प्रेरित मन के काम 6
6
सात सुनाव के सेवक मन कर चुनई
1ओ दिन मन मे जब चेला मन ढेरेच बड़हे लागिन, तब यूनानी भाषा बोले बाला मन इब्रानी मन पर कुड़कुड़ाए लागिन, कि रोज दिन कर सेवकाई मे हमर बिधवा मन कर सुईध नी लेहल जाथे। 2तब ओ बारह चेला मन कर मंडली ला अपन जग बुलाए के कहिस, “ये ठीक नी है कि हमन परमेश्वर कर बचन ला छोएड़ के खिलाए-पिलाए कर सेवा मे लगे रही।” 3एकरे बर, हे भाई मन अपन मे ले सात झन सुनाव लोग मन ला जेमन मन पवित्र आत्मा अउ बुईध ले भरल है, चुईन लेवा कि हमन ओमन मन ला ये बुता बर ठहराए देहब। 4“लेकिन हमन मन त प्रार्थना मे अउ बचन कर सेवा मे लगे रहब।” 5ये गोएठ सबेच मण्डली ला ठीक लागिस अउ ओहर स्तिफनुस नाव कर एक आदमी ला जेहर बिश्वास मे अउ पवित्र आत्मा ले भरल रहिस, अउ फिलिप्पुस, अउ प्रुखुरुस, अउ नीकानोर, तीमोन, अउ परमिनास, अउ अन्ताकिया वासी नीकुलाउस जेहर यहूदी मत मे ले आए रहिस, चुईन लेहिन। 6एमन मन ला प्रेरित मन कर आगू मे खड़ा करिन, अउ ओमन मन प्रार्थना कईर के ओमन मन के उपर मे हाथ रखिन।
7अउ परमेश्वर कर बचन हर बगरत गईस अउ यरूशलेम शहर मे चेला मन कर गिनती ढेरेच बड़हत गईस, अउ याजक मन कर एक बड़खा समाज हर ये मत ला माने बाला होए गईन।
स्तिफनुस कर गिरफ्तारी
8स्तिफनुस अनुग्रह अउ सामर्थ ले भईर के लोग मन मे बड़खा-बड़खा अदभुत बुता अउ चिन्हा दिखात रहिस। 9तब ओ अराधनालय मे ले जेहर लिबिरतीनो कहलात रहिस, अउ कुरेनी अउ सिकन्दरिया अउ किलिकिया अउ एसिया देश कर लोग मन ला कोनो एक झन हर उईठ के स्तिफनुस ले बाद-बिवाद करे लागिस। 10लेकिन ओ ज्ञान अउ ओ आत्मा कर जेकर ले ओहर गोठियात रहिस, ओमन मन हर सामना नी कईर सकिन। 11एमे ओमन मन कई लोग मन ला उकसईन जेमन मन कहे लागिन, “हमन मन एला मूसा अउ परमेश्वर कर बिरोध मे निन्दा कर गोएठ कहत सुने हन।” 12अउ लोग मन अउ पुरनिए अउ शास्त्री मन ला भड़काए के चईड़ अईन अउ ओला पकेड़ के महासभा मे ले अईन। 13अउ झूठ कर गवाह खड़ा करिन, जेमन मन कहिन, “ये आदमी हर पवित्र शास्त्र अउ ब्यवस्था कर बिरोध मे गोठियाए ले नी छोड़े। 14काबर कि हमन मन एला ये कहत सुने हन, कि एहिच यीशु नासरी हर ये जगहा ला गिराए देही, अउ ओ रीति मन ला बदेल देही जेला मूसा हर हमन मन ला देहिस है।” 15त सबेच लोग जेमन मन महासभा मे बईठे रहिन, ओकर कती ताक के ओकर मुह ला स्वर्गदूत कर जईसन देखिन।
Currently Selected:
प्रेरित मन के काम 6: SGJNT
Highlight
Share
Copy
Want to have your highlights saved across all your devices? Sign up or sign in
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
