ମାର୍କ 16
16
ଯୀଶୁ ମ୍ର୍ନ୍ ଲ୍ଗେହ୍ଣି ଉଟ୍ଲା
(ମାଥି. ୨୮:୧-୮; ଲୁକ ୨୪:୧-୧୨; ଯୋହ. ୨୦:୧-୧୦)
1ବିଶାଉଣିଦିନ୍ ଗ୍ଲା ତାର୍ ହ୍ଚାର୍ ସ୍ଞେ, ମଗ୍ଦଲୀନୀ ମରୀୟମ୍ ଆର୍ ଶଲୋମୀ, ସାନ୍ ଯୋସିର୍ ଆର୍ ଯାକୁବାର୍ ଆଇସି ମରୀୟମ୍ ବାସ୍ନା ରିଲା ଚିକାଣ୍ ଯୀଶୁର୍ ମ୍ଲା ଗ୍ଗାଳେ ଲାଗାଉତାର୍ ଗିନେ ଗେନ୍ଲାଇ, ଜ୍ନ୍କ୍ରି ସେମ୍ନ୍ ଯାଇ ତାକେ ଲାଗାମ୍ ହାର୍ତି। 2ଆରେକ୍ ରଇବାର୍ ଦିନ୍ ସ୍କାଳ୍ ସ୍କାଳ୍ ବେଳ୍ ବାର୍ତା ବ୍ଳ୍ ସେମ୍ନ୍ ସେ ଯୀଶୁର୍ ମ୍ସୁଣ୍ ଲ୍ଗେ ଗ୍ଲାଇ, 3ଆର୍ ସେଡେବ୍ଳ୍ ସେମ୍ନ୍ ନିଜାର୍ ନିଜାର୍ ବିତ୍ରେ ହ୍ଚାରା ହ୍ଚାରି ଅଉତି ରିଲାଇ, “କେ ଅମାର୍ ଗିନେ ମ୍ସୁଣ୍ ହାର୍ ଦୁଆରେ ହ୍ଣି ସେ ବ୍ଡ୍ ଟେଳାକେ ଡୁଳାଇ ଦେତି?” 4ମ୍ତର୍ ଜ୍ଡେବ୍ଳ୍ ସେମ୍ନ୍ ମ୍ସ୍ଣେ ଦ୍କ୍ଲାଇ, ସେମ୍ନ୍ ଦ୍କ୍ଲାଇ, ଯେ ସେ ବ୍ଡ୍ ଟେଳାକେ ମ୍ସୁଣ୍ ହାର୍ ଦୁଆରେ ହ୍ଣି ଡୁଳାଇ ଦିଲାଇ ଆତି। 5ଜ୍ଡେବ୍ଳ୍ ସେ ମାଇଜିମ୍ନ୍ ମ୍ସୁଣ୍ ହାରେ କେଟି ବିତ୍ରେ ଗ୍ଲାଇ, ସେମ୍ନ୍ ଗଟେକ୍ ଦ୍ଙ୍ଗ୍ଳାକେ ଦବ୍ଳା ହ୍ଚିଆ ହିନ୍ଦି କାତାବାଟ୍ ବ୍ସି ରିଲାର୍ ଦ୍କି, ସେମ୍ନ୍ ଚ୍ମ୍କି ଡିରି ଗ୍ଲାଇ। 6ସେଡେବ୍ଳ୍ ସେ ଦ୍ଙ୍ଗ୍ଳା ହିଲା, ସେ ମାଇଜି ମ୍ନ୍କେ କଇଲା, “ଡିରାନାଇ। ତୁମିମ୍ନ୍ ଜୁଇ କୁର୍ଶେ ମ୍ଲା ନାଜରିତ ସ୍ହରାର୍ ଯୀଶୁକେ କଜୁଲାସ୍। ସେ ମ୍ରିକ୍ରି ବଚିଆଚେ, ସେ ଇତି ନାଇ। ଦ୍କା, ଇଜାଗାଇ ସେମ୍ନ୍ ତାକେ ସ୍ଙ୍ଗାଇ ରିଲାଇ। 7ମ୍ତର୍ ତୁମିମ୍ନ୍ ଅବେ ଜାଇ ଯୀଶୁର୍ ଚେଲାମ୍ନ୍କେ ଆର୍ ପିତର୍କେ କ୍ଉଆ, ‘ଯୀଶୁ ତୁମାର୍ ଆଗେ ଗାଲିଲୀ ଜିଲାକେ ଗ୍ଲାନି। ସେ ତୁମୁକେ କଇରିଲା ହର୍, ତୁମି ତାକେ ସେତି ଦ୍କାସ୍।’” 8ସ୍ଡେବ୍ଳ୍ ସେମ୍ନ୍ ସେ ମ୍ସ୍ଣେ ହ୍ଣି ଚ୍ମ୍କି କ୍ରି କାବାଅଇ ବାରି ହାଳାଇଲାଇ, କାଇରି ବାଟେ ଗାଟେ କାକେ କ୍ଅତ୍ ନାଇ, କାଇତାକ୍ ସେମ୍ନ୍ ସେତି ବେସି ଡିରିଜାଇରିଲାଇ।
ଯୀଶୁ ମଗ୍ଦଲୀନୀ ମରୀୟମ୍କେ ଦ୍କାଇ ଅଇଲା
(ମାଥି. ୨୮:୯,୧୦; ଯୋହ. ୨୦:୧୧-୧୮)
9ରଇବାର୍ ଦିନାର୍ ସ୍କାଳ୍ ଯୀଶୁ ଜି ଉଟ୍ଲା ହ୍ଚେ, ସେ ମଗ୍ଦଲୀନୀ ସ୍ହରାର୍ ମରୀୟମ୍କେ ହ୍ର୍ତୁ ଦ୍କାଇ ଅଇଲା। ଜାଆର୍ ଲ୍ଗେହ୍ଣି ସେ ସାତ୍ଗଟ୍ ବୁତ୍ଆତ୍ମା ଚାଡାଇ ରିଲା। 10ସେ ଜାଇ କ୍ବର୍ କ୍ମ୍କେ ମରୀୟମ୍ ଯୀଶୁର୍ ଚେଲାମ୍ନ୍କାର୍ ଲ୍ଗେ ଗ୍ଲି। ସେଡେବ୍ଳ୍ ସେମ୍ନ୍ ଯୀଶୁର୍ ମ୍ରଣ୍ କ୍ତା ଏତାଇ କ୍ରି କାନ୍ଦ୍ତି ରିଲାଇ। 11ମ୍ତର୍ ମରୀୟମ୍ ସେମ୍ନ୍କେ କଇଲି, “ଯୀଶୁ ଜୀବନ୍ ଆଚେ, ଆର୍ ମୁଇ ତାକେ ଅବେ ସେ ଦ୍କ୍ଲେ” ମ୍ତର୍ ଇରି ଶୁଣି ସେମ୍ନ୍ ବିଶ୍ବାସ୍ ନ୍କେଲାଇ।
ଯଳେକ୍ ଚେଲାକେ ଯୀଶୁ ଦ୍କାଇ ଅଇଲା
(ଲୁକ ୨୪:୧୩-୩୫)
12ହ୍ଚେ ସେ ବିନ୍ ରୁପେ ସେମ୍ନ୍କାର୍ ବିତ୍ରେହ୍ଣି ଦୁଇ ଲକ୍କେ ଦ୍କାଇ ଅଇଲା, ଜ୍ଡେବ୍ଳ୍ ସେମ୍ନ୍ ଯିରୁଶାଲମ୍ ସ୍ହର୍ ହ୍ଣି ତାକାର୍ ଗାମ୍କେ ଇଣ୍ତି ଜାତିରିଲାଇ, ମ୍ତର୍ ସେମ୍ନ୍ ତାକେ ହ୍ର୍ତୁ ଚିନୁ ନ୍ହାର୍ଲାଇ। 13ଆରେକ୍ ତାକେ ଚିନ୍ଲା ହ୍ଚେ ସେମ୍ନ୍, ଯିରୁଶାଲମ୍ ସ୍ହର୍କେ ଲେଉଟି ଜାଇ ବିନ୍ ଚେଲାମ୍ନ୍କେ ସେ ଗ୍ଟ୍ଲା କ୍ତା କଇଲାଇ। ମ୍ତର୍ ସେମ୍ନ୍ ତାକାର୍ କ୍ତାକେ ବିଷ୍ବାସ୍ ନ୍କେଲାଇ।
ବ୍ଡ୍ ଆଦେଶ୍
(ମାଥି. ୨୮:୧୬-୨୦; ଲୁକ ୨୪:୩୬-୪୯; ଯୋହ. ୨୦:୧୯-୨୩; ପ୍ରେରି. ୧:୬-୮)
14ହ୍ଚେ ଏଗାର୍ ଗଟ୍ ହ୍ଟାଇଲା ଚେଲାମ୍ନ୍ କାମ୍କେ ବ୍ସିରିଲା ବ୍ଳ୍, ଯୀଶୁ ସେମ୍ନ୍କେ ଦ୍କାଇ ଅଇଲା ଆରେକ୍ ସେମ୍ନ୍କାର୍ ଅବିଶ୍ବାସ୍ ଆର୍ ମ୍ନ୍ ଅଟୁଆର୍ ଗିନେ ସେମ୍ନ୍କେ ଉଳ୍ଲା, କାଇତାକ୍ ସେମ୍ନ୍ ତାକେ ଆର୍ ଗଟେତର୍ ଜୀବନ୍ ଦ୍କିକ୍ରି ହେଁ ବିଷ୍ବାସ୍ କ୍ରୁକେ ମ୍ନା କ୍ଲାଇ। 15ଆରେକ୍, ତାର୍ ହ୍ଚେ ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ହୁର୍ତିବିର୍ ସ୍ବୁବାଟ୍ ଯାଇ ସ୍ବୁ ଜାତିର୍ ଲକ୍ମ୍ନ୍କାର୍ ଲ୍ଗେ ସୁବ୍କ୍ବର୍ ପର୍ଚାର୍ କ୍ରା।” 16ଯେ ହେଁ ମର୍ ସୁବ୍କ୍ବର୍କେ ବିଶ୍ବାସ୍ କ୍ରେଦ୍ ଆର୍ ଡୁବେନ୍ ନ୍ଇଦ୍ ଇଶ୍ୱର୍ ତାର୍ ପାପାର୍ ଡ୍ଣ୍ଡ୍ ଲ୍ଗେ ହ୍ଣି ତାକେ ଉଦାର୍ କ୍ରେଦ୍, ମ୍ତର୍ ଜୁଇ ଲକ୍ମ୍ନ୍କାର୍ ଉହ୍ରେ ବିଶ୍ବାସ୍ ନାଇ, ତାର୍ ପାପାର୍ ଗିନେ ଇଶ୍ୱର୍ ତାକେ ଡ୍ଣ୍ଡ୍ ଦେଇଦ୍। 17ଯେମ୍ନ୍ ମର୍ ଉହ୍ରେ ବିଷ୍ବାସ୍ କ୍ର୍ତି ସେମ୍ନ୍ ଚିନ୍ ହର୍ ଚମ୍ତ୍କାର୍ କାମ୍ କ୍ର୍ତି, ମର୍ ନାଉଁଏ ବୁତ୍ଆତ୍ମା ଚାଡାଉତି, ନ୍ଉଁଆ-ନ୍ଉଁଆ ବାଷାଇ କ୍ତା କ୍ଉତି, 18ଆତେ ସାହ୍ ଦ୍ର୍ତି, ଆରେକ୍, ସେମ୍ନ୍ ବିଷ୍ ଡୁକ୍ଲେକ୍ ହେଁ, ସେମ୍ନ୍କାର୍ କାଇରି ନ୍ଷ୍ଟ୍ ନ୍ଉତି। ସେମ୍ନ୍ ରଗିମ୍ନ୍କାର୍ ଉହ୍ରେ ଆତ୍ ସ୍ଙ୍ଗାଇଲେକ୍ ସେମ୍ନ୍ ବ୍ଲ୍ ଅଉତି।
ଯୀଶୁର୍ ସ୍ର୍ଗେ ଯାତାର୍
(ଲୁକ ୨୪:୫୦-୫୩; ପ୍ରେରି. ୧:୯-୧୧)
19ଅନ୍କ୍ରି ମାପ୍ରୁ ଯୀଶୁ ଚେଲାମ୍ନ୍କେ ଇ ସ୍ବୁକ୍ତା କଇଲା ହ୍ଚେ, ସେ ସ୍ର୍ଗେ ଗ୍ଲା ଆର୍ ଇଶ୍ଵରାର୍ କାତାବାଟ୍ ବ୍ସିରିଲା। 20ତାର୍ ହ୍ଚେ ଚେଲାମ୍ନ୍ ଗ୍ଲାଇ ଆର୍ ସ୍ବୁବାଟ୍ ଯୀଶୁର୍ ସୁବ୍କ୍ବର୍ ପର୍ଚାର୍ କ୍ଲାଇ, ଆର୍ ମାପ୍ରୁ ଯୀଶୁ ନିଜେ ସେମ୍ନ୍କାର୍ ସ୍ଙ୍ଗ୍ ର୍ଇ, ସେମ୍ନ୍କାର୍ ପର୍ଚାର୍ ସ୍ତ୍ବ୍ଲି ଦ୍କାମ୍କେ ସେମ୍ନ୍କେ ଚିନ୍ ହର୍ ଚ୍ମ୍ତ୍କାର୍ କାମ୍ କ୍ରୁକେ ଶ୍କ୍ତିଦିଲା।
Currently Selected:
ମାର୍କ 16: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
