लूका 22
22
यहूदा इसकरोती को बिसवासघात
(मत्ती 26:1–5; मरकुस 14:1,2; यहून्ना 11:45–53)
1अब बिना खट्टे चून की रोटी को तौहार जिसकै फसै#22:1 अखमीरी रोटी को तौहार यहूदिऔं को बड़ो तौहार हो जिसमै बे बिना खमीर की रोटी खावै हे। कैबै हैं आनै बारो हो। 2और मुक्ख पुजारी और यहूदी सास्तरी इस बात की ताख मै हे कै ईसु कै मार डारैं, पर बे लोगौं सै डरै हे कै कहीं दंगा ना हो जाय।
(मत्ती 26:14–16; मरकुस 14:10,11)
3तब यहूदा इसकरोती जो बारैह चेलौ मै गिनो जावै हो बौ सैतान नै बस मै करो। 4उसनै जाकै मुक्ख पुजारिऔं और चौकीदारौं के मुखियौं सै बातचीत करी, कै ईसु कै किस तरै उनके हात पकड़बांऐ। 5बे भौत खुस भए, और इसके ताँई उसकै रुपिया दैनै के ताँई तईयार हो गए। 6बौ बी राजी हो गओ और बौ ऐंसे मौके की ताख मै रैहल लगो जब भीड़-भाड़ ना हो और बौ ईसु कै उनके हात पकड़बा दे।
फसै की तईयारी
(मत्ती 26:17–25; मरकुस 14:12–21; यहून्ना 13:21–30)
7फिर बिना खट्टे चून की रोटी को बौ दिन आओ जब फसै के दिन मैमना की बलि देनी होवै ही। 8तब ईसु नै पतरस और यहून्ना जौ कैह कै भेजे, जाकै हमरे खानै के ताँई फसै को खानो तईयार करौ। 9उनौनै उस्सै पूँछी, “कै तू कहाँ चाँहै है, कै हम फसै खानै की तईयारी करैं।” 10उसनै कैई “जैसेई तुम सैहर मै घुसौगे तुमकै पानी को घल्ला ले जाते भए एक आदमी मिलैगो। उसके पीछे हो लेईओ और जिस घर मै बौ जाऐ तुम बी चले जईओ। 11और घर के मालिक सै कैईयो, ‘गुरूजी नै तेसै पूँछी है कै बौ पौंहने बारो कमरा कहाँ है, जहाँ मैं अपने चेलौ के संग फसै तौहार की रोटी खा सकौं?’ 12फिर बौ आदमी तुमकै सजो-सजाओ ऊपर को एक बड़ो कमरा दिखागो, बहीं खानै की तईयारी करिओ।” 13बे चल पड़े और उनौनै जाकै, जैसो बानै कैओ हो, उनकै बैसोई मिलो, फिर उनौनै फसै भोज तईयार करो।
परभु भोज
(मत्ती 26:26–30; मरकुस 14:22–26; 1 कुरन्थियों 11:23–25)
14फिर फसै खानै को बौ टैम आओ जब ईसु अपने बारैह चेलौ के संग रोटी खानै बैठो। 15और उसनै उनसै कैई, “मेरी बड़ी इच्छा ही, कै दुख उठानै सै पैले जौ फसै को भोज तुमरे संग खांऔ। 16कैसेकै मैं तुमसै कैरओ हौं कै जब तक परमेसर के राज मै इस भोज की सैरी बात पूरी ना हो लेती तब तक मैं इसकै दुबारा ना खांगो।” 17तब उसनै कटोरा लेकै धन्नबाद दओ और कैई, “लो इसकै आपस मै बाँट लो। 18कैसेकै मैं तुमसै कैरओ हौं आज के बाद जब तक परमेसर अपने लोगौ के ऊपर राज ना करै, मैं अंगूर को रस कबी ना पियंगो।” 19फिर बानै रोटी लई, और धन्नबाद करकै तोड़ी, और उनकै जौ कैते भए दई, “जौ मेरो सरीर है, जो तुमरे ताँई देओ जा रओ है, मेरी यादगारी के ताँई ऐंसोई करे करौ।” 20ऐंसेई जब बे रोटी खा चुके तौ उसनै कटोरा लओ और कैई, “जौ कटोरा मेरे खून के संग बनाओ भओ नओ नियम है। जो तुमरे ताँई बहाओ जा रओ है।” 21पर देखौ, “जो मैंकै पकड़बागो। बौ बी मेरे संग हिंया रोटी खा रओ है। 22कैसेकै आदमी के लौंड़ा के ताँई जो बात परमेसर नै पैलेसैई तय करी हैं, बौ बैसेई मरैगो। पर हाय उस आदमी कै जिसके दुआरा बौ पकड़बाओ जागो।” 23इस बात मै बे एक दूसरे सै पूँछल लगे, “कै हम्मै सै कौन है? जो इस काम कै करैगो?”
बड़ो कौन
24 #
मत्ती 18:1; मरकु 9:34; लूका 9:46 फिर उनमै जौ बैहैस होल लगी कै हम्मै सै सबसै बड़ो किसकै समजो जाय। 25पर ईसु नै उनसै कैई, “गैर यहूदिऔं के राजा अपने लोगौ के ऊपर अपनो हक जमामै हैं, और बे जो उनके ऊपर अधकार रक्खै हैं, बे अपने कै मदत कन्नै बारे किब्बामै हैं। 26#मत्ती 23:11; मरकु 9:35#मत्ती 20:25–27; मरकु 10:42–44पर तुम बैसे ना हौ बलकन तुम्मै तौ सबसै बड़ो सबसै छोटे जैसो होनो चँईऐ और जो खास है उसकै सेवा कन्नै बारो होनो चँईऐ। 27#यहून 13:12–15कैसेकै बड़ो कौन है; बौ जो रोटी खानै की मेज मै बैठो है या बौ जो सेवा करै है? का बौ ना है जो रोटी खानै बैठो है? पर मैं बी तुमरे बीच मै एक सेवा कन्नै बारे के जैसो हौं। 28पर तुम बे हौ, जो मेरी मुसकलौं मै लगातार मेरे संग रैहए। 29इसताँई जैसे मेरे अब्बा नै मेरे हात मै राज कन्नै के ताँई एक राज दओ है, बैसेई मैं बी तुमकै एक राज देरओ हौं। 30#मत्ती 19:28जिस्सै मेरे राज मै तुम मेरी मेज मै खाऔ और पिऔ और ईसराइल के बारैह गोतौं को फैसला कन्नै के ताँई सिंगासनौ मै बैठौ।
पतरस के इनकार कन्नै की ईसु की भबिसबानी
(मत्ती 26:31–35; मरकुस 14:27–31; यहून्ना 13:36–38)
31 “समौन, हे समौन, सुन, तुम सब लोगौ कै सैतान नै माँग लओ है कै तुमकै गैहूं के हाँई फटकै। 32पर मैंनै तेरे ताँई पिराथना करी है कै तेरो बिसवास ना डगमगाय और जब तू बापस मेरे धौंरे लौहट आए तौ अपने भईयौ को बिसवास मजबूत बना।”
33पर समौन पतरस नै उस्सै कैई, “हे परभु, मैं तेरे संग जेल जानै और मरनै तक कै तईयार हौं।” 34फिर ईसु नै कैई, “हे पतरस मैं तेसै कैरओ हौं, आज रात कै मुरगा के बाँक दैनै सै पैले तू तीन फेरी मैंकै पैचान्नै सै इनकार करैगो।”
बटुआ, झोली और तरवार
35 #
मत्ती 10:9,10; मरकु 6:8,9; लूका 9:3; 10:4 फिर ईसु नै अपने चेलौ सै कैई, “मैंनै तुमकै जब बिना बटुआ, बिना झोला या बिना चप्पलौ के भेजो हो तौ का तुमकै किसी चीज की कमी रैहई ही?” उनौनै कैई, “किसी चीज की ना।” 36ईसु नै उनसै कैई, “पर अब जिसके धौंरे बटुआ हो तौ बौ उसकै ले ले और बौ झोला बी ले ले और जिसके धौंरे तरवार#22:36 ईसु हिंया कठिन हालात को सामनो कन्नो और तईयार रैहनै के बारे मै बता रओ है ना हो, बौ अपनो लत्ता तक बेचकै उसकै मोल ले ले। 37कैसेकै मैं तुमसै कैरओ हौं कै, पबित्तर सास्तर मै लिखी भई बात, मैं मै जरूर पूरी हौंगी, ‘कै उसकी गिनती कुकरमिऔ मै भई,’ और जो कुछ मेरे बारे मै लिखो गओ है, बौ पूरो होनै मै है।” 38चेलौ नै कैई, “हे परभु! देख, हिंया दो तरवार है।” पर ईसु नै कैई, “बस बस।”
जैतून नाम के पहाड़ मै ईसु की पिराथना
(मत्ती 26:36–46; मरकुस 14:32–42)
39ईसु सैहर सै बाहार लिकरो और अपनी आदत के अनुसार जैतून नाम के पहाड़ मै गओ, बाके चेला बी बाके संग हो लए। 40जब ईसु बहाँ पौंचो तौ बानै कैई, “पिराथना करौ, जिस्सै तुम मुसकल मै ना पड़ौ।” 41तब ईसु उनसै थोड़ो सो अग्गे गओ और घूंटे टेक कै पिराथना करल लगो। 42“हे अब्बा, अगर तू चाँहै तौ इस दुख के टैम कै मैंसै हटा ले; फिर बी मेरी मरजी ना, पर तेरी मरजी पूरी हो।” 43तब उसकै सुरग को एक दूत दिखाई पड़ो, जो उसकै हिम्मत देल लगो। 44तब ईसु बड़ी बेचैनी के संग और जोर सै पिराथना करल लगो। और उसको पसीना खून की बूंद के हाँई जमीन मै टपक रओ हो। 45जब बौ पिराथना करकै उठो और चेलौ के धौंरे आओ तौ उसनै देखो कै, बे उदास होकै थकावट के मारे सो रए हैं। 46ईसु नै उनसै कैई, “तुम काए सो रए हौ? उठौ, पिराथना करौ कै तुम मुसकल मै ना पड़ौ।”
ईसु की गिरपतारी
(मत्ती 26:47–56; मरकुस 14:43–50; यहून्ना 18:3–11)
47जब ईसु बात करई रओ हो तौ देखौ, एक भीड़ आ पौंची और बारैह चेलौ मै सै एक जो यहूदा कैलाबै हो, भीड़ के अग्गे-अग्गे चलो आ रओ हो, बौ ईसु कै चूमनै के ताँई उसके धौंरे आओ। 48ईसु नै उस्सै कैई, “हे यहूदा, का तू चुम्मा#22:48 चुम्मा कन्नो यहूदिऔं को एक रिबाज हो लेकै आदमी के लौंड़ा कै धोके सै पकड़बावै है?” 49फिर उसके चेलौ नै जब देखो कै का होनै बारो है, तौ कैई, “हे परभु, का हम तरवार चलाऐ?” 50और उनमै सै एक नै तौ बड़े पुजारी के गुलाम के ऊपर तरवार चलाई, और उसको दाँय लंग को कान काट दओ। 51इसमै ईसु नै कैई, “बस करौ।” फिर ईसु नै उसको कान छूँकै ठीक कर दओ। 52फिर ईसु नै जो उसकै पकड़नै आए हे, उनमै सै मुक्ख पुजारिऔं, मन्दर के सिपाईऔं के अधकारी और बुजरग यहूदी नेताऔं सै कैई, “का तुम तरवार और लठिया लेकै किसी डाँकू कै पकड़नै आए हौ? 53#लूका 19:47; 21:37जब मैं मन्दर मै हर दिन तुमरे संग हो, तौ तुमनै मैं ना पकड़ो; पर जौ बौई टैम है जो तुमरे काम कन्नै के ताँई ठैराओ है, और इन्धेरे को राज चालू है।”
पतरस को इनकार
(मत्ती 26:57,58,69–75; मरकुस 14:53,54,66–72; यहून्ना 18:12–18,25–27)
54फिर बे उसकै पकड़कै ले चले, और बड़े पुजारी के घर मै लाए और पतरस कुछ दूरी मै उसके पीछे-पीछे आ रओ हो। 55और जब बे दारे मै आग सुलगाकै इखट्टे बैठे, तौ पतरस बी उनके बीच मै बैठ गओ। 56और एक नौकरानी नै आग के उज्जेरे मै देखकै और उसकी ओर ताक्कै कैललगी, “जौ बी तौ ईसु के संग हो।” 57पर पतरस नै जौ कैह कै इनकार करो, “बहन, मैं उसकै ना जानौ हौं।” 58थोड़ी देर बाद एक दूसरे आदमी नै पतरस कै देखकै कैई, “तू बी तौ उनमै सै एक है।” पर पतरस बोलो, “मैं बौ ना हौं।” 59करीब एक घंटा बीतो होगो कै कोई और बी जोर देकै कैललगो, “जरूर जौ बी उसके संग हो। कैसेकै जौ बी गलील को रैहनै बारो है।” 60पर पतरस बोलो, “मैं ना जानौ हौं तू किसके बारे मै बात कर रओ है।” बौ अबी बातई कर रओ हो कै एक मुरगा नै बाँक दे दई। 61तब परभु ईसु नै मुड़कै पतरस की ओर देखो, तौ पतरस कै परभु ईसु की बौ बात याद आई जो उसनै कैई ही कै, “आज मुरगा कै बाँक दैनै सै पैले, तू तीन दफै मैंकै पैचान्नै सै इनकार करैगो।” 62तब बौ बाहार लिकरकै फूट-फूटकै रोल लगो।
ईसु की मजाक
(मत्ती 26:67,68; मरकुस 14:65)
63जिन आदमिऔ नै ईसु कै पकड़ खाओ हो, बे बाकी मजाक बनाकै उसकै पीटल लगे। 64और उसकी आँखौं मै पट्टी बांधकै उस्सै पूँछल लगे, “बता तेकै किसनै मारो।” 65उनौनै बाकी बेजती कन्नै के ताँई और बी भौत कुछ बात कैंई।
ईसु महासभा के सामने
(मत्ती 26:59–66; मरकुस 14:55–64; यहून्ना 18:19–24)
66जब दिन भओ तौ मुक्ख पुजारिऔं और सास्तरिऔं और यहूदी बुजरग मुखिया इखट्टे भए, और ईसु कै अपनी पंचात मै ले गए और उस्सै पूँछी, 67“हमकै बता का तू मसी है?” ईसु नै उनसै कैई, “अगर मैं तुमसै कैऔ तौ तुम मेरो बिसवास ना करौगे। 68और अगर मैं एक सबाल पूँछौ तौ उसको जबाब ना देओगे। 69पर अब सै आदमी को लौंड़ा सरब सकतिमान परमेसर के खाने हात की ओर बैठाओ जागो।” 70तौ सबनै पूँछी, “तौ का तू परमेसर को लौंड़ा है?” बानै कैई, “तुम खुदई कैरए हौ, कै मैं हौं।” 71तब उनौनै कैई, “अब हमकै गभाऔ की जरूरत ना है, कैसेकै हमनै खुदई उसकै मौह सै सुन लओ है।”
Currently Selected:
लूका 22: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
