मत्ती 22

ब्याहू धामो कथा

1यीशु यह्च़ा दोतंङ कथारिंङ कुट्री लेहती। 2“स्वर्गो राज दिह कथाऊ ठ्रोह तोह: इच्च़ा रज्ज़ाए एनोह योहऊ ब्याह लाह। 3दंङ एनोह सेवकातिंङ च़रच़ा कि धाम लहसी खास मीहतिंङ ब्याओ धाम रिंङ बुलाके हतांई पर दोरे माह अतिर।

4दंङ दोई एनोह सेवकातिंङ दिह कुह्चे च़रति, बुलासी लहसी मीहतंङ साते कुंई; खांई गेह महस रुठे बगत त्याहर लहसी तातग, ब्याहऊ धाम ज़ेई अतंई। 5पर दोरे गांणी माहकेह अच्च़ा इलिरे; रेह एनातु रीहऊ हखा, रेह एनातु बेईपारो हखा। 6ऊहई मीहच़ी अरी केहषा इल्जी तोईरे दोऊ कहम लहज़ार च़ुमने दोतु बेज़ती लेह दोरे सच्चे च़रतिरे। 7अपेहल रज्ज़ाज़ि दिह रेड्रातो दोबि रोहष अति दोई एनोह सेना चरच़े दुह हत्यारातु नाश लहरी, दंङ दोतु नगरारे रोह्चे केहरी।

8दंङ दोई एनोह परगरातिंङ कहम लहज़ातंङ कुहतो ब्याहऊ धाम त्याहर तोह पर अंजा दोरे दिऊ जोगे माहतोईरे। 9दिऊ थल्जी अमरिंङ अंयों लाह मीहरे केतिंङ खोकसोर, भत्तेतिंङ ब्याहऊ धामो थल्जी (बुलाके) शाहधेके हतांई। 10दोऊ परगर ज़ि अमरिंङ इलजे छि मांजी छि रूठे, अंयों खोकसिरे, भत्ते ठ्रोहका लेह लेहतिर; दिह ब्याहऊ घरबार प्राहऊणातंङ पिंङे इलि।

11अपेहल रज्ज़ा प्राहऊणारे खंड्री तोंखा अति ताह दोई दोहर इच्च़ा मीह तंङरी, अच़ि ब्याहऊ खमज़े लेहसी माहतरे। 12दोई दुह रूह्कातो हे मित्रा कांह खमज़ेर लेहके मेह देर छिले अन्दन? दोऊ मोद बन्द शुहचे इलि। 13दंङ रज्ज़ाज़ि परगरातिंङ कुहतो, दिऊ रहंङ कोंज़ारि छ़ुहचे धह्कते हंञारंङ केह केहई दोहर क्रपिए छ्वा रुहक्च़ी शोतो। 14छना कुचे बुलासी (शाहदेकसी) ताह महस तोतोर पर अंङषी थोड़े तोतोर।”

कैसरा बि कर रंड्री

15दंङ फरीसी मीहज़ी इलजे एनातु बिचंङ विचार लहरिरे कि दोबि छना गप्पारिंङ फसापोंई। 16दंङ दोच़ी एनातु चेलारि हेरोदेसा रंङ साते यीशु कछंङ दिह कुट्री चेहच़ातोर, “हे गुरु, ञेंहच़ी ञेंच़ातंई, कि केई सच्चे शुनाह दंङ परमेश्वर ओ अमो पाहठी सच्चाई रंङ साते कंड्रातन दंङ अतुला केई परवाह माह लोहतन, छना कुचे केई मीहतु मोद कंड्राते गप्पा माह लहज़ातन। 17दिऊ थल्जी ञेंतिंङ कंड्रु केई छि सोचेक्च़ातन? रोम देश ओ महाराजा बि कर रंड्री हेंदु कानूनो हिसाबे रुठे शुहतर मश्‌त।” 18यीशुज़ि दोतु कपटी गुण खंऐ कुहतो, “हे धोखेबाज़ारे गिह्बी छिले परखेकच़ातंई? 19कर रंड्रीमी सिक्का गिह्बी कंडूई।” दंङ दोरे दोऊ कछंङ इच्च़ा मुलतु टंगा रेंज़ा हतिरे। 20दोई दोतंङ रुहक्ती, “दिह छापा ए मिन अतु शुह?” 21दोच़ी यीशुबि कुह्तोर, “महाराजा” दंङ दोई दोतिंङ कुहतो, “अंऊ महाराजा शुह दुह महाराजा बि, दंङ अंऊ परमेश्वरो शुह दुह परमेश्वरा बि रोंऊ।” 22दिह थक्शे दोरे ठट् शुईरे, दंङ दुह केह्चे अच्च़ा इलिरे।

यह्च़ा श्रींङमी ए ब्याह

(मरकु 12:18-27; लूको 20:27-40)

23दुहए ध्याड़ा सदूकी मीहरे अच़ि कुट्रातोर कि सिऊ दोतु श्रींङमी तोद ए माह, दोऊ कछंङ अतिरे दंङ यीशुबि रुहक्च़ी लेह्तिरे। 24“हे गुरु, मूसा भविष्यवक्ताज़ि कुहते अगर अरीआ मीह कटुतु मुतंङ सीए इलि ताह, दंङ दोऊ न्वाज़ि दोऊ मेच़ारंङ ब्याह लेह एनोह न्वाऊ थल्जी खानदान बणेक्पोतो। 25दंङ ञेंहतु दोहर निहज़ी न्वा तोईरे भत्ते बे मोह्ड़े न्वाज़ि ब्याह लहज़ी पर दुह कटु मेह सीए इलि; दंङ कटुरे माहशुहबी रंङ एनोह मेच़मी एनोह न्वाबि केहच़ी केट्री। 26दंङ अई न्वाए दोई दुह मेच़मी रंङ साते ब्याह लहरी पर दुह ला कटु मेह सीए इलि। ध्वांए अई ऊई (तिसरे) न्वाए ला लेही दंङ दुह ला सी इलि। दंङ निंज़ो न्वाएज़ि दुह मेच़मी रंङ साते ब्याह लहरी दंङ दोरे भत्ते कटु मेह सी इलिर। दंङ भत्ते मुखंङ दुह थल दुह मेच़मी ला सीए इलि। 27दंङ हेंतेग केई कंड्रु अगर सीमी थल जीवन तोह ता, 28दुह मेच़मी दुह निज़ा न्वातु बिचंङ अतु मेच़ा शोतो? छना कुंई साते ता दुह भत्ते तु मेच़ा तोहई।”

29यीशुज़ि दोतिंङ जुबाब रेंई, “केहच़ी पवित्रशास्त्र ए परमेश्वरो सामर्थो माह ञेंहई; दिऊ थल्जी भुलेकारिंङ तोतोंई। 30छना कुचे श्रींङमी रंङ दोच़ी ब्याह माह लोहर माह ब्याहरि योर पर स्वर्गदूतातू ठ्रोह शोहर 31पर सीए दोतु खड़े श्रींङमिमी पाहठी केहच़ी मुसा ऊ कताबंङ, मेह लेहकी छ्वाक्तु कथारिंङ पढ़ेकी शुह आ कि परमेश्वरे दोरंङ साते कुतोह, 32गेह सेंहणा अब्राहमो परमेश्वर, इसहाको परमेश्वर, याकूबो परमेश्वर शुगाह? दुह मुका दोरे षुम ला सिए इलजी तोईरे। पर परमेश्वरो तुईज़ी दोरे अईता ला श्रींङी तोईरे। दोऊ थल्जी दोई झांह कुहतो, परमेश्वर सीए दोतु माह शुह पर श्रीङीतु परमेश्वर शुह।” 33दिह रेड्रीरंङ मीहरे दोऊ शिक्षा थाशे ठट् शुहचे इलिरे।

भत्ते बे मोह्ड़े आज्ञा

(मरकु 12:28-34)

34अपेहल फरीसी मीहज़ी थशातोर कि यीशुज़ि सदूकी मीहतु आह बन्द लेह केहतो दंङ दोरे ठ्रोहका शुईरे। 35दोतंङ बिचंङ इच्च़ा कानून सिखाएच़ा ए दोऊ छ़ोत लेहप्च़िमी थल्जी यीशुरंङ साते रुहक्ती। 36“हे गुरु, मूसाओ कानूना अंऊ संङ आज्ञा मोह्ड़े तोह?” 37यीशुज़ि दोतिंङ कुहतो, “केई परमेश्वर केनोह प्रभु रंङ केनोह भत्ते सेहमे ए भत्ते प्राण (जाहने) केनोह भत्ते समझरंङ साते दाह तोह। 38मोह्ड़े ए खास आज्ञा ता दिह ए तोह। 39दोऊ ठ्रोह अई दिह तो कि, केई केनोह पड़ोसीतंङ केनोह ठ्रोह दाह तोह। 40दिह ए झुह्ट आज्ञा रे भत्ते कानून ए भविष्यवक्तातु आधार शुह।”

मसीह अतु योह शुह?

(मरकु 12:35-37; लूको 20:41-44)

41अपेहल फरीसीज़ि ठ्रोहका तोईरे, दंङ यीशुज़ि दोरे रूह्कातो, 42“मसीहू पाहठी केहच़ी छि सोचेक्च़ातंई? दुह अतु योह शुह?” दोच़ी दोबि कुह्तोर, “रज्ज़ा दाऊदो।” 43दोई दोरे रूहकातो, “दंङ दाऊद आत्मारिंङ शुहचे दोबि प्रभु छिले कुट्रा? 44प्रभुज़ि, गिऊ प्रभुरंङ कुट्रा गिऊ सुचंङ पले बंङज़ु अपेहल तचेक गेह कांह बेरीतिंङ कांह कोन्ज़ो पोयंङ लेह मकेग? 45भला अगर दाऊदे ए दोबि प्रभु कुट्रा दंङ दुह दोऊ योह छना शुई?” 46दोऊ जुबाबरिंङ अच़िला इच्च़ा लाह गप्पा कुट्री मरतिरे दोहथर बे अतिंङ ला यच़ाह दुह रुहक्च़िमी हिम्मत मा शुई।

Currently Selected:

मत्ती 22: LBFNT

Highlight

Copy