प्रेरित मन के काम 1
1
प्रस्तावना
1हे थियुफिलुस, मैहर आगू कर पुस्तक मे ओ सबेच गोएठ मन कर बिषय मे लिखे जेला यीशु हर शुरू ले करत अउ सिखात रहिस, 2ओ दिन तक ले जब ले यीशु हर ओ प्रेरित मन जेमन मन ला यीशु हर चुने रहिस, पवित्र आत्मा कर द्वारा हुकूम दे के उपर उठाल नी गईस। 3यीशु हर दुख उठाए कर बाद ढेरेच पक्का सबूत मन ले अपन आप ला ओमन मन के जीवित दिखईस, अउ चालीस दिन तक ले ओमन मन ला दिखाई देहत रहिस, अउ परमेश्वर के राएज कर गोएठ करत रहिस।
पवित्र आत्मा कर वादा
4अउ चेला मन ले भेटाए के ओमन मन ला हुकूम देहिस, “यरूशलेम शहर ला झिन छोड़ीहा, लेकिन दाऊ कर ओ वादा ला पूरा होए कर बाट जोहत रईहा, जेकर चर्चा तुमन मन मोर ले सुईन लेहे हा। 5काबर कि यूहन्ना हर त पानी ले बपतिस्मा देहत रहिस, लेकिन कुछ दिन कर बाद मे तुमन मन पवित्र आत्मा ले बपतिस्मा पईहा।” 6तले ओमन मन जुईट के यीशु ले पूछिन, “हे प्रभु, का तय एहिच समय इस्राएल के राएज ला फेर देबे?” 7यीशु हर ओमन मन ले कहिस, “ओ समय अउ काल मन ला जाने बर, जेला दाऊ हर अपन ही अधिकार मे रखिस है, तुमन मन कर बुता नी है। 8लेकिन जब पवित्र आत्मा तुमन पर आही त तुमन मन सामर्थ्य पईहा; अउ यरूशलेम शहर अउ सबेच यहूदिया परदेस अउ सामरिया नगर मे, अउ जगत कर आखरी तक ले मोर गवाह होईहा।”
यीशु मसीह कर स्वर्गारोहन
9एला कही के यीशु हर ओमन कर देखते देखत स्वर्ग मे उपर उठाए लेहल गईस, अउ बदरी हर ओला ओमन मन कर आएख ले लुकाए लेहिस। 10यीशु कर जात समय मे जब ओमन मन अकाश कती ला ताकत रहिन, त देखा, दुई लोग मन उज्जर कपरा पहिनल ओमन मन कर लिघे मे आए ठड़होईन हे। 11अउ ओमन मन ले कहिस, “हे गलील परदेस कर मैनसे मन, तुमन काबर ठड़होए के अकाश कती ला देखत हा? एहिच यीशु जेहर तुमन जग ले स्वर्ग मे उठाए लेहल गए रहिस, जे नियर तुमन मन ओला स्वर्ग मे जात देखे हवा ओहिच नियर यीशु हर फिर आही।”
सामूहिक प्रार्थना
12तब ओमन मन जैतून नाव कर पहार ले जेहर यरूशलेम शहर कर लिघे एक सब्त के दिन कर दुरी मे है, यरूशलेम शहर फिरिन। 13जब हुवा पहुचिन त ओ छत मे गईन, जिहा पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई कर बेटा याकूब, शमौन जेलोतेस अउ याकूब कर बेटा यहूदा रहत रहिन। 14ये सबेच अउ कई झन अउ महिला अउ यीशु कर दाई मरियम अउ ओकर भाई मन कर संग एक चित होए के प्रार्थना मे लगे रहिन।
एक नावा प्रेरित कर चुनाव
15अउ ओहिच दिन मन मे पतरस अउ ओकर भाई मन कर मांझा मे जेमन एक सौ बीस मैनसे के लगभग रहिन, ठड़होए के कहे लागिस। 16“हे भाई मन, जरूरेच रहिस कि पवित्रशास्त्र कर ओ लेख हर पूरा होए, जेला पवित्र आत्मा हर दाऊद कर मुंह ले यहूदा इस्कारियोती कर बिषय मे, जेहर यीशु ला धरवाए बाला मन कर मुखिया रहिस, आगू ले कहे रहिस। 17काबर कि ओहर त हमन मन मे गिनल गईस, अउ ये सेवकाई मे सहभागी होईस। 18(ओहर अधर्म कर कमाई ले एक खेत खरीदिस; अउ मूड़ के बल गिरिस, अउ ओकर पेट हर फईट गईस, अउ ओकर सबेच पोटा मन हिकेल गईस। 19ये गोएठ ला यरूशलेम शहर कर सबेच रहे बाला मन जाएन गईन, अउ हिया तक कि ओ खेत कर नाव ओमन मन कर भाषा मे ‘हकलदमा’ मने कि ‘लहू कर खेत’ पईड़ गईस)। 20काबर कि भजन संहिता मे लिखल आहे,
‘ओकर घर उजेड़ जाही,
अउ ओमे कोनो झिन बसे’
अउ ‘ओकर पद ला दूसर कोनो ले लेही।’
21एकरे बर जेतेक दिन तक प्रभु यीशु हर हमर संग मे आत-जात रहिस मने कि यूहन्ना कर बपतिस्मा ला ले के ओकर हमर जग ले उठाए जाए तक जे लोग मन बरोबर हमर संग मे रहिन, 22उचित है कि ओमे ले एक मैनसे हमर संग ओकर जी उठे कर गवाह होए जाए।” 23तब ओमन मन दुई झन मन ला खड़ा करिन, एक यूसुफ ला जेहर बरसब्बास कहलात रहिस, जेकर उप नाव यूस्तुस है, दूसर मत्तियाह ला, 24अउ ये प्रार्थना करिन, “हे प्रभु, तय जे सबेच कर मन ला जानथस, एला परगट कर कि ये दुयोच झन मे ले काके चुने हस, 25कि ओहर ये सेवकाई अउ प्रेरिताई कर पद ला लेही, जेला यहूदा हर छोएड़ के अपन जगहा रेंग देहिस है।” 26तब ओमन मन ओकर बर चिठ्ठी डालिन, अउ चिठ्ठी मत्तियाह कर नाव मे हिकलिस, तले ओहर ओ ग्यारह प्रेरित मन कर संग मे गिनल गईस।
Currently Selected:
प्रेरित मन के काम 1: SGJNT
Highlight
Share
Copy
Want to have your highlights saved across all your devices? Sign up or sign in
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
