ମାର୍କ 1
1
ଡୁବେନ୍ ଦେତା ଯୋହନାର୍ ପର୍ଚାର୍
(ମାଥି. ୩:୧-୧୨; ଲୁକ ୩:୧-୧୮; ଯୋହ. ୧:୧୯-୨୮)
1ଇଶ୍ଵରାର୍ ହଇସି ଯୀଶୁ ଖ୍ରୀଷ୍ଟର୍ ସୁବ୍କ୍ବର୍ ଆରମ୍ ଅଇଲି। 2ଯିଶାଇୟ ବବିଶତ୍ କ୍ତା କ୍ଉତା ଲକାର୍ ଶାସ୍ତର୍ ଲ୍ଗେ ଜ୍ନ୍କ୍ରି ଲେକାଆଚେ, ଇଶ୍ୱର୍ ତାର୍ ହିଲାକେ କଇଲା, “ଦ୍କା, ମୁଇ ମର୍ ଡ୍ଣ୍ତାସିକେ ତୁମାର୍ ଆଗେ ହ୍ଟାମ୍ଲେ, ସେ ତୁମାର୍ ଗିନେ ବାଟ୍ ତିଆର୍ କ୍ରେଦ୍। 3ଶୁନ୍ସାନ୍ ବ୍ଟା ଜାଗାଲ୍ଗେ ହ୍ଣି କେ ଗଟେକ୍ ଆଉଲି ଅଇ କ୍ଉତି ରିଲାର୍ ଶୁଣାସ୍, ‘ମାପ୍ରୁ ଆସ୍ତା ବାଟ୍ ତିଆର୍ କ୍ରା, ସେ ବାଟ୍କେ ସ୍ଳକ୍ କ୍ରା ଜୁଇବାଟ୍ ଅଇ ସେ ଆସେଦ୍।’” 4ସେ ଡାଣ୍ତାସି ଡୁବେନ୍ ଯୋହନ୍ ସେ ଗଟେକ୍ ଶୁନ୍ସାନ୍ ବ୍ଟା ଜାଗାଲ୍ଗେ ଆସିକ୍ରି, ଲକ୍ମ୍ନ୍କେ ଇଶ୍ୱର୍ ଲ୍ଗେ ହ୍ଣି ପାପ୍ କେମା ହାମ୍କେ ମ୍ନ୍ ବାଦ୍ଲାଉଆ ଆର୍ ଡୁବେନ୍ ନିଆବ୍ଲି ପର୍ଚାର୍ କ୍ର୍ତିରିଲା। 5ସେଡେବ୍ଳ୍ ସ୍ବୁ ଯିହୁଦା ଜିଲା ଆର୍ ସ୍ବୁ ଯିରୁଶାଲମ୍ ସ୍ହର୍ ଲ୍ଗେ ହ୍ଣି ବେସିଲକ୍ ବାରିଆସି ଯହନାର୍ ପର୍ଚାର୍ ଶୁଣୁକେ ବାଲିଆ ବ୍ଟାଲ୍ଗେ ଆସୁକେ ଲାଗ୍ଲାଇ, ଜ୍ଡେବ୍ଳ୍ ସେମ୍ନ୍ ନିଜାର୍ ପାପ୍କେ ମାନ୍ଲାଇ ସେଡେବ୍ଳ୍ ଯୋହନ୍ ସେମ୍ନ୍କେ ଯର୍ଦନ୍ ଗାଡେ ଡୁବେନ୍ ଦିଲା। 6ଯୋହନ୍ ଉଟାର୍ ବାଳେ ବ୍ନାଇଲା ହ୍ଚିଆ ହିନ୍ଦ୍ତିରିଲା। ସେ ତାର୍ ଅଟାଇ ଚାମ୍ ଅଟାଡର୍ ବାନ୍ଦ୍ତି ରିଲା, ଆରେକ୍, କାତା କିଡା ଆର୍ ବ୍ନାର୍ ମ୍ଉଁ କାତିରିଲା। 7ଯୋହନ୍ ଲକ୍ମ୍ନ୍କାର୍ ଆଗେ ଇରି କ୍ଇ ପର୍ଚାର୍ କ୍ଲା, “ଗଟେଲକ୍ ମର୍ତ୍ଇହ୍ଣି ଅଦିକ୍ ଶ୍କ୍ତିଶାଳି ଆଚେ, ସେ ମର୍ହ୍ଚେ ବେଗି ଆସେଦ୍। ମୁଇ ଲ୍ହ୍ଟିକ୍ରି ତାର୍ ହାଣ୍ତାଇର୍ ଗ୍ଟି ହେଁ ଇଟାମ୍କେ ତାର୍ ଚାକର୍ ସ୍ମାନ୍ ନଇ। 8ମୁଇ ତୁମୁକ୍ମ୍ନ୍ ହାଣିଏ ଡୁବେନ୍ ଦିଲେ, ମ୍ତର୍ ସେ ତୁମୁକ୍ମ୍ନ୍ ପବିତର୍ ଆତ୍ମାଇ ଡୁବେନ୍ ଦେଇଦ୍।”
ଯୀଶୁର୍ ଡୁବେନ୍ ଆର୍ ପରିକ୍ୟା
(ମାଥି. ୩:୧୩; ୪:୧୧; ଲୁକ ୩:୨୧-୨୨; ୪:୧-୧୩)
9ସେଦିନ୍ ଜ୍ଡେବ୍ଳ୍ ଯୋହନ୍ ଡୁବେନ୍ ଦେତିରିଲା, ସେଡେବ୍ଳ୍ ଯୀଶୁ ଗାଲିଲୀ ଜିଲାର୍ ନାଜରିତର୍ ସ୍ହରେ ହ୍ଣି ଆସି, ଯର୍ଦନ୍ ଗାଡେ ଯୋହନାର୍ ତ୍ଇହ୍ଣି ଡୁବେନ୍ ନିଲା। 10ଆରେକ୍, ସେମାଡେ ଯୀଶୁ ହାଣିଏ ହ୍ଣି ବୁଡିକ୍ରି ଉଟ୍ଲାବ୍ଳ୍ ସ୍ର୍ଗ୍ ଦୁଇବାଗ୍ ଅଇଲା ହର୍ ଅଇଲି, ଆର୍ ପବିତର୍ ଆତ୍ମାକେ ହାରୁଆ ହର୍ ତାର୍ ଉହ୍ରେ ଉତୁର୍ଲାର୍ ଦ୍କ୍ଲାଇ, 11ଆରେକ୍ ସ୍ର୍ଗେ ହ୍ଣି ଇଶ୍ୱର୍ ଯୀଶୁକେ କଇଲା, “ତୁଇ ମର୍ ଲାଡାର୍ ହିଲା, ମୁଇ ତର୍ଗିନେ ବେସି ସ୍ର୍ଦା ଆଚି।” 12ସେମାଡେ ପବିତର୍ ଆତ୍ମା ଯୀଶୁକେ ଗଟେକ୍ ଶୁନ୍ସାନ୍ ବ୍ଟା ଜାଗାଲ୍ଗେ ନ୍ଇଗ୍ଲାଇ। 13ଯୀଶୁ ଶୁନ୍ସାନ୍ ଜାଗାଇ ଚାଳିଶ୍ଦିନ୍ ଆର୍ ଚାଳିଶ୍ ରାତି ରିଲା, ଆରେକ୍ ସେତି ଶଇତାନ୍ ଯୀଶୁକେ ପରିକ୍ୟା କ୍ଲି। ସେ ବ୍ନାର୍ ପଶୁମ୍ନ୍କାର୍ ସ୍ଙ୍ଗ୍ ରିଲା, ଆରେକ୍ ସ୍ର୍ଗାର୍ ଦୂତ୍ମ୍ନ୍ ଆସି ଯୀଶୁକେ ଜ୍ତୁନ୍ କ୍ର୍ତିରିଲାଇ।
ହ୍ର୍ତୁ ଚେଲାକେ କୁଦ୍ଲା
(ମାଥି. ୪:୧୨-୧୭; ଲୁକ ୪:୧୪,୧୫; ମାଥି. ୪:୧୮-୨୨; ଲୁକ ୫:୧-୧୧)
14କ୍ତିଦିନ୍ ଗ୍ଲାହ୍ଚେ ହେରୋଦ୍ ର୍ଜା ଡୁବେନ୍ ଯୋହନ୍କେ ଦ୍ରାଇଲା ଆର୍ ଜେଲ୍ ତାନାଇ ବ୍ର୍ତି କ୍ଲା, ଆର୍ ହ୍ଚେ ଯୀଶୁ ଗାଲିଲୀ ଜିଲାର୍ ସ୍ବୁହାକ୍ ବୁଲ୍ଲା ଆର୍ ଲକ୍ମ୍ନ୍କେ ଇଶ୍ୱର୍ ରାଇଜାର୍ ସୁବ୍କ୍ବର୍ କ୍ମ୍କେ ଲାଗ୍ଲା, 15“ଇଶ୍ୱର୍ ଜୁଇ ସମୟ୍ ବାବିରିଲା ସେ ବେଳା କେଟ୍ଲିବେ, ଇଶ୍ଵରାର୍ ରାଇଜ୍ ଲ୍ଗେ ଆଇଲିବେ। ପାପେହ୍ଣି ମ୍ନ୍ ବାଦ୍ଲାଉଆ ଆର୍ ସୁବ୍କ୍ବର୍କେ ଶୁଣି ବିଶ୍ବାସ୍ କ୍ରା।” 16ଜ୍ଡେବ୍ଳ୍ ଯୀଶୁ ଗାଲିଲୀ ଜିଲାର୍ ସ୍ମ୍ନ୍ଦୁର୍ କ୍ଣ୍ତି ବାଟ୍ ଦେଇ ଜାତାବ୍ଳ୍ ଶିମୋନ୍ ଆର୍ ତାର୍ ସାନ୍ବାଇ ଆନ୍ଦ୍ରିୟକେ ସ୍ମ୍ନ୍ଦୁରେ ଭଉଁରି ଜାଲ୍ ହ୍କାଉତି ରିଲାର୍ ଦ୍କ୍ଲା, କାଇତାକ୍ ସେମ୍ନ୍ କେଉଟ୍ ଲକ୍ ରିଲାଇ। 17ଯୀଶୁ ସେମ୍ନ୍କେ କଇଲା, “ମର୍ହ୍ଚେ ଆଶା। ମୁଇ ତୁମୁକ୍ମ୍ନ୍ ଲକ୍ମ୍ନ୍କେ ମର୍ଲ୍ଗେ ଆଣି ଚେଲା କ୍ରୁକେ ଶିକାଇନ୍ଦ୍।” 18ସେମାଡେ ସେମ୍ନ୍ ତାକାର୍ ମାଚ୍ ଦ୍ର୍ତା ଜାଲ୍ ଚାଡ୍ଲାଇ ଆର୍ ଯୀଶୁର୍ ହ୍ଚେ ହ୍ଚେ ଗ୍ଲାଇ। 19ଆରେକ୍, ଯୀଶୁ କ୍ଣ୍ତେକ୍ ଦୁରିକେ ଯାଇ ଜେବଦୀର୍ ହିଲାମ୍ନ୍ ଯାକୁବ ଆର୍ ତାର୍ ସାନ୍ବାଇ ଯୋହନ୍କେ ଡଙ୍ଗାୟ୍ ଜାଲ୍ ହ୍ଜାଡ୍ତି ରିଲାର୍ ଦ୍କ୍ଲା। 20ସେମାଡେ ଯୀଶୁ ସେମ୍ନ୍କେ କୁଦ୍ଲା, ଆରେକ୍ ସେମ୍ନ୍ ସେମ୍ନ୍କାର୍ ଉବାସି ଜେବଦୀକେ ଆର୍ ତାର୍ ବୁତିକ୍ର୍ତା ଲକ୍ମ୍ନ୍କାର୍ ସ୍ଙ୍ଗ୍ ଡଙ୍ଗାଇ ଚାଡିକ୍ରି ଯୀଶୁର୍ ସ୍ଙ୍ଗ୍ ଗ୍ଲାଇ।
ବୁତ୍ ଡ୍ସ୍ଲା ଲକ୍ ବ୍ଲ୍ ଅଇଲା
(ଲୁକ ୪:୩୧-୩୭)
21ଯୀଶୁ ଆର୍ ତାର୍ ଚେଲାମ୍ନ୍ କପର୍ନାହୁମ୍ ସ୍ହର୍କେ ଗ୍ଲାଇ, ଆରେକ୍ ଜ୍ଡେବ୍ଳ୍ ସେ ବିଶାଉଣିଦିନ୍ ଆଇଲି ସେଡେବ୍ଳ୍ ସେ ଯିହୁଦି ମ୍ନ୍କାର୍ ପାର୍ତେନା ଗ୍ରେ ହୁରି ଶିକ୍ୟା ଦେମ୍କେ ଲାଗ୍ଲା। 22ଲକ୍ମ୍ନ୍ ଯୀଶୁର୍ ଶିକ୍ୟା ଶୁଣି ଚ୍ମ୍କି ଗ୍ଲାଇ, କାଇତାକ୍ ସେ ମୋଶାର୍ ନିଆଇ ଶିକାଉତା ଲକ୍ମ୍ନ୍କାର୍ ହର୍ ଶିକ୍ୟା ନ୍ଦେଇ ଜ୍ତେନ୍କି ତାର୍ ଲ୍ଗେ ଅଦିକାର୍ ହାଇଲା ଲକ୍ ହର୍ ସେମ୍ନ୍କେ ଶିକ୍ୟା ଦେତିରିଲା। 23ଜ୍ଡେବ୍ଳ୍ ଯିହୁଦିମ୍ନ୍କାର୍ ପାର୍ତେନା ଗ୍ରେ ଯୀଶୁ ଶିକ୍ୟା ଦେତିରିଲା, ସେମାଡେ ଗଟେକ୍ ବୁତ୍ଆତ୍ମା ଡ୍ସ୍ଲା ଲକ୍ ବେଲ୍କି ଅଇ କଇଲା, 24“ଏ ନାଜରିତ ସହ୍ରାର୍ ଯୀଶୁ, ଅମାର୍ ସ୍ଙ୍ଗ୍ ତର୍ କାଇକାମ୍? ତୁଇ କି ଅମୁକେ ନାସ୍ କ୍ରୁକେ ଆଇଲିସ୍? ତୁଇ କେ, ସେରି ମୁଇ ଜାଣି। ତୁଇ ସେ ପବିତର୍ ଲକ୍ ଯେ କି ଇଶ୍ୱର୍ ଲ୍ଗେ ହ୍ଣି ଆଇଲିସ୍ ଆଚି।” 25ଯୀଶୁ ସେ ବୁତ୍ଆତ୍ମାକେ ଦ୍ମ୍କାଇ କ୍ରି କଇଲା, “ଚୁପ୍ଅଉ! ଆର୍ ଲଗେହ୍ଣି ବାରିଯା!” 26ସେଡେବ୍ଳ୍ ବୁତ୍ଆତ୍ମା ସେ ଡ୍ସିରିଲା ଲକ୍କେ ମଡି ହ୍କାଇ ବେଲ୍କି ଅଇକିରି ତାର୍ ଲ୍ଗେ ହ୍ଣି ବାରିଗ୍ଲି। 27ସେଡେବ୍ଳ୍ ସ୍ବୁଲକ୍ କାବାଅଇଲାଇ, ସେମ୍ନ୍ କ୍ଉଆ କ୍ୱି ଅମ୍କେ ଲାଗ୍ଲାଇ, “ଇରିକାଇରି? ଇରି ତର୍ ଅଦିକାର୍ ସ୍ଙ୍ଗ୍ ନ୍ଉଆଶିକ୍ଷା! ସେ ବୁତ୍ଆତ୍ମାମ୍ନ୍କେ ହେଁ ଆଦେଶ୍ ଦେତି, ଆରେକ୍ ସେମ୍ନ୍ ତାର୍ ଆଦେଶ୍ ମାନ୍ତି।” 28ଆରେକ୍ ଯୀଶୁ କ୍ଲା କାମ୍କେ ଲକ୍ମ୍ନ୍ ବିନ୍ବିନ୍ ଲକ୍ମ୍ନ୍କେ କ୍ମ୍କେ ଆରମ୍ କ୍ଲାଇ। ଆରେକ୍ ଦାହ୍ରେ ଗାଲିଲୀ ଜିଲାର୍ ସ୍ବୁ ବାଟାର୍ ଲକ୍ ତାର୍ କ୍ତାକେ ଶୁଣ୍ଲାଇ।
ଯୀଶୁ ବେସି ଲକ୍କେ ବ୍ଲ୍କ୍ଲା
(ମାଥି. ୮:୧୪-୧୭; ଲୁକ ୪:୩୮-୪୧)
29ଜ୍ଡେବ୍ଳ୍ ଯୀଶୁ ଆର୍ ତାର୍ ଚେଲାମ୍ନ୍ ଯିହୁଦିମ୍ନ୍କାର୍ ପାର୍ତେନା ଗ୍ରେହ୍ଣି ବାରାଇଲାଇ, ଯାକୁବ ଆର୍ ଯୋହନ୍ ତାର୍ସ୍ଙ୍ଗ୍ ରିଲାଇ। ସେମନ୍ ଶିମୋନ୍ ଆର୍ ଆନ୍ଦ୍ରିୟର୍ ଗ୍ରେ ଗ୍ଲାଇ। 30ସେଡେବ୍ଳ୍ ଶିମୋନାର୍ ସ୍ତୁର୍ସି ବେସି ଜ୍ର୍ଅଇ କ୍ଟେ ସଇରିଲାର୍ ଦ୍କ୍ଲା, ଆର୍ ସେମ୍ନ୍ ସେମାଡେ ତାକାର୍ କ୍ତା ଯୀଶୁକେ ଜାଣାଇଲାଇ। 31ସେଡେବ୍ଳ୍ ଯୀଶୁ ଲ୍ଗେଯାଇ ତାର୍ ଆତେ ଦ୍ରି ତାକେ ଉଟାଇଲା, ଆରେକ୍ ତାର୍ ଗ୍ଗାଳେହ୍ଣି ଜର୍ ଚାଡ୍ଲି, ଆରେକ୍ ସେ ସେମ୍ନ୍କେ ସେବା କ୍ରୁକେ ଲାଗ୍ଲି। 32ସେଦିନ୍ ବେଳ୍ ବୁଡି ସ୍ଞ୍ ଅଇଲାକେ, କ୍ତେକ୍ ଲକ୍ମ୍ନ୍ ରଗେଜ୍ରେ ହ୍ଳିରିଲା ଆର୍ ବୁତ୍ ଡ୍ସିରିଲା ଲକ୍ମ୍ନ୍କେ ଯୀଶୁର୍ ଲ୍ଗେ ଆଣୁକେ ଲାଗ୍ଲାଇ, 33ଆରେକ୍ କପର୍ନାହୁମ୍ ସ୍ହରାର୍ ସ୍ବୁ ଜାଗାର୍ ବେସିଲକ୍ ଗ୍ରେ ଆର୍ ସ୍କ୍ଳାଇ ରୁଣ୍ତଲାଇ। 34ସେଡେବ୍ଳ୍ ଯୀଶୁ ବିନ୍ବିନ୍ ପ୍ରକାର୍ ରଗିମ୍ନ୍କେ ବ୍ଲ୍କ୍ଲା ଆର୍ ବେସି ବୁତ୍ଆତ୍ମା ଚାଡାଇଲା, ଆରେକ୍ ସେ ବୁତ୍ ମ୍ନ୍କେ କ୍ତା କ୍ମ୍କେ ସୁଜଗ୍ ନ୍ଦିଲା, କାଇତାକ୍ ସେମ୍ନ୍ ତାକେ ଇଶ୍ଵରାର୍ ହିଲା ବ୍ଲି ଚିନ୍ତି ରିଲାଇ।
ଗାଲିଲୀ ଜିଲାଇ ଯୀଶୁ ପର୍ଚାର୍ କ୍ଲା
(ଲୁକ ୪:୪୨-୪୪)
35କୁକ୍ଳା ବାଶେ ଯୀଶୁ ଉଟିକ୍ରି ବାରିଗ୍ଲା ଆର୍ ଗଟେକ୍ ଶୁନ୍ସାନ୍ ଜାଗାଇ ଗ୍ଲା ଜୁଇତି କି ସେ ଗଟେକ୍ ରେଇ ପାର୍ତେନା କ୍ରୁକେ ଲାଗ୍ଲା। 36ଜ୍ଡେବ୍ଳ୍, ଶିମୋନ୍ ଆର୍ ତାର୍ ସ୍ଙ୍ଗ୍ମ୍ନ୍ ଜାନ୍ଲାଇ ଯୀଶୁ ଉଟିକ୍ରି ଗ୍ଲାବ୍ଲି, ସେମ୍ନ୍ ତାକେ କଜୁକେ ଆରମ୍ କ୍ଲାଇ, 37ଯୀଶୁକେ ଦ୍କିକ୍ରି କଇଲାଇ, “ବେସିଲକ୍ ତକେ କଜୁଲାଇ।” 38ସେଡେବ୍ଳ୍ ଯୀଶୁ ସେମ୍ନ୍କେ କଇଲା, “ଆଶା, ଅମିମ୍ନ୍ ବିନ୍ବିନ୍ ଲ୍ଗାର୍ ଗାମ୍କେ ଜୁମା। ସେତି ହେଁ ମୁଇ ଇଶ୍ଵରାର୍ ରାଇଜାର୍ ସୁବ୍କ୍ବର୍ ପର୍ଚାର୍ କ୍ରିନ୍ଦ୍, କାଇତାକ୍ ସେତାର୍ଗିନେ ମୁଇ ଆଇଲେଆଚି।” 39ଆରେକ୍, ଯୀଶୁ ଗାଲିଲୀ ଜିଲାର୍ ସ୍ବୁ ବାଟାର୍ ଗାମ୍କେ ବୁଲି ବୁଲି ସ୍ବୁ ଯିହୁଦି ମ୍ନ୍କାର୍ ପାର୍ତେନା ଗ୍ରେ ପର୍ଚାର୍ କ୍ଲା ଆର୍ ବୁତ୍ଆତ୍ମାମ୍ନ୍କେ ଚାଡାଇଲା।
ଯୀଶୁ କୁଷ୍ଟରଗିକେ ବ୍ଲ୍କ୍ଲା
(ମାଥି. ୮:୧-୪; ଲୁକ ୫:୧୨-୧୬)
40ଇତିହ୍ଣି ଗଟେକ୍ କୁଷ୍ଟରଗି ଯୀଶୁର୍ ଲ୍ଗେ ଆସି ମୁଣ୍ତିଆ ମାରି ତାକେ କାନିକ୍ର୍ମ୍ ଅଇ କଇଲା, “ଏ ମାପ୍ରୁ, ତୁଇ ଯଦି ମ୍ନ୍ କ୍ରୁଲିସ୍, ତ୍ବେ ମକେ ବ୍ଲ୍ କ୍ରୁହାର୍ସି।” 41ସେତାର୍ଗିନେ ଯୀଶୁ ତାର୍ ମ୍ନେ ଜୀବନ୍ ଦୁକାଇ ଆତ୍ ଲାମାଇ କ୍ରି ତାକେ ଚୁଇଲା ଆର୍ କଇଲା, “ମୁଇ ମ୍ନ୍କ୍ରୁଲେ। ତୁଇ ବଲ୍ଅଉ!” 42ସେମାଡେ କୁଷ୍ଟରଗି ତାର୍ ଗ୍ଗାଳାର୍ ଗାଉ ଚାଡ୍ଲି ଆର୍ ସେ ବ୍ଲ୍ ଅଇଲା। 43ଆରେକ୍, ଯୀଶୁ ତାକେ ଅଟୁଆ କ୍ରି ଆଦେଶ୍ ଦେଇ ସେମାଡେ ହ୍ଟାଇକ୍ରି କଇଲା, 44“ସାବ୍ଦାନ୍, କାକେ କାଇରି କ୍ଉନାଇ କି ମୁଇ ତକେ ବ୍ଲ୍ କ୍ରିଆଚେ ବ୍ଲି, ମ୍ତର୍ ଯା, ଜାଜକାର୍ ଲ୍ଗେ ନିଜ୍କେ ଦ୍କାଉଆ, ଆରେକ୍, ମୋଶା ଜୁଇ ଜୁଇ ଆଦେଶ୍ ଦେଇଆଚେ, ସେ ସ୍ବୁ ନିଜାର୍ ବ୍ଲ୍ ଅଇଲାର୍ ଗିନେ ସେମ୍ନ୍କାର୍ ଲ୍ଗେ ସାକି ଦେତାର୍ ଗିନେ ମାନ୍ସି କ୍ରା।” 45ମ୍ତର୍ ସେଲକ୍ ସେ ଜାଗାଇ ହ୍ଣି ବାରିଗ୍ଲା ଆର୍ ସ୍ବୁଲକ୍ ରିଲା ଜାଗାଇ ଯୀଶୁ ତାକେ ବ୍ଲ୍କ୍ଲା ଆଚେବ୍ଲି କଇଲା। ସେତାର୍ଗିନେ ଯୀଶୁ ଆରେକ୍ କୁଇ ଗାମେ ହେଁ ଜାଣାଇ ଅଇ ହୁରୁ ନାହାର୍ଲା, ମ୍ତର୍ ଗାମ୍ ବାହାରେ ଶୁନ୍ସାନ୍ ଜାଗାଇ ରିଲା। ଆରେକ୍, ଲକ୍ମ୍ନ୍ ଚାରିହାକ୍ ହ୍ଣି ତାର୍ ଲ୍ଗେ ଆସୁକେ ଲାଗ୍ଲାଇ।
Currently Selected:
ମାର୍କ 1: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
