मत्ती 27
27
पिलातुस कर आगू मे यीशु
(मरकुस 15:1; लूका 23:1-2; यूहन्ना 18:28-32; प्रेरित मन के काम 1:18-19)
1जब भिनसरहा होईस त सबेच प्रधान याजक मन ला अउ लोग मन कर पुरनिए हर यीशु ला माएर देहे कर सलाह करिन। 2ओमन मन यीशु ला बाएध देहिन अउ ले जाए के पिलातुस हाकिम कर हाथ मे दे देहिन।
यहूदा इस्करियोती कर आत्महत्या
3जब ओकर धरवाए बाला यहूदा हर देखिस कि यीशु हर दोषी ठहराल गईस है, त ओहर पछतईस अउ ओ तीस चांदी कर सिक्का ला प्रधान याजक अउ पुरनिए मन ठन फिर लानिस। 4अउ कहिस मैहर निर्दोष ला घात करे बर धरवाए कर पाप करे हो। ओमन मन कहिन, हमन का करी तए ही जान। 5त ओहर ओ सिक्का मन ला मन्दिर मे फेक के चईल देहिस, अउ जाए के अपन आप ला फासी देहिस।
6प्रधान याजक मन ओ सिक्का मन ला लेकर कहिस। एला भण्डार मे रखई उचित नी है, काबर कि एहर लहू कर दाम है। 7तले ओमन मन सलाह कईर के ओ सिक्का ला परदेसी मन कर मरल मन ला गाड़े जाए बर कुमहार कर खेत ला बेसाए लेहिन। 8एकर बर ओ खेत आएज ले लहू कर खेत कहलाथे। 9त जे बचन यिर्मयाह अगमजानी कर द्वारा कहे रहिस, ओहर पूरा होईस। ओमन हर वो तीस सिक्का मने कि ओ ठहराल, किमत ला जेला इस्राएल कर संतान मे ले केतेक हर ठहराए रहिन। 10अउ जेकस प्रभु हर मोला हुकूम देहिस, ओहिच कस कुमहार कर खेत कर किमत मे दे देहिन।
पिलातुस कर यीशु मसीह ले प्रश्न
(मरकुस 15:2-5; लूका 23:3-5; यूहन्ना 18:33-38)
11जब यीशु हर पिलातुस हाकिम कर आगू मे ठड़होए रहिस, त हाकिम हर ओला पुछिस, का तय यहूदी मन कर राजा हस यीशु हर ओला कहिस, तय हर अपन ही कहथस। 12जब प्रधान याजक अउ पुरनिए ओकर मे दोष लगात रहिन, त ओहर कुछ जवाब नी देहिस। 13एकर बर पिलातुस हाकिम हर यीशु ले कहिस, का तय नी सुनथस कि एमन हर तोर बिरोध मे केतेक गवाही देथे। 14लेकिन ओहर ओला एक गोएठ कर भी उत्तर नी देहिस, यहा ले कि पिलातुस हाकिम ला बड़ेच अचम्भा होईस।
यीशु मसीह ला छोड़े मे पिलातुस सफल नी होईस
(मरकुस 15:6-15; लूका 23:13-25; यूहन्ना 18:39-19:16)
15अउ पिलातुस हाकिम कर ये रीति रहिस, कि ओ तिवहार मे लोग मन बर कोनो एक बंदी ला, जेला ओमन हर चाहथे, छोएड़ देहत रहिस। 16ओ समय बरअब्बा नाव कर एक जानल-मानल बंदी रहिस। 17तले जब हुवा जमा होईन त पिलातुस हाकिम हर ओकर ले कहिस, तुमन कोन ला चाहथा कि मैहर तुमन बर छोएड़ देहू? बरअब्बा ला या यीशु ला जेहर मसीह कहलाथे? 18काबर कि ओहर जानत रहिस, कि ओमन मन हर यीशु ला डाह कईर के धरवाईन है। 19जब ओहर न्याय कर सिंहासन मे बईठल रहिस त ओकर घरदारिन हर ओला कहलाए भेजिस, तय ओ धर्मी कर बिषय मे हाथ झिन डालबे। काबर कि मैहर अझे सपना मे ओकर कारन ढेरेच दुख उठाए हो।
20प्रधान याजक अउ पुरनिए मन हर लोग मन ला उभारिन कि ओहर बरअब्बा ला माएंग लेहिन। अउ यीशु ला नाश कराए। 21हाकिम हर ओकर ले पुछिस, ये दोनो मे ले, कोन ला पतियाथा कि मैहर तुमन मन बर छोएड़ देहू? ओमन मन कहिन, बरअब्बा ला। 22पिलातुस हाकिम हर ओला पुछिस, फिर यीशु ला जेहर मसीह कहलाथे, का करो? सबेच झन मन ओला कहिन, ओला क्रूस मे चड़हाए दे। 23पिलातुस हाकिम हर कहिस, काबर यीशु हर का बुराई करिस है? लेकिन ओमन मन अउ भी किरलाए-किरलाए के कहिन, ओला क्रूस मे चड़हाए दे। 24जब पिलातुस हाकिम हर देखिस कि कुछूच बईन नी पड़थे, लेकिन एकर उलटा हुल्लड़ बड़हत गईस, त ओहर पानी ला ले के भीड़ के आगू मे अपन हाथ ला धोईस अउ कहिस, मैहर ये धर्मी कर लहू ले निर्दोष हो, तुमन ही जानिहा। 25सबेच लोग मन उत्तर देहिन, एकर लहू हमन मे अउ हमर संतान मे होही।
क्रूस पर चड़हाए बर देहई
26एकर कारन ओहर बरअब्बा ला ओमन मन बर छोएड़ देहिस अउ यीशु ला कोड़ा लगवाए बर दे देहिस, कि क्रूस मे चड़हाल जाए।
सिपाही मन कर द्वारा यीशु कर अपमान
(मरकुस 15:16-20; यूहन्ना 19:2-3)
27तब पिलातुस हाकिम कर सिपाही मन हर यीशु ला राजा कर महल मे ले जाए के सबेच सैनिक मन ओकर चाएरो कती जमा होईन। 28अउ ओकर कपरा ला उताएर के ओला लाल रंग कर बागा पहिरईन। 29अउ कंटा मन कर मुकूट गुईथ कर ओकर मूड़ मे रखिन अउ ओकर हाथ मे सरकण्डा देहिन अउ ओकर आगू घुटना टेक कर ओला ठठ्ठा मे उड़ईन अउ कहिन, “हे यहूदी मन कर राजा नमस्कार।” 30अउ यीशु पर थुकिन, अउ ओहिच सरकण्डा ला ले के ओकर मूड़ मे मारे लागिन। 31जब ओमन मन यीशु कर ठठ्ठा कईर दारिन त ओहर बागा ला ओकर मे ले उताएर कर फिर ओकरेच कपरा ला ओला पहिरईन, अउ क्रूस मे चड़हाए बर बाहर कती ले गईन।
यीशु कर क्रूस पर चड़हई
(मरकुस 15:21-32; लूका 23:26-39; यूहन्ना 19:17-19)
32बाहरी जात ओमन मन शमौन नाव कर एक कुरेनी आदमी मिलिस, ओमन मन ओला बेगार मे धरिन, कि यीशु कर क्रूस उठाए के ले चले। 33ओ जगहा मे पहुच के जेहर गुलगुता मने कि खोपड़ी कर जगहा कहलाथे, 34ओमन मन पित्त मिलाल, दाखरस ओला पीए बर देहिन, लेकिन यीशु हर चईख के पीए बर नी चाहिस। 35तब ओमन मन यीशु मसीह ला क्रूस मे चड़हईन, अउ चिठ्ठी डाएल के ओकर कपरा ला बाएट लेहिन। 36अउ हुवा बईठ के ओकर पहरा देहत रहिन। 37अउ यीशु कर दोष पत्र ला ओकर मूड़ कर उपरे लगईन, कि “एहर यहूदी मन कर राजा यीशु है।” 38तब यीशु कर संग मे दुई डाकू मन ला, एक जेवनी कती अउ एक डेरी कती, क्रूस मे चड़हाए देहिन। 39आए-जाए बाला मन मूड़ ला हिलाए-हिलाए के ओकर निन्दा करत रहिन। 40अउ ये कहत रहिन, “हे मन्दिर कर ढाए बाला अउ तीन रोज मे बनाए बाला, अपन आप ला तय बचाए ले। अगर तय परमेश्वर कर बेटा हस, त क्रूस मे ले उतेर आ।” 41एहिच रीति ले प्रधान याजक, शास्त्री अउ पुरनिए मन सहित ठठ्ठा कईर-कईर के कहत रहिन। 42एहर अउ झन ला बचईस, अउ अपन आप ला नी बचाए सकथे, एहर त इस्राएल कर राजा है, अझे क्रूस मे ले उतेर आही त हमन मन ओकर पर बिश्वास करब। 43ओहर परमेश्वर मे भरोसा रखिस। अगर ओहर एला पतियाथे त अझेच एला चड़हाए ले। काबर कि एहर कहे रहिस, मैहर परमेश्वर कर बेटा हो। 44एहिच कस डाकू मन भी जेमन मन ओकर संग क्रूस मे चड़हाल गए रहिन, ओकर निन्दा करत रहिन।
यीशु मसीह कर प्रान छोड़ई
(मरकुस 15:33-41; लूका 23:44-49; यूहन्ना 19:28-30)
45दुईपहर ले ले के तीसरा पहर तक ले ओ सबेच देश मे अन्धार छाए रहिस। 46तीसरा पहर कर लिघे यीशु हर बड़खा शब्द ले पुकारिस, अउ कहिस, “एली, एली, लमा शबक्तनी” मने कि “हे मोर परमेश्वर, हे मोर परमेश्वर, तय हर मोला काबर छोएड़ देहे?” 47जेमन मन हुवा ठड़होए रहिन, ओमन मन ले केतेक झन मन एला सुईन के कहिन, ओहर त एलिय्याह ला पुकारत है। 48ओमन मे ले एक झन हर तुरतेच, कुदिस, अउ सपंज ला ले के सिरका मे डुबईस, अउ सरकण्डा मे रईख के ओला चूसवाईस, 49अउ झन मन कहिन, रूक जावा, देखा एलिय्याह हर ओला बचाए बर आथे कि नही। 50तब यीशु हर फिर जोर से किरलाए के प्रान छोएड़ देहिस। 51अउ देखा मन्दिर कर परदा उपर ले खाल्हे तक फईट के दुई टुड़का होए गईस। अउ धरती, डोएल गईस अउ चट्टान मन तड़क गईन। 52अउ कबर मन हर खुईल गईस अउ सुतल पवित्र लोग मन कर ढेरेच मुरदा मन जी उठिन। 53अउ ओकर जी उठे कर पाछू ओहर कबर मे ले हिकेल के पवित्र नगर मे गईन, अउ ढेरेच झन मन ला दिखाई देहिस, 54तब सूबेदार अउ जेमन मन ओकर संग यीशु कर पहरा देहत रहिन, भूईडोल अउ जे कुछ होए रहिस, ओला देख के ढेरेच झन मन डईर गईन, अउ कहिन, “सचमुच एहर परमेश्वर कर बेटा रहिस।” 55हुआ ढेरेच औरत मन ला जेमन मन गलील परदेस मे ले यीशु कर सेवा करत रहिन ओकर संग अईन, दुरिहा ले एला देखत रहिन। 56ओमन मे ले, मरियम मगदलीनी, अउ याकूब अउ योसेस कर दाई मरियम, अउ जब्दी कर बेटा मन कर दाई रहिस।
यीशु कर दफनई
(मरकुस 15:42-47; लूका 23:50-56; यूहन्ना 19:38-42)
57जब सांझ होईस त यूसुफ नाव कर अरिमतियाह कर एक धनी आदमी, जेहर अपन ही यीशु कर चेला रहिस, अईस। 58ओहर पिलातुस कर लिघे जाए के यीशु कर लाश ला मांगिस। एकर मे पिलातुस हर दे देहे कर हुकूम देहिस। 59यूसुफ हर लाश ला लेहिस, अउ ओला उज्जर चादर मे लपेटिस, 60अउ ओला अपन नावा कबर मे रखिस, जेहर ओ चट्टान मे खोदवाए रहिस। अउ कबर कर दूरा मे बड़खा पखना ला लुड़काए के चईल देहिन। 61अउ मरियम मगदलीनी अउ दूसर मरियम हुवा कबर कर आगू मे बईठे रहिन।
यीशु कर कबर पर पहिरा
62दूसर रोज जेहर तियारी कर रोज कर आगू के रोज रहिस, प्रधान याजक मन अउ फरीसी मन हर पिलातुस कर लिघे जुईट के कहिन, 63“हे महाराज, हमन ला याद है कि ओ भरमाए बाला हर जे घनी ओहर जिन्दा रहिस, त कहे रहिस, मैहर तीन रोज कर बाद मे जी उठहू।” 64तले हुकूम दे कि तीसरा रोज तक ले कबर कर रखबाली करल जाए, एकस झिन होए कि ओकर चेला मन आए के ओला चोराए ले जाही, अउ मैनसे मन ला कहे लागही, ओहर मरल मे ले जी उठिस है। त पीछू कर धोखा पहिला ले भी बुरा होही। 65पिलातुस हाकिम हर ओमन ले कहिस, तुमन जग पहरूवा मन त है, जावा अपन समझ कर अनुसार ओकर रखबाली करा। 66तले ओमन मन हर पहरूवा मन ला संग मे ले के गईन अउ पखना मे मोहर लगाए के रखबाली करिन।
Currently Selected:
मत्ती 27: SGJNT
Highlight
Share
Copy
Want to have your highlights saved across all your devices? Sign up or sign in
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
