Matoosa 22
22
Kahaassinoo aamokkokki masuussa
(Luk'. 14:15-24)
1Yesuusa ade masuussayi ibaaddon segaano haggaɂabe, 2Wononnati kadaruure erekkeessatti haassinoon aamo kaɂekkaasatero wono aani laara, 3Wonona haassinoon kakkoonsegaatero ibaaddo kekkeesiin ohandaareen handdaa farate, ibaaddo goɂameen lakkoɂemeeyinnanno ame.
4«Adena okkalee ohandaaran faregure oɂuumameraanne goortta aaraarinna kak'aabaan ‹Giddikkee enɂaayegure ekkaasayera kameen dubba mankkoɂekkaatero maraan haassinoon koyeen, amara ama segaa.›
5«Oɂuumameeran goɂameen uumit diidengureen; koo ira tos, kakkalee dookki daddalayin seete, 6Oheseeran adeen ohandaaran abeenguren abboosiseen lagadeen. 7Wonona amaraategure wotaadara faregure hanɂu olagadeeraan lagadssise; katamaattisoonna eleenii gube.
8«Esekkona ohandaareenne haa ame, ‹Kahaassinoo aamo ekkaatera, ayesuun goɂameen oɂuumameeranna aamoon odootisaraan leen mankkomutanawaateran maraan; 9Kakkosesseetaran raadii biyaagudden kaheltteen ibaaddo dubba kajila aamo tos uuma› ame. 10Ohandaaranna raadii beengureen kaheleen ibaaddo kaɂidanna kameellan dubba kukkuyisenguren kahaassinoo min martti ammageen.
11«Wonona taɂuumanttetto martti din min orddi gotabro ibaaddoti koo kahaassinoo sarssi hasarssannoni kagiro dee. 12Haanna ame; ‹Ani kageelaataro!› kahaassinoo sarssi hasarissannooni misii hittarraa tabin daanddeete? Ibaaddotina goɂameen taɂamiɂabbaabro waate.
13«Wonona ohandaaranne; ‹Genena luk'k'ana shiyaagudden sarre kagiro t'illinggakki mugud tos beesaddeen usu shafa, eseenna ottanna ilkko fooc'ano linnara› ame.#Mat. 8:12; 25:30; Luk'. 13:28.
14Esekko Yesuusa, «Oɂuumameeranna omoogganiyyaan, oɂassaabameeraan goɂameen huc'c'arriyyaan» ame.
Giira muranokokki gara
(Mar. 12:13-17; Luk'. 20:20-26)
15Esekko Farasaawiil been seetaa giraan misimisii Yesuusa ayeeskkessayi t'oyi taɂami abinaraan makkareen. 16Isokko oɂagaalssatareenna taherodoosa unane wota Yesuusa tos fareengureen, «Kaɂagaalssisatto!» «Ati karrummii laanona raa kawaa rummii kaɂagaalssisatto laano, ibaaddo abssataa kaɂululisoon dubbana il tooyi kadiyaatto laano noo kanssowa. 17Karoomi wonolaalkokki wonowuun giira murano dootisara muu lakkodootisaroya alla noon segii? Ameen hoosaten.»
18Yesuusana miiggettisoo addeesere, «Isin ifissaaddolee mewuun ayeesii in c'aafin dootaattan? 19Giira tamurattaan maragade alla iin tusa?» isona t'agaraa too keneen. 20Usuna, «Hitta maragadeeyi gutii tamutatta middi taayyotta? S'uufinna ade taayyotta?» ame.
21Isona abbaabeen «Karoomi wonoyya» ameen. Usuna abbaabere «Karoomi wonokokki karoomi wonoon, kawaanna Waawuun sisa» ame.
22Isona hikka maalengureen ayeeskkeessaa saadaa iiseen seeteen.
Goyikko kiyaanokokki gara tahoosanttetto hoosiin
(Mar. 12:18-27; Luk'. 20:27-40)
23Ese arrii goyikko kiyaano laagiro ame kaɂammanara kasodok'awil ibaaddo Yesuusa tos emeetengure haa ame hoosate;#Ofa. Fe. 23:8. 24«Kaɂagaalssisatto!» Muse; «Ibaaddoti koo ooritteessakko yiis haɂumuloon goggoye, kagooyero abbikkeessakkotti oori abbikkeessa atayigure usuun sannii hakkaye amera.#Ada. 25:5. 25Abbilaal todoba no dollee gitta, kahoree oori atategure yiis haɂumuloon kakkogowaare goorata abbikkessana oori yelate; 26Hikkamalee ade kaseedikko taa todoba geeroo hikkamalee goyeen. 27Dubbaankko haarre heleelttitina goote. 28Haanssun ese dubbaan mankkokeesantetto maraan goyikko takkiyaano arri iso abbilaal todoba orrokko ekiin oori linnatta?»
29Yesuusana isoon abbaabere, «Isin k'ulluukki mas'aafajjolnna hunna kawaa mankkoɂaddeesanawattettan maraan shir amattaan. 30Ogoyeraan goyikko kii goɂabbaabateen daruurii kagiro erggichchaal aani linnaraan kuwaarre lakkoɂatayinaraan; lakkonakeesaminaran. 31Ogoyeraan goyikko kiyaanokkokki gara Waa isinuun kaɂayeesero lakkonabbabtteettanya? 32‹Ani kaɂabraame Hedo, kayissaak'a Hedo, kayayik'ooba Hedoya,› Haanssun Waa arddokki Hedoya kuwaarre lakkokagoyi Hedoyyo.»#Biy. 3:6.
33Gosana hikka kakkomaalare goorata agaalssiskkeessaa saadeen.
Dubbaankko karooraro ajaja
(Mar. 12:28-34; Luk'. 10:25-28)
34Yesuusa Sodok'aawil abbaab tiri c'alɂisano kakkomaalareen goorata Farasaawiil raattoo kukkuɂameen. 35Isokko koo seera kamuse kaɂagaalssisare Yesuusa c'aafin dootegure haa ame:#Luk'. 10:25-28.
36«Kaɂagaalssisatto! Seeral kamuse dubbakko karoorara eeki ajajaya?» 37Yesuusana isoon abbaabere, « ‹Goottaa Hedokkaa migitti wodanaayi, migitti neefooyi, migitti k'ofaayi geelaa›.#Ada. 6:5. 38Hikki ajaja kahoraarjjeenna dubbaankko karooraro ajajaya. 39Kallami ajajana hikka aani laara; hikkina ‹Ollaattaa isiɂoottaa aani geelaa› kaɂamaroya.#Woy. 19:18. 40Seera kamusena kahegeroolkokki agaalssis dubba hikka ajaja lamaa gutii dhaabbateen giraan ame.»
Kiristoosa sannii taayyoya?
(Mar. 12:35-37; Luk'. 20:41-44)
41Farasaawiil kukkuɂameengureen Yesuusa haa ame iso hoosate, 42«Gara kakiristoosa me aani laara? Sannii taayyoya?» ame iso hoosate.
«Isona sannii tadaawuteyya» ameen.
43Yesuusana, «Hayya daawute Ayyaana K'ulluukkinna hunnaayi muun usu, ‹Goottaa!› amara? Ame.
44« ‹Gootta Goottakkeewun!
Diinakkaa lukittaa hegelii taadaddaramiroo;
«Merggetteeyi hamas's'ii amera.» ›#Mez. 110:1.
45Haannuun Daawute, ‹Goottaa!› Ami goɂuumiro hayya Kiristoosa misii sanniitteessa liin daanddaara?» 46Haafura koonna abbaabin kadanddeera goorttun ese arrikko haggaɂabere hoosayin kajabaate maayyona laagiro.
Currently Selected:
Matoosa 22: BayNT
Highlight
Share
Copy
Want to have your highlights saved across all your devices? Sign up or sign in
The Word for the World Northern Africa
