ମାଥିଉ 23
23
ସାଦ୍ଦୂକୀ ଆର୍ ଫାରୂଶୀମ୍ନ୍କାର୍ ଗିନେ ସାତ୍ଗଟ୍ ଅବିଶାପ୍
(ମାର୍କ ୧୨:୩୮,୩୯; ଲୁକ ୧୧:୪୩,୪୬; ୨୦:୪୫,୪୬)
1ସେଡେବ୍ଳ୍ ଯୀଶୁ ଲକ୍ମ୍ନ୍କେ ଆର୍ ନିଜାର୍ ଚେଲାମ୍ନ୍କେ କଇଲା, 2“ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍ ମୋଶାର୍ ନିୟମ୍କେ ବୁଜାମ୍କେ ଅଦିକାର୍ ହାଇଲାଇ ଆତ୍ତି। 3ତ୍ବେ ସେମ୍ନ୍ ତୁମୁକେ ଯାଇରି ହେଁ କ୍ଉତି, ସେରି ମାନା ଆର୍ ପାଳନ୍ କ୍ରା, ମ୍ତର୍ ସେମ୍ନ୍କାର୍ କ୍ଲାକାମ୍ ହର୍ କାମ୍ କ୍ରାନାଇ, କାଇତାକ୍ ସେମ୍ନ୍ କ୍ଉତି, ମ୍ତର୍ ନ୍କେର୍ତି। 4ସେମ୍ନ୍ ଲକାର୍ ଗିନେ ଅନ୍କାର୍ ସ୍ବୁ ନିୟମ୍ ବ୍ନାଉତି, ଜୁଇରି କି ଲକ୍ମ୍ନ୍ ମାନ୍ତାର୍ ଗିନେ ବେସି କ୍ଷ୍ଟ, ମ୍ତର୍ ସେମ୍ନ୍ ନିଜେ ନିଜାର୍ ତିଆର୍ କ୍ରିରିଲା ନିୟମ୍କେ ଅଳ୍କ୍ ହେଁ ନ୍ମାନ୍ତି। 5ସେମ୍ନ୍ ଲକ୍ ଦ୍କାଉତାର୍ ଗିନେ ନିଜାର୍ ନିଜାର୍ ସ୍ବୁ ଦ୍ର୍ମ୍ କ୍ର୍ମ୍ କ୍ର୍ତି, କାଇତାକ୍ ସେମ୍ନ୍ ନିଜାର୍ ନିଜାର୍ ବୁଦିକେ ଅସାର୍ କ୍ର୍ତି ଆର୍ ହ୍ଚିଆର୍ ଆଚଳ୍ ବ୍ଡ୍ କ୍ର୍ତି, 6ଆର୍ ବଜିତ୍ଇ ଆର୍ ପାର୍ତେନା ଗ୍ରାର୍ ମୁକିଆ ଜାଗାଇ ବ୍ସୁକେ, 7ଆର୍ ଆଟ୍ ବ୍ଜାରେ ଜୁଆର୍ ସନ୍ମାନ୍ ହାମ୍କେ ଆର୍ ଲକାର୍ ଲ୍ଗେ ହ୍ଣି ଗୁରୁ ବ୍ଲି କ୍ଉଆଇ ଅମ୍କେ ବ୍ଲ୍ ହାଉତି। 8ମ୍ତର୍ ତୁମିମ୍ନ୍ ଗୁରୁ ବ୍ଲି କ୍ଉଆଇ ଅଉଆନାଇ, କାଇତାକ୍ ତୁମାର୍ମ୍ନ୍କାର୍ ଗୁରୁ ଏକ୍ଲା, ଆରେକ୍, ତୁମିମ୍ନ୍ ସ୍ବୁ ତାର୍ ବାଇ। 9ଆର୍ ହୁର୍ତିବି ତ୍ଇ କାକେ ହେଁ ଉବା ବ୍ଲି କ୍ଉଆନାଇ, କାଇତାକ୍ ତୁମାର୍ମ୍ନ୍କାର୍ ଉବା ଏକ୍ଲା, ସେ ସ୍ର୍ଗେ ଆଚେ। 10ଆର୍ ତୁମିମ୍ନ୍ ନେତା ବ୍ଲି ଚିନାଇ ଅଉଆନାଇ, କାଇତାକ୍ ତୁମାର୍ମ୍ନ୍କାର୍ ନେତା ଏକ୍ଲା, ସେ ଖ୍ରୀଷ୍ଟ। 11ମ୍ତର୍ ତୁମାର୍ମ୍ନ୍କାର୍ ବିତ୍ରେ ଜୁଇଲକ୍ ବେସିବ୍ଡ୍, ସେ ତୁମାର୍ମ୍ନ୍କାର୍ ସେବାକ୍ର୍ତା ଲକ୍ ଅଉଅ। 12ଆର୍ ଜୁଇଲକ୍ ନିଜ୍କେ ବ୍ଡ୍ବ୍ଲି ଦ୍କାଇଦ୍ ତାକେ ଇଶ୍ୱର୍ ସାନ୍ କ୍ରେଦ୍, ଜୁଇଲକ୍ ନିଜ୍କେ ସାନ୍ବ୍ଲି ଦ୍କାଇଦ୍ ତାକେ ଇଶ୍ୱର୍ ବ୍ଡ୍ କ୍ରେଦ୍।”
ପଣ୍ଡିତ୍ ଆର୍ ଫାରୂଶୀମ୍ନ୍କେ ଉଡା
(ମାର୍କ ୧୨:୪୦; ଲୁକ ୧୧:୩୯-୪୨,୪୪,୫୨; ୨୦:୪୭)
13ଯୀଶୁ ଆରେକ୍ କଇଲା, “ହାୟ୍, ଡ୍ଣ୍ଡ୍ ହାଉତା ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ମାନାଇମ୍ନ୍କାର୍ ଲ୍ଗେ ସ୍ର୍ଗ୍ ରାଇଜ୍ ବ୍ନ୍ଦ୍ କ୍ରିଆଚାସ୍। ତୁମିମ୍ନ୍ ତ ନିଜେ ହୁରି ନ୍କେରୁଲାସ୍, ଆରେକ୍, ହୁରୁକେ ଇଚା କ୍ର୍ତା ଲକ୍ମ୍ନ୍କେ ହେଁ ହୁରୁକେ ନ୍ଦେମ୍ଲାସ୍। 14ହାୟ୍, ଡ୍ଣ୍ଡ୍ ହାଉତା ଅକାରିଆ ପଣ୍ଡିତ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ମିଚ୍ ମିଚ୍ ଡେଙ୍ଗ୍ ପାର୍ତେନା କ୍ଲା ସ୍ଙ୍ଗେ ସ୍ଙ୍ଗେ ରାଣ୍ଡି ମାଇଜି ମ୍ନ୍କାର୍ ଗ୍ରାର୍ ସ୍ବୁ ଜିନିଷ୍କେ ଟକିକ୍ରି ନେମ୍ଲାସ୍। ସେତାକ୍ ତୁମିମ୍ନ୍ ବେସି ଡ୍ଣ୍ଡ୍ ହାଉଆସ୍। 15ହାୟ୍, ଡ୍ଣ୍ଡ୍ ହାଉତାର୍ ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ଏକ୍ଲାକେ ତୁମାର୍ ଦ୍ର୍ମ୍ ମାନ୍ତା ଲକ୍ କ୍ରୁକେ, ସ୍ବୁବାଟ୍ ବୁଲ୍ତି ରିଆସ୍, ଆରେକ୍, ଯ୍ଡେବ୍ଳ୍ ସେ ତୁମାର୍ ଶିକ୍ୟା ଉହ୍ରେ ବିଶ୍ବାସ୍ କ୍ରେଦ୍, ସେଡେବ୍ଳ୍ ତାକେ ତୁମାର୍ ଲ୍ଗେହ୍ଣି ଦୁଇ ଗୁଣ୍ ନ୍ର୍କେ ଜାତାର୍ ଗିନେ, ତାକେ ତିଆର୍ କ୍ର୍ତି ରିଆ।
16ହାୟ୍, ଡ୍ଣ୍ଡ୍ ହାଉତାର୍ କାଣା ବାଟ୍ ଦ୍କ୍ତା ଲକ୍, ତୁମିମ୍ନ୍ କ୍ଉତି ରିଆସ୍, କେ ମନ୍ଦିରାର୍ ହ୍ର୍ମାଣ୍ କ୍ଲା ସେରି କାୟରୀ ନାୟ୍, ମ୍ତର୍ ମନ୍ଦିରାର୍ ସନାର୍ ହ୍ର୍ମାଣ୍ କ୍ଲେକ୍, ସେ ତାର୍ ଗିନେ ମାନତ୍ ଦିବାର୍ ଆଚେ। 17ରେ ବକୁଆ ଆର୍ କାଣାମ୍ନ୍, ସନା, କି ସେ ସନାକେ ଜୁଇ ମନ୍ଦିର୍ ପବିତର୍ କ୍ରିଆଚେ, ଇ ଜଳେକ୍ ବିତ୍ରେ କୁଇରି ବେସିବ୍ଡ୍? 18ଆରେକ୍ କ୍ଉତି ରିଆସ୍, କେ ବେଦିର୍ ହ୍ର୍ମାଣ୍ କ୍ଲେକ୍ ସେରି କାଇରି ନୟ୍, ମ୍ତର୍ ଯେ କେ ତାର୍ ଉହ୍ରେ ରେତା ଜିନିଷାର୍ ହ୍ର୍ମାଣ୍ କ୍ରେଦ୍, ସେ ତାର୍ ଗିନେ ମାନତ୍ ଦିବାର୍ ଆଚେ। 19ରେ କାଣାମ୍ନ୍, ମାନତ୍, କି ସେ ମାନତ୍କେ ଜୁଇ ବେଦି ପବିତର୍ କ୍ରେଦ୍, ଇ ଜଳେକ୍ ବିତ୍ରେ କୁଇରି ବେସିବ୍ଡ୍? 20ତ୍ବେ ଜୁଇଲକ୍ ବେଦିୟେ ହ୍ର୍ମାଣ୍ କ୍ରେଦ୍, ସେ ତ ସେରି ଆର୍ ତାର୍ ଉହ୍ରେ ରେତା ଜିନିଷାର୍ ହ୍ର୍ମାଣ୍ କ୍ରେଦ୍। 21ଆର୍ ଯେ ମନ୍ଦିରାର୍ ହ୍ର୍ମାଣ୍ କ୍ରେଦ୍, ସେ ମନ୍ଦିର୍ ଆର୍ ସେତି ବାସାକ୍ଲା ମାପ୍ରୁ ଇଶ୍ଵରାର୍ ହ୍ର୍ମାଣ୍ କ୍ରେଦ୍। 22ଆରେକ୍ ଯେ ସ୍ର୍ଗାର୍ ହ୍ର୍ମାଣ୍ କ୍ରେଦ୍, ସେ ଇଶ୍ଵରାର୍ ସିଂହାସନ୍ ଆର୍ ସେତି ବ୍ସ୍ଲା ମାପ୍ରୁ ଇଶ୍ଵରାର୍ ହ୍ର୍ମାଣ୍ କ୍ରେଦ୍।
23ହାୟ୍, ଡ୍ଣ୍ଡ୍ ହାଉତାର୍ ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ପୋଦିନା, ସଂମପ୍ ଆର୍ ଜୀରାର୍ ଦ୍ଶମାଂସ ଇଶ୍ଵର୍କେ ଦେତି ରିଆସ୍, ଆର୍ ମୋଶାର୍ ନିୟମାର୍ ବେସିବ୍ଡ୍ ବିଷଇ ମ୍ନ୍ ଜ୍ନ୍କ୍ରି ନିଆଇ ବିଚାର୍, ଦୟା ଆର୍ ବିଶ୍ବାସ୍, ଇରିସ୍ବୁ ଚାଡିଦେଇ ରିଆସ୍। ମ୍ତର୍ ଇରିସ୍ବୁ ମାନୁମା ଆର୍ ବିନ୍ସ୍ବୁ ନ୍ଚାଡ୍ ତାର୍ ଉଚିତ୍। 24ରେ କାଣା ବାଟ୍ ଦ୍କାଉତା ଲକ୍ମ୍ନ୍, ତୁମିମ୍ନ୍ ମଚିକେ ଚାଣ୍ଲା ହର୍ ସାନ୍ ସାନ୍ ନିୟମ୍କେ ମାନ୍ତି ରିଆସ୍, ମ୍ତର୍ ଉଟ୍ କେ ଗିଳ୍ଲା ହର୍ ବଡ୍ ବଡ୍ ନିୟମ୍କେ ନ୍ମାନ୍ତି ରିଆସ୍।
25ହାୟ୍, ଡ୍ଣ୍ଡ୍ ହାଉତାର୍ ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ଗିନା ଆର୍ ତାଳିର୍ ହ୍ଦାବାଟ୍ ସଫା କ୍ଲାହର୍ ଉହ୍ରେ ଉହ୍ରେ ବ୍ଲ୍ ଆର୍ ଦ୍ର୍ମ୍ ଦ୍କାଇ ଅଉତି ରିଆସ୍, ମ୍ତର୍ ତୁମାର୍ ହୁର୍ଦୟ୍ ବିତ୍ରେ ଲ୍ବ୍ ଆର୍ ନିଜାର୍ ମ୍ନାର୍ କ୍ରାପ୍ ଇଚାକେ ବ୍ର୍ତି କ୍ରି ରିଆସ୍। 26ଏ କାଣା ଫାରୂଶୀ, ଆଗେ ଗିନାର୍ ବିତୁର୍ ବାଟ୍କେ ଦ୍ଉଆ, ଜ୍ନ୍କ୍ରି ସେତିର୍ ହ୍ଦାବାଟ୍ ହେଁ ସଫା ଅଇଦ୍।
27ହାୟ୍, ଡ୍ଣ୍ଡ୍ ହାଉତାର୍ ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ଦବ୍ଳା ର୍ଙ୍ଗାର୍ ମ୍ସୁଣ୍ ହର୍। ସେରି ହ୍ଦାବାଟ୍ ସୁନ୍ଦୁର୍ ଦ୍କାଇ ଅଇଦ୍, ମ୍ତର୍ ବିତ୍ରେ ମ୍ଲା ଲକାର୍ ଆଡ୍ ଆର୍ ସ୍ବୁ ପର୍କାର୍ ଅଚୁଆୟ୍ ବ୍ରତି ଅଇର୍ଇଦ୍। 28ସେ ପର୍କାର୍ ତୁମିମ୍ନ୍ ହେଁ ହ୍ଦାଇ, ଲକାର୍ ଆକି ଲ୍ଗେ ଦ୍ର୍ମ୍ ଲକ୍ ହ୍ର୍ ଦ୍କାଇ ଅଉଆସ୍, ମ୍ତର୍ ମ୍ନ୍ ବିତ୍ରେ ଅକାର୍ ଆର୍ କ୍ରାପ୍ ବାବ୍ନା ଲ୍ଗେ ବ୍ର୍ତି ଅଇ ରିଆସ୍।”
ଅକାରିଆ ପଣ୍ଡିତ୍ ଆର୍ ଫାରୂଶୀମ୍ନ୍କାର୍ ଡ୍ଣ୍ଡ୍ ଆସ୍ତା ଆଗେ ଜାଣାଇଲା
(ଲୁକ ୧୧:୪୭-୫୧)
29ଆରେକ୍ ଯୀଶୁ ସେମ୍ନ୍କେ କଇଲା, “ହାୟ୍, ଡ୍ଣ୍ଡ୍ ହାଉତାର୍ ଅକାରିଆ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ତୁମାର୍ ଦାଦି ଆନିମ୍ନ୍ ମ୍ର୍ନେ ମ୍ରିରିଲା ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ମ୍ସୁଣ୍ ତିଆର୍ କ୍ରି ଆର୍ ଦ୍ର୍ମାର୍ ଲକ୍ମ୍ନ୍କାର୍ ମ୍ସୁଣ୍ ସ୍ଜାଇ କ୍ରି କ୍ଉତି ରିଆସ୍, 30‘ଅମିମ୍ନ୍ ଜ୍ବେ ଅମାର୍ମ୍ନ୍କାର୍ ଦାଦି ଅଜା କାଳେ ରିଲେକ୍, ତ୍ବେ ବବିଶତ୍ କ୍ତା କ୍ଉତା ଲକ୍ମ୍ନ୍କେ ମାର୍ତାବ୍ଳ୍ ଅମି ସେମ୍ନ୍କାର୍ ସ୍ଙ୍ଗ୍ ନ୍ମିସ୍ତି।’ 31ସେତାକ୍ ତୁମିମ୍ନ୍ ଯେ ବବିଶତ୍ କ୍ତା କ୍ଉତା ଲକ୍ମ୍ନ୍କେ ମାର୍ଲା ଲକାର୍ ହିଲାମ୍ନ୍, ସେ ବିଷୟେ ତୁମିମ୍ନ୍ ସେ ନିଜାର୍ ନିଜାର୍ ବିଷୟେ ସାକି ଦେମ୍ଲାସ୍। 32ତୁମିମ୍ନ୍ ନିଜାର୍ ହୁର୍ବାର୍ ଲକ୍ମ୍ନ୍ ଆରମ୍ କ୍ରିରିଲା କ୍ରାପ୍ କାମ୍କେ, ଶେସ୍ କ୍ରା, 33ରେ ବିଷ୍ରିଲା କାଳ୍ସାହ୍ ହର୍ ଲକ୍ମ୍ନ୍, ତୁମିମ୍ନ୍ ନ୍ର୍କାର୍ କ୍ଷ୍ଟ ଲ୍ଗେ ହ୍ଣି ବଞ୍ଚି ନାହାରାସ୍। 34ସେତାକ୍ ଦ୍କା, ମୁଇ ତୁମାର୍ମ୍ନ୍କାର୍ ଲ୍ଗେ ବବିଶତ୍ କ୍ତା କ୍ଉତାଲକ୍, ବୁଦିମାନ୍ ଆର୍ ନିଆଇ ଶିକାଉତା ଲକ୍ମ୍ନ୍କେ ହ୍ଟାମ୍ଲେ। ସେମ୍ନ୍କାର୍ ତ୍ଇହ୍ଣି କାକେ କାକେ ତୁମିମ୍ନ୍ ମ୍ର୍ନେ ମାରାସ୍ ଆର୍ କାକେ କାକେ କୁର୍ଶକାଟେ ମାରାସ୍, ଆର୍ କାକେ କାକେ ତୁମାର୍ମ୍ନ୍କାର୍ ପାର୍ତେନା ଗ୍ରେ କର୍ଡା ମାରାସ୍ ଆର୍ ସ୍ହର୍କେ ସ୍ହର୍ ବୁଲାଇ କ୍ଷ୍ଟ ଦିଆସ୍। 35ଜ୍ନ୍କ୍ରି ଦ୍ର୍ମାର୍ ଲକ୍ ହେବଲ୍କେ ମ୍ର୍ନେ ମାର୍ଲା ଲ୍ଗେ ହ୍ଣି, ବେରିଖୀୟର୍ ହଇସି ଯିଖରୀୟକେ ତୁମିମ୍ନ୍ ମନ୍ଦିରାର୍ ପବିତର୍ ଜାଗା ଆର୍ ବେଦିର୍ ମ୍ଜାଇ ମ୍ର୍ନେ ମାର୍ଲା ହ୍ତେକ୍, ହୁର୍ତିବିର୍ ଜ୍ତେକ୍ ଦ୍ର୍ମାର୍ ଲକ୍କେ ମ୍ର୍ନେ ମାରା ଅଇଆଚେ, ସେ ସ୍ବୁ ତୁମାର୍ ଉହ୍ରେ ଗଟେଦ୍। 36ମୁଇ ତୁମୁକ୍ ସ୍ତ୍ କ୍ମ୍ଲେ, ଇ ଯୁଗାର୍ ଲକାର୍ ଉହ୍ରେ ସେମ୍ନ୍କେ ମ୍ର୍ନେ ମାର୍ଲାର୍ ସ୍ବୁ ଡ୍ଣ୍ଡ୍ ଗଟେଦ୍।
ଯିରୁଶାଲମାର୍ ଗିନେ ଯୀଶୁର୍ ଦୁକ୍
(ଲୁକ ୧୩:୩୪,୩୫)
37ରେ ଯିରୁଶାଲମାର୍ ଲକ୍ମ୍ନ୍, ରେ ଯିରୁଶାଲମାର୍ ଲକ୍ମ୍ନ୍, ବବିଶତ୍ କ୍ତା କ୍ଉତା ଲକ୍ମ୍ନ୍କେ ମ୍ର୍ନେ ମାର୍ଲା ଲକ୍ ଆର୍ ନିଜାର୍ ଲ୍ଗେ ହ୍ଟାଇଲା ଲକ୍ମ୍ନ୍କେ ଟେଡା ମାଡ୍ କ୍ର୍ତା ଲକ୍ମ୍ନ୍, କୁକ୍ଳା ଜ୍ନ୍କ୍ରି ହେଟ୍ ତ୍ଳେ ନିଜାର୍ ହିଲାମ୍ନ୍କେ ଉଦାର୍ କ୍ରେଦ୍, ସେନ୍କ୍ରି ମୁଇ କ୍ତିତର୍ ତୁମାର୍ ହିଲାମ୍ନ୍କେ ଉଦାର୍ କ୍ରୁକେ ଇଚା କ୍ଲେ, ମ୍ତର୍ ତୁମିମ୍ନ୍ ଇଚା କ୍ରୁକେ ମ୍ନ୍ ନ୍କେଲାସ୍। 38ଦ୍କା, ତୁମାର୍ମ୍ନ୍କାର୍ ଗ୍ର୍ ତୁମାର୍ମ୍ନ୍କାର୍ ଆତେ ଚାଡି ଦେମ୍ଲେ। 39କାଇତାକ୍ ମୁଇ ତୁମୁକ୍ମ୍ନ୍କେ କ୍ମ୍ଲେ, ଇଶ୍ଵରାର୍ ନାଉଁଏ ଯେ ଆସୁଲାଇ, ସେ ଦନ୍ୟ, ତୁମିମ୍ନ୍ ଇକ୍ତା ନ୍କ୍ଉତା ହ୍ତେକ୍ ଆଜିହ୍ଣି ମକେ ସ୍ତ୍ ଆର୍ ଦ୍କି ନ୍ଦେକାସ୍।”
Currently Selected:
ମାଥିଉ 23: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
