मत्ती 4
4
ईसु कै परखनो
(मरकुस 1:12,13; लूका 4:1–13)
1 #
इबरा 2:18; 4:15 फिर आत्मा ईसु कै बियाबान मै ले गओ जिस्सै सैतान के दुआरा बौ परखो जा सकै। 2बानै चालीस दिन और चालीस रात कुछ ना खाओ इसके बाद बाकै भूँक लगी। 3तब परखनै बारे नै धौंरे आकै बासै कैई, “अगर तू परमेसर को लौंड़ा है, तौ कैह दे, कै जौ पत्थर रोटी बन जाँय।” 4ईसु नै उसकै जबाब दओ, “कै पबित्तर सास्तर मै लिखो है,
“आदमी सिरप रोटी सैई जिन्दो ना रैहगो
पर हर एक उस बचन सै
जो परमेसर के मौह सै लिकरै है जिन्दो रैहगो।”
5तब सैतान उसकै पबित्तर सैहर मै ले गओ और मन्दर के सबसै ऊँची चुटिया मै खड़ो कर दओ। 6और ईसु सै बोलो, “अगर तू परमेसर को लौंड़ा है, तौ हिंया सै अपने आपकै नीचे गिरा दे। कैसेकै पबित्तर सास्तर मै लिखो है,
“कै परमेसर तेरे बारे मै अपने सुरगदूतौं कै हुकम देगो,
कै बे तेरी सायता करैं। और बे तेकै हातौ हात उठा लंगे
कहीं ऐंसो ना हो कै तेरे पाँऐ मै पत्थर सै चोट लगै।”
7तब ईसु जबाब देते भए बोलो, “पबित्तर सास्तर मै जौ बी लिखो है कै,
“‘तू अपने परभु परमेसर कै ना परखिए।’”
8तब सैतान उसकै भौत ऊँचे पहाड़ मै ले गओ और पलभरमैई दुनिया के सैरे देस और उनकी सान दिखा दई। 9तब ईसु सै कैई, “अगर तू मेरे अग्गे झुक्कै मैंकै डन्डौत करै, तौ जौ सब तेरो हो जागो।”
10तब ईसु नै उस्सै कैई, “हे सैतान दूर हो जा, कैसेकै पबित्तर सास्तर मै लिखो है कै,
“ ‘तू परभु अपने परमेसर कैई डन्डौत कर
और सिरप उसई की सेवा कर।’ ”
11तब सैतान उसके धौंरे सै चलो गओ और देखौ, सुरगदूत आकै ईसु की सेवा करल लगे।
ईसु के काम की सुरूआत
(मरकुस 1:14,15; लूका 4:14,15)
12 #
मत्ती 14:3; मरकु 6:17; लूका 3:19,20 जब ईसु नै जौ सुनो कै यहून्ना पकड़बा दओ है, तौ बौ गलील मुलक कै चलो गओ। 13#यहून 2:12बौ नासरत सैहर छोड़कै, जबुलून और नप्ताली के इलाके मै, समन्दर के किनारे बसे भए कफरनहूम सैहर मै रैहल लगो। 14जिस्सै जो यसाया नबी के दुआरा कैओ गओ हो, बौ पूरो हो।
15“कै जबुलून और नप्ताली के इलाके मै,
समन्दर के रस्ता सै यरदन नद्दी के धौंरे
गलील के गैर यहूदिऔं के इलाके मै।
16जो लोग इन्धेरे मै जी रए हे,
उनौनै एक बड़ो उज्जेरो देखो और जो मौत की छाँई के परदेस मै रैह रए हे,
उनके ऊपर रौसनी चमकी।”
17 #
मत्ती 3:2
उस टैम सै ईसु उपदेस दैनै और जौ कैललगो, “पापौं सै मन फिराऔ, कैसेकै सुरग को राज धौंरे आ गओ है।”
ईसु के दुआरा चेलौ को चुनो जानो
(मरकुस 1:16–20; लूका 5:1–11)
18ईसु नै गलील की झील के किनार सै जाते भए दो भईया झील मै जार डारते भए देखे; समौन जो पतरस कैलाबै हो और उसको भईया अन्दरयास हो, बे धीमर हे। 19ईसु नै उनसै कैई, “मेरे पीछे चले आऔ, मैं तुमकै आदमिऔ कै पकड़नै बारे बनांगो।” 20बे तुरन्त जारौ कै छोड़कै ईसु के पीछे हो लए। 21थोड़े अग्गे जाकै ईसु नै जबदी को लौंड़ा याकूब और उसको भईया यहून्ना अपने अब्बा के संग किसती मै अपने जारौ कै सुदारते भए देखे। और बे बी बुलाए। 22बे तुरन्त किसती और अपने अब्बा कै छोड़कै उसके पीछे हो लए।
ईसु को लोगौ कै उपदेस देनो और उनकै ठीक कन्नो
(लूका 6:17–19)
23 #
मत्ती 9:35; मरकु 1:39 और ईसु सैरे गलील मै फिरतो भओ उनकी पिराथना घरौं मै उपदेस देतो और परमेसर के राज की अच्छी खबर को परचार करतो और लोगौं की हर तरै की बेमारी ठीक और कमजोरिऔं कै दूर करतो रैहओ 24और सैरे सीरिया मै उसकी खबर फैल गई और लोग सब बेमारौं कै, जो तरै-तरै की बेमारिऔ और दुखौ मै जकड़े भए हे और जिनमै दुसट आत्मा हीं, और मिरगी बारौ और फालस के मारे भएऔं कै उसके धौंरे लाए और ईसु नै बे ठीक करे। 25और गलील, दिकापुलुस, ऐरूसलेम, और यहूदिया सै और यरदन नद्दी के पार सै भीड़ की भीड़ उसके पीछे हो लई।
Currently Selected:
मत्ती 4: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
