ପ୍ରେରିତ 1
1
ପବିତର୍ ଆତ୍ମାର୍ କ୍ତା ଦେମ୍ଲା କ୍ତା
1ଏ ଲାଡାର୍ ଥିୟଫିଲ୍, ଜୁଇ ଦିନ୍ ଯୀଶୁ ନିଜେ ବାଚିକ୍ରି ହ୍ଟାଇଲା ଚେଲାମ୍ନ୍କେ ପବିତର୍ ଆତ୍ମାର୍ ସ୍ଙ୍ଗ୍ ସେ ଆଦେଶ୍ ଦେଇ ସ୍ର୍ଗେ ନିଆ ଅଇଲା, 2ସେ ଦିନ୍ ହ୍ତେକ୍ ଯୀଶୁ ଜୁଇସ୍ବୁ କାମ୍ କ୍ରୁକେ ଆର୍ ଶିକ୍ୟା ଦେମ୍କେ ଆରାମ୍ କ୍ରିରିଲା, ସେ ସ୍ବୁ ବିଷୟକେ ମୁଇ ହ୍ର୍ତୁର୍ ଶାସ୍ତରେ ଲେକ୍ଲେ ଆଚି। 3ଯୀଶୁ ନିଜାର୍ ଦୁକ୍କ୍ଷ୍ଟ ହାଇ ମ୍ଲାହ୍ଚେ ହେଁ କେତେକ୍ ଚିନ୍ ସ୍ଙ୍ଗ୍, ହ୍ଟାଇଲା ଚେଲାମ୍ନ୍କାର୍ ଲ୍ଗେ ନିଜ୍କେ ଜୀବନ୍ ଆଚି ବ୍ଲି ଦ୍କାଇ ଅଇଲା, ଆରେକ୍ ସେ ଚାଳିଶ୍ଦିନ୍ ହ୍ତେକ୍ ବାର୍ ବାର୍ ଚେଲାମ୍ନ୍କେ ଦ୍କା ଅଇ, ଇଶ୍ଵରାର୍ ରାଇଜାର୍ ସ୍ବୁ ବିଷୟ୍ କଇଲା। 4ଗଟେତର୍ ସେମ୍ନ୍କାର୍ ସ୍ଙ୍ଗ୍ କାମ୍କେ ବ୍ସ୍ତା ବ୍ଳ୍ ଯୀଶୁ ସେମ୍ନ୍କେ ଇ ଆଦେଶ୍ ଦିଲା, “ତୁମିମ୍ନ୍ ଯିରୁଶାଲମ୍ ସ୍ହରେ ହ୍ଣି ଜାହାନାଇ, ମ୍ତର୍ ଉବାର୍ ଜୁଇ ପୁରୁସ୍କାର୍ ବିଷୟେ ତୁମି ମର୍ଲ୍ଗେହ୍ଣି ଶୁଣିଆଚାସ୍ ସେତାକ୍ ହାଉତା ହ୍ତେକ୍ ଜାଗିକ୍ରି ରିଆ। 5କାଇତାକ୍ ଯୋହନ୍ ହାଣିୟେ ଡୁବେନ୍ ଦିଲା ସ୍ତ୍, ମ୍ତର୍ ତୁମିମ୍ନ୍ ଅଳ୍କ୍ ଦିନ୍ ବିତ୍ରେ ପବିତର୍ ଆତ୍ମାଇ ଡୁବେନ୍ ହାଉଆସ୍।”
ଉବା ଇଶ୍ୱର୍ ଯୀଶୁକେ ସ୍ର୍ଗେ ନିଲା
6ତ୍ବେ ହ୍ଟାଇଲା ଚେଲାମ୍ନ୍ ଆର୍ ଗଟେତର୍ ଯୀଶୁର୍ ସ୍ଙ୍ଗ୍ ମିସ୍ଲାଇ, ଆର୍ ତାକେ ହ୍ଚାର୍ଲାଇ। “ଏ ମାପ୍ରୁ, ତୁଇ କାଇରି ଇସ୍ରାଏଲ୍ ଦେଶାର୍ ଲକ୍ମ୍ନ୍କେ ତାକାର୍ ରାଇଜ୍କେ ଆର୍ ଗଟେତର୍ ଲେଉଟାଇ ଦେସି?” 7ଯୀଶୁ ଆରେକ୍ ସେମ୍ନ୍କେ କଇଲା, “ମର୍ ଉବା ସ୍ଡେବ୍ଳାର୍ ଗଟ୍ଣାକେ ତାର୍ ଅଦିନେ ର୍କିଆଚେ, ସେରି ତୁମିମ୍ନ୍ ଜାଣ୍ତା ବିଷୟ୍ ନଇ। 8ମ୍ତର୍ ଜ୍ଡେବ୍ଳ୍ ପବିତର୍ ଆତ୍ମାର୍ ଶ୍କ୍ତି ତୁମାର୍ ଉହ୍ରେ ଆସେଦ୍, ସ୍ଡେବ୍ଳ୍ ତୁମିମ୍ନ୍ ଶ୍କ୍ତିୟେ ହୁରା ଅଉଆସ୍, ଆର୍ ଯିରୁଶାଲମ୍ ସ୍ହରେ, ସ୍ବୁ ଯିହୁଦା ଜିଲା ଆର୍ ଶମିରୋଣୀୟ ଜିଲା, ଆରେକ୍ ହୁର୍ତିବିର୍ ବିନ୍ସ୍ବୁ ଦେଶେ ମର୍ ବିଷୟେ ଲକ୍ମ୍ନ୍କେ କ୍ଉଆସ୍।” 9ସେ ଇ ସ୍ବୁକ୍ତା କଇଲା ହ୍ଚେ, ସେମ୍ନ୍ ସ୍ବୁ ତାକେ ଦ୍କ୍ତି ରିଲାବ୍ଳ୍ ଇଶ୍ୱର୍ ଯୀଶୁକେ ସ୍ର୍ଗେ ଉଟାଇ ନିଲା, ତାର୍ହ୍ଚେ କ୍ଣ୍ତେକ୍ ମେଗ୍ ଆସିକ୍ରି ସେମ୍ନ୍କାର୍ ମୁଏ ହ୍ଣି ଯୀଶୁକେ ଅଲ୍ଗା କ୍ଲି। 10ଯୀଶୁ ସ୍ର୍ଗେ ଗ୍ଲାବ୍ଳ୍ ସେ ସ୍ବୁ ଲକ୍ମ୍ନ୍ ସ୍ର୍ଗ୍ ବାଟ୍ ଦ୍କ୍ତି ରିଲାଇ। ସ୍ଡେବ୍ଳ୍ ଦ୍କା, ଦବ୍ଳା ହ୍ଚିଆ ହ୍ଜିରିଲା ଦୁଇ ଲକ୍ ସେମ୍ନ୍କାର୍ ମୁଏ ଆସିକ୍ରି ଟିଆ ଅଇଲାଇ, 11ଆରେକ୍, ସେମ୍ନ୍ କଇଲାଇ, “ଏ ଗାଲିଲୀୟ ଲକ୍ମ୍ନ୍, କାଇତାକ୍ ତୁମିମ୍ନ୍ ବାଦୁଳ୍ ବାଟ୍ ଦ୍ରିକ୍ରି ଆଚାସ୍? ଇ ଯୀଶୁ ଜ୍ନ୍କ୍ରି ତୁମାର୍ ଲ୍ଗେ ହ୍ଣି ସ୍ର୍ଗେ ଗ୍ଲା, ସେନ୍କ୍ରି ତାକେ ଆରେକ୍ ଆସ୍ତାର୍ ଦ୍କାସ୍।”
ଯିହୁଦାର୍ ଜାଗାଇ ମଥିୟକେ ବାଚ୍ଲାଇ
12ତାର୍ହ୍ଚେ ହ୍ଟାଇଲା ଚେଲାମ୍ନ୍ ଜିତ୍ ନାଉର୍ ଡଙ୍ଗ୍ରେ ହ୍ଣି ଯିରୁଶାଲମ୍ ସ୍ହର୍କେ ଲେଉଟିକ୍ରି ଆଇଲାଇ, ସେ ଡଙ୍ଗ୍ରେ ହ୍ଣି ଯିରୁଶାଲମ୍ ସ୍ହର୍ ଗଟେକ୍ କିଲମିଟର୍ ବାଟ୍ ରିଲି। 13ସେମ୍ନ୍ ଅଇଲାଇ ପିତର୍, ଯୋହନ୍, ଯାକୁବ, ଆନ୍ଦ୍ରିୟ, ଫିଲିପ୍ପ, ଥୋମା ବାର୍ଥଲମୀ, ମାଥିଉ, ଆଲଫିର୍ ହଇସି ଯାକୁବ, ଉଦ୍ଯୋଗି ଶିମୋନ୍ ଆର୍ ଯାକୁବାର୍ ହଇସି ଯୀହୂଦା, ଯିରୁଶାଲମ୍ ସହରେ ଜୁଇ ଉହ୍ରାର୍ ବ୍କ୍ରାଇ ସେମ୍ନ୍ ରେତିରିଲାଇ ସେତିକେ ସେମ୍ନ୍ ଲେଉଟି ଗ୍ଲାଇ। 14କ୍ତେକ୍ ମାଇଜି ଟକିମ୍ନ୍କାର୍ ସ୍ଙ୍ଗ୍ ଆର୍ ଯୀଶୁର୍ ଆଇସି ମରୀୟମାର୍ ସ୍ଙ୍ଗ୍ ତାର୍ ବାଇସି ମ୍ନ୍କାର୍ ସ୍ଙ୍ଗ୍ ଇ ସ୍ବୁ ଚେଲାମ୍ନ୍ ଗଟେକ୍ ଜାଗାଇ ପାର୍ତେନା କ୍ରୁକେ ରୁଣ୍ତ୍ତି ରିଲାଇ।
15ଅଳକ୍ କ୍ତିଦିନ୍ ହ୍ଚେ ଶଏ କଳେଗଟ୍ ବିଶ୍ବାସିମ୍ନ୍ ଗଟେକ୍ ଜାଗାଇ ପାର୍ତେନା କ୍ରୁକେ ରୁଣ୍ଡି ରିଲାଇ, ସେତି ପିତର୍ ଟିଆ ଅଇକ୍ରି କଇଲା, 16“ମର୍ ବାଇମନ୍ ଜୁଇ ଯିହୁଦା ଯୀଶୁକେ ଶତ୍ରୁ ମ୍ନ୍କାର୍ ଆତେ ଦ୍ରାଇ ରିଲା, ତାର୍ ବିଷୟେ ପବିତର୍ ଆତ୍ମା ଆଗେ ଦାଉଦ୍ ର୍ଜାର୍ ତ୍ଇହ୍ଣି କଇରିଲା, ଦ୍ର୍ମ୍ ଶାସ୍ତରାର୍ ସେ କ୍ତା ହୁରା ଅଉତାର୍ ଲଡାରିଲି। 17କାଇତାକ୍ ଯିହୁଦା ଅମାର୍ ଦ୍ଳାର୍ ଗଟେକ୍ ଲକ୍ରିଲା, ଆର୍ ଯୀଶୁ ତାକେ ଅମାର୍ ସ୍ଙ୍ଗ୍ ମିସିକ୍ରି ତାର୍ ସେବା କ୍ରୁକେ ବାବିରିଲା। 18ଯିହୁଦା ଯୀଶୁକେ ଯିହୁଦା ନେତାମ୍ନ୍କାର୍ ଆତେ ଦ୍ରାଇ ଦେଇରିଲା, ସେ ପାପାର୍ ଡାବୁସ୍ଙ୍ଗ୍ ଜୁଇ ବେଡା ଗେନିରିଲା, ସେ ବେଡାଇ ମୁଣ୍ତ୍ ତ୍ଳେ ଅଇ ଅଦ୍ରି କ୍ରି ମ୍ଲା, ଆର୍ ତାର୍ ହେଟ୍ ହୁଟିକ୍ରି ଅତ୍ନିମ୍ନ୍ ସ୍ବୁ ହ୍ଦାଇ ବାର୍ଲି। 19ଆର୍ ଇ ଯିରୁଶାଲମ୍ ସ୍ହରେ ବାସାକ୍ରିରିଲା ସ୍ବୁ ଲକ୍ମ୍ନ୍ ଇବିଷୟ୍ ଶୁଣିକ୍ରି ତାକାର୍ ନିଜାର୍ ବାଷାଇ ବେଡାକେ ‘ହକଲ୍ଦମା’ ବ୍ଲେକ୍ ‘ବ୍ନିର୍ ବେଡା’ ବ୍ଲି ନାଉଁ ଦିଲାଇ।”
20ଆର୍ ପିତର୍ କଇଲା “ଇବିଷୟ୍ ଦାଉଦ୍ ର୍ଜା ଲେକ୍ଲା ଗିତସଂହିତା ତ୍ଇ ଲେକାଆଚେ, ‘ତାର୍ ଗ୍ର୍ ସୁନ୍ ଅଉଅ, ସେ ଗ୍ରେ କେ ହେଁ ବାସା ନ୍କେର୍ତି ଆର୍, ତାର୍ ସେବାକ୍ର୍ତା ଅଦିକାର୍ ବିନ୍ ଲକ୍କେ ଦିଆ ଜ୍ଅ।’ 21ଯୀଶୁ ଯୋହନାର୍ ଡୁବେନ୍ ନେତା ସମୟେ ହ୍ଣି ଆରମ୍ କ୍ରି ତାକେ ସ୍ର୍ଗେ ନିଲା ହ୍ତେକ୍ ସେ ମାନାଇ ଅମାର୍ ଦ୍ଳେ ରିଲାଲକ୍ ଅଇରେତା ଦ୍ର୍କାର୍ ତ୍ବେ ଅମି ତାକେ ହ୍ଟାଇଲା ଚେଲାକ୍ରି ବାଚୁନ୍, 22ତ୍ବେ ଯୀଶୁ ମାପ୍ରୁ ମରିକ୍ରି ଜିଇ ଉଟ୍ଲା ଆଚେ ବ୍ଲି ବିନ୍ସ୍ବୁ ଲକ୍ମ୍ନ୍କେ ସାକି ଅମ୍କେ ଗଟେଲକ୍ ଅମାର୍ ଦ୍ଳେ ମିଶ୍ଲେକ୍ ବ୍ଲ୍ ଅଇଦ୍ ବ୍ଲି ଅମିମ୍ନ୍ ମ୍ନ୍ କ୍ରୁଲୁ।” 23ତ୍ବେ ହ୍ଟାଇଲା ଚେଲାମ୍ନ୍ ଦୁଇ ଲକ୍କେ ବାଚ୍ଲାଇ, ସେମ୍ନ୍ ଅଇଲାଇ ବର୍ଶବା ଜାକେ କି ଯୋଷେପ୍ ବ୍ଲି କ୍ଉତି, ତାର୍ ଆରେଗଟ୍ ନାଉଁ ଅଇଲି ଯୂସ୍ତ, ତାକେ ଆର୍ ମଥିୟକେ, ବିନେ କ୍ରି ଚେଲାମ୍ନ୍ ପାର୍ତେନା କ୍ଲାଇ, 24“ଏ ମାପ୍ରୁ ତୁଇ ସ୍ବୁ ଲକ୍ମ୍ନ୍କାର୍ ଚିନ୍ତା ଜାଣୁଲିସ୍, ସେତାର୍ଗିନେ ତୁଇ ଇ ଦୁଇଲକାର୍ ବିତ୍ରେ କାକେ ବାଚୁଲିସ୍ ସେରି ଅମୁକ୍ ଜାଣାଉ, 25ଜେକି ହ୍ଟାଇଲା ଚେଲାର୍ କାମ୍ କ୍ରେଦ୍, ଜୁଇକାମ୍ ଇଷ୍କାରିୟତ୍ ଯିହୁଦା କ୍ର୍ତାର୍ ଚାଡି ମ୍ରତାର୍ ବାଟ୍ ବାଚ୍ଲା।” 26ତାରହ୍ଚେ ସେମ୍ନ୍ ସେ ଦୁଇଲକାର୍ ଗିନେ ଲେଟ୍ରି ହୁଟାଇଲାଇ, ଆରେକ୍ ମଥିୟର୍ ନାଉଁଏ ଲେଟ୍ରି ହୁଟ୍ଲି, ତ୍ବେ ସେମ୍ନ୍ ମଥିୟକେ ଏଗାର୍ ଗଟ୍ ହ୍ଟାଇଲା ଚେଲାମ୍ନ୍କାର୍ ଲ୍ଗେ ମିଶାଇଲାଇ।
Currently Selected:
ପ୍ରେରିତ 1: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
