ମାର୍କ 6
6
ନାଜରିତ ସ୍ହରାର୍ ଲକ୍ ଯୀଶୁକେ ଇନସ୍ତା କ୍ଲାଇ
(ମାଥି. ୧୩:୫୩-୫୮; ଲୁକ ୪:୧୬-୩୦)
1ଯୀଶୁ କପର୍ନାହୁମ୍ ସ୍ହର୍ ଲ୍ଗେ ହ୍ଣି ବାରିଗ୍ଲା ଆର୍ ନିଜାର୍ ଗାମ୍ ନାଜରିତ୍କେ ଆଇଲା ଆର୍ ତାର୍ ଚେଲାମ୍ନ୍ ତାର୍ ହ୍ଚେ ଗ୍ଲାଇ। 2ବିଶାଉଣିଦିନ୍ ଆଇଲେକ୍, ଯୀଶୁ ଯିହୁଦି ମ୍ନ୍କାର୍ ପାର୍ତେନା ଗ୍ରେ ଲକ୍ମ୍ନ୍କେ ଇଶ୍ଵରାର୍ କ୍ତା ଶିକ୍ୟା ଦେମ୍କେ ଆରମ୍ କ୍ଲା। ଆରେକ୍, ବେସିଲକ୍ ଯୀଶୁର୍ କ୍ତାଶୁଣି ଚାନିଆ ଅଇ କଇଲାଇ, “ଏ ମାନାଇ ଇ ସ୍ବୁକ୍ତା କେଣେହ୍ଣି ସିକ୍ଲା? ଆରେକ୍, ଆକେ ଅନ୍କା ଗିଆନ୍ ଆରେକ୍ ଚମ୍ତ୍କାର୍ କାମ୍ କ୍ରୁକେ କୁଇତିହ୍ଣି ଶ୍କ୍ତି ମିଳ୍ଲି, ଇ ସ୍ବୁ କାଇରି?” 3ସେମ୍ନ୍ ଅନ୍କାର୍ ଇନସ୍ତା କ୍ରି ଯୀଶୁକେ କଇଲାଇ, “ଏ କି ସେ ବାଡାଇ ନଇ? ଏ କି ମରୀୟମାର୍ ହଇସି, ଆର୍ ଯାକୁବ, ଯୋସି, ଯିହୁଦା ଆର୍ ଶିମୋନାର୍ ବ୍ଡ୍ ବାଇସି ନଇ? ଆରେକ୍, ଇତାର୍ ସାନ୍ ବେଣ୍ସିମ୍ନ୍ ଇତି ଅମାର୍ ସ୍ଙ୍ଗ୍ ନାଇ କି?” 4ସେଡେବ୍ଳ୍ ଯୀଶୁ ସେମ୍ନ୍କେ କଇଲା, “ଗଟେକ୍ ବବିଶତ୍ କ୍ତା କ୍ଉତାଲକ୍ ଜୁଇତି ଗ୍ଲେକ୍ ହେଁ ସନ୍ମାନ୍ ହାଇଦ୍। ମ୍ତର୍ ତାର୍ ଗାମ୍, ତାର୍ ଗ୍ରେ, ଆର୍ ତାର୍ ନିଜାର୍ ଲକ୍ବାକ୍ ମ୍ନ୍ ତାକେ ନ୍ମାନ୍ତି।” 5କାଇତାକ୍ ଲକ୍ମ୍ନ୍ ତାର୍ ଉହ୍ରେ ବିଶ୍ବାସ୍ କ୍ରୁକେ ମ୍ନା କ୍ଲାଇ। ତ୍ବେ ଯୀଶୁ ଅଳକ୍ କ୍ତେକ୍ ରଗି ଲକାର୍ ଉହ୍ରେ ଆତ୍ ସ୍ଙ୍ଗାଇ ସେମ୍ନ୍କେ ବ୍ଲ୍ କ୍ର୍ତାର୍ ଚାଡି ଯୀଶୁ ସେ ଜାଗାଇ ଆରେକ୍ କାଇରି ଚମ୍ତ୍କାର୍ କାମ୍ ନ୍କେଲା। 6ଆରେକ୍, ଯୀଶୁ ସେମ୍ନ୍କାର୍ ଅବିଶ୍ବାସ୍ ଦ୍କି ଚାନିଆ ଅଇଲା। ହ୍ଚେ ଯୀଶୁ ଚାରିହାକାର୍ ଗାମ୍ ଗାମ୍ ବୁଲିକ୍ରି ଶିକ୍ୟା ଦେମ୍କେ ଲାଗ୍ଲା।
ଯୀଶୁ ବାର୍ଗଟ୍ ବାଚ୍ଲା ଚେଲାମ୍ନ୍କେ ପର୍ଚାର୍ କ୍ରୁକେ ହ୍ଟାଇଲା
(ମାଥି. ୧୦:୫-୧୫; ଲୁକ ୯:୧-୬)
7ହ୍ଚେ ଯୀଶୁ ବାରଗଟ୍ ଚେଲାମ୍ନ୍କେ ତାର୍ ଲ୍ଗେ କୁଦ୍ଲା ଆର୍ ସେମ୍ନ୍କେ ଦୁଇ ଦୁଇ ଲକ୍କେ କ୍ରି ହ୍ଟାଇଲା ଆର୍ ବୁତ୍ଆତ୍ମାକେ ଲକାର୍ ତ୍ଇହ୍ଣି ଚାଡାମ୍କେ ଅଦିକାର୍ ଦିଲା, 8ଆରେକ୍ ବାଟେ ଜାତାବ୍ଳ୍ ତୁମାର୍ ସ୍ଙ୍ଗ୍ କାଇରି ନିଆନାଇ ବ୍ଲେକ୍ ଡାଙ୍ଗ୍, ମଣା, କାଦି, ଡାବୁ କାସୁ ନ୍ନେମ୍କେ ଆଦେଶ୍ ଦିଲା। 9ସେମ୍ନ୍କେ ହାଣ୍ତାଇ ହିନ୍ଦୁକେ କଇଲା, ଜଳେକ୍ ଆଙ୍ଗି ହିନ୍ଦୁକେ ମ୍ନା କ୍ଲା। 10ଆରେକ୍, ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ଯାର୍ ଗ୍ରେ ହେଁ ହୁରାସ୍, ସେ ଗାମେ ହ୍ଣି ଜାତା ହ୍ତେକ୍ ସେ ଗ୍ରେ ସେ ରିଆ। 11ମ୍ତର୍ ଜୁଇ ଜାଗାଇ ଲକ୍ମ୍ନ୍ ତୁମୁକେ ହ୍ଚାରି ନ୍କେର୍ତି ତୁମାର୍ କ୍ତାଶୁଣି ନ୍କେର୍ତି, ସେ ଗାମେ ହ୍ଣି ଜାତାବ୍ଳ୍ ସେମ୍ନ୍କାର୍ ଲ୍ଗେ ସାକି ଦେତାର୍ ଗିନେ ତୁମାର୍ ହାଦାର୍ ଦୁଡି ହାହଳି ଦିଆସ୍।” 12ସେଡେବ୍ଳ୍ ବାଚ୍ଲା ଚେଲାମ୍ନ୍ ଜାଇକ୍ରି ଲକ୍ମ୍ନ୍କେ ପାପେହ୍ଣି ମ୍ନ୍ ବାଦ୍ଲାମ୍କେ ଦ୍ର୍କାର୍ ବ୍ଲି, ଇରି ପର୍ଚାର୍ କ୍ଲାଇ। 13ଆରେକ୍ ବେସି ବୁତ୍ଆତ୍ମା ଚାଡାଇ ଲାଇ ଆର୍ ବେସି ରଗିଲକ୍କେ ଜିତ୍ ଗ୍ଚାର୍ ଚିକାଣ୍ ଲାଗାଇ ବ୍ଲ୍ କ୍ଲାଇ।
ଡୁବେନ୍ ଦେତା ଯୋହନାର୍ ମ୍ର୍ନ୍
(ମାଥି. ୧୪:୧-୧୨; ଲୁକ ୨:୭-୯)
14ସେଡେବ୍ଳ୍ ଗାଲିଲୀ ଜିଲାର୍ ଶାସନ୍କ୍ର୍ତା ହେରୋଦ୍ ର୍ଜା ଯୀଶୁ କ୍ର୍ତା କାମ୍ ବିଷୟେ ଲକ୍ମ୍ନ୍କାର୍ ଲ୍ଗେ ହ୍ଣି ଶୁଣ୍ଲାଇ, କାଇତାକ୍ ବେସି ଲକ୍ମ୍ନ୍ ଯୀଶୁର୍ କ୍ର୍ତା କାମ୍ ବିଷୟେ କ୍ତା ଅଉତି ରିଲାଇ, ଆରେକ୍ ଲକ୍ କ୍ଉତିରିଲାଇ, “ଡୁବେନ୍ ଯୋହନ୍ ମ୍ଲା ଲକାର୍ ତ୍ଇହ୍ଣି ଉଟିଆଚେ, ସେତାର୍ଗିନେ ଇରିସ୍ବୁ ଶ୍କ୍ତି ତାକାର୍ ତ୍ଇ ଚମ୍ତ୍କାର୍ କାମ୍ କ୍ରୁଲି।” 15ମ୍ତର୍ ବିନ୍ ଲକ୍ମ୍ନ୍ କ୍ଉତିରିଲାଇ, “ଏ ବବିଶତ୍ କ୍ତା କ୍ଉତାଲକ୍ ଏଲିୟ।” ଆରେକ୍ କେ କେ କ୍ଉତିରିଲାଇ, “ଇରି ଆଗାର୍ ବବିଶତ୍ର୍ କ୍ତା କ୍ଉ ମ୍ନ୍କାର୍ ବିତ୍ରେହ୍ଣି ଏ ଗଟେକ୍ ବବିଶତ୍ କ୍ତା କ୍ଉ।” 16ମ୍ତର୍ ହେରୋଦ୍ ର୍ଜା ଇରି ଶୁଣି କଇଲା, “ଜୁଇ ଡୁବେନ୍ ଯୋହନାର୍ ମୁଣ୍ତ୍ ମୁଇ କାଟି ଆଚି, ସେ ମ୍ଲାଲକ୍ ଉଟିଆଚେ।” 17ଜ୍ଡେବ୍ଳ୍ ଗାଲିଲୀ ଜିଲାର୍ ହେରୋଦ୍ ର୍ଜା ନିଜାର୍ ବାଇ ଫିଲିପ୍ର୍ ମାଇଜି ରାଣୀ ହେରୋଦିଆକେ ବିବା କ୍ରିରିଲାକ୍। ଇକ୍ତା ଡୁବେନ୍ ଯୋହନ୍ ଜାଣ୍ଲା। ତ୍ବେ ହାଇତାର୍ ଗିନେ ହେରୋଦ୍ ର୍ଜା ନିଜେ ଲକ୍ ହ୍ଟାଇ ଡୁବେନ୍ ଯୋହନ୍କେ ବାନ୍ଦିକ୍ରି ବନ୍ଦିଗ୍ରେ ହୁରାଇଲା। 18କାଇତାକ୍ ଡୁବେନ୍ ଯୋହନ୍ ହେରୋଦ୍କେ କ୍ଉତିରିଲା, “ନିଜାର୍ ବାଇର୍ ମାଇଜିକେ ସ୍ଙ୍ଗାଉତାର୍ ମୋଶାର୍ ନିୟମ୍ତ୍ଇ ନାଇ।” 19ସେଡେବ୍ଳ୍ ରାଣୀ ହେରୋଦିଆ ଡୁବେନ୍ ଯୋହନାର୍ ଉହ୍ରେ ଅକାର୍ ଅଇ ତାକେ ମ୍ର୍ନେ ମାରୁକେ ମ୍ନ୍କ୍ର୍ତି ରିଲି, ମ୍ତର୍ ନାହାର୍ତି ରିଲାଇ। 20କାଇତାକ୍ ହେରୋଦ୍ ଡୁବେନ୍ ଯୋହନ୍ ଗଟେକ୍ ଦ୍ର୍ମି ଆର୍ ପବିତର୍ ଲକ୍ବ୍ଲି ଜାଣି ଡିର୍ତିରିଲା, ଆରେକ୍ ଡୁବେନ୍ ଯୋହନ୍କେ ବାଚାମ୍କେ ଚେସ୍ଟା କ୍ର୍ତିରିଲା, ଆରେକ୍ ଡୁବେନ୍ ଯୋହନାର୍ କ୍ତାଶୁଣି ବେସି ଡିର୍ତିରିଲା ମ୍ତର୍ ଆରେକ୍ ତାର୍କ୍ତା ସ୍ର୍ଦାଇ ଶୁଣ୍ତି ରିଲା। 21ମ୍ତର୍ ଗଟେଦିନ୍। ହେରୋଦ୍ ନିଜାର୍ ଜ୍ର୍ନ୍ ଦିନ୍ ମାନ୍ଲା, ସେ ନିଜାର୍ ବ୍ଡ୍ ମୁକିଆ ମ୍ନ୍କେ ସେନାପ୍ତି ମ୍ନ୍କେ ଗାଲିଲୀ ଜିଲାର୍ ବ୍ଡ୍ ବ୍ଡ୍ ଲକ୍ମ୍ନ୍କେ ବଜିଲ୍ଗେ ଆସୁକେ କ୍ବର୍ ଦିଲା। ସେ ରାତିବ୍ଳ୍ ବଜିତ୍ଇ ଡୁବେନ୍ ଯୋହନ୍କେ ମାରୁକେ, ରାଣୀ ହେରୋଦିଆକେ ଗଟେକ୍ ସୁଜଗ୍ ମିଳ୍ଲି। 22ଆରେକ୍, ରାଣୀ ହେରୋଦିଆର୍ ନିଜାର୍ ଟକି ବିତ୍ରେ ଆସି ନାଚିକ୍ରି ହେରୋଦ୍ ଆର୍ ତାର୍ସ୍ଙ୍ଗ୍ କାମ୍କେ ବ୍ସିରିଲା ଗତିଆ ମ୍ନ୍କେ ସ୍ର୍ଦା କ୍ଲି। ସେଡେବ୍ଳ୍ ହେରୋଦ୍ ର୍ଜା ଟକିକେ କଇଲା, “ଯାଇରି ଇଚ୍ଚା କ୍ରୁଲିସ୍, ମାଗ୍, ମୁଇ ତକେ ସେରି ଦ୍ଇନ୍ଦେ।”
23ଆରେକ୍, ସେ ତାର୍ ଲ୍ଗେ ହ୍ର୍ମାଣ୍ କ୍ରି କଇଲା, “ତୁଇମକେ ଜୁଇରି ହେଁ ମାଗ୍ସି ମୁଇ ଦ୍ଇନ୍ଦେ, ଯଦି ତୁଇ ମର୍ ରାଇଜାର୍ ଅକାବାଗ୍ ହ୍ତେକ୍ ମାଗ୍ସି ମୁଇ ତକେ ଦ୍ଇନ୍ଦେ।” 24ସେଡେବ୍ଳ୍ ସେ ବାରିଜାଇ ନିଜାର୍ ଆଇସିକେ ହ୍ଚାର୍ଲି, “ମୁଇ କାଇରି ମାଗିନ୍ଦ୍?” ସେ କଇଲି, “ଡୁବେନ୍ ଯୋହନାର୍ ମୁଣ୍ଡ୍।” 25ସେମାଡେ ସେ ହେରୋଦ୍ ର୍ଜାର୍ ଲ୍ଗେ ବେଗିଆସି ଇରି କ୍ଇ ମାଗ୍ଲି, “ମର୍ ମ୍ନ୍ ଯେ, ତୁଇ ଡୁବେନ୍ ଯୋହନାର୍ ମୁଣ୍ଡ୍ କାଟି ଗଟେକ୍ ତାଳିଏ ମକେ ଏବେ ଦେ।” 26ସେଡେବ୍ଳ୍ ଗାଲିଲୀ ଜିଲାର୍ ହେରୋଦ୍ ର୍ଜା ବେସି ଦୁକ୍ ଅଇଲେକ୍ ହେଁ ନିଜାର୍ ହ୍ର୍ମାଣ୍ ଆର୍ କାମ୍କେ ବ୍ସିରିଲା ଗତିଆ ମ୍ନ୍କାର୍ ଗିନେ ମ୍ନା କ୍ରୁକେ ଇଚା ନ୍କେଲା। 27ତ୍ବେ ହେରୋଦ୍ ର୍ଜା ସେମାଡେ ବନ୍ଦିଗ୍ରେ ଗଟେକ୍ ସେନାକେ ହ୍ଟାଇ ଡୁବେନ୍ ଯୋହନାର୍ ମୁଣ୍ତ୍ କାଟି ଆଣୁକେ ଆଦେଶ୍ ଦିଲା। ସେଡେବ୍ଳ୍ ସେ ଯାଇ ବନ୍ଦିଗ୍ରେ ଡୁବେନ୍ ଯୋହନାର୍ ମୁଣ୍ତ୍ କାଟି ଆନ୍ଲା, 28ଆରେକ୍ ସେ ମୁଣ୍ତ୍ ଗଟେକ୍ ତାଳିଏ ଆଣି ଟକିକେ ଦିଲା, ଆରେକ୍ ଟକି ସେରି ଆଣି ନିଜାର୍ ଆଇସିକେ ଦିଲି। 29ଡୁବେନ୍ ଯୋହନାର୍ ଚେଲାମ୍ନ୍ ତାର୍ ମ୍ଲା କ୍ବର୍ ଶୁଣି ଆଇଲାଇ ଆର୍ ତାର୍ ମ୍ଳ୍ ଆଣିକ୍ରି ମ୍ସ୍ଣେ ତହ୍ଲାଇ।
ଯୀଶୁ ପର୍ଚାର୍ କ୍ରୁକେ ହ୍ଟାଇଲା ଚେଲାମ୍ନ୍ ଗଟେତ୍ଇ ରୁଣ୍ତ୍ଲାଇ
(ମାଥି. ୧୪:୧୩,୧୪; ଲୁକ ୯:୧୦)
30ହ୍ଚେ ଯୀଶୁ ବାରଗ୍ଟ୍ ହ୍ଟାଇଲା ଚେଲାମ୍ନ୍ ଚାରିବାଟ୍ ହ୍ଣି ଆସି ଯୀଶୁର୍ ଲ୍ଗେ ରୁଣ୍ତ୍ଲାଇ, ଆରେକ୍ ସେମ୍ନ୍ ଯାଇରି ଯାଇରି କ୍ରିରିଲାଇ ଆର୍ ଯାଇରି ଯାଇରି ଶିକ୍ୟା ଦ୍ଇରିଲାଇ, ସେ ସ୍ବୁ ତାକେ ଜାଣାଇଲାଇ। 31ସେଡେବ୍ଳ୍ ଯୀଶୁ ଚେଲାମ୍ନ୍କେ କଇଲା, “ଆଶା ଅମିମ୍ନ୍ ବିନ୍ ଅଇ ଗଟେକ୍ ଶୁନ୍ସାନ୍ ଜାଗାଇ ଜୁମା ଆରେକ୍ ଚ୍ନେକ୍ ହୁଣ୍ଡୁମା।” କାଇତାକ୍ ବେସିଲକ୍ ତାକାର୍ ଲ୍ଗେ ଆଶା ଯା କ୍ର୍ତି ରିଲାଇ ସେତାର୍ଗିନେ ସେମ୍ନ୍କେ କାତାର୍ ହେଁ ସ୍ମୟ୍ ନ୍ଉତେରିଲି। 32ସେତାକ୍ ସେମ୍ନ୍ ଡଙ୍ଗାଇ ବ୍ସି ଗଟେକ୍ ଶୁନ୍ସାନ୍ ଜାଗାଇ ବାରିଗ୍ଲାଇ।
ହାଁଚ୍ଗଟ୍ ରୁଟି ଆର୍ ଜଳେକ୍ ମାଚ୍
(ମାଥି. ୧୪:୧୫-୨୧; ଲୁକ ୯:୧୧-୧୭; ଯୋହ. ୬:୧-୧୪)
33ମ୍ତର୍ ବେସିଲକ୍ ସେମ୍ନ୍କେ ବାରିଯାତାର୍ ଦ୍କ୍ଲାଇ ଆର୍ ସେମ୍ନ୍ କୁନ୍ତି ଗଲାଇନି ସେରି ଦ୍କ୍ଲାଇ ଆର୍ ଜାନ୍ଲାଇ, ଆରେକ୍ ଲକ୍ମ୍ନ୍ ସ୍ବୁ ଗଳି ଗନ୍ଦି ବାଟ୍ ଅଇ ହ୍ଳାଇ ଜାଇ ଯୀଶୁ ଆର୍ ଚେଲାମ୍ନ୍କାର୍ କେଟ୍ଲା ଆଗେ ସେତି ଜାଇ ସେମ୍ନ୍ କେଟ୍ଲାଇ। 34ଯୀଶୁ ଡଙ୍ଗାଇ ହ୍ଣି ତ୍ଳେ ଉତୁର୍ଲା ସେ ବେସି ଲକ୍ମ୍ନ୍କେ ଦ୍କି ସେମ୍ନ୍କାର୍ ଗିନେ ବିସାସ୍ କ୍ରି ଜୀବନ୍ ଦୁକାଇଲା, କାଇତାକ୍ ସେମ୍ନ୍ ଗ୍ଉଡିଆ ନ୍ରିଲା ମେଣ୍ଢା ହର୍ ରିଲାଇ। ଆରେକ୍ ଯୀଶୁ ସେମ୍ନ୍କେ ବେସି ଇଶ୍ଵରାର୍ ରାଇଜାର୍ କ୍ତା ଶିକ୍ୟା ଦେମ୍କେ ଲାଗ୍ଲା। 35ବେସି ସ୍ଞ୍ ଅଇଲାକ୍ ଯୀଶୁର୍ ଚେଲାମ୍ନ୍ ତାର୍ ଲ୍ଗେ ଆସି କଇଲାଇ, “ଇରି ଶୁନ୍ସାନ୍ ଚିମ୍ରା ଜାଗା, ଆରେକ୍ ବେସି ସ୍ଞ୍ ହେଁ ଅଇଲିନି। 36ଜ୍ନ୍କ୍ରି ଲକ୍ମ୍ନ୍ ଚାରିହାକାର୍ ଗାମ୍ ମ୍ନ୍କେ ଜାଇ ନିଜାର୍ ନିଜାର୍ ଗିନେ କାମ୍କେ କାଇହେଁ କାଦି ଗେନ୍ତି, ଇତାର୍ଗିନେ ସେମ୍ନ୍କେ ହ୍ଟାଇ ଦିଆସ୍।” 37ମ୍ତର୍ ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ସେମ୍ନ୍କେ କାଦି କାଳାଉଆ।” ସେମ୍ନ୍ ତାକେ କଇଲାଇ, “ଅମିମ୍ନ୍ କାଇରି ଆଟ୍ ମାସାର୍ ହାଜ୍ରି ଡାବୁ କ୍ର୍ଚ କ୍ରି ରୁଟି ଗେନି ଏମ୍ନ୍କେ କାଳାମ୍ଦେ?” 38ଯୀଶୁ ସେମ୍ନ୍କେ ହ୍ଚାର୍ଲା, “ତୁମାର୍ ଲ୍ଗେ କ୍ତିଗଟ୍ ରୁଟି ଆଚେ? ଯାଇକ୍ରି ଦ୍କା।” ସେମ୍ନ୍ ବୁଜି ଆସି ତାକେ କଇଲାଇ, “ହାଁଚ୍ଗଟ୍ ରୁଟି, ଆରେକ୍ ଜଳେକ୍ ମାଚ୍।” 39ସେଡେବ୍ଳ୍ ସ୍ବୁଲକ୍ ଜ୍ନ୍କ୍ରି ମ୍ନ୍ଦା ମ୍ନ୍ଦା ଅଇ କ୍ଉଁଣା ର୍ନ୍ ଉହ୍ରେ ବ୍ସ୍ତି, ସେତାର୍ଗିନେ ଯୀଶୁ ସେମ୍ନ୍କେ ଆଦେଶ୍ ଦିଲା। 40ତ୍ବେ ସେମ୍ନ୍ ମ୍ନ୍ଦା ମ୍ନ୍ଦା ଅଇ ଶଏ ଶଏ ଆର୍ ପଚାଷ୍ ପଚାଷ୍ ଲକ୍ ବ୍ସ୍ଲାଇ। 41ହ୍ଚେ ଯୀଶୁ ସେ ହାଁଚ୍ଗଟ୍ ରୁଟି ଆର୍ ଜଳେକ୍ ମାଚ୍ ନ୍ଇ ସ୍ର୍ଗ୍ ବାଟ୍ ଦ୍କିକ୍ରି ଇଶ୍ଵରାର୍ ଦନ୍ୟବାଦ୍ କ୍ଲା ଆର୍ ରୁଟି ଚିଡାଇ କ୍ରି ଲକ୍ମ୍ନ୍କେ ବାଟାକ୍ରିଦେମ୍କେ ଚେଲାମ୍ନ୍କେ ଦିଲା। ଆରେକ୍, ସେ ଜଳେକ୍ ମାଚ୍ ସେ ସ୍ବ୍କେ ବାଟା କିରି ଦିଲାଇ। 42ସେଡେବ୍ଳ୍ ସ୍ବୁଲକ୍ କାଇକ୍ରି ହେଟ୍ ହୁରାଇଲାଇ, 43ଆରେକ୍ ସେମ୍ନ୍ ଚିଡାଇଲା ରୁଟି ବାର ଡ୍ଲା ବ୍ର୍ତି କ୍ଲାଇ ଆର୍ ଉବୁର୍ଲା ମାଚ୍ ହେଁ କ୍ଣ୍ତେକ୍ କ୍ଣ୍ତେକ୍ ବେଟ୍ଲାଇ। 44ରୁଟି କାଇଲା ଲକ୍ମ୍ନ୍ ହାଁଚ୍ ହ୍ଜାର୍ ଅଣ୍ଡ୍ରାହିଲା ରିଲାଇ।
ଯୀଶୁ ହାଣି ଉହ୍ରେ ଇଣ୍ଡ୍ଲା
(ମାଥି. ୧୪:୨୨-୩୩; ଯୋହ. ୬:୧୫-୨୧)
45ସେମାଡେ ଯୀଶୁ ତାର୍ ଚେଲାମ୍ନ୍କେ ତାକାର୍ ଡଙ୍ଗାଇ ବ୍ସି ବେଥ୍ସାଇଦା ସ୍ହରାର୍ ସେହାଟିକେ ସେ କେଟ୍ତା ଆଗେ ଜ୍ମ୍କେ କଇଲା, ଆରେକ୍ ଯୀଶୁ ଇ ବିତ୍ରେ ଲକ୍ମ୍ନ୍କେ ତାକାର୍ ନିଜାର୍ ନିଜାର୍ ଗ୍ରେ ହ୍ଟାଇଲା। 46ସେମ୍ନ୍କେ ହ୍ଟାଇଲା ହ୍ଚେ ଯୀଶୁ ପାର୍ତେନା କ୍ରୁକେ ଡଙ୍ଗୁର୍ ଉହ୍ରେ ଗ୍ଲା। 47ସ୍ଞ୍ ଅଇଲା ହ୍ଚେ ଡଙ୍ଗା ଗାଲିଲୀ ଜିଲାର୍ ସ୍ମ୍ଦୁର୍ କ୍ଣ୍ଡିଏ ହ୍ଣି ଦୁରିକେ ରିଲି, ଆର୍ ଯୀଶୁ ସେ ଡଙ୍ଗୁର୍ ଲ୍ଗେ ଗଟେଲକ୍ ରିଲା। 48ଆଗ୍ହାକ୍ ହ୍ବନ୍ ଟେଲ୍ତି ରିଲି ଲାଗି ସେମ୍ନ୍କେ ଡଙ୍ଗା ହ୍ଉଁର୍ତାର୍ କ୍ଷ୍ଟ ଅଉତିରିଲି। ଇରି ଦ୍କି ଯୀଶୁ କୁକ୍ଳା ଡାକେ ସ୍ମ୍ଦୁର୍ ଉହ୍ରେ ଇଣ୍ତି ଇଣ୍ତି ସେମ୍ନ୍କାର୍ ଲ୍ଗେ ଗ୍ଲା, ଆର୍ ସେମ୍ନ୍କେ ହାକ୍ ମାରିକ୍ରି ଆଗେ ଇଣ୍ଡୁକେ ଆରମ୍ କ୍ଲା। 49ମ୍ତର୍ ଚେଲାମ୍ନ୍ ଯୀଶୁକେ ସ୍ମ୍ଦୁର୍ ଉହ୍ରେ ଇଣ୍ଡ୍ତାର୍ ଦ୍କି ବୁତ୍ ବ୍ଲି ବାବି ବେଲ୍କି ଅଇଲାଇ, 50କାଇତାକ୍ ସ୍ବୁ ଲକ୍ ତାକେଦ୍କି ଡିର୍ଲାଇ। ମ୍ତର୍ ଯୀଶୁ ସେମାଡେ ସେମ୍ନ୍କାର୍ ସ୍ଙ୍ଗ୍ କ୍ତାବାର୍ତା କ୍ରି ସେମ୍ନ୍କେ କଇଲା, “ସାସ୍ ଦ୍ରା, ଡିରାନାଇ। ଇରି ମୁଇ ଯୀଶୁ।” 51ଆରେକ୍, ଯୀଶୁ ସେମ୍ନ୍କାର୍ ଲ୍ଗେଯାଇ ଡଙ୍ଗାଇ ଚ୍ଗ୍ଲା, ଆର୍ ହ୍ବନ୍ ତିର୍ ଅଇଲି। ସେଡେବ୍ଳ୍ ସେମ୍ନ୍ ମ୍ନେ ମ୍ନେ ଅଦିକ୍ କାବାଅଇଲାଇ, 52କାଇତାକ୍ ଆଗାର୍ ଦିନାର୍ ରୁଟି କାଳାଇଲା ଗଟ୍ଣାକେ ଦ୍କିକ୍ରି ହେଁ ସେମ୍ନ୍ ଯୀଶୁର୍ ଶ୍କ୍ତିକେ ଜାଣିନ୍ରିଲାଇ, କାଇତାକ୍ ସେମ୍ନ୍କାର୍ ବୁଦି ଗୁହି ଜାଇରିଲି।
ଗିନେସରତ୍ ସ୍ହରେ ଯୀଶୁ ରଗିମ୍ନ୍କେ ବ୍ଲ୍କ୍ଲା
(ମାଥି. ୧୪:୩୪-୩୬)
53ସେଡେବ୍ଳ୍ ଯୀଶୁ ଆର୍ ତାର୍ ଚେଲାମ୍ନ୍ ଡଙ୍ଗାଲ୍ଗେ ଗାଲିଲୀ ଜିଲାର୍ ସ୍ମ୍ଦୁର୍ ମ୍ଜିକେ ବୁଲିକ୍ରି ଗିନେସରତ୍ ସ୍ହର୍ ବାଟାର୍ କ୍ଣ୍ଡି ଲ୍ଗେ କେଟ୍ଲାଇ ଆର୍ ସେତି ସେମ୍ନ୍ ଡଙ୍ଗାକେ ବାନ୍ଦ୍ଲାଇ। 54ଆରେକ୍ ସେମ୍ନ୍ ଡଙ୍ଗାଇ ହ୍ଣି ଉତୁର୍ତି, ସେଡେବ୍ଳ୍ ଲକ୍ମ୍ନ୍ ସେମାଡେ ଯୀଶୁକେ ଚିନି, 55ଆରେକ୍ ସେମ୍ନ୍ ଯୀଶୁକେ ଦ୍କି ଚାରିବାଟାର୍ ସ୍ବୁ ଗାମ୍କେ ଦ୍ବୁଳ୍ଲାଇ, ଆର୍ ସେ ଜୁଇ ଜୁଇ ଜାଗାଇ ଆତ୍ତି ବ୍ଲି ଶୁଣ୍ଲାଇ, ସେ ସେ ଜାଗାକେ ରଗି ଲକ୍ମ୍ନ୍କେ ଟାଟି ଲ୍ଗେ ବଇ ଆଣୁକେ ଲାଗ୍ଲାଇ। 56ଆରେକ୍, ଯୀଶୁ ଜୁଇ ଜୁଇ ଗାମେ, ସ୍ହର୍ ଆର୍ ସାନ୍ ସାନ୍ ଗାମେ ହୁର୍ଲାଇ, ଲକ୍ ସେ ସ୍ବୁ ବାଟାର୍ ଆଟ୍ ବ୍ଜାରେ ରଗିମ୍ନ୍କେ ଆଣି ସ୍ଳାଇଲାଇ, ସେମ୍ନ୍ ଜ୍ନ୍କ୍ରି ଯୀଶୁର୍ ହ୍ଚିଆର୍ ଆଚଡ୍କେ ଚୁଉତି, ଇରି ତାକେ ଗ୍ୱାରୁକେ ଲାଗ୍ଲାଇ। ଆରେକ୍ ଜ୍ତେକ୍ ଲକ୍ ତାକ୍ ଚୁଇଲାଇ, ସ୍ବୁଲକ୍ ଉଦାର୍ ଅଇଲାଇ।
Currently Selected:
ମାର୍କ 6: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
