प्रेरित 21
21
पोलुस ओ यरूशलेम शहरो हखा यात्रा
1इफिसुस ओ सेंहणा तिंङ अलविदा कुहच़ी थल अपेहल नावो सफर शुरू लोहनि, सीधा कोस टापू ओ हखा अतिनि, दंङ ऊईरग रूदुस टापू रिंङ, दंङ दोरच़ी पतरा टापू रिंङ पिचे इलिन। 2दंङ इच्च़ा समुंद्री जहाज़ फीनीके ऊ हखा इबिमी तंङरि, दंङ ञेंहच़ी दोऊ टोईच़ी हेंदु तुंखी यात्रा शुरू लहरिन। 3ञेंहतिंङ सुचंङ हासी ए साइप्रस द्वीप तंङरिर, ञेंहरे दोरच़ी जहाज़ंङ ज़ि सफर लहज़ा सीरिया प्रदेशो हखा इलिन दंङ सोर नगरा रिंङ पिचे इलिन; छना कुचे दोर्तिंङ सामान तकसिमी तोहई। 4दंङ देर ञेंहतिंङ रे विशवासी खोकसिरी दंङ दोतंङ साते निज़ा ध्याड़ा तचेक बंङज़िनि, दोरे पोलुस रंङ साते घड़ी-घड़ी यरूशलेम शहर ओ हखा मेबिमी थल्जी विनती लहज़ातेर, छना कुचे पवित्र आत्मा ज़ि प्रकट लाहते कि दोबि दोर्तिंङ मुसीबतो सामना लेह पढ़ेक्पोतो। 5अपेहल निह्ज ध्याड़ो थल ञेंहतु दोरच़ी इबिमी ध्याड़ा अति, दंङ ञेंहरे दोरच़ी अचा इलांई; दंङ भत्ते विशवासी साते ञेंहतिंङ दुह इलाको धह्कते पिचे च़रतिर; दंङ ञेंहच़ी मुखारिंङ पुष्टू भारे बंङज़ा प्रार्थना लहरिन, 6दोहथर इदि-ऊईदि रंङ साते दोरच़ी बिदा शुहचे, ञेंहरे समुंद्री जहाज़ो टोहकठे बंङज़ा इलांई, दंङ दोरे एनोह-एनोह चुंङ इलिर।
7सोर शहर दोरच़ी हुंच़िमी थल ञेंहरे पतुलिमयिस शहरंङ पिचे इलिन, अंऊर ञेंरे नावो दोरच़ी तक्सा, दंङ विशवास न्वा रे ञेंतिंङ नमस्कार लेह दंङ इच्च़ा ध्याड़ा दोतंङ साते बंङज़िनि। 8ऊईरग ध्याड़ा ञेंहरे दोरच़ी अच्च़ा केसरिया शहरंङ अति, दंङ फिलिप्पुस रूठे खबर ओ प्रचारको ओ चुंङ, दुह निह्ज गंङमी तु बिचंङ इच्च़ा तोहई अतिंङ यरूशलेमा रिंङ प्रेरिता ज़ि रंणी मेच़िमी तु देख-भालो थल्जी अंङषी ताहरेर। 9दोऊ पी कुंवारी मियो रे तोईरे, अंऊ भविष्यबाणी लहज़ा तोईर। 10अपेहल ञेंहरे दोहर महस ध्याड़ा बंङज़ा इलांई, ता अगबुस मिंदंङ इच्च़ा भविष्यवक्ता यहुदिया प्रदेशंङ ज़ि अति। 11दोई ञेंहतु कछंङ अंज़े पोलुस छ़िर रेंज़ा शिली, दंङ एनोह गुहड़ ए कोन्ज़ा छ़ुहचे कुई, “पवित्र आत्मा दिह कुट्रा, कि अंऊ मीहू दिह छ़िर शुह, दोबि यरूशलेमंङ यहुदी ज़ि झांह ठ्रोह छ़ुह्च़ी च़रपोर, दंङ ऊईजातितु गुह्ट्र रिंङ रेह च़रपोर।” 12अपेहल ञेंहच़ी दि गप्पा थाशातेंई, ता ञेंहच़ी ए दोहर कि मीहज़ी पोलुसा रंङ साते बिनती लहरिर, कि यरूशलेमो हखा थाह इलांई। 13पर पोलुसे जुबाब रेंई, केहच़ी छि लहज़ातंई, कि क्रप्चे-क्रप्चे गिऊ सेहम दुखी लहज़ातंई? गेह ता प्रभु यीशु मिन्दु थल्जी यरूशलेमंङ माह सिर्फ छुहसिमी थल्जी, पर सिमी ला तेयार तोतोग। 14अपेहल ञेंरे समझेगी इलेंई कि दोई एनोह फेंसला माह बदलेपोतो, दंङ ञेंहच़ी दि कुट्रिमी बंद लेह च़रतिन दंङ ञेंहच़ी कुईनि कि, “प्रभु ऊ हिटी पूरे शुहबी जूंस।”
15थोड़े ध्याड़ो थल ञेंहच़ी यरूशलेम शहरो हखा इबिमी तेयारी लहरिन। 16केसरिया शहरो थोड़े अरे विशवासी ञेंतंङ साते शामिल शुचि इलिर, दंङ ञेंतिंङ मनासोंन मिंदंङ इच्च़ा मीहू चुंङ रेंज़ा शिलिर, ताकि ञेंरे दोऊ चुंङ बंङज़ोंई। दुह साइप्रस टापू पक्का निवासी तोहई, दंङ भत्ते बे पुराना विशवासी तु बिचंङ ज़ि इच्च़ा तोहई।
यरूशलेम शहरंङ पोलुस ओ आगमन
17अपेहल ञेंहरे यरूशलेम शहरंङ पिचे इलिन, ता बिशवासी न्वाज़ि ञेंतंङ साते खुशी रंङ साते ञेंहतु स्वागत लहरिर। 18दोऊ ऊईरग पोलुस ञेंतिंङ रेंज़ा याकूबो कछंङ इलि, अंऊर भत्ते सेंहणा मीहरे ठ्रोहका तोईरे। 19दंङ पोलुसे दोतिंङ नमस्कार लेह, अंऊ-अंऊ कम परमेश्वरे दोऊ सेवाऊ दोरच़ी ऊईजाति मीहतु बिचंङ लहसी तते, इच्च़ा-इच्च़ा लेह भत्ते दोतिंङ कंङे च़रति। 20अपेहल दोच़ी दि रेड्रा दंङ दोच़ी परमेश्वरो तारीफ लहरिर, दोहपल पोलुसे कुई, हे न्वा, केतिंङ पता तोह, कि यहुदी मीहतु बिचंङ च़ि अंयों हज़ार मीहज़ी प्रभु यीशु टोईच़ी बिशवास लहज़ातोर, दंङ केहच़ी दि ला ञेंहच़ातंई कि दोरे भत्ते मूसा ओ कानूनो भाषे रूठे रंङ मनेक्च़िमी थल्जी महस पक्का तोतोर। 21दोच़ी कांह पाहठी दि रेड्री तातोर कि कांह ऊईजाति तु बिचंङ बंङज़ा यहुदी तिंङ दि शिक्षा रंड्रातन कि दोरे मूसा ओ कानूनो शिक्षा ब्याड़ा लेह च़रपोर; छना कुचे केई दोतंङ साते कुट्रातन, कि दोरे माह एनोह कटुतु खतना लोहर, दंङ माह ए पुराना रीति-रिवाज़ो पालन लोहर। 22दंङ छि लहज़ी जूंशी तोह? मीहतिंङ दि ज़रूर पता लेहकी योतो कि कांह देर्तिंङ अंज़े तोतोन। दिऊ थल्जी कनिंङ छा लेह लेहपोतो दि कि कंड्रीमी थल्जी कि अंऊ दोच़ी कांह पाहठी रैहषी ततो दुह हेले माह शुह। 23दिऊ थल्जी छि अंऊ गेह केतंङ साते कुट्रातग, दुह लोह। ञेंहतु दोर्तिंङ पी मीहरे तोतोर, दोच़ी सरा माह तुंङमिमी एनोह दुह मन्नत बि लगभग पुरा लेह चरच़ातोर अंऊ दोच़ी परमेश्वरो तुईज़ी लेहपसी तातेर। 24कांह दोतंङ साते इला, शुद्ध शुहबिमी बिधि पुरा लोह, दंङ दोतु मुंडन ओ खर्च उठातु। दोथर भत्ते तिंङ दिह पता लेहकी योतो कि अंऊ गप्पा दोच़ी कांह पाहठी सिखाएसी ताहरेर, दुह हप्सी शुह, कि कांह केने ला मूसा ओ कानूनो पालन लहज़ातन। 25पर दुह ऊईजाति मीहतु पाहठी अच़ि विशवास लाहतेर, ञेंहच़ी दीह फेंसला लेह च़ेऐ च़रतिन, कि अंऊ यहुदी कानूनो दोतिंङ भाषे लहज़ी ज़रूरी तोह। ञेंहच़ी दि चेई दि फेंसला चरच़ातंई दुह बगत थाह ज़ंई अंऊ मूर्तिरिंङ चढ़ाएसी शुह दंङ टटू झुचीऊ शाहओ दोरच़ी ए कुकमो दोरच़ी शताह बंङज़ुंई। 26झांह लेह पोलुसे दोतु दोरच़ी रूहक्च़ी कमो थल्जी सहमत शुचि इलि, दंङ ऊईरग दोई पी मीहतिंङ शिलज़ी कानूनो हिसाबे साते ए एनाबि ला शुद्ध लहरी, दोऊ थल पोलुस ए दोरंङ साते दोरे पि मीहरे ला यहुदी मंदिरो ल्वाड़ी ला इलि दंङ यहुदी पुरोहित ओ हखा कुई कि दुह अंऊ ध्याड़ा रिंङ कानूनो हिसाबे एनाबि शुद्ध लोहर दंङ अपेहल दोरे हर इच्च़ा ओ थल्जी बलि चढ़ाएपोर ए एनोह पुंज़ा टुमटुम लोहर।
यहुदी मंदिरंङ पोलुसो गिरफ्तारी
27अपेहल दुह निज़ा ध्याड़ा पूरे शुहबिमी तोहई, ता आसिया प्रदेशो यहुदी मीह ज़ि पोलुसा बि यहुदी मंदिरो ल्वाड़िङ खंड्रा ते भत्ते मीहतिंङ बेहकाएति, दोथर पोलुस बि च़ुमने च़रतिर, दंङ हाऊषेपि लेहतिर, 28हे इस्राएल मीहरे, “ञेंहतु मदत लंहि, दि दुह मीह शुह अंऊ इस्राएलो मीहरे ए मूसाओ कानूनो भाषे ए दि मंदिरो पाहठी, भत्ते गंङमी तिंङ सिखाएति कि दि भत्ते मदम तोह। दंङ हेंतेग दुह दि यहुदी मंदिरो ल्वाड़ी ऊई जाति मीहतिंङ हंजे दि पवित्र ठहरि बि अपवित्र लहज़ी लेहकी तोह।” 29दोच़ी झांह दिऊ थल्जी कुईर, छना कुचे दोच़ी इफिसियों शहरो वासी त्रुफिमुसा बि पोलुस रंङ साते इलाकंङ खंणीर, दंङ दोच़ी दी चेहतिर कि पोलुस दोबि यहुदी मंदिरो ल्वाड़ी रेंज़ा इलि। 30दोऊ थल भत्ते शहरारिंङ हल्ला शुहचे इलि, दंङ मीहरे ज़रका रें ठ्रोहका शुचि इलिर दंङ पोलुसा बि च़ुमने यहुदी मंदिरो ल्वाङि#21:30 मंदिरो ल्वाड़ी तोंखा ऊई जातिओ मीहरे इबि माह तोहई अंऊर सिर्फ यहुदी मीहरे इबि तंङफातेर। पोलुसो टोईच़ी दि तोंखा इबिमी ठहरि इच्च़ा ऊई जातिओ मीह शिल्ज़िमी अरोप तोहई। दोच़ी तोंखा इबिमी ठहरि बंद लेह च़रतिर।ज़ि षोहकी धकतेखा हतिर, दंङ ध्वांए मोह्ड़े पेतंङ बंद लेह च़रतिर। 31अपेहल दोरे दोबि सच़िमी ताहरेर, दंङ रोमी सेनिकातु सरदार बि खबर पिचे इलि कि यरूशलेम शहरंङ महस मीहरे हल्ला लहज़ी लेहकी तोतोर। 32दोऊ थल दोई सुबेदारे ए सेनिका तिंङ बुलाके च़रति दंङ मंदिरो पोड़ीओ दोरच़ी ज़रका रें तकसिरी दंङ मंदिरो ल्वाड़ी रिंङ मीहतु भीड़ो हखा ज़रका रेंई, दंङ मीहतु भीड़ ए रोमी सरकारो सुबेदार सेनिकरे खंड्रा पोलुस बि घाह केट्री बंद लहरिर। 33दंङ सेनिकातु सरदारे पोलुस ओ कछंङ अंज़े दुह च़ुमने च़रतिर; दंङ झुह्ट षंङणी रंङ साते छ़ुह्च़ी मीहरे रुहक्च़ी लेहती, दीह अरी शुह, दंङ दीह छी लह्सी ततो? 34पर भीड़ो दोरच़ी रेज़ि ऊई जुबाब रंड्री लेहतिरे दंङ अपेहल हल्ला रिंङ दोबि ठीक सच्चाई पता माह लेहती, ता दोबि बेड़ो ओ हखा शिल्ज़िमी हुकुम रेंई। 35अपेहल दुह ऊईजाति ल्वाड़ी ज़ि बेड़ा तचेक इबिमी पौड़ी ऊ कछंङ पिचे इलि, दंङ झांह शुई कि भीड़ो बहज़ाज़ि सैनिका तिंङ दोबि कुरच़े शिलज़ी लेहती। 36छना कुचे मीहतु भीड़ दीह हाऊष रंड्रा दोऊ थल अतिर, “कि दोबि सचे च़रतुंई।”
37अपेहल सेनिकरे पोलुस बि किला ओ हखा शिलज़ी लेहकी तोईरे, ता दोई रोमी सेनिकातु सरदारो हखा कुंई, “छि गिह्बी आज्ञा तोह आ कि गेह करंङ साते छा कोहग?” सेनिकातु सरदारे रुहक्ति, छि कनिंङ यूनानी भाषा अपा आ? 38छि कांह दुह मिस्त्र देशो माह शुनाह, अंऊ दीह ध्याड़ो बे तुई सरदारो खिलाप विद्रोह लहतेन, दंङ पी हज़ार कटारबन्ध मीहतिंङ जंगलंङ रेंज़ा शिलजि? 39पोलुसे जुबाब रेंई, माह गेह ता यहुदी मीह शुगाह, गेह किलिकिया प्रदेशो इच्च़ा महस खास तरसुस शहरो निवासी शुगाह। दंङ गेह करंङ साते बिनती लहज़ातग, कि गिह्बी मीहतंङ साते गप्पा लेह रोंऊ। 40अपेहल दोरे शांत शुचि इलिर, दंङ दुह यहुदी मीहतु भाषा रिंङ कुट्री लेहती दंङ पोलुस पोड़ी ऊ टोईच़ी खड़े शुहचे मीहतु हखा गुह्ड़े इशारा लहरी। अपेहल दोरे चुपे शुहचे इलिर।
Currently Selected:
प्रेरित 21: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
