लूका 5
5
ईसु के पैले चेला
(मत्ती 4:18–22; मरकुस 1:16–20)
1 #
मत्ती 13:1,2; मरकु 3:9,10; 4:1 एक दिन ईसु गन्नेसरत नाम की झील के किनारे खड़ो हो, तब भीड़ ईसु कै दबाते भए चारौ लंग सै घेरकै परमेसर को बचन सुन्नै के ताँई खड़ी ही, 2तबई बानै झील के किनारे खड़ी भई दो किसती देखीं, और उनके धीमर किसती सै उतरकै अपने जार धो रए हे। 3ईसु उनमै सै एक किसती मै चढ़ गओ, जो समौन की ही, और बानै किनारे मै खड़ी भई उसई किसती कै थोड़ी हटा लैनै कै कैई, फिर बौ किसती मै बैठ गओ और बहीं सै लोगौ कै उपदेस सुनाल लगो। 4जब बानै अपनो उपदेस खतम कर लओ तौ बौ समौन सै बोलो “किसती कै गैहरे पानी की ओर ले चल, और मच्छी पकड़नै के ताँई अपने जार डारौ।” 5#यहून 21:3समौन बोलो, “हे मालिक, हमनै सैरी रात भौत मैहनत करी, पर हमरे हात कुछ बी ना लगो, अगर तू कैरओ है तौ जार डारे देवौ हौं।” 6#यहून 21:6जब उनौनै ऐंसो करो तौ, भौत मच्छी फस गंई, और उनके जार फटल लगे। 7उनौनै दूसरी किसती के अपने सातिऔं कै इसारो करो कै आकै हमरी सायता करौ। बे आए और उनौनै दौनौ किसतिऔ कै मच्छिऔं सै इत्तो भर लओ कै किसती डूबनै कै हो गई। 8जौ देखकै समौन पतरस ईसु के पाँऐऔं मै गिर गओ, और कैई “हे परभु, मेरे धौंरे सै चलो जा, मैं तौ पापी आदमी हौं।” 9कैसेकै इत्ती मच्छिऔं के पकड़े जाने सै बाकै और बाके सातिऔं कै बड़ो अचम्बो भओ। 10जौई हालत जबदी के लौंड़ा याकूब और यहून्ना की बी भई, जो समौन के साजेदार हे, ईसु नै समौन सै कैई, “डर मत, अब सै तू आदमिऔ कै बटोरै करैगो।” 11और बे किसतिऔ कै किनारे लगाकै और सब कुछ छोड़कै ईसु के पीछे हो लए।
कोढ़ी को ठीक करो जानो
(मत्ती 8:1–4; मरकुस 1:40–45)
12जब ईसु एक सैहर मै हो, तौ बहाँ कोढ़ सै भरो एक आदमी हो, और बौ ईसु कै देक्कै मौह के बल गिरो, और बिनती करते भए बोलो, “हे परभु, तू चाँहै तौ मैंकै सुद्द कर सकै है।” 13ईसु नै अपनो हात बढ़ाकै बौ छुँओ और कैई, “मैं चाँहौ हौं कै तू सुद्द हो जा।” उसई टैम बाको कोढ़ दूर हो गओ। 14पर ईसु नै उसकै आदेस दओ कै किसी सै कुछ ना कैईए, पर “जाकै अपने आपकै पुजारी कै दिखा और अपने ठीक होनै के बारे मै जो कुछ मूसा नै चढ़ाबो ठैराओ है उसकै चढ़ा, जिस्सै लोगौ कै तेरे ठीक होनै को पतो चल जाय।” 15पर बाकी चरचा और बी फैलती गई, और भीड़ की भीड़ बाको उपदेस सुन्नै के ताँई और अपनी बेमारिऔ सै छुटकारो पानै के ताँई बाके धौंरे आल लगे। 16पर बौ एकान्त जघै मै अगल जाकै पिराथना करे करै हो।
फालस के रोगी कै ठीक कन्नो
(मत्ती 9:1–8; मरकुस 2:1–12)
17ऐंसो भओ कै एक दिन जब ईसु उपदेस देरओ हो तौ बहाँ फरीसी और यहूदी सास्तरी बी बैठे हे। जो गलील और यहूदिया के हर एक गामौ सै और ऐरूसलेम सै आए हे, पर परभु की सकति लोगौं के ठीक कन्नै के ताँई ईसु के संग ही। 18तबई कुछ लोग खटिया मै फालस के एक रोगी कै लेकै बाके धौंरे लाए, और बे बाकै भीतर लेजानै और ईसु के सामने रखनै को रस्ता ढूंड़ रए हे। 19और जब भीड़ के बजै सै बाकै भीतर ना ले जा सके तौ उनौनै कोठे मै चढ़कै और खपड़ैल हटाकै, बौ खटिया समेत बीचौ बीच ईसु के सामने उतार दओ। 20उनके बिसवास कै देखते भए ईसु नै कैई, “हे दोस्त, तेरे पाप माफ भए।” 21तब यहूदी सास्तरी और फरीसी आपस मै सोचल लगे, कै “जौ कौन है, जो परमेसर की बुराई करै है? परमेसर के अलाबा कौन पापौं कै माफ कर सकै है?”
22ईसु उनके मन की बात जान गओ, और उनसै कैई, “कै तुम अपने मनौ मै ऐंसो काए सोच रए हौ? 23आसान का है? जौ कैनो कै ‘तेरे पाप माफ भए’ या जौ कैनो कै ‘उठ और चल फिर’? 24पर इसताँई कै तुम जानौ कै आदमी के लौंड़ा, कै इस धरती मै पाप माफ कन्नै को बी अधकार है।” बानै फालस के मारे भए रोगी सै कैई, “मैं तेसै कैरओ हौं, उठ और अपनी खटिया उठाकै अपने घर चलो जा।”
25बौ तुरन्त उनके सामने उठो, और उनके देखते देखते जिस खटिया मै बौ लेटो हो, बाकै उठाकै परमेसर की बड़ाई करतो भओ अपने घर चलो गओ। 26तब सब लोग चकित भए और परमेसर की बड़ाई करल लगे, और बे भौत डरकै कैललगे, “कै आज हमनै अनोखी बात देखी है।”
लेबी ईसु के पीछे चलल लगो
(मत्ती 9:9–13; मरकुस 2:13–17)
27इसके बाद ईसु चल दओ। तबई बानै चुंगी चौकी मै बैठे लेबी नाम को एक लगान बसूलनै बारो देखो। और बासै कैई, “मेरे पीछे चलो आ।” 28तब बौ सब कुछ छोड़कै उठो, और बाके पीछे हो लओ। 29तब लेबी नै अपने घर मै ईसु के ताँई एक बड़ी दाबत दई, और चुंगी लैनै बारे और बी पौंहने बड़ी तादात मै बाके संग रोटी खानै बैठे। 30#लूका 15:1,2तब फरीसी और सास्तरिऔं नै उसके चेलौ सै जौ कैते भए सिकात करी “तुम चुंगी लैनै बारौं और पापिऔं के संग काए खावौ-पीवौ हौ?” 31ईसु नै उनकै जबाब दओ, “भले चंगौ कै बैद की जरूरत ना है, पर बेमारौं कै होवै है। 32मैं धरमिऔं कै ना, पर पापिऔं के मनौ कै परमेसर की ओर मोड़नै के ताँई आओ हौं।”
बरत को सबाल
(मत्ती 9:14–17; मरकुस 2:18–22)
33उनौनै ईसु सै कैई, “यहून्ना के चेला बेरमबेर बरत रक्खैं और पिराथना मै लगे रैहबैं हैं, और फरीसिऔं के चेला बी ऐंसोई करै हैं, पर तेरे चेला तौ खावै-पीवै हैं” 34ईसु नै उनसै कैई, “जब तक दूलाह बरातियौ के संग है, का तुम उनसै बरत रखबा सकौ हौ? 35पर बे दिन आंगे, जब दूलाह उनसै बिछड़ जागो, उन दिनौ बे बरत रखंगे।” 36ईसु नै जौ दासतान बी सुनाई, “कोई नए कुरता कै फाड़कै बाको पुराने कुरता मै थिकरा ना लगाबै है। ना तौ बौ नओ कुरता फटो रैह जागो और नए कुरता को थिकरा पुराने कुरता के संग मेल बी ना खागो। 37और कोई नओ अंगूरौं को रस पुरानी मटकिऔ मै ना भरै है, ना तौ नओ अंगूरौं को रस उबाल खाकै मटकिऔ कै फाड़कै बह जागो, और मटकिया बी बरबाद हो जांगी। 38इसताँई नओ अंगूरौं को रस नई मटकिऔ मैई भन्नो चँईऐ। 39कोई आदमी पुरानो अंगूरौं को रस पीकै नओ ना चाँहै है, कैसेकै बौ कैबै है कै पुरानोई अच्छो है।”
Currently Selected:
लूका 5: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
