मरकुस 9
9
1और ईसु नै जौ बी कैई, “मैं तुमसै सच कैरओ हौं, हिंया कुछ ऐंसे लोग खड़े हैं, जो तब तक ना मरंगे, जब तक बे परमेसर कै राज कन्नै के ताँई सकति के संग आतो भओ ना देख लैं।”
ईसु को रूप बदल जानो
(मत्ती 17:1–13; लूका 9:28–36)
2 #
2 पतर 1:17,18 छै दिन के बाद ईसु नै पतरस, याकूब और यहून्ना संग लए, और किसी ऊँचे पहाड़ के एकान्त मै ले गओ, और उनके सामने उसको रूप बदल गओ। 3और उसके लत्ता ऐंसे चमकीले और सपेद चिट्ठा हो गए कै दुनिया को कोई बी धोबी उनकै इतने चमकीले और सपेद चिट्ठा ना कर सकै है। 4तब उनकै मूसा और एलिया दिखाई दए, और बे ईसु के संग बातचीत कर रए हे। 5फिर पतरस नै ईसु सै कैई, “हे गुरू, हमरो हिंया रैहनो अच्छो है; इसके ताँई हम तीन तम्बू खड़े करैं, एक तेरे ताँई, एक मूसा के ताँई और एक एलिया के ताँई।” 6पतरस की समज मै ना आ रओ हो कै, बौ का कैऐ कैसेकै बे भौत डर गए हे।
7 #
मत्ती 3:17; मरकु 1:11; लूका 3:22 तबई एक बादर आओ और उनके ऊपर छाँ गओ, और उस बादर मै सै जौ अबाज सुनाई दई, “जौ मेरो पियारो लौंड़ा है इसकी सुनौ।” 8इसके तुरन्त बाद जब चेलौ नै अपने चारौ ओर नजर दौड़ाई, तौ उनकै ईसु के सिबा और कोई ना दिखाई पड़ो।
9ईसु नै पहाड़ सै उतरते टैम उनकै आदेस दओ कै, “जब तक आदमी को लौंड़ा, मरे भए मै सै जी ना उठै, तब तक जो तुमनै देखो है, उसके बारे मै किसी कै ना बतइओ।”
10उनौनै ईसु की जौ बात मान लई, पर बे आपस मै सोच-बिचार करकै कैललगे कै, “मरे भए मै सै जी उठनै” को अरथ का हो सकै है? 11#मत्ती 11:14फिर उनौनै ईसु सै पूँछी, “सास्तरी काए कैबै हैं कै एलिया को पैले आनो जरूरी है?”
12ईसु नै उनकै जबाब दओ कै, “एलिया सचमुच पैले आकै सब कुछ सुदारैगो, पर आदमी के लौंड़ा, के बारे मै पैले सै पबित्तर सास्तरौं मै जौ काए लिखो है कै बौ भौत दुख उठागो, और नकारो जागो? 13पर मैं तुमसै कैरओ हौं कै एलिया आ चुको है, और जैसो बाके बारे मै लिखो है, उनौनै जो कुछ चाँहो बाके संग करो।”
दुसट आत्मा सै परेसान लौंड़ा कै ठीक कन्नो
(मत्ती 17:14–21; लूका 9:37–43)
14और जब बे दूसरे चेलौ के धौंरे आए, तौ देखौ कै उनके चारौ लंग एक बड़ी भीड़ लगी पड़ी है और सास्तरी उनके संग बैहैस कर रए हैं। 15ईसु कै देखतेई लोग अचम्बे मै पड़ गए और दौड़ते भए उसकै परनाम कन्नै आए। 16ईसु नै उनसै पूँछी, “तुम लोग इनके संग का बैहैस कर रए हौ?” 17भीड़ मै सै एक नै बाकै जबाब दओ कै, “गुरू, मैं अपने लौंड़ा कै, तेरे धौंरे लाओ हो। जिसमै गूँगी दुसट आत्मा समाई भई है। 18जहाँ कहीं बौ दुसट आत्मा उसके ऊपर आवै है बहीं पटक देवै है और लौंड़ा मौह सै झाग लिकारल लगै है और दाँत कटकटाते भए ऐंठ जावै है और मैंनै तेरे चेलौ सै कैई कै बे उसकै लिकार दैं, पर बे लिकार ना सके।”
19ईसु नै उनकै जबाब देकै कैई कै, “हे अबिसवासी लोगौ, मैं कब तक तुमरे संग रैहंगो? और कब तक तुमरी सैहंगो? बा लौंड़ा कै मेरे धौंरे लिआऔ।” 20तब बे बा लौंड़ा कै ईसु के धौंरे ले आए और जब दुसट आत्मा नै ईसु देखो, तौ उस दुसट आत्मा नै बौ लौंड़ा तुरन्त मरोड़ो, और बौ लौंड़ा जमीन मै गिर पड़ो, और मौह सै झाग लिकारते भए लोटल लगो। 21ईसु नै उसके अब्बा सै पूँछी, “इसकै ऐंसो कितने दिनौ सै है?”
उसके अब्बा नै जबाब दओ, “बचपन सैई।”
22“दुसट आत्मा इसकै मार डान्नै के ताँई कबी आग मै गिरा देवै है तौ कबी पानी मै। का तू कुछ कर सकै है? तौ हमरे ऊपर तरस खाकै हमरी सायता कर।”
23ईसु नै उस्सै कैई, “अगर तू कर सकै है? जौ का बात है? बिसवास कन्नै बारौ के ताँई सब कुछ हो सकै है।” 24लौंड़ा के अब्बा नै तुरन्त गिड़गिड़ाकै कैई, “हे परभु, मैं बिसवास कर रओ हौं, मेरे अबिसवास कै हटा।”
25ईसु नै देखो कै भीड़ बढ़ती जा रई है, तौ उसनै दुसट आत्मा जौ कैह कै डाँटी कै, “ऐ गूँगी और बैहरी आत्मा, मैं तेकै हुकम देरओ हौं कै इसमै सै लिकर जा, और फिर इसमै कबी ना घुसिए।”
26तब बौ चिल्लाकै और उसकै जोर सै मरोड़कै लिकर गई, और लौंड़ा मरो भओ सो हो गओ, हिंया तक कै भौत से लोग कैललगे, कै बौ मर गओ 27फिर ईसु नै लौंड़ा कै हात पकड़कै उठाओ, और बौ खड़ो हो गओ। 28जब ईसु घर मै आओ, तौ उसके चेलौ नै एकान्त मै उस्सै पूँछी, हम उसकै काए ना लिकार सके? 29ईसु नै उनसै कैई, “ऐंसी दुसट आत्मा पिराथना के सिबाए और किसी तरीका सै ना लिकारी जा सकै हैं।”
अपनी मौत के बारे मै ईसु को कैनो
(मत्ती 17:22,23; लूका 9:43–45)
30फिर उनौनै बौ जघै छोड़ दई, और जब बे गलील मुलक होते भए जा रए हे तौ ईसु ना चाँहै हो कै किसी कै जाको पतो चलै, 31कैसेकै बौ सिरप अपने खास चेलौ कै सिका रओ हो। ईसु नै उनसै कैई, “आदमी को लौंड़ा, आदमिऔ के हवाले धोके सै पकड़बाओ जागो और बे उसकै मार डारंगे। मारे जानै के तीन दिन बाद बौ जी उठैगो।” 32पर बे इस बात कै समज ना सके और ईसु सै पूँछनै सै डरै हे।
सबसै बड़ो कौन है
(मत्ती 18:1–5; लूका 9:46–48)
33फिर बे कफरनहूम सैहर आए। ईसु जब एक घर मै हो, बानै अपने चेलौ सै पूँछी, “रस्ता मै तुम किस बात मै सोच-बिचार कर रए हे?” 34#लूका 22:24पर बे चुप रैहए, कैसेकै बे रस्ता मै चलते भए जौ बिचार कर रए हे कै हम्मै सबसै बड़ो कौन है? 35#मत्ती 20:26,27; 23:11; मरकु 10:43,44; लूका 22:26तब उसनै बैठकै बारौंह चेलौ कै बुलाकै उनसै कैई कै, “अगर कोई बड़ो होनो चाँहै, तौ सबसै छोटो होकै सबकी सेवा कन्नी होगी।” 36और उसनै एक बालक कै लेकै चेलौ के बीच मै खड़ो करो और उसकै गोदी मै लेकै उनसै कैई, 37#मत्ती 10:40; लूका 10:16; यहून 13:20“मेरे नाम मै जो कोई किसी बी एक बालक कै अपनाबै है, बौ मैंकै अपना रओ है, और जो कोई मैंकै अपनाबै है, बौ ना सिरप मैंकै अपना रओ है, पर मेरे अब्बा कै बी अपना रओ है, जिसनै मै भेजो हौं।”
(लूका 9:49,50)
38तब यहून्ना नै उस्सै कैई, हे गुरू, हमनै एक आदमी कै तेरे नाम सै दुसट आत्मा कै लिकारते भए देखो और हम उसकै मनैह करल लगे, कैसेकै बौ हमरे संग को ना हो।
39ईसु नै कैई, “उसकै मत रोकौ, ऐंसो कोई बी ना है, जो मेरो नाम लेकै चमत्कार दिखाकै और तुरन्त बाद मै मेरी बुराई करै। 40#मत्ती 12:30; लूका 11:23कैसेकै जो हमरे बिरोद मै ना है, बौ हमरी ओर है। 41#मत्ती 10:42मैं तुमसै सच कैरओ हौं कै जो तुमकै एक गिलास पानी मेरे नाम सै इसताँई पिबाय कै तुम मसी के चेला हौ, तौ बौ अपनो ईनाम किसी रीती सै ना खोगो।
ठोकर की बजै बननै बारौ कै चितौनी
(मत्ती 18:6–9; लूका 17:1,2)
42 “पर इन छोटौ मै सै जो मेरे ऊपर बिसवास करै हैं, अगर उनकै कोई पाप के रस्ता मै ले जावै है, तौ उसके ताँई परमेसर की सजा सै जौ अच्छो होतो कै एक बड़ी चक्की को पटा उसकी गरदन मै लटकाओ जाय और बौ समन्दर मै फैंक दओ जाय। 43#मत्ती 5:30टुंटा होकै परमेसर के संग हमेसा की जिन्दगी मै परबेस कन्नो, तेरे ताँई इस्सै भलो है कै दो हात रैहते भए नरक के बीच उस आग मै डारो जाय जो कबी बुतनै की ना है। इसताँई अगर तेरो हात तेरे ताँई पाप की बजै बनै है तौ उसकै काट डार। 44#9:44 कुछ यूनानी लेखौं मै आयत 44 इसहाँई जोड़ी गई है: जहाँ उनको कीड़ा ना मरै है और आग बी ना बुतै है। 45लंगड़ो होकै सुरग मै परबेस कन्नो तुमरे ताँई दो पाँऐ रैहते भए नरक मै डारनै सै अच्छो है। इसताँई अगर तेरो पाँऐ तेकै पाप के रस्ता मै ले जाय तौ उसकै काट दे। 46#9:46 कुछ यूनानी लेखौं मै आयत 46 इसहाँई जोड़ो गओ है: जहाँ उनको कीड़ा ना मरै है और आग बी ना बुतै है। 47#मत्ती 5:29कांड़ो होकै परमेसर के राज मै परबेस कन्नो तुमरे ताँई दो आँख रैहते भए नरक मै डारनै सै अच्छो है। इसताँई अगर तेरी आँख तेसै पाप करबाय तौ उसकै लिकार दे। 48जहाँ के कीड़ा कबी ना मरै है और जहाँ की आग कबी ना बुतै है। 49कैसेकै हर आदमी कै आग सै नमकीन करो जागो। 50#मत्ती 5:13; लूका 14:34,35नौन अच्छो है, पर अगर बाको सबाद बिगड़ जाय, तौ तुम उसकै किस्सै नमकीन बनाऔगे? अपने आपकै नमकीन बनाए रक्खौ और आपस मै मेल-जोल रक्खौ।”
Currently Selected:
मरकुस 9: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
