मत्ती 10
10
बारह प्रेरित
(मरकुस 3:13-19; लूका 6:12-16)
1फिरौंकी ईसु अपने बारह चेलन कै झोने बुलाएकै, उनकै असुद्ध आत्मा कै बाहर निकारन और सब बिमारिन कै ठीक करन को अधिकार दई। 2जे बारह प्रेरितन के नाओं हैं: पहलो सिमौन, जो पतरस कहो जाथै, और बाको भईय्या अन्द्रियास; जब्दी को लौड़ा याकूब और बाको भईय्या यूहन्ना; 3फिलिप्पुस, बरतुल्मै, थोमा, और लगान लेन बारो मत्ती, हलफई को लौड़ा याकूब और तद्दै। 4सिमौन कनानी, और यहूदा इस्करियोती, जो ईसु कै पकड़बाई रहै।
बारह चेलन कै आग्या देनो
(मरकुस 6:7-13; लूका 9:1-6)
5जे बारहन कै ईसु जौ निर्देस दैकै भेजी, “कोई भी गैर यहूदि के इलाका या कोई सामरी सहर मैं मत जाबौ। 6बल्कि इस्राएल के परिवार की खोई भइ भेंड़न के झोने जाबौ। 7और नेंगत-नेंगत प्रचार करकै कहबौ कि ‘स्वर्ग को राज्य झोने आए गौ है!’ 8बिमारन कै अच्छो करौ; मरे भैन कै जिंदो करौ, कोहोढ़ बारेन कै सुद्ध करौ, प्रेत आत्मा कै निकारौ, तुम सेंत-मेंत मैं पाए हौ, बिना कुछ लिये मुफ्त मैं बाँटो। 9अपने बटुआ मैं ना तौ सोनो, चाँदी, और न तांबा के सिक्का कमरबंद मैं रखियो। 10रस्ता के ताहीं ना झोला, ना दुई जोड़ी कुरता, ना जूता और ना लठिया लियो, काहैकि मजदूर कै बाकी रोटी मिलनो चाहिए।”
11“जो कोई नगर या गाँव मैं जाबौ तौ मालुम करौ कि हूँना कौन काबिल है? और जब तक हूँना से ना निकरौ, उन्हईं के हूँना रहबौ। 12जब तुम कोई के घर मैं जाबौ तौ परिवार के लोगन को आदर सत्कार करत भै कहबौ, ‘तुम्हैं सांति मिलै।’ 13अगर बौ घर के आदमी काबिल होंगे तौ तुम्हारी सांति उनके संग रहबैगी, और बे काबिल नाय होंगे तौ तुम्हारी सांति बापस लौट जाबैगी। 14#प्रेरितो 13:51 और जो कोई तुमकै नाय अपनाबै, और तुमरी बात ना सुनै, बौ घर या बौ नगर से निकरत भै अपने टाँगन से धूदर झार डारौ। 15#मत्ती 11:24; उत्पत्ति 19:24-28 मैं तुमसे सच कहथौं, कि जब न्याय होगो बौ दिन बौ देस की हालत सदोम और अमोरा के नगर की हालत से भी जद्धे सहन के काबिल होगी।”
आनबारो कठिन समय
(मरकुस 13:9-13; लूका 21:12-17)
16 #
लूका 10:3
“सुनौ! मैं तुमकै भेंड़न के हानी भेंड़ियन के बीच मैं भेजथौं तभई साँपन के हानी अकलदार और कबूतरन के हानी भोले बनौ। 17#मरकुस 13:9-11; लूका 12:11,12; 21:12-15लोगन से सावधान रहियो काहैकि बे तुम्हैं बंधी बनाएकै यहूदि सभाघरन मैं सौंप देंगे, और बे तुम्हैं अपने यहूदि सभाघरन मैं कोड़ा से पिटबांगे। 18तुम राजन और सासकन के अग्गु पेस करे जागे, काहैकि तुम मेरे अनुयायी हौ तुमकै मौका दियो जागो कि उनकी और गैर यहूदिन के बारे मैं गभाई देबौ। 19जब बे तुमकै पकड़बांगे तौ जौ चिंता मत करियो, कि तुम कैसे बोलैगे और का कहबैगे; काहैकि जो कछु तुमकै कहने होगो, बौ बहे समय बताए दौ जागो। 20काहैकि बोलन बारे तुम नाय हौ पर तुमरे परम दऊवा की आत्मा तुमरे जरिया बोलैगी।”
21 #
मरकुस 13:12; लूका 21:16 “भईय्या अपने भईय्या कै पकड़वाए कै मरबाए डारंगे, अईय्या दऊवा अपने कै पकड़बांगे, और बालका अपने अईय्या दऊवा के खिलाप ही जांगे और बे उन्हैं मरबाए डारंगे। 22#मत्ती 24:9; मरकुस 13:13; लूका 21:17; मत्ती 24:13; मरकुस 13:13मेरे नाओं के बजह से सब तुमसे बैर करंगे, पर जो अंत तक धीरज धरैगो बहे को उद्धार होगो। 23जब बे तुमकै एक नगर मैं सतामै, तौ दुसरे नगर कै भाज जईयो। मैं तुमसे सच कहथौं, तुम इंसान के लौड़ा के आन से पहले इस्राएल के सब नगरन मैं से गै भी ना होगे इंसान को लौड़ा आए जागो।”
24 #
लूका 6:40; यूहन्ना 13:16; 15:20 “कोई भी चेला अपने गुरु से बड़ो नाय होथै; कोई भी सेवक अपने स्वामी से बड़ो नाय होथै। 25चेला कै गुरु के बराबर होन मैं, और सेवक स्वामी के बराबर होन मैं ही संतोस करनो चाहिए। जब बे घर के स्वामी कै बालजबूल मतलब दुस्टआत्मा को अगुवा कहथैं तौ बाके घर के दुसरे लोगन संग और बुरो बर्ताव करंगे!”
कौन से डरामैं
(लूका 12:2-7)
26“तौ लोगन से मत डरईयो, काहैकि जो कछु लुको भौ है, बाकै उजागर करो जागो, और सब चीजन को भेद बताओ जागो। 27मैं अंधियारे मैं जो कुछ कहथौं, बाकै तुम उजीते मैं कहबौ; और जो कानौ कान सुनथौ, बाकै छत के ऊपर से प्रचार करौ। 28जो सरीर कै मार सकथैं, पर आत्मा कै नाय मार सकथैं, उनसे मत डरौ; पर बहे से डराबौ, जो भीतरी आत्मा और सरीर दोनों कै नरक मैं खतम कर सकथै। 29का एक पैसा की दुई गौरैया नाय बेंची जाथै? तौभी तुमरे दऊवा की मरजी के बिना उनमैं से एक भी जमीन मैं नाय गिर सकथै। 30और तुमरे मूड़ के एक बार तक भी सब गिने भै हैं। 31तभई डराबौ मत; तुम निरे गौरैयन से बढ़कै कीमती हौ।”
मसीह कै अपनानो या ना अपनानो
(लूका 12:8,9)
32“जो कोई इंसान के सामने मोकै मान लेगो, बाकै महुँ अपने स्वर्गिय दऊवा के अग्गु मान लेंगो। 33#2 तीमुथियुस 2:12पर जो कोई इंसान के अग्गु मेरो इंकार करैगो बाकै महुँ अपने स्वर्गिय दऊवा के अग्गु इंकार करंगो।”
सांति नाय बल्किन तलवार है
(लूका 12:51-53; 14:26,27)
34“जौ मत समझौ, कि मैं दुनिया मैं सांति लान के ताहीं आओ हौं। नाय, मैं सांति लान नाय आओ हौं, पर एक तलवार चलवान आओ हौं। 35मैं जौ करन आओ हौं, बेटा अपने दऊवा के खिलाप मैं बेटी अपनी अईय्या के खिलाप और बहु अपनी सास के खिलाप मैं होंगी, 36इंसान के बैरी बाके घरै के लोग होंगे।”
37“जो अपने अईय्या या दऊवा कै मोसे जाधे प्यार करथै, बे मेरे चेला बनन के काबिल नाय हैं। और जो अपने लौड़ा या लौड़िया कै मोसे जाधे प्यार करथै, बे मेरे चेला बनन के काबिल नाय हैं। 38#मत्ती 16:24; मरकुस 8:34; लूका 9:23 बौ जो राहगीर को अपनो क्रूस खुद उठाएकै मेरे पच्छू नाय हुई लेथै बौ मेरो चेला बनन के काबिल नाय है। 39#मत्ती 16:25; मरकुस 8:35; लूका 9:24; 17:33; यूहन्ना 12:25जो अपनी ज्यान बचाथै, बौ बाकै गबागो; पर जो मेरे बजह से अपनी ज्यान खोथै, बौ जिंदगी पाएगो।”
प्रतिफल
(मरकुस 9:41)
40 #
लूका 10:16; यूहन्ना 13:20; मरकुस 9:37; लूका 9:48 “जो तुमकै अपनाथै, बौ मोकै अपनाथै; और जो मोकै अपनाथै, बौ परमेस्वर कै अपनाथै जो मोकै पनारी। 41जो कोई भविस्यवक्ता कै तभई अपनाथै कि बौ भविस्यवक्ता है, बाकै बहे प्रतिफल मिलैगो जो भविस्यवक्ता कै मिलथै, और अगर कोई भले आदमी को तभईये स्वागत करथौ कि बौ भलो आदमी है बाकै सच मैं बहे प्रतिफल मिलैगो जो कोई धर्मी आदमी कै मिलनो चाहिए। 42जो कोई जे छोटे मैं से एक कै चेला मानकै सिरफ एक गिलास ठंडो पानी पिबाबै, मैं तुमसे सच कहथौं, बाको प्रतिफल सच मैं मिलैगो।”
Currently Selected:
मत्ती 10: NTRTu2023
Highlight
Share
Copy
Want to have your highlights saved across all your devices? Sign up or sign in
The New Testament in Rana Tharu Language ©The Word for the World International and Rana Tharu Translation Samithi, Khatima, UttraKhanda, India. 2024
