ମାର୍କ 4
4
ଯୀଶୁ ବୁଣ୍ତାଲକ୍କେ ଦ୍କାଇକ୍ରି ଶିକ୍ୟା ଦିଲା
(ମାଥି. ୧୩:୧-୯; ଲୁକ ୮:୪-୮)
1ଯୀଶୁ ଗାଲିଲୀ ଜିଲାର୍ ସ୍ମ୍ଦୁର୍ କ୍ଣ୍ତିଲ୍ଗେ ଆର୍ ତରେକ୍ ଶିକ୍ୟା ଦେମ୍କେ ଲାଗ୍ଲା ଆରେକ୍ ଅତେକ୍ ବେସିଲକ୍ ତାର୍ ଲ୍ଗେ ରୁଣ୍ତ୍ଲାଇ ଯେ, ଯୀଶୁ ସ୍ମ୍ଦୁର୍ କ୍ଣ୍ତିଲ୍ଗେ ରିଲା ଗଟେକ୍ ଡଙ୍ଗାଇ ଯାଇ ବ୍ସ୍ଲା, ଆରେକ୍ ସ୍ବୁ ଲକ୍ମ୍ନ୍ ସ୍ମ୍ଦୁର୍ କ୍ଣ୍ତିଲ୍ଗେ ରିଲାଇ। 2ସେଡେବ୍ଳ୍ ଯୀଶୁ ଦ୍କାଇକ୍ରି କ୍ଉତା କ୍ତା ଲ୍ଗେ ସେମ୍ନ୍କେ ବିନ୍ବିନ୍ ବିଷୟ୍ ଶିକ୍ୟା ଦେମ୍କେ ଲାଗ୍ଲା, ଆରେକ୍, ନିଜାର୍ ଶିକ୍ୟା ଦେତା ବିତ୍ରେ ସେମ୍ନ୍କେ କଇଲା, “ଶୁଣା! 3ଦ୍କା, ଗଟେକ୍ ଚାଷି ବୁଣୁକେ ବାର୍ଲା। 4ସେ ବିଆନ୍ ବୁଣୁ ବୁଣୁ କ୍ତେକ୍ ବିଆନ୍ ବାଟ୍ ଉହ୍ରେ ଅଦୁର୍ଲି, ଆରେକ୍, ଚେଳେମ୍ନ୍ ଆସି ସେ ବିଆନ୍କେ କାଇଲାଇ। 5ଆରେକ୍ କ୍ତେକ୍ କମ୍ ମାଟି ରେତା ଟେଳାକୁଳି ଉହ୍ରେ ଅଦୁର୍ଲି ଆର୍ ଅଦିକ୍ ମାଟି ନ୍ରିଲାକେ ବେଗି ଗ୍ଜା ଅଇଲି, 6ମ୍ତର୍ ବେଳ୍ ବାରିକ୍ରି ବେସିକ୍ରା ଅଇଲାକେ ହ୍ଡିଗ୍ଲି ଆରେକ୍ ଚେର୍ବିନ୍ଦୁ ନାହାର୍ଲାକେ ସୁକିଗ୍ଲି। 7ଆରେକ୍ କ୍ତେକ୍ ବିଆନ୍ କାଟାବୁଟା ବିତ୍ରେ ଅଦୁର୍ଲି, ଆରେକ୍, କାଟାବୁଟାମ୍ନ୍ ଉଟି ବ୍ଡ୍ଅଇ ସେ ଗ୍ଜାକେ ଡାହି ଅଇଲି ଆର୍ କାଇ ହେଁ ହ୍ଳ୍ ନ୍ହେଳ୍ଲି। 8ଆରେକ୍, କ୍ତେକ୍ ବିଆନ୍ ଗାଦିଆ ବୁଇୟେ ଅଦୁର୍ଲି, ଆର୍ ଗ୍ଜାଅଇ ନିଗିକ୍ରି ତିରିଶ୍ ଗୁଣ୍, ଷାଟେଗୁଣ୍ ଆର୍ ଶଏଗୁଣ୍ ହ୍ତେକ୍ ହ୍ଳ୍ ହ୍ଳ୍ଲି।” 9ଆରେକ୍ ଯୀଶୁ କଇଲା, “ଯାର୍ ଶୁଣୁକେ କାନ୍ ଆଚେ, ସେ ମ୍ନ୍ ଦେଇକ୍ରି ଶୁଣା ଆର୍ ସେ କ୍ତାକେ ବୁଜୁକେ ଚେଷ୍ଟାକ୍ରା।”
ଯୀଶୁ ଦ୍କାଇକ୍ରି ଶିକ୍ୟା ଦିଲା ଅର୍ତ
(ମାଥି. ୧୩:୧୦-୧୭; ଲୁକ ୮:୯,୧୦)
10ଯୀଶୁ ଏକ୍ଲା ରେତାବ୍ଳ୍ ତାର୍ ବାରଗଟ୍ ବାଚ୍ଲା ଲକ୍ ଆର୍ ତାକାର୍ ସ୍ଙ୍ଗ୍ ରେତା ଲକ୍ମ୍ନ୍ ତାକେ ସେ ଦ୍କାଇକ୍ରି କ୍ଉତା କ୍ତା ବିଷୟେ ହ୍ଚାରୁକେ ଲାଗ୍ଲାଇ। 11ସେଡେବ୍ଳ୍ ଯୀଶୁ ସେମ୍ନ୍କେ କଇଲା, “ଇଶ୍ୱର୍ ରାଇଜେ ଲୁକିରିଲା ସ୍ତ୍କ୍ତା ଜାଣୁକେ ତୁମୁକେ ଶ୍କ୍ତି ଦିଆଅଇଲି ଆଚେ, ମ୍ତର୍ ଜୁଇଲକ୍ ମକେ ନ୍ଜାଣ୍ତି ସେ ଲକ୍ମ୍ନ୍କେ ସ୍ବୁ ବିଷୟ୍ ଦ୍କାଇକ୍ରି କ୍ଉତା କ୍ତା କ୍ଉଆ ଅମ୍ଲି, 12ଜ୍ନ୍କ୍ରି ଦ୍ର୍ମ୍ ଶାସ୍ତର୍ ଲ୍ଗେ ଲେକା ଅଇଲିଆଚେ, ଜ୍ନ୍କ୍ରି ସେମ୍ନ୍ ଦ୍କି ଦ୍କି ଦ୍କୁ ନାହାର୍ତି ଆର୍ ଶୁଣୁ ଶୁଣୁ ବୁଜି ନ୍କେର୍ତି, ମ୍ତର୍ ଯଦି ସେମ୍ନ୍ ଦ୍କୁ ହାରତି ଆର୍ ବୁଜୁ ହାର୍ତି ତ୍ବେ ସେମ୍ନ୍ ଇଶ୍ୱର୍ ଲ୍ଗେ ଲେଉଟି ଆସି କେମା ହାଉତି।”
ଯୀଶୁ ବୁଣ୍ତା ଲକାର୍ କ୍ତାର୍ ଅର୍ତ ଶିକ୍ୟା ଦିଲା
(ମାଥି. ୧୩:୧୮-୨୩; ଲୁକ ୮:୧୧-୧୫)
13ଯୀଶୁ ଆରେକ୍, ସେମ୍ନ୍କେ କଇଲା, “ତୁମିମ୍ନ୍ କି ଇରି ଦ୍କାଇକ୍ରି କ୍ଉତା କ୍ତା ବୁଜୁ ନାହାରୁଲାସ୍? ସେତାକ୍ କ୍ନ୍କ୍ରି ସ୍ବୁ କଇଲା କ୍ତାକେ ବୁଜାସ୍? 14ବୁଣ୍ତା ଲକ୍ ଇଶ୍ଵରାର୍ ବାକ୍ୟ ବୁଣେଦ୍। 15ଜୁଇ ଲକ୍ମ୍ନ୍ ଶୁଣ୍ତି, ଆରେକ୍, ଶୁଣ୍ଲାମାଡେ ଶଇତାନ୍ ଆସି ସେମ୍ନ୍କାର୍ ତ୍ଇ ବୁଣା ଅଇରିଲା ଇଶ୍ଵରାର୍ ବାକ୍ୟ ଚରି ନ୍ଇଦ୍, ସେମ୍ନ୍ ବାଟ୍ଲ୍ଗେ ବୁଣା ଅଇରିଲା ବିଆନ୍ ସ୍ମାନ୍। 16ତାର୍ ହର୍ ଜୁଇଲକ୍ ବାକ୍ୟ ଶୁଣ୍ଲାମାଡେ ସ୍ର୍ଦା ଅଇକ୍ରି ମାନ୍ତି, ସେମ୍ନ୍ ବୁଣା ଅଇରିଲା ଟେଳାକୁଳି ବୁଇଁ ହର୍। 17ସେମ୍ନ୍କାର୍ ମ୍ନ୍ ବିତ୍ରେ ବାକ୍ୟ ଚେର୍ ନ୍ବେଦ୍ଲା ହର୍ କ୍ତିଦିନ୍ ହାଇଁ ଶାନ୍ତି ରେତି, ହ୍ଚେ ବାକ୍ୟର୍ ହାଇଁ କ୍ଷ୍ଟ ଆର୍ ଲିନ୍ଦା ଗଟ୍ଲେକ୍ ସେମାଡେ ଡିର୍ତି ଆର୍ ବିଶ୍ବାସେ ହ୍ଣି ହ୍ଚେ ଆସ୍ତି। 18ଆରେକ୍ ଜୁଇଲକ୍ ଇଶ୍ଵରାର୍ ବାକ୍ୟ ଶୁଣ୍ତି, ଆରେକ୍ ଦୁନିଆର୍ ଚିନ୍ତା, ଦ୍ନାର୍ ଆଶା ଆର୍ ବିନ୍ସ୍ବୁ ବିଷୟ୍ ଲାଳ୍ସା ହୁରିକ୍ରି ବାକ୍ୟକେ ଚାହି ହ୍କାଇଦ୍ ଆର୍ ସେରି ହ୍ଳ୍ ନ୍ଦେରେ, 19ସେ ପର୍କାର୍ ଲକ୍, କାଟାବୁଟା ବୁଇଁ ଲ୍ଗେ ଅଦ୍ରିରିଲା ବିଆନ୍ ହର୍। 20ତାର୍ ହର୍ ଜୁଇଲକ୍ ଇଶ୍ଵରାର୍ ବାକ୍ୟ ଶୁଣିକ୍ରି ସେରି ମାନ୍ତି ଆର୍ ତିରିଶ୍ ଗୁଣ୍, ଷାଟେଗୁଣ୍ ଆର୍ ଶଏଗୁଣ୍ ହ୍ଳ୍ ହ୍ଳ୍ତି, ସେମ୍ନ୍ ବୁଣା ଅଇରିଲାର୍ ଗାଦିଆ ବୁଇଁ ହର୍।”
ମାଣ୍ ଉହ୍ରେ କୁପି
(ଲୁକ ୮:୧୬-୧୮)
21ଯୀଶୁ ଆର୍ ଗଟେକ୍ ଦ୍କାଇକ୍ରି କ୍ଉତା କ୍ତା ସେମ୍ନ୍କେ କଇଲା, “ଲକ୍ମ୍ନ୍ କୁପି ଲାଗାଇକ୍ରି ମାଣ୍ ବିତ୍ରେ କି କ୍ଟ୍ ତ୍ଳେ ସ୍ଙ୍ଗାଇ ନ୍କେର୍ତି, ମ୍ତର୍ କୁପି ବ୍ତା ଉହ୍ରେ ସ୍ଙ୍ଗାଉତି। 22କାଇତାକ୍ ଜାଇରି ହେଁ ଲୁକି ଆଚେ ଜାଣ୍ତାର୍ ଗିନେ ଲୁକି ଆଚେ। ଆରେକ୍ ଜୁଇରି ହେଁ ଲକ୍ମ୍ନ୍କାର୍ ଗିନେ ଲୁକି ଆଚେ, ସେରି ଇଶ୍ୱର୍ ଜାଣାମ୍କେ ଲୁକି ଆଚେ। 23ଯଦି କାର୍ ଶୁଣୁକେ କାନ୍ ଆଚେ, ସେ ମ୍ନ୍ ଦେଇକ୍ରି ଶୁଣା ଆର୍ ସେ କ୍ତାକେ ବୁଜୁକେ ଚେଷ୍ଟାକ୍ରା।” 24ଯୀଶୁ ସେମ୍ନ୍କେ କଇଲା, “ଜୁଇରି କ୍ମ୍ଲେ ସେରିମ୍ନ୍ ଦେଇ ଶୁଣା। ଜ୍ନ୍କ୍ରି ତୁମିମ୍ନ୍ ନାହି ଦିଆସ୍, ସେନ୍କ୍ରି ମାପ୍ରୁ ହେଁ ତୁମୁକେ ନାହିକ୍ରି ଦ୍ଇଦ୍ ଆର୍ ତୁମିମ୍ନ୍ ଅଦିକ୍ ହାଉଆସ୍। 25ମ୍ତର୍ ଯାର୍ ଲ୍ଗେ ଅଦିକ୍ ବୁଦି ଗ୍ଯାନ୍ ଆଚେ, ସେ ଆରେକ୍ ଅଦିକ୍ ହାଇଦେ। ଆରେକ୍ ଯାର୍ ଲ୍ଗେ ବୁଦି ଗ୍ଯାନ୍ ନାଇ, ତାର୍ ଲ୍ଗେ ଯାଇରି ଆଚେ, ସେରି ସେ ତାର୍ ତ୍ଇହ୍ଣି ନିଆ ଅଇଦ୍।”
ଗ୍ଜା ଅଉତା ମ୍ନ୍ଜିର୍ କ୍ତା
(ମାଥି. ୧୩:୨୪)
26ଆରେକ୍ ଯୀଶୁ କଇଲା, “ଇଶ୍ୱର୍ ରାଇଜ୍ ଅନ୍କାର୍, ଜ୍ନ୍କ୍ରି ଗଟେକ୍ ଚାଷିଲକ୍ ଜମିଏ ବିଆନ୍ ବୁଣେଦ୍। 27ଆରେକ୍, ରାତି ସଇଦ୍ ଆର୍ ସ୍କାଳ୍ ଉଟେଦ୍, ଆର୍ ବିଆନ୍ କ୍ନ୍କ୍ରି ଗ୍ଜାଅଇ ବାଡେଦ୍, ସେରି ସେ ନ୍ଜାଣେ। 28ବୁଇଁ ନିଜେ ହ୍ଳାକେ ବାଡାଇ ହ୍ଳ୍ ଦ୍ରାଇଦ୍, ହ୍ର୍ତୁ ହ୍ତାର୍, ହ୍ଚେ କେଡ୍, ତାର୍ ହ୍ଚେ କେଡ୍ ବ୍ର୍ତି ମ୍ଞ୍ଜି। 29ମ୍ତର୍ ହାଚି ହାକ୍ଲା ମାଡେ, କାଟ୍ତା ସ୍ମୟ୍ ଅଇଲେକ୍ ସେ ଇଳା ଲାଗାୟଦ୍।”
ସ୍ର୍ସୁ ମ୍ଞ୍ଜିର୍ କ୍ତା
(ମାଥି. ୧୩:୩୧,୩୨,୩୪; ଲୁକ ୧୩:୧୮,୧୯)
30ଯୀଶୁ ଆରେକ୍ କଇଲା, “ଅମିମ୍ନ୍ କାର୍ ସ୍ଙ୍ଗ୍ ଇଶ୍ଵରାର୍ ରାଇଜ୍କେ ସ୍ମାନ୍ କ୍ରୁମା? ନଇଲେକ୍ କୁଇରି ଦ୍କାଇକ୍ରି କ୍ଉତା କ୍ତା ସେରି ବୁଜାମା? 31ସେରି ଗଟେକ୍ ସ୍ର୍ସୁ ମ୍ଞ୍ଜି ହର୍। ଜମିଏ ବୁଣା ଅଉତାବ୍ଳ୍ ସେରି ହୁର୍ତିବିର୍ ସ୍ବୁ ବିଆନ୍ ତ୍ଇହ୍ଣି ସାନ୍। 32ମ୍ତର୍ ବୁଣା ଅଇଲେକ୍ ସେରି ଉଟିକ୍ରି ସ୍ବୁଶାଗ୍ ତ୍ଇହ୍ଣି ବ୍ଡ୍ ଅଇଦ୍, ଆରେକ୍, ତାର୍ ଅନ୍କ୍ରି ବ୍ଡ୍ ବ୍ଡ୍ ଡାଳ୍ ଅଇଦେ ଯେ, ଆକାଶାର୍ ଚେଳେମ୍ନ୍ ତାର୍ କ୍ନ୍ଦାୟ୍ ଗୁଡାବାନ୍ଦି ବାସାମ୍ ହାର୍ତି।” 33ଯୀଶୁ ଅନ୍କ୍ରି ବେସି ଦ୍କାଇକ୍ରି କ୍ଉତା କ୍ତା ସ୍ଙ୍ଗ୍ ଲକ୍ମ୍ନ୍କାର୍ ଶୁଣୁ ହାର୍ତା ଶ୍କ୍ତି ହ୍ତେକ୍, ସେମ୍ନ୍କାର୍ ଲ୍ଗେ ଇଶ୍ଵରାର୍ ବାକ୍ୟ ପର୍ଚାର୍ କ୍ର୍ତିରିଲା, 34ଆରେକ୍ ଦ୍କାଇକ୍ରି କ୍ଉତା କ୍ତା ଚାଡି ଯୀଶୁ ସେମ୍ନ୍କାର୍ ଲ୍ଗେ କାଇକ୍ତା ହେଁ ନ୍କ୍ଉତି ରିଲା। ମ୍ତର୍ ଯୀଶୁ ଲୁକ୍ଣେ ନିଜାର୍ ଚେଲାମ୍ନ୍କେ ସ୍ବୁ ବିଷୟ୍ ବୁଜାଇ ଦେତିରିଲା।
ହାଣି ହ୍ବନ୍ ଉହ୍ରେ ଅଦିକାର୍
(ମାଥି. ୮:୨୩-୨୭; ଲୁକ ୮:୨୨-୨୫)
35ସେ ଦିନ୍ ସ୍ଞ୍ବେଳା ଯୀଶୁ ଚେଲାମ୍ନ୍କେ କଇଲା, “ଆଶା, ସ୍ମ୍ଦୁରାର୍ ସେହାଟିକେ ଯୁମା।” 36ସେଡେବ୍ଳ୍ ଚେଲାମ୍ନ୍ ଲକ୍ମ୍ନ୍କାର୍ ବାଳ୍କେ ଚାଡି, ଯୀଶୁ ଜ୍ନ୍କ୍ରି ରିଲା, ସେନ୍କ୍ରି ତାକେ ଡଙ୍ଗା ସ୍ଙ୍ଗ୍ ନ୍ଇକ୍ରି ଗ୍ଲାଇ। ଆରେକ୍, ଲକ୍ମ୍ନ୍ ଅଲ୍ଗା ଅଲ୍ଗା ଡଙ୍ଗାଇ ବ୍ସି ଯୀଶୁର୍ ସ୍ଙ୍ଗ୍ ଗ୍ଲାଇ। 37ଆର୍ ବେସି ସ୍ମ୍ଦୁରେ ଅନ୍କ୍ରି ହାଣି ହ୍ବନ୍ ଅଇଲି, ଆରେକ୍, ଉଲ୍କା ମାରି ଡଙ୍ଗାଇ ହାଣି ବ୍ର୍ତି ଅମ୍କେ ଲାଗ୍ଲି। 38ସେଡେବ୍ଳ୍ ଯୀଶୁ ଡଙ୍ଗାର୍ ହ୍ଚ୍ବାଟ୍ ଚ୍ଟୁ ଡାଙ୍ଗେ ମୁଣ୍ତ୍ ଅଚ୍ନା ଦେଇ ସଇରିଲା। ଆରେକ୍ ସେମ୍ନ୍ ଯୀଶୁକେ ଉଟାଇକ୍ରି କଇଲାଇ, “ଏଗୁରୁ, ଅମି ମ୍ଲୁ! ତର୍ କାଇରି ଚିନ୍ତା ନାଇ?” 39ସେଡେବ୍ଳ୍ ଯୀଶୁ ଉଟି ହାଣି ହ୍ବନ୍କେ ଦ୍ମ୍କାଇ କ୍ରି କଇଲା “ଚୁପ୍ଅଇ ତିର୍ଅଉ।” ସେଡେବ୍ଳ୍ ହାଣି ହ୍ବନ୍ ବ୍ନ୍ଦ୍ ଅଇଲି ଆର୍ ସ୍ବୁ ତିର୍ ଅଇଲି। 40ଆରେକ୍, ଯୀଶୁ ସେମ୍ନ୍କେ କଇଲା, “ତୁମିମ୍ନ୍ କାଇତାକ୍ ଏତେକ୍ ଡିରୁଲାସ୍? ଏ କାଇରି? ମର୍ ଉହ୍ରେ ତୁମାର୍ ବିଶ୍ବାସ୍ ନାଇ କି?” 41ସେଡେବ୍ଳ୍ ସେମ୍ନ୍ ବେସି ଡିରିକ୍ରି ତାକାର୍ ତାକାର୍ ବିତ୍ରେ କ୍ଉଆ କ୍ୱି ଅମ୍କେ ଲାଗ୍ଲାଇ, “ଏ କେ ଯେ? ହ୍ବନ୍ ଆର୍ ସ୍ମ୍ଦୁର୍ ଆର୍ ଆଦେଶ୍ ମାନେଦ୍!”
Currently Selected:
ମାର୍କ 4: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
