा करीं। 17बे येशूके बैजनी रंगको कुर्ता लगाए दइं और काँटोको मुकुट बनाएके येशूके राजा हानी दिखानके ताहीं मुकुट लगाए दइं। बे जा येशूको मजाक उणानके ताहीं करीं रहएं। 18तओ बे येशूके अभिबादन करन सुरु करीं, जा दिखानके ताहीं, कि बे येशूको सम्मान करत रहएं। और अइसे चिल्लान लागे, “यहूदीनको राजा अमर रहाबए!” 19बे घरी-घरी येशूके मुणमे पक्को लकणीसे मारत रहएं, बे येशूको अपमान करनके ताहीं बहुत चोटी येशूके उपर थुकीं, और बे येशूके सम्मान देनको नाटक करत येशूके अग्गु झुकन लागे। 20और येशूके गिल्ला करके, बे बैजनी रंगको कुर्ता खोलदइं, और येशूको बाको अप्नो कुर्ता लागए दइं। तओ पिच्छु बे येशूके क्रूसमे टाँगनके ताहीं बाहिर लैगए।
येशूके क्रूसमे टाँगी
(मत्ती. 27:32-44; लूक. 23:33-43; यूह. 19:17-27)
21जब बे सहरसे बाहिर जात रहएं, तओ सिमोन नाउँको एक आदमी सिमोन कुरेनी सहरको इलाकासे यरूशलेम सहरमे आत रहए। और बो अलेक्जेन्डर और रुफसको दौवा रहए, सैनिक बोके हुकुम दइं, कि बो क्रूसके उठाएके बो ठिहातक लैजए जहाँ येशूके क्रूसमे चढामंगे। 22सैनिक येशूके गलगथा कहान बारो ठिहामे लैगए, जौनको आरामी भाषामे अर्थ हए “खोपडीको ठिहा।” 23तओ सैनिक येशूके मूर्र नाउँको दबाई मिलो भओ अंगुरको रसा पिनके दइं, ताकी बा दुखाइको महसुस नाए करए, पर येशू पिन मनाही करदइ। 24बे येशूके क्रूसमे टाँगीं। और येशूको कौनछो कुर्ता कौन पएहए कहिके निर्णय लेनके ताहीं बे चिट्टा डारीं।
25बो समय सुबेरेको नौ बजो रहए जब बे येशूके क्रूसमे चढाइं रहएं। 26और सैनिक येशूके मुण उपर क्रूसमे एक पाटी ठोक दइं, जौनमे लिखो रहए, कि बे काहे बाके किल ठोकके क्रूसमे चढात रहएं। बोमे लिखो रहए, “यहूदीनको राजा।” 27बे बाके सँग दुई जनै डाँकुके क्रूसमे टाँगीं, एक दहिना घेन और दुस्रो बाके दिबरा घेन। 28अइसीयए, पबित्र-शास्त्र सही साबित भओ, जो ख्रीष्टके बारेमे कहोगओ रहए कि, “बाके सँग एक अपराधी कता ब्यबहार हुइहए।” 29हुवाँसे जान बारे आदमी अपन मुण हलात अइसे कहिके बाके खिसबाइं, “ओहो! देखओ, तए मन्दिर उजाणके तीन दिनमे बनान बारो, 30क्रूससे उतरके आएजा, और अपनएके बचा।”
31उइसी करके, मुखिया यहूदी पुजारी फिर मोशाको नियम कानुन सिखान बारेनसे अइसे कहात आपसमे बाको ठट्ठा करीं, “जा औरनके बचाइ, पर अपनएके नाए बचाए पाइ। 32जा आदमी, जो इस्राएल देशको ख्रीष्ट और राजा होनको घोषणा करत हए अब क्रूस मैसे उतरके आएजाए, ताकी हम देखएं और बिश्वास करएं, कि बा हमर राजा हए।” और जो बाके सँग क्रूसमे चढे रहएं, बे फिर येशूके बदनाम करत रहएं।
येशूको मृत्यु
(मत्ती. 27:45-56; लूक. 23:44-49; यूह. 19:2-30)
33बाह्र बजेसे लैके तीन बजेतक सारा देशमे अंधियारो छैगओ। 34तीन बजे घेन येशू बडो जोडसे चिल्लाइ, “इलोई, इलोई, लामा सबखथनी?” जौनको अर्थ हए, “हे मिर परमेश्वर, हे मिर परमेश्वर तुम मोके काहे त्यागदए?” 35बे आदमी मैसे कुछ आदमी, जो बाके ठिन ठाणे रहएं, बाके सुनीं। पर बे बाके नाए सम्झीं और एकदुस्रेसे कहीं, “सुनओ, बा अगमबक्ता एलियाके अपनो मदतके ताहीं बुलातहए।” 36बे आदमी मैसे एक आदमी भागके गओ, और एक स्पंज लइ, और सिर्कामे डुबाएके एक लम्बो नरकुटिकी लट्ठीमे लैके येशुक मुँहुँमे पुगाइ, ताकी बा बो मैसे सिर्का चुस पाबए। एक मनै कही, “रुकओ, कुछ मत् करओ। हम देखएं, कि परमेश्वरको अगमवक्ता एलिया आबैगो और जाके क्रूससे मुक्त करदेबैगो।” 37तओ येशू जोडको अबाज निकारी और प्राण त्याग दइ।
38और बो मोटो पर्दा जो यरूशलेमको मन्दिरमे लटको रहए, जो सबके परमेश्वरको उपस्थितिमे घुसनके रोकत रहए, बो पर्दा उपरसे लैके तरे तक दुई खण्डा हुइके फटिगओ। 39जो कप्तान बाके ठिन ठाणे रहएं, जब बाके जोडसे अबाज निकारके मरत देखी, तओ बो कही, “जा नेहात्तओ हए, कि जा आदमी परमेश्वरको लौंणा रहए।”
40हुवाँ दुरसे देखन बारी बैयर फिर रहएं। बैयरके समुह मैसे मरियम मग्दलिनी, छोटो याकूब और योसेफकी अइया मरियम और सलोमी रहएं। 41पहिले येशू गालील परदेशमे चारऔ तरफ यात्रा करी, तओ जे तिनौ बैयर बाके चेलाके रुपमे बनीं और बाके जो फिर जरुरत होत रहए बोके बे पुरा करत रहएं। कुइ और बैयर फिर गालील परदेशमे बाके सँगए-सँग रहएं और बाके सँग यरूशलेम सहर आइ रहएं। बेहुँ दुरसे देखत रहएं।
येशूको दफन
(मत्ती. 27:57-61; लूक. 23:50-56; यूह. 19:38-42)
42जौन दिन येशूके क्रूसमे चढाओगओ बो तयारीको दिन रहए, जौनक अर्थ हए “आराधनाके दिनसे पहिलोको दिन,” और यहूदी रिति रिबाजके अनुसार संझाको सुरु होतए खिनक बे काम नाए कर सिकते। जहेमारे, जब दिन लगभग डुबिगओ, 43तओ योसेफ नाउँको आदमी जो अरिमाथिया सहरसे रहए। बो यहूदी सभाको एक बहुत सम्मान पाओभओ आदमी रहए। बो बे आदमी मैसे एक रहए जो जा चाँहत रहए, कि परमेश्वरको राज्य जल्दी आएजाए। बो बिना कोइ डरको रोमको बडो-हाकिम पिलातसके ठिन गओ और येशूको लहासके क्रूससे तरे उतारन और बाके दफ्नानकी अनुमति मागी। 44जब रोमको बडो-हाकिम पिलातस सुनी, कि येशू पहिलीयएसे मरिगओ रहए, तओ बो अचम्मो मानी और बो कप्तानके अपन ठिन बुलाएके पुछी, “का येशू पहिलीयए मरिगओ रहए?” 45येशू मरिगओ करके जा बात कप्तानसे पता पाएके रोमको बडो-हाकिम पिलातस योसेफके, लहास लैजानके अनुमति दइ। 46और योसेफ सुतीको कुर्ता किनी, और बो येशूकी लहासके क्रूससे तरे उतारलइ, और बाके सुतीको कुर्तामे लपेटदइ और येशूकी लहासके एक दफ्नान बारो गुफामे धर दइ, तओ फिर बो दफ्नान बारो गुफाके बन्द करनके ताहीं एक बडो गोल पत्थरके गुफामे घुसन बारो ठिहामे लुढकाएदइ। 47मरियम मग्दलिनी और छोटो याकूब और योसेफकी अइया मरियम देखत रहएं, कि बा कहाँ पर दफ्नाओ गओ हए।
Currently Selected:
मर्कूस 15: THRNT
Highlight
Share
Copy
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
