यहून्नो 6

ङा हज़ार मीहतिंङ खिलाच़ी

(मत्ती 14:13-21; मरकु 6:30-44; लूको 9:10-17)

1थोड़े टेमो थल यीशु गलील झीलो मतलब तिबिरियास झीलो नुरेच़ि इलि। 2दंङ इच्च़ा मोह्ड़े भीड़ दोऊ थले शुहचे इलि छना कुचे अंऊ हेरान लहज़िमी कम दोई टेहची दोतु टोईच़ी लहज़ाते दोच़ी दुह खंड्रातेर। 3दोऊ थल यीशु गोह टोईच़ी इलजे एनोह चेला तंङ साते दोर्तिंङ बंङज़िरी। 4दंङ यहुदी मीहतु फसह ओ त्यार पिचे अंज़े तोहई।

5दंङ यीशु ज़ि इच्च़ा मोह्ड़े भीड़ एनोह हखा अपि तंङरी, दंङ फिलिप्पुस ओ हखा रुहक्ती, “दिह भत्ते तिंङ खिलाएच़िमी थल्जी बगत अंऊरच़ि हपोंई?” 6पर यीशु ज़ि दिह गप्पा दोबि परखेक्च़िमी थल्जी कुंई; छना कुचे दोई ऐनाहे ञेंहच़ाते कि दोई छि लोहतो। 7फिलिप्पुस ए दोबि जुबाब रेंई, “झुह्ट राह मुलतु टंगा ओ रोटी ला (झुह्ट राह मुलतु टंगा ओ मतलब-झुह्ट राह ध्याड़ाओ ध्याड़ी ऊ बराबर) दोतु थल्जी पुरा माह शोतो कि दोतु बिचंङ च़ि हर इच्च़ा बि थोड़े-थोड़े अरे खोकसा योतो।” 8यीशु ऊ चेला तु बिचंङ च़ि शमौन पतरस ओ न्वा अन्द्रियास ए दोरंङ साते कुंई, 9“देर्तिंङ इच्च़ा गंङकटु तोह अच़ि ज़तो ङा रोटी ए झुह्ट मह्छ़ ततो, पर धोंण दिरंङ साते दितु छि शोतो।”

10यीशु ज़ि कुंई, “मीहतिंङ षोड़िंङ बंङज़िमी थल्जी कुंईन।” दुह ठाहरीरिंङ महसे श्रांङ तोहई। दंङ मीहरे षोड़िंङ बंङज़ा इलिर अंऊर गंङ मीहतु संख्या लगभग ङा हज़ार तोहई। 11दंङ यीशु ज़ि रोटी लेहप्ती, दंङ परमेश्वरो धन्यवाद लेह अंऊ मीहरे दोर्तिंङ बंङज़ा तोईरे दोतु बिचंङ फाए च़रति; दंङ ध्वांए मह्छ़ अंयों दोच़ी जुन्ज़ातेर फाए च़रति। 12छना दोरे ज़ेह कहशी इलिर, ता यीशु ज़ि एनोह चेला तु हखा कुंई, “नव्शी खंणीर सोटेकी च़रतुंई, कि छले छंङसी माह जूंस।” 13झांह लेह दोच़ी ठ्रोहका लहरिर, दंङ ज़तो ङा रोटी तु खंणी अंऊ ज़जातु दोरच़ी बचेके इली, दोरच़ी सनी टोकरी पिंङषा। 14दंङ अंऊ हेरानी ऊ कम दोई लहते दुह खांई ते मीहरेर कुट्री लेहतिर; कि “दुह भविष्यवक्ता अरी संसारा रिंङ अपि तोहई पक्‍का दिह ए शुह।” 15यीशु दिह ञेंहच़ा कि दोरे दोबि ज़बरदस्ती राजा बणाएट्रिमी थल्जी शिल्ज़ी ततोर, ता दुह यच़ाह गोहू टोहकठे इच्च़ा अच़ा इलि।

यीशु तिऊ टोईच़ी जोई

(मत्ती 14:22-33; मरकु 6:45-52)

16दोऊ थल अपेहल ञोंकल शुई, ता यीशु ऊ चेलार गलील झीलो मुखंङ इलिर, 17दंङ किशतीऊ टोहकठे बंङज़ा झीलो नुरेच़ि कफरनहूम शहरो हखा इबि लेहतिर। दुह मुका हंयार शुहचे इलजी तोहई, दंङ यीशु हेंतेग तचेक दोतु कछंङ अंज़े माह तोहई। 18दंङ तेज लहनो बजह च़ि झीलारिंङ छ्वली खेका शुबी लेहती। 19अपेहल दोरे सूले-सूले लगभग पांच छह किलो मीटर तुंखा शुहचे इलिर, ता दोच़ी यीशु बि झीलो टोहकठे जोई ए दंङ किशतीऊ कछंङ अपि तंङातोर, दंङ दोरे बेवा इलिर। 20पर यीशु ज़ि दोतंङ साते कुहतो, “गेह शुगाह; बेंईन था।” 21दंङ चेलार यीशु बि किशतीऊ टोहकठे बेठाएच़िमी थल्जी तेयार शुईरे दंङ दोथरे दुह किशती दुहए ठहरि रिंङ पिचे इलि अंऊर दोरे इपि लेहकी तोईरे।

मीहतु यीशु बि पेट्री

22ओई रग दुह भीड़ो मीहच़ी अंऊ गलील झीलो नुरेच़ि तोईरे, दिह खंईर कि दोर्तिंङ सिर्फ इच्च़ा कवचि किशती तोहई, दंङ यीशु एनोह चेला तंङ साते माह इलि सिर्फ दोऊ चेलार ए नुरेच़ि इल्देर। 23दोथर तिबेरियास शहरो दोरच़ी ऊई किशतीर अतिर, अंऊर प्रभु ज़ि मीहतु मोह्ड़े भीड़ बि बगत रंदे। 24अपेहल मीहज़ी खंईर कि देर्तिंङ माह यीशु तोह माह दोऊ चेलारे, दंङ दोरे ला कवचि-कवचि किशती रिंङ बंङज़ा यीशु बि पेट्रा ते कफरनहूम शहरंङ पिचातेर।

यीशु जीवनो रोटी

25दंङ झीलो नुरे दुह मीहरे यीशु रंङ साते दोईरे दंङ दुह रुक्तिर, “हे गुरु, कांह देर्तिंङ अपेहल अन्देन?” 26यीशु ज़ि दोतिंङ जुबाब रेंई, “गेह केहतु हखा हेले कुट्रातग, केहरे गिह्बी दिऊ थल्जी माह पेट्रातोन कि केहच़ी हेरानी ऊ कम खंड्रातंई, पर दिऊ थल्जी कि केहरे रोटी ज़े कांहषी इल्दोन। 27दुह बगतो थल्जी मेहनत थाह लांही अंऊ नाशवान तोह पर दुह बगतो थल्जी लांही अंऊ अनंत जीवन तचेक बंङज़ा, मतलब गेह मीहू योह दिह बगत रमोग, छना कुचे पिता परमेश्वरे गिह्बी झांह लहज़िमी अधिकार रांहषी ततो।”

28दोच़ी यीशु हखा कुईर, “परमेश्वरो कम लहज़िमी थल्जी ञेंहच़ी छि लोहनी?” 29यीशु ज़ि दोतिंङ जुबाब रेंई, “परमेश्वरे जुंज़ातो कि केहरे दोऊ टोहकठे विशवास लांही अरी दोई च़रसी शुह।” 30दंङ दोच़ी यीशु हखा कुईर, “दंङ केई छि चिन्ह चमत्कार कंड्री तरपोन कि ञेंहरे दुह खांई कांह टोहकठे विशवास लोहन? दुह कम छि तोह? 31ञेंहतु बाह-मेमे ज़ि सुनसान ठहरि रिंङ मन्ना #6:31 मन्ना: दिह इच्च़ा इब्रानी शब्द शुह अतु मतलब शुह “दिह छि शुह” ज़तेर; छना पवित्र शास्त्रा रिंङ च़ेहसी तोह, ‘मुसा ज़ि दोतिंङ ज़ेइमी थल्जी स्वर्गंङच़ि रोटी रंदे।’ ”

32यीशु ज़ि दोतंङ साते कुंई, “गेह केतंङ साते हेले कुट्रातग कि मूसा ज़ि दुह रोटी केतिंङ स्वर्गंङ च़ि माह रोंऊ, पर गिऊ पिता परमेश्वर केतिंङ सच्चे रोटी स्वर्गंङच़ि रंड्रा। 33छना कुचे परमेश्वरो रोटी दुह ए शुह, अंऊ स्वर्गंङच़ि तक्सा संसारो मीहतिंङ जीवन रंड्रा।” 34दोथल दोच़ी यीशु हखा कुंई, “हे गुरु, दिह रोटी ञेंतिंङ रोज रमा लोहू।”

35यीशु ज़ि दोतंङ साते कुंई, “जीवनो रोटी गेह शुगाह; अंऊ गिऊ कछंङ अपा, दुह अपेहला योंई माह केषतो, दंङ अरी गिऊ टोहकठे विशवास लोहतो दुह अपेहला तीस्करे माह शोतो। 36पर गेह केतंङ साते तुई ए कुहतेग, कि केहच़ी गेह खांई चरच़ातनि तांला विशवास माह लहज़ातन। 37अंऊ धिर ला पिता परमेश्वरे गिह्बी रंड्रा दुह भत्ते धिर गिऊ कछंङ अपतो, दंङ अंऊला गिऊ कछंङ अपतो दोबि गेह अपेहल ला माह हुंपोग। 38छना कुचे गेह घेंङौ हिटी मशत पर गिह्बी च़रच़ा ओ हिटी पुरा लहज़िमी थल्जी स्वर्गंङ च़ि अंज़े शुगाह। 39दंङ गिह्बी च़रच़ा ओ हिटी दिह तोह कि अंऊ ला धिर दोई गिह्बी रांहषी ततो दोतु बिचंङ च़ि गेह छिला माह योंहपोग पर अंतिम ध्याड़ा रिंङ दुह यच़ाह श्रींङमी लोहग। 40छना कुचे गिऊ पिता परमेश्वरो हिटी दिह तोह, कि अच़िला गिह्बी खमोर, दंङ गिऊ टोहकठे विशवास लोहर, दोई अनंत जीवन खोक्पोतो; दंङ गेह अंतिम ध्याड़ा रिंङ यच़ाह षीङमी लोहग।”

41दोथल यहुदी सेंहणार कुड़कुड़ लहज़ी लेहतिर कि दोई कुहते, “अंऊ रोटी स्वर्गच़ि तक्सा, दुह गेह शुगाह।” 42दंङ दोरे कुट्री लेहतिर, “छि दिह यूसुफो योह यीशु माह शुहआ, अतु याह बाह बि ञेंहरे ञेंइन? ता दोई छिला कुट्रा कि गेह स्वर्गंङच़ि तक्सी शुगाह?”

43यीशु ज़ि दोतिंङ जुबाब रेंई, “केनातु बिचंङ कुड़कुड़ था लांही। 44अरीला गिऊ कछंङ दोहपल तचेक अपि मरच़ि अपेहल तचेक गिऊ पिता परमेश्वर अच़ि गिह्बी च़रसी शुह, दोबि गिऊ कछंङ माह हपतो; दंङ गेह दोबि अंतिम ध्याड़ारिंङ यह्च़ा श्रींङमी लोहग। 45भविष्यवक्तातु कताबंङ च़ेहसी तोह, ‘दोरे भत्तेर पिता परमेश्वरो दोरच़ी सिखाएच़ि शोर।’ अच़िला पिता परमेश्वरो दोरच़ी थासी ए सिखेसी तोतोर, दुह गिऊ कछंङ अपा। 46अच़िला पिता परमेश्वर तंङसी माह। गेह इच्च़ा तोतग अरी परमेश्वरो दोरच़ी अंज़े शुगाह, अच़ि दुह तंङतो। 47गेह केतंङ साते हेले कुट्रातग अच़िला गिऊ टोहकठे विशवास लज़तोर, अनंत जीवन दोतु शुह। 48जीवनो रोटी गेह शुगाह। 49केहतु बाह मेमेज़ि सुनसान ठहरि रिंङ मन्ना ज़हतेर दंङ सीए इलिर। 50दीह दुह रोटी शुह अंऊ स्वर्गंङ तक्सा कि मीहरे दोऊ दोरच़ी ज़ोअर दंङ माह सिओर। 51जीवनो रोटी अंऊ स्वर्गंङच़ि तक्सा, दुह गेह शुगाह। अगर अच़िया दिह रोटीऊ दोरच़ी ज़ोतो ता हमेशा श्रींङे बंङज़ोतो; दंङ अंऊ रोटी गेह रमोग, दुह गिऊ फुक शुह अंऊ गेह संसारो मीहतु जीवनो थल्जी बलिदान लोहग।”

52दिरंङ यहुदी मीहरे दिह कुट्रा एनातु बिचंङ झगड़ा लहज़ी लेहतिर, “दिह मीह छना एनोह फुक ज़ेइमी थल्जी रें तरपोतो?” 53यीशु ज़ि दोतंङ साते कुंई, “गेह केतंङ साते हेले कुट्रातग अपेहल तचेक केहच़ी गेह मीहू योह ओ फुक माह ज़ोऊनी दंङ गिऊ शुहई माह तुंङमोन, केनाह तिंङ जीवन माह। 54अच़ि गिऊ फुक ज़ोवा, दंङ गिऊ शुहई तुंङमा, अनंत जीवन दोऊ ए शुह, दंङ गेह न्याय ध्याड़ा रिंङ यच़ाह दोबि श्रींङमी लोहग। 55छना कुचे गिऊ फुक हेले ज़ेइमी चीज़ शुह, दंङ गिऊ शुहई हेले ए तुंङमिमी चीज़ शुह। 56अच़ि गिऊ फुक ज़ोवा, दंङ गिऊ शुहई तुंङमा, दुह पक्‍का ए गेरंङ साते तोह दंङ गेह दोरंङ साते। 57गिऊ पिता परमेश्वर अच़ि गेह च़रसी शुगाह, दोई जीवन रंड्री। छना ठ्रोह दोई गिह्बी जीवन रंदो, ध्वांए गेह ला दुह मीहबी जीवन रमोग अच़ि गिऊ फुक ज़ोतो। 58अंऊ रोटी स्वर्गंङच़ि तक्सा, बाह मेमेतु ठ्रोह मशत कि ज़ते दंङ सीए इलिर; अच़िला दिह रोटी ज़ोतो, दुह हमेशा श्रींङी बंङज़ोतो।” 59दिह गप्पा यीशु ज़ि कफरनहूम शहरंङ इच्च़ा यहुदी सभा घरबारंङ शिक्षा रंड्रा दोहपल ए कुहते।

अनंत जीवनो वचन

60दिऊ थल्जी यीशु ऊ चेला तु बिचंङ च़ि महसे ज़ि दिह रेड्राते कुईर, “दिह ता मुशकिल शिक्षा शुह; दिह अच़ि मनेक्च़ी तरपोतो?” 61यीशु ज़ि दिह ञेंह कि गिऊ चेलार दिह गप्पो टोहकठे कुड़कुड़ लहज़ातोर, दोतु हखा रुहक्ती, “छि दिह गप्पा केतिंङ गिऊ टोहकठे विशवास लहज़िमी दोरच़ी रोक्केच़ा आ? 62केहरे दोहपल छि लोहनी अपेहल केहच़ी गेह मीहू योह बि स्वर्गंङ इपि तंङमोन, अंऊर गेह तुई तोईग? 63आत्मा ता जीवन रड्रा शुह, शरीरो दोरच़ी छले फायदा माह। अंऊ गप्पा गेह केतंङ साते कुट्रातग दुह आत्मा शुह, दंङ जीवन ला शुह। 64पर केहतु बिचंङ अंयों झांह ठ्रोह तोतोर अच़ि गिऊ शिक्षा ओ टोहकठे विशवास माह लहज़ातोर।” छना कुचे यीशु ता तुई ए ञेंहच़ाते कि अरी विशवास माह लहज़ातोर, दुह अरी शुह; दंङ अच़ि गिह्बी च़ुमज़ि लोहतो। 65दंङ यीशु ज़ि कुंई, “दिऊ थल्जी गेह केतंङ साते कुहतेग कि अपेहल तचेक अतिया पिता परमेश्वरो दोरच़ी दिह वरदान माह रमोर दोहपल तचेक दुह गिऊ कछंङ अपि मरच़ि।”

पतरसो विशवास

66दिरंङ यीशु ऊ चेला तु बिचंङ महस चेलाज़ि दुह छोड़के केहरिर दंङ दोऊ थल दोरंङ साते माह जोज़ीर। 67दोथर यीशु ज़ि दोरे सनी चेला तु हखा कुंई, “छि केहरे ला अच़ा इबि तातंईयां?” 68शमौन पतरसे यीशु बि जुबाब रेंई, “हे प्रभु, ञेंहरे अतु कछंङ योंई? अनंत जीवनो गप्पा ता कांह ए कछंङ तोह। 69दंङ ञेंहच़ी विशवास लहतन ए ञेंहई च़रतन कि कांह परमेश्वरो दोरच़ी च़रसी पवित्र मीह मसीह शुनाह।” 70यीशु ज़ि दोतिंङ जुबाब रेंई, “छि गेह केहरे सनी तिंङ अंङषी माह शुगाह? तांला केहतु बिचंङ च़ि इच्च़ा शेतान तोह।” 71यीशु करियोतो वासी यहूदा ओ पाहठी कुट्री लेहकी तोहई अरी शमौन इस्करियोति ऊ योह तोहई, अरी सनी चेला तु बिचंङ च़ि इच्च़ा तोहई, दुह यीशु रंङ साते धोखा लहज़िमी तोहई।

Currently Selected:

यहून्नो 6: LBFNT

Highlight

Copy