मत्ती 24
24
मन्दर के बिनास की भबिसबानी
(मरकुस 13:1,2; लूका 21:5,6)
1ईसु मन्दर सै लिकरकै चलो जा रओ हो कै बाके चेला उसके धौंरे आए और उनौनै मन्दर की इमारतौं की ओर उसको धियान करबाओ 2ईसु नै उनसै कैई, “तुम इन इमारतौं कै सीदे खड़े देख रए हौ? मैं तुमकै सच बता रओ हौं, हिंया एक पत्थर मै दूसरो पत्थर टिको ना रैहगो। एक-एक पत्थर गिरा दओ जागो।”
(मरकुस 13:3–13; लूका 21:7–19)
3जब ईसु जैतून पहाड़ मै जाकै बैठ गओ तौ चेलौ नै अलग उसके धौंरे आकै कैई, “हमकै बता जौ कब होगो? तेरे आनै को और युग के अन्त को चिन्न का होगो?”
4ईसु नै उनकै जबाब दओ, “चौकस रैहऔ, तुमकै कोई ना बहकाय, 5कैसेकै भौस्से लोग मेरो नाम लेकै आंगे और कैंगे, मैं मसी हौं, और बे भौतौं कै बहका दंगे। 6तुम लड़ाईऔं की चरचा सुनौगे और लड़ाईऔं के बारे मै अफबा बी सुनौगे इनसै ना घबरईयो, ऐंसो तौ होगोई, पर जौ अन्त ना है। 7हर एक जाति दूसरी जाति के बिरोद मै और एक राज दूसरे राज के बिरोद मै खड़ो होगो, जहाँ तहाँ अकाल पड़ंगे, और हालेचाले आते रैहंगे। 8पर जे सब बात तौ सिरप मुसीबतौं की सुरूआत हौंगी।
9 #
मत्ती 10:22
“उस टैम लोग तुमकै पकड़बाकै डन्ड देंगे और मार डारंगे। मेरे नाम के बजै सै सबई जाति के लोग तुमसै नफरत करंगे। 10उस टैम भौस्से लोग बिसवास सै भटक जांगे। बे एक दूसरे कै धोके सै पकड़बांगे और एक दूसरे सै नफरत करंगे। 11भौत से झूँटे नबी उठ खड़े हौंगे और लोगौ कै ठगंगे। 12बुराई के बढ़नै सै लोगौ मै पियार भाब घट जागो, 13#मत्ती 10:22पर जो अन्त तक टिको रैहगो उसई कै मुक्ति मिलैगी। 14सैरी दुनिया मै सुरग के राज की इस अच्छी खबर को परचार करो जागो, जो सैरी जातिऔं कै गभाई के रूप मै सुनाओ जागो और तबई अन्त आ जागो।
महासंकट
(मरकुस 13:14–23; लूका 21:20–24)
15 “इसताँई जब तुम लोग भयानक उजाड़नै बारी घिनौनी चीज कै पबित्तर जघै मै खड़ी देखौगे, जिसकी चरचा नबी दानियल नै करी। पढ़नै बारो खुद समज ले कै इसको मतलब का है। # 24:15 पढ़नै बारो खुद समज ले कै इसको मतलब का है। जौ बात ईसु नै ना कैई, पर मत्ती को खुद को कैनो है 16तौ, जो लोग यहूदिया मै हौं, बे पहाड़ौ मै भाज जाँय, 17#लूका 17:31और जो लोग अपनी छत मै हौं, बौ अपने घर को सामान लैनै नीचे ना उतरै, 18जो अपने खेत मै काम कर रओ होए, बौ अपनी चद्दर लानै के ताँई ना लौहटै।
19 “उन बईयरौं के ताँई जो गरब सै हौंगी या जिनके दूद पीते बालक हौंगे, बे दिन भौत कसट के हौंगे। 20पिराथना करौ कै तुम लोगौ कै जाड़ौ के टैम या आराम कन्नै बारे दिन भाजनो ना पड़ै। 21#परका 7:14कैसेकै उन दिनौ ऐंसो महासंकट होगो, जैसो दुनिया के सुरू सै अब तक ना कबी भओ है और ना कबी होगो।
22 “अगर बे दिन घटाए ना जाते, तौ कोई आदमी ना बचतो, पर चुने भए लोगौ के कारन बे दिन घटा दए जांगे।
23 “अगर उस बखत कोई तुम लोगौ सै कैए, ‘देखौ, मसी हिंया है!’ या ‘बौ बहाँ है!’ तौ बिसवास ना करिओ, 24कैसेकै झूँटे मसी और झूँटे नबी खड़े हौंगे और ऐंसे बड़े-बड़े चिन्न और चमत्कार दिखांगे कै अगर उनसै बन पड़ो तौ, बे चुने भए लोगौ कै बी बहका दंगे। 25देखौ, मैंनै पैलेसैई तुमकै बता दओ है।
26 #
लूका 17:23,24 “अगर बे तुम लोगौ सै कैंऐ, ‘देखौ, बौ बियाबान मै है’ तौ बहाँ मत जईओ और अगर बे कैंऐ, ‘देखौ, बौ उन कमरौ मै लुको भओ है,’ तौ उनको बिसवास मत करिओ। 27कैसेकै जैसे बिजली पूरब सै लिकरकै पच्छिम तक चमकै है, बैसेई आदमी के लौंड़ा को आनो होगो। 28#लूका 17:37जहाँ कहीं लाहस हौंगी बहीं गिज्ज इखट्टे हो जांगे।
(मरकुस 13:24–27; लूका 21:25–28)
29 #
परका 6:12;
परका 6:13
“उन दिनौ जो मुसीबत पड़ैगी उसके तुरन्त बाद,
“‘सूरज कारो पड़ जागो,
चाँद सै उसकी चाँदनी ना छिटकैगी
आसमान सै तारे गिरललगंगे
और आसमान की महासकति हला दई जांगी।’
30 #
परका 1:7
“तब आसमान मै आदमी के लौंड़ा को चिन्न दिखाई देगो, धरती की सैरी जाति के लोग छाती पीटंगे और बे आदमी के लौंड़ा कै सकति और महिमा के संग आसमान के बादरौं मै आते भए देखंगे। 31बौ तुरही की ऊँची अबाज के संग अपने दूतौ कै भेजैगो और बौ चारौ दिसाऔं सै, आसमान के कौने कौने सै अपने चुने भए लोगौ कै इखट्टे करैगो।
(मरकुस 13:28–31; लूका 21:29–33)
32 “अंजीर के पेड़ सै सीकौ, जब बाके डुग्गे नरम बन जावै हैं और उनमै कन्छी फूटल लगैं हैं, तौ तुम जान जाबौ हौ कै गरमी आ रई है। 33बैसेई जब तुम जौ सब होते भए देखौ तौ समज जईओ कै बौ धौंरे आ पौंचो है, बलकन मौहड़े मैई है। 34मैं तुमसै सच कैरओ हौं कै इस पीड़ी को अन्त हो जाने सै पैलेई जे सब बात पूरी हो जांगी। 35चाँए आसमान और धरती मिट जाँय, पर मेरो कहो भओ बचन कबी ना मिटैगो।
अन्त के दिनौ की तईयारी
(मरकुस 13:32–37; लूका 17:26–30,34–36)
36 “उस दिन और उस घड़ी के बारे मै कोई ना जानतो ना तौ सुरगदूत और ना बेटा, सिरप परम पिताई जानै है। 37जैसे नूह के दिनौ मै भओ, बैसेई आदमी के लौंड़ा को आनो बी होगो। 38बैसेई जैसे जलपरलै के आनै सै पैले के दिनौ तक, जब तक नूह पानी के जिहाज मै ना चढ़ो, तब तक लोग खाते-पीते और बिहा-सादी करते रैहए। 39उनकै तब तक पतो ना चलो जब तक जलपरलै ना आ गओ और उन सबकै बहा ना ले गओ, आदमी के लौंड़ा को आनो बी ऐंसोई होगो। 40उस टैम दो आदमी खेत मै काम करते हौंगे, एक उठा लओ जागो दूसरो बहीं छोड़ दओ जागो। 41दो बईयरैं चकिया मै नाज पीस रई हौंगी एक उठा लई जागी और दूसरी बहीं छोड़ दई जागी। 42इसताँई जगते रौह, कैसेकै तुम ना जानौ हौ कै तुमरो परभु कब आ जाय। 43#लूका 12:39,40जौ अच्छी तरै समज लो, कै अगर घर के मालिक कै मालूम होतो कै चोर रात के किस टैम आगो, तौ बौ जगतो रैहतो और अपने घर मै कूमल ना लगन देतो। 44इसताँई तुम लोग बी तईयार रौह, कैसेकै जिस घड़ी तुम उसके आनै की ना सोचते, उसई टैम आदमी को लौंड़ा आ जागो।
ईमानदार और बेईमान नौकर की दासतान
(लूका 12:41–48)
45 “ऐंसो ईमानदार और समजदार नौकर कौन है, जिसके मालिक नै नौकरौ के ऊपर बौ अधकारी बनाओ, जिस्सै बौ ठीक टैम मै उनकै रोटी दे? 46धन्न है बौ नौकर, जिसको मालिक आकै उसकै ऐंसोई करते पाय। 47मैं तुमसै सच कैरओ हौं कै बौ उसकै अपनी सैरी दौलत के ऊपर अधकारी बना देगो। 48पर अगर एक बेईमान नौकर अपने मन मै कैए, ‘मेरो मालिक आनै मै देर कर रओ है’ 49और बौ दूसरे नौकरौ कै पीटनै और पियक्कड़ौ के संग खानै पीनै लगै, 50तौ बा नौकर को मालिक ऐंसे दिन आगो, जब बौ उसको पैंड़ो ना देख रओ होगो और ऐंसी घड़ी जिसकै बौ जान बी ना पागो। 51और बाको मालिक उसकै बुरी तरै डन्ड देगो और पाखंडिऔ के संग डार देगो। बहाँ बे लोग रोंगे और दाँत पीसते रैहंगे।
Currently Selected:
मत्ती 24: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
