प्रेरित 10
10
कुरनेलियुस ओ दर्शन
1केसरिया शहर कुरनेलियुस मिंदंङ इच्च़ा मीह तोहई, अंऊ इतालियानी मिंदंङ पलटनो सुबेदार तोहई। 2दुह परमेश्वरो अराधक तोहई, दंङ गरीब यहुदी मीहतिंङ महसे दान रंड्राते, दंङ हर टेम परमेश्वरारंङ साते प्रार्थना लहज़ाते। 3दोई इच्च़ा ध्याड़ा निहरो लगभग तीन बजे साफ खांई कि परमेश्वरो इच्च़ा स्वर्गदूत ए दोऊ कछंङ अंज़े कुई, “हे कुरनेलियुस।” 4कुरनेलियुस ए स्वर्गदूतो हखा ध्याना रंङ साते खांई दंङ बेवा ते कुई, “हे मालिका छि शुह?” स्वर्गदूते जुबाब रेंई, कांह प्रार्थना ए कांह गरीबा तु थल्जी दान परमेश्वरो तुईज़ी पिचे इल्दोर। 5दंङ हेंतेग याफा शहर मीहरे च़रच़ा शमौन बि अंऊ दिबी पतरस कुट्रातोर, बुलाएतुंई। 6दुह शमौन, चम ओ व्यापार लहज़ा ओ दोर्तिंङ मेहमान तोह, अतु घरबार समुंद्रो मुखारिंङ तोह। 7छना ए दुह स्वर्गदूत अच़ि कुरनेलियुस रंङ साते गप्पा लहते अच़ा इलि, दंङ दोऊ झुह्ट परगर, दंङ अंऊ दोऊ कछंङ हाज़िर बंङज़ा शवातेर, दोतु बिचंङ च़ि इच्च़ा भक्त सेनिका बि बुलाएति अंऊ दोऊ एनोह सेवका तु बिचंङ ज़ि इच्च़ा तोहई, परमेश्वरो अराधक तोहई बुलाएती। 8दंङ दोई दोतिंङ भत्ते गप्पारे कंड्राते अंऊ स्वर्गदूते कुहते दंङ दोतु हखा कुई कि याफा शहरंङ इलांई दंङ पतरसा बि केसरिया अपिमी थल्जी कुई।
पतरस ओ दर्शन
9ऊई ध्याड़ारिंङ अंऊ मुक्का कुरनेलियुस ओ च़रसी दोरे षुमु गंङमी रे जोज़ा-जोज़ा लगभग नीरो टेमा रिंङ याफा शहरो कछंङ पिचे इलिर, दुह ए टेमा रिंङ पतरस प्रार्थना लहज़िमी थल्जी लंङदीङ इलि। 10दोबि योंहष लेहती दंङ छा बगत ज़े हिटी शुई, पर अंऊ मुक्का दोरे बगत बणाएठ्री लेहकी तोईरे दंङ दोई दर्शन खांई। 11दंङ दोई खांई कि सर्ग अलसा इलज़ा; दंङ इच्च़ा मोह्ड़े चादरो ठ्रोह चीज़, पिला कुंणीऊ दोरच़ी टोमषी धरतीऊ हखा तक्सी लेह्की तोह। 12अंऊर धरतीऊ भत्ते पाहठी दुह पि कोंज़ा रंङ साते ए दंङ घुष्टी रंड्रा जीवा रे ए दंङ सर्गो प्यारे तोईरे, अतु पाहठी मूसा ज़ि रांहषी कानूना रिंङ महस च़ेहसी तोह कि दोरे अशुद्ध ए अपवित्र तोतोर दंङ अंऊ दिह इस्राएलो मीहतिंङ ज़ेइमी दोरच़ी इंकार लहसी तोह। 13दंङ दोई झांह ठ्रोह सग रेड्रिरी, “हे पतरस खड़े शुह, दितिंङ सहच़ु दंङ ज़ोऊ।” 14पर पतरस ए कुई, “माह प्रभु, अपेहल ला माह; छना कुचे गेह अपेहल ला अपवित्र ए अशुद्ध चीज़ ज़हसी माह।” 15दोथर अई फेरा दोई सग थाशिरी, कि परमेश्वरे कुट्रा कि अपेहल गेह कुट्रातग अंऊ दोबि गेह शुद्ध कुहतग दोबि यह्च़ा अशुद्ध थाह कुंई। 16षुमु फेरा ध्यांए शुई, दंङ दोहथरे दुह चादर सर्गो हखा रेंज़ा शिलिर।
कुरनेलियुस ओ चुंङ पतरस
17अंऊ मुक्का पतरस एनोह सेहमा रिंङ परेशान तोहई, कि दिह दर्शन ओ छि मतलब शुहबी तरपोतो, दोथर दोरे मीहरे अंऊ कुरनेलियुस ए च़रते, शमौन ओ घरबारो पता लगाएच़ा पेतंङो टोईच़ी पिचे इलिर, 18दंङ हाऊष रंड्रा रुहक्च़ीमी लेहतिर, “छि शमौन अतु मिन पतरस ला शुह, देर्तिंङ मेहमान तोहा?” 19पतरस अंऊ दुह दर्शन ओ टोईच़ी सोचेक्च़ी ए लेह्की तोहई, कि पवित्र आत्माज़ि दोरंङ कुई, “खंणु, षुमु मीहरे कनिंङ पेट्री लेहकी तोतोर। 20दिऊ थल्जी खड़े शुहचे योंखा इल, बेशक दोरे ऊई जाति शुहर पर छल्ले शक लेह मेह दोतु कछंङ अच़ा इल; छना कुचे गेह ए दोरे च़रसी शुगाह।” 21दंङ पतरस ए योंखा तक्सा दुह मीहतु हखा कुई, “खंणुई, अतिंङ केहरे पेट्री लेहकी तोतोंई, दुह गेह ए शुगाह, केहतु अपिमी छि बजह शुह?” 22दोच़ी कुईर, कुरनेलियुस सुबेदारे अंऊ धर्मी ए परमेश्वरो बेह्द चेहच़ा दंङ भत्ते यहुदी मीहतु बिचंङ दुह इच्च़ा इज्ज़तदार मीह तोह, दोई इच्च़ा पवित्र स्वर्गदूतो दोरच़ी दिह हुकुम खोकसिरी, कि कनिंङ एनोह घरबारंङ बुलाके कांह दोरच़ी शिक्षा रेड्रोंई। 23दंङ पतरसे ए दोतिंङ तोंखा बुलाके बंङज़िमी थल्जी ठहरि रेंई। दंङ ऊई रघ दुह दोतंङ साते इलि; दंङ याफा इलाका ओ बिशवासी न्वा तु बिचंङ च़ि रेह दोरंङ साते इलिर। 24झुह्ट ध्याड़ो थल दोरे केसरिया शहरंङ पिचे इलिर, दंङ कुरनेलियुस एनोह नातारे ए प्यारे मित्रारे ठ्रोहका लहज़ा दोतिंङ रुमज़ा तोहई। 25अंऊ मुक्का पतरस तोंखा अबि लेहकी तोहई, ता कुरनेलियुस दोरंङ साते दोईरी, दंङ दोऊ कोंज़ारिंङ दह्चे दोबि फ्यग लहरी। 26पर पतरस ए दुह खड़े लेह कुई, “खड़े शुह, गिह्बी फ्यग थालोहू छना कुचे गेह ला मीह ए शुगाह।” 27दंङ दोरंङ साते गप्पा लहज़ा तोंखा इलि, दंङ महसे मीहतिंङ ठ्रोहका खंड्रा 28पतरसे दोरंङ साते कुई, “केतिंङ पता तोह कि ऊईजाति ऊ संगति लहज़ी या दोतु दोर्तिंङ इबि ञेंहतु यहुदी मीहतु खिलाप तोह, पर परमेश्वरे गिह्बी कांहषी ततो कि अरिला मीहबी अपवित्र या अशुद्ध माह कोहग। 29दिऊ थल्जी अंऊ मुक्का गिह्बी बुलाएतिर ता छल्ले कुट्रा मेह अच़ा अतिगा। हेंतेग गेह रुहक्च़ा तोतग कि गिह्बी छि कमो थल्जी बुलाएक्तेनी?”
30कुरनेलियुस ए कुई, “पी ध्याड़ा तुई दिह ए टेमा रिंङ, गेह घेंङौ चुंङ नीरो लगभग तीन बजे प्रार्थना लहज़ी लेहकी तोईग; दोहथल अचानक इच्च़ा गंङमी छंङी खमज़ेर लेहच़ा, गिऊ तुईज़ी खड़े शुहचे इलि।” 31दंङ कुट्री लेहती, “हे कुरनेलियुस, परमेश्वरे कांह प्रार्थना रेड्री केहतो। दंङ दि ला खांई केहतो कि अंयों फेरा केई गरीब यहुदी मीहतिंङ दान रदेन। 32दिऊ थल्जी अतिया याफा शहरंङ च़रतु दंङ शमौन अतु मिन पतरस ला तोह बुलाएतु। दुह समुंद्रो मुखारिंङ शमौन, अंऊ च़मो व्यापार लहज़ा दोऊ चुंङ मेहमान तोह। अपेहल दुह अपतो, दंङ कनिंङ परमेश्वरो दोरच़ी इच्च़ा खबर रमतो। 33दोथर दोहपले गेह कांह कछंङ मीहरे च़रतिगा, दंङ केई रुठे लहतन कि अच्च़ा अतिन। दा हेनर भत्ते देर्तिंङ परमेश्वरो तुईज़ी तोतोन, कि छिला धिर परमेश्वरे करंङ साते कुहतो दुह रेड्रोंई।”
कुरनेलियुस ओ चुंङ पतरस ओ शिक्षा
34पतरस ए दोतंङ साते कुई, “दा गेह रुठे रंङ साते ञेंह केहतग कि परमेश्वर ए अतिंङ ला साते पक्षपात माह लहज़ा, 35बल्कि हर इच्च़ा जाति अच़ि परमेश्वरो बेह्द चेहच़ा दंङ धर्मो कम लहज़ा, परमेश्वर दोतिंङ ग्रहण लहज़ा।” 36केतिंङ दुह रूठे खबरो पाहठी पता तोह, अंऊ परमेश्वरे ञेंहतु थल्जी मतलब इस्राएल देशो मीहतिंङ रंदे। दोई शांति ऊ पाहठी रूठे खबर सुनाएती अंऊ मीहतिंङ यीशु मसीहू टोहकठे बिशवास लहज़िमी दोरच़ी खोकसी तरपोतो। दि मीह यीशु सिर्फ इस्राएली मीहतु प्रभु माह शुह पर दुह भत्ते मीहतु प्रभु शुह। 37केतिंङ दुह भत्ते कमो पाहठी पता तोह, अंऊ यहुदिया प्रदेशो महस ठहरि शुह्ते, अंऊ गलील प्रदेशंङ च़ि शुरू शुचि यूहन्ना ओ बपतिस्मा ए प्रचारो लहज़िमी थल कि मीहतिंङ पापो दोरच़ी सेहम किरच़ी ए बपतिस्मा लेहपच़ी ज़रूरी तोह। 38केतिंङ दि ला पता तोह परमेश्वरे छना ठ्रोह नासरत नगरो यीशु बि पवित्र आत्मा ए सामर्थ रंङ साते अभिषेक लहरी; दुह ठहरि-ठहरि इलजी हमेशा मीहतु थल्जी भलाईओ कम लहज़ाते, दंङ दोतिंङ आईन लहरी अंऊ दोरे शेतानो वहज़ा ज़ि तकलीफा रिंङ तोईरे, छना कुचे परमेश्वर दोरंङ साते तोहई। 39दंङ हेनर दुह भत्ते कमो गवाह शुई; अंऊ यीशु ज़ि यहूदिया ए भत्ते यरूशलेम शहरा रिंङ लहरिर, दंङ दुह ए यीशु बि यहुदी सेंहणा ज़ि दुह क्रूसो टोईच़ी सच़ी च़रतिर। 40पर दोबि परमेश्वरे षुमु ध्याड़ा थल सिमी दोरच़ी श्रींङे लेह च़रति दंङ मीहतु तुईज़ी प्रगट ला लहरी। 41भत्ते मीह ज़ि दुह माह खंईर बल्कि दुह गवाह तिंङ अतिंङ परमेश्वरे तुई ए अंङे च़रते। दुह गवाह ञेंहरे प्रेरित शुई। दोऊ सिमी दोरच़ी श्रींङमिमी थल ञेंहच़ी दोरंङ साते ज़ेईन ए तुंङरिन। 42दोहथल दोई ञेंतिंङ हुकुम रेंई कि भत्ते मीहतु बिचंङ प्रचार लांही दंङ गवाही रांई, कि यीशु दुह ए शुह अपि परमेश्वरे श्रींङे ए सिए दोतु न्याय लहज़ा ठहरासी ततो। 43दोऊ गवाही भत्ते भविष्यवक्तार रंड्रातोर कि अरिला दोऊ टोहकठे बिशवास लोहर, दोतिंङ यीशु ऊ मिन्दु दोरच़ी पापो माफी खोकसोतो।
ऊई जातितु टोईच़ी पवित्र आत्मा तक्सी
44पतरस दिह गप्पारे कुट्री ए लेह्की तोहई कि पवित्र आत्मा दुह भत्तेतु टोहकठे तक्सा अति, अंऊ दोऊ बचन रेड्री लेहकी तोईरे। 45दंङ अंयों ला यहुदी बिशवासी रे पतरस रंङ साते याफा शहरो दोरच़ी अंज़े तोईरे, दोरे भत्ते दि खांई हेरान शुहचे इलिर कि परमेश्वरे महसे रंङ साते पवित्र आत्मा ऊईजाति बि ला रांई। 46छना कुचे दोच़ी दोतिंङ पाहठी-पाहठी भाषा रिंङ कुट्री ए परमेश्वरो तारीफ लहज़ी रेड्रिर। दिरंङ पतरसे कुई, 47“दितिंङ परमेश्वरो दोरच़ी ञेंहतु ठ्रोह ए पवित्र आत्मा खोकसा इलज़ा, दंङ अच़िला दितिंङ ती ओ दोरच़ी बपतिस्मा रंड्रीमी दोरच़ी रोकेगी लेह मरपोतो।” 48दंङ पतरसे हुकुम रेंई कि अंऊ मीहरे कुरनेलियुसो चुंङ ठ्रोहका तोतोर, दोतिंङ यीशु मसीहू मिंदंङ बपतिस्मा रांई। दोथर दोच़ी पतरस रंङ साते बिनती लहरीर कि, ऊई थोड़े अरे ध्याड़ा ञेंतंङ साते बंङज़ु, दंङ झांह लेह दुह थोड़े ध्याड़ो थल्जी नहच़ा इलि।
Currently Selected:
प्रेरित 10: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
